Ol Sista Oli Tekpat long Kam Tugeta blong Isrel
I Kam long Presiden Russell M. Nelson
Olsem profet, mi plis long yufala, ol woman blong Jos, blong mekem wan gud fiuja taem yufala i help blong karem tugeta Isrel ia we i serseraot.
Hem i gud tumas blong stap wetem yufala, ol dia sista blong mi. Maet wan eksperiens we i jes pas i givim yufala wan smol lukluk long hao mi filim abaot yufala mo ol bigfala paoa we God i kavremap yufala wetem.
Wan dei, taem mi stap toktok long wan kongregesen long Saot Amerika, mi kam blong glad tumas long topik blong mi, mo mi harem gud tumas, mi talem: “Olsem mama blong 10 pikinini, mi save talem long yufala se …” afta mi gohed wetem mesej blong mi.
Mi no haremsave se mi talem toktok ia, mama. Transleta blong mi, we i ting se mi mestem toktok, i jenisim toktok ia, mama i go long papa, mekem se kongregesen i neva save se mi mi tokbaot miwan olsem wan mama. Be waef blong mi, Wendy, i harem, mo hem i glad long toktok ia we mi talem.
Long taem ia, bigfala tingting long hat blong mi blong mekem wan samting i defren long wol ia—olsem we wan mama nomo i save mekem—i kamkamaot long hat blong mi. Tru long ol yia, taem oli askem mi from wanem mi jusum blong kam wan dokta, oltaem, ansa i semmak: “from mi no save jusum blong kam wan mama.”
Plis not se enitaem we mi yusum toktok ia, mama, mi no stap tokbaot ol woman we oli karem pikinini, o oli adoptem pikinini long laef ia. Mi stap tokbaot evri adalt gel blong Papa long Heven. Evri woman i wan mama, tru long paoa blong God, mo huia hem we i no save finis.
So tedei long naet, olsem papa blong 10 pikinini—naen gel mo wan boe—mo olsem Presiden blong Jos, mi prea se bambae yufala i filim hamas mi mi filim abaot yufala—abaot huia yufala mo evri gud samting we yufala i stap mekem. I no gat wan i save mekem wanem wan stret mo gud woman i save mekem. I no gat wan i save kopi, paoa blong lidim tingting blong wan mama.
Ol man oli save, mo plante taem oli pasem o talem lav we Papa long Heven mo Sevya i gat long ol narawan. Be ol woman oli gat wan spesel presen from hemia—wan samting we God i kavremap olgeta wetem. Yufala i gat paoa blong filimsave wanem wan i nidim—mo wetaem oli nidim. Yu save go luk, kamfotem, tijim mo mekem wan i kam strong moa long stret taem we hem i gat nid.
Ol woman oli luk samting long defren wei we man i lukluk long hem, mo !o, mifala i nidim wei blong lukluk blong yufala! Fasin blong yufala i lidim yufala blong tingbaot ol narawan fastaem, blong tingting long risal blong eni kaen aksen mo wanem bae i mekem long ol narawan.
Hem i gudfala Mama blong yumi, Iv—wetem visen blong hem we i lukluk longwe long plan blong Papa long Heven—we i mekem wanem yumi singaotem “Foldaon.” Waes joes we hem i mekem wetem paoa long tingting, mo sapot blong Adam i muvum plan blong stap glad i go fored. Tufala i mekem se i posibol blong wanwan long yumi i kam long wol, blong kasem wan bodi, mo pruvum se bae yumi jusum blong stanap from Jisas Kraes, naoia, semmak olsem yumi bin mekem long laef bifo.
Ol dia sista blong mi. Yufala i gat ol spesel presen mo filing. Tunaet, mi askem strong long yufala, wetem evri hop insaed long hat blong mi, blong yufala i prea blong andastanem ol presen blong yufala we i kam long Spirit,—blong lanem moa abaot olgeta, blong yusum, mekem i go moa, mo kasem moa. Bae yufala i jenisim wol taem yufala i mekem hemia.
Olsem ol woman, yu givim insperesen long ol narawan, mo putum wan standet i stap we i inaf blong man i mekem semmak. Bae mi givim smol bakgraon long tufala bigfala anaonsmen we oli mekem long las jeneral konfrens. Yufala, ol sista, i bin ki blong wanwan anaonsmen ia.
Faswan, wok blong givhan. Hae standet o eksampol blong wok blong givhan, i Sevya, Jisas Kraes. Plante taem, ol woman, oli bin, mo oli stap kolosap moa long standet ia bitim ol man. Taem yu stap givhan tru, yu stap folem ol filing blong helpem wan blong i eksperiensem moa lav blong Sevya. Fasin blong stap go givhan, i wan fasin we ol stret mo gud woman oli gat wetem olgeta nomo. Mi save ol woman we oli prea evri dei: “?Huia yu wantem mi blong helpem hem tedei?”
Bifo anaonsmen long Epril 2018, abaot ol moa hae mo tabu wei blong stap kea long ol narawan, sam man oli gat fasin ia blong tikim wok blong hom tijing, se oli mekem, mo oli muv i go long nara wok.
Be taem yu filim se wan sista we yu bin stap visitim tij i nidim yu, kwiktaem yu go help, mo gohed tru long manis. Long wei ia nao, i hao visit tijing blong yufala i givim insperesen mo seftem wok ia i go antap long wok blong givhan.
Nambatu, long las jeneral konfrens, yumi stretem bakegen ol kworom blong Melkesedek Prishud. Taem mifala i stap toktok long wei blong helpem ol man blong Jos blong wok gud moa long responsabiliti blong olgeta, mifala i skelem gud eksampol blong Rilif Sosaeti.
Long Rilif Sosaeti, ol woman, we oli gat ol defren yia mo defren situesen long laef, oli mit tugeta. Wanwan defren taem long laef i gat ol defren jalenj, be yet, yufala i stap ia, wik afta wik, i joen tugeta, mo stap tijim gospel tugeta, mo mekem wan ril samting i defren long wol.
Naoia, folem eksampol blong yufala, olgeta we oli kasem Melkesedek Prishud, oli memba blong kworom blong ol elda. Olgeta man ia, oli gat 18 yia kasem 98 o moa, wetem ol defren ofis long prishud mo eksperiens blong Jos. Olgeta brata ia, naoia oli save krietem ol strong rilesensip, oli lan tugeta, mo oli blesem olgeta wanwan long wan wei we i wok gud moa.
Las manis Jun, Sista Nelson mo mi i toktok long ol yut blong Jos. Mifala i invaetem olgeta blong joen long yut ami blong Lod blong help karem Isrel i kam tugeta long tugeta saed. !Kam tugeta ia, i jalenj we i moa bigwan olgeta, i stamba wok we i gud moa olgeta, mo i wok we i nambawan long wol tedei!1
Hem i wan stamba wok we i nidim tumas ol woman, from se ol woman oli stap mekem fiuja. So tunaet, olsem profet, mi askem yufala, ol woman blong Jos, blong mekem wan gud fiuja taem yufala i help blong karem tugeta Isrel ia we i serseraot.
?Bae yu stat wea?
Mi givim fo invitesen:
Faswan, mi invaetem yufala, blong 10 dei, blong livim sosol media mo eni nara media we i stap tekem ol nogud mo doti tingting long maen blong yufala. Prea blong save wanem fos o samting blong karemaot long taem yufala i aot long ol samting ia. Risal blong 10 dei we yufala i no luk media, bae i wan sapraes long yufala. ?Wanem yu luk i hapen afta we yu spel smol long ol lukluk blong wol ia we oli bin stap givim kil long spirit blong yu? ?Yu luk se i gat wan jenis long weaples yu wantem spendem taem mo paoa blong yu naoia? ?I gat jenis long wanem i mas kam faswan—iven sapos i smol? Mi askem strong long yufala blong raetemdaon, mo mekem folem wanwan filing mo tingting we yufala i kasem.
Nambatu: Mi invaetem yufala blong ridim Buk blong Momon bitwin naoia mo en blong yia. Nating yufala i luk se i no posibol wetem evri samting yufala i lukaot long hem long laef, sapos yu akseptem invitesen ia wetem ful tingting insaed long hat, bae Lod i helpem yu blong faenem wan wei blong mekem i hapen. Mo, taem yu prea mo stadi, mi promesem yufala se ol heven bae oli open long yufala. Lod bambae i blesem yufala wetem insperesen mo revelesen.
Taem yufala i stap rid, bambae mi leftemap tingting blong yufala blong makem wanwan ves ia we i talem nem o i tokbaot Sevya. Afta, gat tru tingting blong tokbaot Kraes, glad long Kraes mo prij abaot Kraes wetem ol famli mo fren blong yufala.2 Yufala mo olgeta, bambae yufala i kam kolosap moa long Sevya tru long rod ia. Mo ol jenis, iven ol merikel, bae oli stat blong hapen.
Long moning ia, oli mekem anaonsmen abaot wan niufala taemtebol blong Sandei mo kurikulom we i lukluk long hom mo Jos i sapotem. Yufala, ol dia sista blong mi, yufala i ki blong sakses blong niufala balens gospel tijing wok ia. Plis, tijim olgeta we yu lavem olgeta long wanem yu stap lanem aot long ol skripja. Tijim olgeta olsem wanem blong tanem olgeta i go long Sevya, blong oli kam oraet mo kasem paoa blong klinim olgeta taem oli sin. Mo tijim olgeta olsem wanem blong yusum paoa blong Hem we i mekem man i kam strong moa evri dei long laef.
Nambatri. Stanemap wan fasin blong go long tempol. Hemia i askem moa sakrifaes long laef blong yu. Moa taem long tempol bae i letem Lod i tijim yu hao blong yusum prishud paoa blong Hem we God i kavremap yu wetem insaed long tempol blong Hem. Long olgeta we oli stap laef kolosap long wan tempol, mi invaetem yufala blong prea mo stadi abaot ol tempol long ol skripja, mo long ol toktok blong ol profet we oli stap laef. Lukaot blong save moa, blong andastanem moa, blong filim moa abaot ol tempol i bitim bifo.
Long wol yut divosen long las Jun, mi tokbaot wan yang man we laef blong hem i jenis taem papa mo mama blong hem i jenisim smatfon blong hem wetem wan flipfon. Mama blong yang man ia, i woman we i no fraet mo i gat fet. Hem i luk boe blong hem i glis i go long ol joes we i save blokem hem blong go long wan misin. Hem i tekem ol tingting blong hem i go long tempol, blong save wanem i bes blong helpem boe blong hem. Afta long hemia, hem i mekem folem wanwan filing mo tingting we hem i kasem.
Hem i se: “Mi filim Spirit i lidim mi blong jekem fon blong boe blong mi long sam stret taem blong kasem sam stret samting. Mi mi no save hao blong lukluk long smatfon, be Spirit i lidim mi tru long evri sosol media we mi no stap yusum. Mi save Spirit i helpem ol papa mo mama we oli stap lukaotem help blong protektem ol pikinini blong olgeta. Long fas taem, boe blong mi i kros tumas long mi. … Be afta tri dei nomo, !hem i talem tangkyu long mi! Hem i save filim wanem i defren.
Fasin mo aksen blong boe blong hem i jenis bigwan. Hem i help moa long hom, i smael moa, mo i lisin moa long jos. Hem i laekem blong givim seves long ples blong baptaes long tempol mo rere from misin blong hem.
Nambafo invitesen: long yufala we i gat stret yia, i blong yufala i tekpat fulwan long Rilif Sosaeti. Mi askem strong long yufala blong stadi long stamba toktok blong Rilif Sosaeti. Hem i givim insperesen. Hem i save lidim yufala blong developem stamba toktok blong yufalawan long laef blong yufala. Mi askem yufala tu blong testem ol trutok insaed long ofisol toktok blong Rilif Sosaeti we oli pablisim kolosap 20 yia i pas.3 Wan kopi blong hem oli putum long frem mo i hang long ol wol insaed long ofis blong Fas Presidensi. Mi filim gud evri taem mi ridim toktok ia. I tokbaot huia yufala, mo huia Lod i nidim yu blong stap long stret taem naoia taem yu stap mekem pat blong yu blong help blong pulum Isrel i kam tugeta.
Ol dia sista blong mi. !Mifala i nidim yufala! Mifala i “nidim paoa blong yu, jenis blong hat blong yu, strong tingting blong yu, mo paoa blong yu blong save lidim man, waes tingting blong yu mo voes blong yu.”4 Mifala i no save pulum Isrel i kam tugeta sapos yufala i no stap.
Mi lavem yufala mo talem tangkyu, mo blesem yufala naoia wetem paoa blong livim wol i stap biaen taem yufala i stap help long impoten mo hariap wok ia. Tugeta, yumi save mekem evri samting we Papa long Heven i nidim yumi blong mekem blong mekem wol ia i rere from Seken Kaming blong Pikinini blong Hem we Hem i Lavem Tumas.
Jisas Hem I Kraes. Hemia i Jos blong Hem. Long hemia, mi testifae long nem blong Jisas Kraes, amen.