Rol blong Buk blong Momon long Fasin blong Jenisim Laef
Elda Shayne M. Bowen
Blong Olgeta Seventi
Yumi stap pulum Isrel i kam tugeta blong wan las taem mo yumi stap mekem hemia wetem Buk blong Momon, wan long ol tul we i gat moa paoa blong jenisim laef blong man.
Plante pipol tedei, oli stap askem olgetawan abaot huia stret i God, mo rilesensip blong yumi wetem Hem. Plante oli save smol samting, o oli no save nating abaot bigfala plan blong God blong hapines. Moa long 30 yia i pas, Presiden Esra Taf Benson i luk se “plante man mo samting long wol tedei, oli sakemaot Sevya olsem wan tabu man. Oli kwestinim merikel taem we Hem i bon, stret mo gud laef blong hem mo sapos i tru we Hem i laef bakegen long ded wetem glori.”1
Tedei, ol kwestin oli no lukluk nomo long Sevya, be tu, long Jos blong Hem—Jos blong Jisas Kraes blong Ol Lata-dei Sent—we Hem i putumbak tru long Profet Josef Smit. Olgeta kwestin ia, plante taem oli lukluk nomo long histri, tijing, o praktis blong Jos blong Sevya.
Buk blong Momon i Helpem Yumi Gro long Testemoni
Aot long buk, Prijim Gospel blong Mi, yumi ridim: “Tingbaot se andastaning abaot huia Papa long Heven mo wanem plan blong hem blong stap glad, i kam long ol profet blong tedei— Josef Smit mo olgeta afta long hem—we oli kasem daerek revelesen i kam long God. From hemia, fas kwestin we wan i mas ansarem i sapos Josef Smit i wan profet, mo huia i askem i save ansarem taem hem i ridim mo prea abaot Buk blong Momon.”2
Testemoni blong mi abaot tabu koling blong Profet Josef Smit i kam strong moa taem mi bin stadi wetem prea long Buk blong Momon: Wan Narafala Testeman blong Jisas Kraes. Mi bin mekem folem invitesen blong Moronae, blong “askem God, Papa we I No Save Finis, long nem blong Kraes,” blong save se Buk blong Momon i tru o no.3 Mi witnesem long yufala se mi save se i tru. Save ia i kam long mi, olsem i save kam long yu, “tru long paoa blong Tabu Spirit”4
Fas toktok blong Buk blong Momon i talem: “Olgeta we oli kasem tabu witnes ia tru long Tabu Spirit, bae oli kam blong save tu tru long sem paoa, se Jisas Kraes i Sevya blong wol, se Josef Smit i man blong revelesen blong Hem mo profet long ol las dei ia, mo se Jos blong Jisas Kraes blong Ol Lata-dei Sent i kingdom blong Lod we i stanap wan taem bakegen long wol, blong mekem man i rere from taem ia we Mesaea bae i Kambak Bakegen.”5
Olsem wan yang misinari we i stap go long Jile, mi bin lanem wan strong lesen abaot paoa blong jenisim laef we i kam long Buk blong Momon. Masta Gonsales i stap long wan hae posisen long jos blong hem blong plante yia. Hem i gat bigfala trening long saed blong relijin, mo tu, i gat wan digri long teoloji. Hem i praod long waes blong hem long Baebol. I klia long mifala se hem i stadi gud long relijin.
Hem i save gud long ol Lata-dei Sent misinari we oli stap go mekem wok blong olgeta long homtaon blong hem long Lima, Peru. Oltaem, hem i wantem mitim olgeta blong hem i save tijim olgeta long Baebol.
Wan dei, olsem wan presen we i kam long heven, olsem tingting blong hem, tufala misinari i stopem hem long rod mo askem sapos oli save go luk hem long haos mo serem ol skripja wetem hem. !Hemia i drim we i kamtru! Ansa blong prea blong hem i kam. Naoia bae hem i save stretem ol yang boe ia we oli lusum rod. Hem i talem olgeta se bae hem i glad tumas blong oli go long haos blong hem blong toktok raon long ol skripja.
Hem i no save wet long apoenmen dei ia. Hem i rere blong yusum Baebol blong sakemaot bilif blong olgeta. Hem i gat tras long hemwan se Baebol bae i talemaot klia mo long ditel ol rong rod blong olgeta. Naet blong apoenmen i kam, ol misinari oli noknok long doa blong hem. Hem i glad we i glad. Taem blong hem, i kam nao.
Hem i openem doa mo invaetem tufala insaed long hom blong hem. Wan long ol misinari i givim hem blu buk ia mo i talem wan tru testemoni, se hem i save se buk ia, i tekem toktok blong God. Nambatu misinari i ademap strong testemoni blong hem abaot buk ia, i testifae se wan profet blong God blong tedei i transletem, we nem blong hem i Josef Smit, mo i tij abaot Kraes. Tufala misinari i talem se i taem, mo tufala i aot long haos.
Masta Gonsales, tingting blong hem i no glad. Be hem i openem buk, mo i statem blong gotru long ol pej blong hem. Hem i ridim fas pej. Hem i ridim pej afta pej, mo i no stop kasem let long aftenun long nekis dei. Hem i ridim ful buk, mo hem i save se buk ia i tru. Hem i save wanem nao bae hem i mekem. Hem i singaotem ol misinari, i kasem ol lesen, mo i lego laef we hem i bin gat blong kam wan memba blong Jos blong Jisas Kraes blong Ol Lata-dei Sent.
Gudfala man ia, i bin tija blong mi long MTS, Provo, Yuta. Stori blong Brata Gonsales we i jenisim laef blong hemwan, mo paoa blong Buk blong Momon, i tajem mi bigwan.
Taem mi kasem Jile, misin presiden blong mi, Presiden Roeden J. Gled, i invaetem mifala blong ridim testemoni blong Profet Josef Smit we i stap long Josef Smit—Histri, evri wik. Hem i tijim mifala se, wan testemoni abaot Fas Visen, bae i lidim testemoni blong mifala abaot gospel, mo testemoni blong mifala abaot Buk blong Momon.
Mi tekem invitesen blong hem i series. Mi bin ridim ol stori blong Fas Visen; mi ridim Buk blong Momon. Mi bin prea olsem Moronae i talem, blong “askem God, Papa we I No Save Finis, long nem blong Kraes,”6 blong save se Buk blong Momon i tru o no. Mi talem witnes blong mi tedei se mi save se Buk blong Momon, olsem Profet Josef Smit i bin talem, “i moa stret bitim eni narafala buk long wol, mo i ki ston blong relijin blong yumi, mo wan man bae i kam moa kolosap long God sapos hem i folem ol tijing blong hem, bitim eni narafala buk.”7 Profet Josef i talem tu: “Tekemaot Buk blong Momon mo ol revelesen, nao ?wehem relijin blong yumi? Yumi no gat wan i stap.”8
Jenis long Laef blong Yuwan
Taem yumi andastanem moa huia yumi, mo ol stamba tingting blong Buk blong Momon, jenis long laef blong yumi i kam dip moa, mo i kam sua moa. Yumi kam strong moa tru long komitmen blong yumi blong kipim ol kavenan yumi bin mekem wetem Lod.
Wan stamba tingting blong Buk blong Momon i blong pulum i kam tugeta Isrel we i serseraot olbaot. Kam tugeta ia i givim long evri pikinini blong God, wan janis blong kam long kavenan rod, mo taem hem i ona long ol kavenan ia, i gobak long ples we Papa i stap long hem. Taem yumi stap tijim fasin blong sakem sin mo baptaesem ol konvet, yumi stap pulum i kam tugeta Isrel ia we i serseraot olbaot.
Buk blong Momon i tokbaot haos blong Isrel, 108 taem. Long stat blong Buk blong Momon, Nifae i tijim: “From ful plan blong mi, hem i blong bae mi winim tingting blong ol man blong kam long God blong Ebraham, mo God blong Aesak, mo God blong Jekob, mo blong hem i save sevem olgeta”9 God blong Ebraham, Aesak, mo Jekob, hem i Jisas Kraes, God blong OlTesteman. God i sevem yumi taem yumi kam long Kraes tru long fasin blong laef folem gospel blong Hem.
Sam taem afta, Nifae i bin raetem:
“Yes, papa blong mi i bin talem plante samting long saed blong Ol Jentael tu, mo tu, long saed blong laen blong Isrel, se bae oli skelem olgeta long wan olif tri, we ol branj blong hem bae oli mas kamaot mo oli mas seraot long ful fes blong wol.
“Mo afta we ol laen blong Isrel bae oli seraot, bae oli mas kam tugeta bakegen; o, blong endem, afta we Ol Jentael oli bin kasem Gospel we i fulwan, ol stret branj blong olif tri, o ol smol haf nomo we i stap yet blong laen blong Isrel, Lod bae i joenem olgeta, o oli kam blong save long saed blong tru Mesaea, Lod blong olgeta mo Ridima blong olgeta.”10
Semmak, long en blong Buk blong Momon, profet Moronae i rimaenem yumi abaot ol kavenan blong yumi, i talem: “Blong mekem se oli nomo save miksim yufala bakegen, blong mekem se ol kavenan blong Papa we I No Save Finis, we hem i bin mekem wetem yufala, O laen blong Isrel, i save hapen.”11
Ol Kavenan blong Papa we I No Save Finis
?Wanem nao oli “ol kavenan blong Papa we I No Save Finis” we Moronae i tokbaot? Yumi rid long Buk blong Ebraham:
“Nem blong mi i Jehova, mo mi save en stat long stat finis; from hemia, han blong mi bae i lukaot long yu.
“Mo aot long yu, bae mi mekem wan bigfala nesen, mo bae mi blesem yu bitim mak, mo bae mi mekem nem blong yu i hae long medel blong evri nesen, mo bambae yu stap olsem wan blesing long laen blong yu afta long yu, long wei ia se bae han blong olgeta bae i tekem seves ia mo Prishud ia i go long evri nesen.”12
Presiden Russel M. Nelson i tijim long las wol brodkas se, “i tru, hemia oli ol las dei, mo Lod i stap muvum wok blong Hem i go hariap blong pulum Isrel i kam tugeta. Kam tugeta ia, i samting we i moa impoten we i stap tekem ples long wol tedei. I no gat samting we yu save komperem, we i bigwan tumas olsem, we i impoten tumas olsem, mo i hae mo i tabu tumas olsem. Mo sapos yu jusum, sapos yu wantem, yu save tekpat bigwan long hem. !Yu save tekpat long wan samting we i bigwan, i gud tumas, wan samting we i naes!
“Taem yumi stap tokbaot, kam tugeta, yumi stap talem stamba trutok ia nomo: evriwan long ol pikinini blong Papa blong yumi long Heven, long tugeta saed blong vel, i nidim blong harem mesej blong gospel we i kambak blong Jisas Kraes. Oli save disaed blong olgetawan sapos oli wantem save moa.”13
Samting ia nao yumi stap mekem olsem memba blong Jos blong Jisas Kraes blong Ol Lata-dei Sent: yumi stap lukaot blong tekem i go long wol, wan andastaning mo wan jenis i go long laef blong gospel blong Jisas Kraes. Yumi ol “lata-dei man blong pulum man i kam tugeta.”14 Misin blong yumi i klia. Ol brata mo sista. Bae oli save yumi olsem olgeta we oli tekem promes blong Moronae i go long hat blong yumi, we yumi bin prea mo kasem wan ansa blong save se Buk blong Momon i tru, mo afta, serem save ia wetem ol narawan tru long toktok, mo moa impoten, tru long aksen.
Rol blong Buk blong Momon long Fasin blong Jenisim Laef
Buk blong Momon i tekem ful gospel blong Jisas Kraes.15 I stap lidim yumi i go long ol kavenan blong Papa, we sapos yumi kipim, bae i mekem se i tru, bae yumi kasem presen ia we i hae olgeta—we i laef we i no save finis.16 Buk blong Momon i ki ston blong fasin blong jenisim laef, hemia blong evriwan long ol boe mo gel blong Papa long Heven.
Blong kwotem bakegen Presiden Nelson: “Taem yufala i stap rid evri dei long Buk blong Momon, bambae yufala i lanem doktrin blong wok blong pulum Isrel i kam tugeta, ol trutok abaot Jisas Kraes, Atonmen blong Hem, mo fulwan blong gospel blong Hem we oli no faenem long Baebol. Buk blong Momon i stamba blong kam tugeta blong Isrel. Wanem i stap, i we, sapos i no gat Buk blong Momon, kam tugeta blong Isrel we God i promesem, bae i no save hapen.”17
Bae mi endem wetem ol toktok blong Sevya, olsem we Hem i bin tijim long Ol Man blong Nifae long saed blong ol promes blesing: “Mo luk, yufala i ol pikinini blong ol profet; mo yufala i blong laen blong Isrel; mo yufala i blong kavenan we Papa i bin mekem wetem ol papa blong yufala, we hem i talem long Ebraham: ‘Tru long laen blong yu bae evri famli blong wol i kasem blesing.”18
Mi testifae we yumi ol boe mo gel blong God, laen blong Ebraham, haos blong Isrel. Yumi stap pulum Isrel i kam tugeta blong wan las taem mo yumi stap mekem hemia wetem Buk blong Momon—wan buk we, joenem wetem Spirit blong Lod, i tul we i gat moa paoa blong jenisim laef blong man. Profet blong God, Presiden Russel M. Nelson, i stap lidim wok blong pulum Isrel i kam tugeta long taem blong yumi. Buk blong Momon i tru. Hem i jenisim laef blong mi. Mi promesem yufala, olsem Moronae mo plante profet oli bin mekem truaot long ol yia, se bae i jenisim laef blong yufala.19 Long nem blong Jisas Kraes, amen.