Kam Lisin long Voes blong Wan Profet

I Kam long Bisop Dean M. Davies

Fas Kaonsela long Prisaeding Bisoprik

Taem yumi laef strong blong lisin mo folem voes blong ol profet we oli stap laef, Lod bae i bildim laef blong yumi folem tabu paten we i gat blong yumi, mo bae yumi kasem ol promes blesing we i no save finis.

Long toktok blong Hem i go long Presiden blong Jos blong Jisas Kraes blong Ol Lata-dei Sent, Lod i talem:

“Mo bakegen, diuti blong Presiden blong ofis blong Hae Prishud i blong prisaed ova long ful jos, mo blong stap olsem Moses—

“… yes, blong stap olsem wan sia, wan reveleta, wan transleta, mo wan profet, mo gat evri presen blong God we God i givim long hed blong jos” (Doktrin mo Ol Kavenan 107:91–92; oli ademap italik).

Mi bin gat blesing ia blong witnesem ol presen blong God we Hem i givim long ol profet blong Hem. ?Bae mi save serem wan long ol tabu eksperiens ia wetem yufala? Bifo koling blong mi, mi bin stap help long wok blong faenem mo givim advaes long ol fiuja ples blong tempol. Afta long 11 Septemba 2001, hem i bin had blong kros i go long Y.S. boda. From samting ia, plante memba i nidim blong tekem tu kasem tri aoa blong krosem Vankuva, long Kanada blong kasem Siatel Wasington Tempol. Presiden Gordon B. Hinckley, Presiden blong Jos long taem ia, i bin talem se wan tempol long Vankuva bae i blesem ol memba blong Jos. Oli givim raet blong faenem wan ples, mo afta mifala i stadi long sam propeti blong Jos, mifala i stadi tu long ol ples long Vankuva we oli no blong Jos.

Mifala i faenem wan naes ples we i fes i go long Trans-Kanadien Haewei. Propeti ia i gat gudfala akses, i gat ol naesfala laen blong ol Paentri blong Kanada, mo i stap long wan impoten gudfala ples we plante man we i pas long trak oli save luk.

Mifala i soem ples ia wetem ol pikja mo map insaed long miting blong evri manis blong ol ples blong Tempol mo Bilding Komiti miting. Presiden Hinckley i givim raet ia blong mifala i putum hemia long kontrak mo komplitim ol impoten pat blong stadi. Long Disemba long sem yia, mifala i ripot i gobak long komiti se ol stadi oli finis, mo mifala i wet long apruvol blong stat blong pem. Afta long ripot blong mifala, Presiden Hinckley i talem, “Mi filim se mi nid blong luk ples ia.”

Samtaem let long manis ia, tu dei afta long Krismes mifala i aot i go long Vankuva wetem Presiden Hinckley; Presiden Thomas S. Monson; mo Bill Williams, wan tempol akitek. Mifala i mit wetem Pol Kristensen, lokol stek presiden, we i draevem mifala i go long ples ia. Ples i wetwet smol mo i no klia gud, be Presiden Hinckley i jiamaot long trak mo stat wokbaot long evri pat blong graon ia.

Afta we mifala i spendem taem long ples ia, mi askem Presiden Hinckley sapos hem i wantem luk sam nara ples we mifala i bin lukluk long olgeta tu. Hem i se yes, hem i laekem blong luk. Yu luk, taem mifala i lukluk long nara ples, mifala i save komperem hao oli naes.

Mifala i mekem wan bigfala raon long Vankuva blong lukluk long ol nara propeti, long en mifala i kambak long fasfala ples. Presiden Hinckley i talem se, “Hemia i wan naesfala ples.” Afta hem i askem: “?Yumi save go long mitinghaos blong Jos we hem i klosap haf kilometa longwe long ples ia?”

“Yes, Presiden,” mifala i ansa.

Mifala i gobak long ol trak mo draev i go long wan mitinghaos. Taem mifala i kasem japel, Presiden Hinckley i talem se: “Tanem lef long ples ia.” Mifala i tanem mo folem rod ia olsem we i talem. Rod ia i stat blong go antap long hil.

Taem trak i kasem antap long top blong hil, Presiden Hinckley i talem se “Stopem trak, stopem trak.” Afta hem i poen i go long raet long wan pis graon mo talem, “?Olsem wanem long ples ia? Hemia nao ples we tempol bae i stap long hem Hemia nao ples we Lod i wantem tempol blong i stap long hem ?Yufala i kasem?” ?Yufala i kasem?”

Mifala i no bin luk long ples ia. Hem i stap biaen mo longwe long bigfala rod, mo oli no salem. Taem mifala i se mifala i no save, Presiden Hinckley i poen long ples ia mo talem bakegen, “Tempol bae i stap long ples ia nao.” Mifala i stap blong sam minit afta go long eapot blong kambak hom.

Nekis dei oli singaotem mi mo Brata Wiliams long ofis blong Presiden Hinkli. Hem i bin droem ol plan long wan pis pepa: ol rod, japel, tanem lef long ples ia, mo makem x long ples blong tempol. Hem i askem wanem mifala i faenemaot. Mifala i talem long hem se hem i bin jusum wan ples we i had blong tekem. Ples ia tri defren man i gat raet long hem: !wan blong Kanada, wan blong India, mo wan blong Jaena! Mo hem i no wan ples we i stret tumas blong wosip.

“Ale, traem tingting gud,” hem i talem.

Afta ol merikel oli hapen. Blong sam manis nomo afta, mifala i tekem ples ia, mo afta siti blong Langley Britis Kolombia i givim raet blong bildim tempol.

Luklukbak long eksperiens ia, i putum tingting blong mi daon blong luksave se nomata mi mo Brata Wiliams i skul gud mo gat plante yia eksperiens long wok blong haos mo tempol disaen, Presiden Hinckley hem i no skul from ol samting ia; be hem i gat wan samting we i moa bigwan—presen ia blong profet sia, wan we i save luk fiuja. Hem i bin luk finis weaples tempol blong God bae i mas stanap long hem.

Taem Lod i komandem ol fas Sent blong dispensesen ia blong bildim wan tempol Hem i talem:

“Be letem wan oli bildim wan haos long nem blong mi folem eksampol we bae mi soemaot long ol wokman blong mi.

“Mo sapos ol pipol blong mi oli no bildim haos ia folem eksampol we bae mi soemaot … , bae mi no akseptem haos ia long han blong olgeta” (Doktrin mo Ol Kavenan 115:14–15).

Olsem ol fas Sent, i semmak long yumi tedei: Lod i bin soem mo bae i gohed blong soem long Presiden blong Jos ol wei we kingdom blong God i mas folem long dei blong yumi tedei. Mo, long yumi wanwan, Hem i soem rod ia long hao wanwan long yumi i mas lidim laef blong hem long wei we Lod i save akseptem.

Long Epril 2013, mi bin tokbaot ol wok we i go wetem wok blong rere mo bildim evri tempol fandesen blong mekemsua se hem i strong long hariken mo bigfala trabol we bae hem i kam blong hem fesem. Be fandesen hem stat blong hem yet ia. Wan tempol i nidim plante brikis we i fas tugeta folem paten we oli bin disaenem. ?Sapos ol laef blong yumi bae i kam ol tempol, we wanwan long yumi bae i traehad blong bildim olsem we Lod i bin tijim (luk long Fas Korin 3:16–17), i gud blong askem yumiwan, “Wanem brikis nao mi mas putum gud blong mekem se laef blong yumi i naes, i saen, mo save stanap strong agensem ol strong win blong wol?”

Yumi save faenem ansa long kwestin ia insaed long Buk blong Momon. Taem tokbaot Buk blong Momon, Profet Josef Smit i se: “Mi bin talem long ol brata se Buk blong Momon i moa stret long eni narafala buk long wol, mo i ki ston blong bilif long God blong yumi, mo wan man bae i kam moa klosap long God sapos hem i folem ol tijing blong hem, bitim eni narafala buk (Fas Toktok long Buk blong Momon). Long Fas Toktok long Buk blong Momon, oli bin tijim yumi se “olgeta we i kasem tabu witnes ia tru long Tabu Spirit se Buk blong Momon i toktok blong God bae oli kam blong save tu tru long sem paoa, se Jisas Kraes i Sevya blong wol, se Josef Smit i man blong revelesen blong Hem mo profet blong Restoresen, mo se Jos blong Jisas Kraes blong Ol Lata-dei Sent i kingdom blong Lod we i kambak bakegen mo stanap long wol ia.”

Olgeta samting ia oli ol impoten brikis blong wanwan fet mo testemoni blong yumi:

1. Jisas Kraes i Sevya blong wol.

2. Buk blong Momon hem i toktok blong God.

3. Jos blong Jisas Kraes blong Ol Lata-dei Sent i kingdom blong God long wol ia.

4. Josef Smit hem i wan profet, mo yumi gat ol profet we oli stap laef long wol ia tedei.

Long ol manis we i jes pas, mi lisin long evri toktok blong jeneral konfrens we Presiden Nelson i bin givim stat long taem we hem i wan aposol. Wei ia i bin jenisim laef blong mi. Taem mi stadi mo tingting hevi long ol 34 yia blong waes tingting blong Presiden Nelson, ol stamba tingting we i klia mo i semmak i kamaot long ol tijing blong hem. Wanwan long ol stamba tingting ia i olsem ol bilding brikis we mi jes talem o i wan narafala ki bilding brikis blong ol tempol blong yumiwan. Insaed i gat fet long Lod Jisas Kraes; fasin blong sakem sin; baptaes blong kam klin aot long ol sin, presen we i Tabu Spirit, wok blong ol ded man mo tempol wok, kipim Sabat dei i tabu, stat wetem en long maen, stap long rod blong kavenan. Presiden Nelson i tokbaot evri samting ia wetem lav mo divosen.

Stamba blong Jif kona ston mo bilding brikis blong Jos mo blong ol laef blong yumi hem i Jisas Kraes. Hemia i Jos blong Hem. Presiden Nelson hem i profet blong Hem. Ol tijing blong Presiden Nelson i witnes mo soem blong gud blong yumi, laef mo fasin blong Jisas Kraes. Hem i toktok wetem plante lav mo save abaot fasin blong Sevya mo wok blong Hem. Hem i gohed blong serem oltaem strong testemoni abaot tabu koling blong ol profet we oli stap laef—ol Presiden blong Jos—we hem i bin wok wetem.

Nao tedei hem i wan spesel janis blong sastenem hem olsem profet blong Lod we i stap laef long wol ia. Yumi kam blong sastenem ol lida blong Jos folem tabu fasin ia blong leftemap han blong soem se yumi akseptem mo sapotem olgeta. Yumi jes mekem hemia nomo. Be blong soem se yumi sastenem olgeta i no blong putum han nomo antap. Olsem we i stap long Doktrin mo Ol Kavenan 107:22, Fas Presidensi hem i blong “jos i sastenem olgeta tru long tras, fet, mo prea.” Yumi kam blong sastenem tru mo fulwan profet we i stap laef taem yumi gohed blong trastem ol toktok blong hem, gat fet blong wok folem, mo afta prea blong Lod i gohed blong blesem hem.

Taem mi tingbaot Presiden Russell M. Nelson, mi filim kamfot long toktok blong Sevya we i se, “Mo sapos ol pipol blong mi oli lisin gud long voes blong mi, mo long voes blong ol wokman blong mi we mi bin jusum blong lidim ol pipol blong mi, luk, i tru, mi talem long yufala, i no gat eniwan i save fosem pipol blong mi blong muvaot long ples blong olgeta” (Doktrin mo Ol Kavenan 124:45).

Blong lisin mo obei long ol profet we oli stap laef bae i mekem bigfala jenis long laef blong yumi. Yumi kam strong moa. Yumi gat moa strong tingting mo tras long Lod. Yumi harem tok blong Lod. Yumi filim lav blong Lod. Yumi save hao blong stap laef wetem wan stamba tingting.

Mi lavem mo sastenem Presiden Russell M. Nelson mo ol narawan we oli singaotem olsem ol profet, sia, mo reveleta. Mi testifae se hem i gat ol presen we Lod i bin putum long hed blong hem, mi witnes se taem yumi laef strong blong lisin mo folem voes blong ol profet we oli stap laef, Lod bae i bildim laef blong yumi folem tabu paten we i gat blong yumi, mo bae yumi kasem ol promes blesing we i no save finis. Invitesen i go long evriwan. Kam lisin long voes blong wan Profet; yes, kam long Kraes mo laef. Long nem blong Jisas Kraes, amen.