Leftemap Hed blong Yu mo Stap Glad
I Kam long M. Joseph Brough
Seken Kaonsela long Yang Man Jeneral Presidensi
Taem yumi fesem ol had samting long wei blong Lod, bae yumi leftemap ol hed blong yumi mo stap glad.
Long 1981 papa blong mi, tu gudfala fren mo mi i bin go long wan trip long Alaska. Mifala i sapos blong lan long wan lek mo klaem sam naesfala ples long dakbus. So, blong katem daon hevi blong ol ting blong mifala, mifala i fulumap ol saplae long ol bokis, kavremap wetem plastik, makem wetem kala riben mo mo sakem olgeta tru long windo blong bus plen long ples we bae mifala i stap long hem.
Afta we mifala i kasem ples, mifala i lukaotem ol samting blong mifala gogo mifala i no save faenem wan long ol bokis ia nomo. Be afta mifala i faenem wan. Insaed long hem i gat wan smol gas stov, wan tapolen, sam swit kaekae mo sam hambega helpa— be i no gat hambega. Mifala i no gat wei blong kasem ol man mo taem blong pikimap mifala, hem i afta long wan wik.
Mi lanem tu impoten lesen long eksperiens ia: Wan, no sakem kaekae blong yu tru long windo. Tu, samtaem yumi mas fesem ol had samting.
Plante taem, fas samting yumi mekem taem yumi fesem had samting hem i: “?From wanem mi?” Blong askem, from wanem, i neva tekemaot long had samting. Lod wantem se yumi winim ol jalenj, mo Hem i bin soem se “olgeta samting ia bambae oli givim eksperiens long yumi, mo bae i blong gud blong yumi.1
Samtaem Lod i askem yu blong mekem wan had samting mo samtaem, ol jalenj blong yumi, fasin blong yumiwan, o blong narafala man blong yusum fridom blong joes, i krietem olgeta. Nifae i bin go tru long tugeta situesen. Taem Livae i invaetem ol boe blong hem blong gobak karem ol buk ia long Leban, hem i talem: “Mo nao, luk ol brata blong yu i komplen, oli talem se hem i wan had samting we mi bin talem long olgeta blong mekem; be luk mi no bin talem long olgeta blong mekem samting ia, be hem i wan komanmen blong Lod.”2 I bin hapen wantaem long Nifae we ol brata blong hem oli yusum fridom blong joes blong olgeta blong stopem blong hem: “Mo i bin hapen se oli bin putum ol han blong olgeta long mi from luk oli bin kros tumas, mo oli bin fasem mi wetem ol rop, from oli bin lukaotem blong tekemaot laef blong mi.”3
Josef Smit i bin fesem wan had samting long Libeti Kalabus. Taem help i no gat mo hop i lus, i krae aot: “O God, ?Wehem Yu?”4 I no wan sapraes sam long yumi i bin filim olsem we Josef i bin filim.
Evriwan i fesem had samting: ded blong wan we yu lavem tumas, divos, wan pikinini we i no aktiv long Jos, sik, ol tes blong fet, lusum wok, o eni nara hadtaem.
Mi bin jenis bigwan taem mi harem ol toktok blong Elda Neil A. Maxwell blong Kworom blong Twelef Aposol, long medel blong traehad blong hem wetem kansa. Hem i talem, “Mi bin stap tingting plante mo olgeta 13 toktok blong tijing mo leftemap tingting i kam long maen blong mi: ‘Mi bin givim yu kansa long yu blong bae yu tijim pipol blong mi long tru fasin abaot safaring.’” Hem i gohed blong serem olsem wanem eksperiens ia i bin blesem hem wetem “longfala lukluk abaot ol tru samting blong taem we i no save finis. … Ol smol lukluk ia blong taem we i no save finis i save helpem yumi blong wokabaot 100 yad we bae i had tumas.”5
Blong helpem yumi wokabaot mo glad long ol hadtaem wetem ol smol lukluk blong taem we i no save finis, bae mi givim tu samting. Yumi mas fesem ol had samting, faswan, blong fogivim ol narafala, mo nambatu, blong givim yumiwan long Papa we i stap long Heven.
Blong fogivim olgeta we oli mekem yu fesem ol hadtaem mo stretem “yufala long tingting blong God,”6 bae i save had. Harem nogud blong yu i save soa tumas taem wan famli memba, wan gudfala fren o yumiwan i mekem.
Olsem wan yang bisop, mi bin lanem fasin blong fogiv taem stek presiden, Bruce M. Cook i serem storian ia. Hem i eksplenem:
“Long yia 1970 sam fren mo mi i statem wan bisnis. Nomata mifala i no brekem loa, sam pua desisen plasem ol jalenj blong nogud ekonomi, i risal we mifala i no go tru.
“Sam long ol investa oli putum mifala long kot blong oli winim wanem we oli lusum. Loya blong olgeta i bin hapen se hem i wan kaonsela long bisoprik famli blong mi. Hem i had tumas blong sastenem man ia we i stap lukaot blong spolem mi. Mi stat blong no laekem hem mo luk hem olsem wan enemi. Afta long faef yia blong kot, mifala i lusum evri samting we mifala i gat, hemia wetem hom blong mifala.
“Long 2002, waef blong mi mo mi i lanem se stek presidensi we mi stap insaed long hem olsem wan kaonsela, bambae oli jenisim. Taem mifala i stap travel long wan sot holidei bifo oli rilisim mi, waef i askem mi long huia bae mi jusum olsem ol kaonsela sapos oli singaot mi olsem niufala stek presiden. Mi no wantem tokabaot hemia, be hem i gohed nomo. Nao wan nem i kam long maen blong mi. Hem i girap i talem nem blong loya ia we mifala i luk olsem stamba blong hadtaem blong mifala 20 yia i pas. Taem hem i stap toktok, Spirit i konfemem se hem nao bae narafala kaonsela ia. ?Bae mi save fogivim man ia?
“Taem Elda David E. Sorensen i singaot mi blong stap olsem stek presiden, hem i bin givim mi wan aoa blong jusum ol kaonsela. Wetem krae, mi talem se Lod i bin givim finis tru long revelesen. Taem mi talem nem blong man ia we mi luk hem olsem enemi blong mi, kros, konkon mo gud filing we mi stap holemtaet i lus. Long taem ia mi lanem abaot pis we i kam wetem fogivnes tru long Atonmen blong Kraes.”
Long nara toktok, stek presiden blong mi i bin “fogivim gud” hem, olsem Nifae blong bifo.7 Mi save se Presiden Cook mo kaonsela blong hem, tufala i gat klin mo oli ol stret prishud lida we tufala i lavlavem tufala. Mi gat strong tingting ia blong kam olsem tufala.
Sam yia bifo, long trip blong mifala we i no gat sakses long Alaska, mi lanem kwiktaem se blong blemem ol hadtaem blong yumi long ol narafala—paelot we i sakem kakae aotsaed long wan smol laet—i no wan ansa. So, taem yumi gat ol wari blong bodi, nogat kaekae, sik, mo slip long graon long wan hariken wetem wan tapolen blong kavremap mifala, mi bin lanem se “I no gat wan samting we i strong tumas, we God i no save mekem.”8
Ol yang pipol, God i askem ol had samting long yu. Wan yang woman blong 14 yia i tekpat long kompetisen blong basket bol. Drim blong hem se bae hem i plei long sekendri skul basketbol olsem bigfala sista blong hem. Be afta hem i faenemaot se papa mo mama blong hem oli singaotem tufala blong prisaed long wan misin long Gwatemala.
Taem oli kasem longwe hem i faenemaot se sam long ol klas blong hem bae i stap long Spanis, wan lanwis we hem i no save toktok long hem yet. I no gat wan spot tim blong ol gel long skul blong hem. Hem i stap long namba 14 level blong wan bilding we sekiuriti i taet. Antap long evri samting ia, hem i no save go aotsaed hemwan from i no sef.
Papa mo mama blong hem i lisin long hem i krae gogo i slip evri naet blong plante manis. !Hem i mekem hat blong tufala i brok! Afta tufala i disaed se bae tufala i sendem hem i go long hom long bubuwoman blong go long sekendri skul.
Taem waef blong mi i go insaed long rum blong gel blong mitufala blong talem l desisen blong mitufala, hem i luk gel blong mitufala i nildaon long prea wetem Buk blong Momon i open long bed blong hem. Spirit i toktok long smol voes long waef se, “Hem bae i oraet,” mo waef blong mi i livim rum kwaet nomo.
Mifala i nomo harem hem i krae gogo i slip. Wetem strong tingting mo wetem help blong Lod, hem i bin fesem olgeta tri yia ia olsem wan hiro.
Long en blong misin blong mifala, mi askem gel blong mi sapos hem i wantem go long wan ful taem misin. Ansa blong hem i bin: “No, Papa, mi go long misin finis.”
!I bin oraet nomo long mi! Be sikis manis i pas, Spirit i wekemap mi long naet wetem tingting ia: “Mi bin singaotem gel blong yu blong go long misin.”
Ansa blong mi hem i: “Papa long Heven, hem i bin givim plante finis.” Spirit i stretem mi kwiktaem nomo mo mi kam blong andastanem se Lod i wantem hem blong go long misin.
Folem hemia mi karem gel blong mi i go lanj. Mi lukluk i go narasaed blong tebol, mi talem, “Ganzie, yu save from wanem yumitu stap ia?”
Hem i se, “Yes, Papa. Yu save se mi mas go long wan misin. Mi no wantem go, be bae mi go.”
From we hem i bin givim tingting blong hem long Papa long Heven, hem i bin givim seves long Hem wetem ful hat, strong paoa long tingting, maen, mo ful paoa. Hem i bin tijim papa blong hem olsem wanem blong mekem ol had samting.
Long wol divosen blong yut, Presiden Russell M. Nelson, hem i askem sam had samting long ol yut. Presiden Nelson i talem: “Nambafaef invitesen blong yu i blong stanap we yu stanap defren long wol. … Lod i nidim yu blong yu luk olsem, yu saon olsem, yu mekem samting olsem, mo yu dresap olsem wan tru disaepol blong Jisas Kraes.”9 Hemia bae i wan had samting, be mi save se bae yu save mekem—wetem glad.
Tingabaot se “ol man oli stap blong oli save gat glad.”10 Wetem evri samting we Lihae i fesem, hem i gohed blong stap glad. ?Mo tingbaot se taem we “sore blong Alma i hevi tumas”11 from ol pipol blong Amonaeha? Enjel i talem long hem se, “Mi blesem yu, Alma; from hemia, leftemap hed blong yu mo stap glad, … from yu bin fetful blong stap obei ol komanmen blong God.”12 Alma i lanem wan impoten trutok: yumi save oltaem glad taem yumi obei ol komanmen. Tingbaot se long taem blong ol wo mo ol jalenj long taem blong Kapten Moronae, “i neva bin gat wan taem we i moa glad long medel blong ol pipol blong Nifae.”13 Yumi save mo sapos blong faenem glad taem yumi fesem ol had samting.
Sevya i bin fesem ol had samting: “Mo wol, from ol rabis fasin blong olgeta, bae oli jajem hem se hem i wan samting blong nating; from samting ia oli wipim hem, mo hem i letem samting ia; mo oli kilim hem, mo hem i letem samting ia. Yes, oli spet long hem, mo hem i letem samting ia, from bigfala lav mo kaen blong hem, mo fasin blong go tru long ol hadtaem wetem longfala tingting, blong hem i go long ol pikinini blong ol man.”14
From bigfala lav ia, Jisas Kraes i safa long Atonmen. From hemia, God Hemwan i talem long wanwan long yumi: “Long wol, ia bambae yufala i harem nogud tumas. Be yufala i no fraet. Mi mi winim paoa blong olgeta samting blong wol ia finis.”15 From Kraes, yumi save winim wol.
Taem yumi fesem ol had samting long wei blong Lod, bae yumi leftemap ol hed blong yumi mo glad. Long tabu janis ia blong testifae long wol, mi talem se Sevya hem i laef mo stap lidim Jos blong Hem. Long nem blong Jisas Kraes, amen.