Ol Jenis we I Help blong Balensem Tijing long Hom mo long Jos

Olsem pat blong ol wok we i stap gohed blong helpem ol Lata-dei Sent blong oli “lanem doktrin, mekem fet i kam strong moa, mo helpem ol memba blong wosip moa,” Presiden Russell M. Nelson i bin anaonsem ol jenis ia blong help blong balensem mo joen spesel wei ia we i nid, blong ol memba oli wosip mo lanem mo laef folem gospel blong Sevya, tugeta, long jos mo long hom.

Ol lida blong Jos oli anaonsem ol jenis ia long taemtebol blong Sandei Miting, stat long Jenuware 2019, semtaem wetem niufala hom senta, jos sponsa kurikulom. Olgeta jenis ia, mo sam moa bifo long hemia we Jos i bin putumaot long ol las yia i kam, oli blong helpem ol memba blong mekem laef blong olgeta i lukluk moa fulwan long Papa long Heven mo Jisas Kraes, mo gat moa dip fet long Tufala. Olgeta wok ia, i pusum wan wok blong lukluk moa long wan stadi blong gospel long hom we i gat moa mining, blong stap ona long Lod taem yumi kipim Sabat dei i tabu, mo taem yumi stap kea long wanwan long yumi olsem we Sevya bae i mekem, mo olsem we Spirit i talem.

Ol jenis ia oli blong mekem ol pipol blong Lod oli rere blong hem i kambak; ol jenis ia, oli blong mekem wanwan i jenisim laef blong hem moa dip i go long Sevya, olsem we Elda Quentin L. Cook blong Kworom blong Olgeta Twelef Aposol i bin eksplenem long aotlaen blong hem blong ol jenis long Satedei moning sesen blong Jeneral Konfrens.

“Mifala i save hamas i save tajem spirit blong man mo jenis long laef we i tru mo i stap, we i save hapen insaed long hom” hem i talem. “Stamba tingting blong mifala i blong balensem eksperiens long Jos mo long hom long wan wei we bae i mekem fet i kam antap, spirit i kam antap, mo i gat moa bigfala jenis long laef i go long Papa long Heven mo Lod Jisas Kraes.”

Ol Jenis long Hom

Ol Lida blong Jos oli stap invaetem yumi blong lukluk moa blong tekpat moa long fasin blong lukluk long bilif blong yumi long hom, yumiwan mo olsem famli, mo hemia i tekem tu gospel stadi long hom long Sandei, mo truaot long wik mo ol jenis long haos naet.

Hom i olsem wan klasrum mo wan lab (ples blong testem samting); hem i wan stamba senta blong stap lanem mo stap laef folem gospel. Gospel stadi blong yumi wanwan, mo famli, long hom long Sandei mo truaot long wik, i givim samfala janis blong faenem paoa long saed blong spirit, evri dei, mo i letem se i gat moa taem blong stadi yuwan mo kasem revelesen. Blong dipen nomo long wan smol taem long jos blong kasem tijing blong gospel, i mekem se i no gat balens, mekem se i no gat bigfala jenis we i stap, we wan i nid blong gat.

“Wanwan long yumi i responsibol blong wanwan i gro long saed blong spirit,” Presiden Nelson i talem. “Mo ol skripja oli talemaot klia se ol papa mo mama, oli gat fas responsabiliti blong tijim doktrin long ol pikinini blong olgeta.”

Ol jenis oli tekem wan niu stadi tul blong wanwan man, woman mo famli i stadi long gospel. Wanwan man, woman mo famli i save yusum niufala, Kam Folem Mi—Blong Wanwan Man, Woman mo Famli, sapos oli wantem, blong gaedem gospel stadi eksperiens blong olgeta aotsaed long Jos. Niu risos ia i wok wetem ol risos blong Sandei Skul mo Ol Praemeri tija oli stretem ol lesen blong Sandei wetem hom stadi blong ol skripja mo ol tingting we oli stap blong haos naet.

Antap long fasin blong leftemap tingting blong stadi long gospel, ol lida blong Jos oli stap invaetem yumi bakegen, blong yumi evriwan i tekpat long Sabat dei—mo truaot long wik—blong gat famli kaonsel, haos naet, famli histri mo tempol wok, wok blong givhan, wosip blong yuwan mo famli taem we i gat glad long hem.

Ol tul we oli sendem i go long ol memba mo ol lida oli eksplenem se ol lida blong Jos oli mas leftemap tingting blong ol memba blong holem wan haos naet mo gospel stadi long Sabat—o long wan nara taem olsem we wanwan man, woman mo famli i jusum. Bae oli save holem wan famli aktiviti naet long Mandei, o long sam nara taem. From hemia, ol lida oli gohed blong kipim Mandei i fri, we i no mas gat ol miting mo aktiviti long Jos. Be, taem we oli stap spendem long hom stadi long gospel mo ol aktiviti blong wanwan man, woman mo famli, hemia, bae oli save putum folem situesen blong wanwan long olgeta.

Blong stap wosipim God long jos, blong tekpat long ol tabu odinens long jos, mo blong kam tugeta blong stap tijim wanwan long olgeta mo mekem wanwan i kam strong moa mo givim seves long wanwan, oli ol impoten pat blong mekem fet i kam moa dip mo jenis i moa dip. Blong katemsot taem we man i spendem long jos bae i no mekem wan gud samting sapos wanwan man, woman mo famli i no gat tingting blong mekem hom blong olgeta i kam strong moa.

Presiden Nelson i tijim: “Olsem ol Lata-dei Sent, yumi kam blong stap tingting se ‘jos’ i wan samting we i hapen insaed long mitinghaos blong yumi, wetem sapot blong wanem i stap hapen insaed long hom. Yumi nidim blong stretem kaen fasin ia. Hem i taem blong i gat wan Jos we senta blong hem i stap long hom, mo sapot i kam long wanem i tekem ples insaed long ol branj, wod, mo stek bilding blong yumi.”

Ol Jenis long jos

Ol jenis long eksperiens blong Jos oli stap blong sapotem moa fasin blong lanem mo laef folem gospel long hom. Ol jenis ia, i gat blong stretem taemtebol blong Sandei blong i gat insaed:

60 minit Sakramen Miting,
10 minit blong muv i go long klas,
50 minit klas, olsem i stap long aotlaen blong eksampol blong taemtebol andanit ia:

Sandei Taemtebol Stat long Jenuware 2019
60 minit	Sakramen miting
10 minit	Muv i go long ol klas
50 minit	Klas blong ol adalt; klas blong ol yut; Praemeri

50 minit klas taem, insaed i gat Praemeri evri wik blong ol pikinini, mo evri tu wik, bae i gat jenis blong klas blong ol yut mo adalt i go olsem:

Fas mo Nambatri Sandei: Sandei Skul.
Nambatu mo Nambafo Sandei: Ol kworom blong Prishud, Rilif Sosaeti, mo Yang Woman.
Nambafaef Sandei: ol yut mo adalt miting bambae oli stap long daereksen blong bisop.

Sapos wan Praemeri i bigwan inaf blong seperetem ol smolwan (junia) long ol bigwan (senia), taemtebol we i stap andanit ia, yufala i save tanem blong haf blong ol pikinini, mo stretem ol taem olsem we i nid.

Praemeri Taemtebol Stat long Jenuware 2019
25 minit	Prea, skripja o toktok blong bilif, toktok (5 minit). Singsing taem: miusik we i sapotem ol skripja we oli stap stadi long klas (20 minit)
5 minit	Muv i go long ol klas
20 minit	Ol klas: ol lesen we oli kamaot long Kam Folem Mi—Blong Praemeri

Kurikulom Jenis

Jenis ia long taemtebol blong ol miting i wok stret wetem niufala buk blong kurikulom blong Jos Kam Folem Mi. Stat long Jenuware, hom senta, Jos sapot kurikulom ia bae i joenem wanem ol adalt, ol yut, mo ol pikinini oli stap lanem long Sandei Skul mo Praemeri klas, i mekem i moa isi blong ol famli oli stadi tugeta long hom long taem blong wik.

Ol instraksen, ol aotlaen blong ol lesen, mo ol risos, oli save faenem long:

Kam Folem Mi—Blong Kworom blong Ol Elda mo Rilif Sosaeti (we yu save faenem long Ensign mo Liahona blong Novemba 2018)
Kam Folem Mi—Blong Ol Kworom blong Aronik Prishud
Kam Folem Mi—Blong Ol Yang Woman
Kam Folem Mi—Blong Sandei Skul
Kam Folem Mi—Blong Praemeri

Visitim comefollowme.lds.org blong gat moa infomesen.

Ol nara ki jenis, i gat olgeta ia:

Kaonsel miting blong ol tija, oli holem wan taem long kwota, be i no evri manis.
Ol taemtebol blong ol lesen blong kworom blong ol elda mo Rilif Sosaeti bambae oli nomo gat wan kaonsel miting long fas Sandei blong manis, o wan spesel topik blong nambafo Sandei. Ol lesen bae oli lukluk nomo long ol mesej blong las jeneral konfrens.
Singsing taem bae i tekem ples blong sering taem. Aotlaen blong Sering Taem bambae i nomo gat.
Bae i nomo gat klas blong Ol Gospel Prinsipol, o Ol Stamba blong Gospel. Evri memba mo fren we i intres, bae oli invaetem olgeta blong go long wanwan adalt mo yut Sandei Skul klas.
Ol nara klas— olsem hemia blong mekem mared mo famli i kam strong moa, ol klas blong rere blong go long tempol, misinari priperesen klas, mo famli histri— bambae oli no holem olgeta long Sandei. Olgeta klas ia, oli save tijim long sam nara taem long wanwan man, woman mo famli, o ol grup folem ol lokol nid mo desisen blong bisop.

Ol Stamba Tingting blong Ol Jenis Ia

Ol lida blong Jos oli wantem blong krietem wan niu balens mo moa koneksen bitwin ol spesel paoa blong eksperiens long hom mo long Jos, wetem sam spesifik tingting i stap long maen.

“Be i gat plante moa samting biaen long jenis ia bitim blong jes mekem Sandei mitinghaos taemtebol i kam sot. …” Elda Cook i talem. “Insaed long ol stamba tingting mo blesing we oli joen wetem jenis ia mo ol nara las jenis, i gat:

“Wan jenis long laef we i tru mo i stap, i go long Papa long Heven mo Lod Jisas Kraes, mo wan fet long Tufala we i kam strong moa.
“Wok blong mekem wanwan man, woman mo famli oli kam strong moa tru long wan hom senta mo Jos sapot kurikulom we i helpem wan gospel laef we i gat glad long hem.
“Stap ona long Sabat dei, mo wan lukluk we i go nomo long odinens blong sakramen.
“Stap helpem evriwan long ol pikinini blong Papa long Heven long tugeta saed blong vel tru long misinari wok, mo fasin blong kasem ol odinens mo ol kavenan mo ol blesing blong tempol.”

Blong ridim gud anaonsmen blong ol jenis ia, luk long Russell M. Nelson, “Ol Fas Toktok,” long pej 6 blong magasin ia; Quentin L. Cook, “Wan Jenis long Laef we I Dip mo I Stap I Go long Papa long Heven mo long Jisas Kraes,” long pej 8. Blong gat moa infomesen abaot ol jenis ia, visitim sabbath.lds.org blong faenem wan leta we i kam long Fas Presidensi; i stap ansarem ol kwestin we oli askem oltaem, mo sam moa risos we i save helpem wanwan man, woman mo famli blong ona long Sabat.