Ol Papa mo Mama, mo Ol Pikinini
I Kam long Elda Dallin H. Oaks
Fas Kaonsela long Fas Presidensi
Bigfala plan blong stap glad, blong Papa long Heven, i talem huia yufala, mo stamba tingting blong laef blong yu.
Ol dia sista blong mi. I gud tumas blong gat niufala jeneral konfrens sesen blong ol woman blong Jos, we oli gat 8 yia i go antap. Yumi bin harem ol mesej blong insperesen we oli kam long ol sista lida, mo i kam long Presiden Henry B. Eyring. Presiden Eyring mo mi, i laekem blong wok anda long daereksen blong Presiden Russel M. Nelson, mo mifala i luk fored blong harem toktok blong hem.I
.
Ol pikinini, oli bigfala presen we i kam long God—we bae yumi kasem moa long laef we i no save finis. Be yet, yumi laef long wan taem we plante woman oli no wantem gat pat blong bonem pikinini i kam long wol mo lukaotem olgeta. Plante yang adalt oli slo blong mared kasem taem oli gat inaf long laef ia. Yia we ol memba blong Jos oli mared i go antap long tu yia, mo namba blong ol pikinini we oli bon long ol memba blong Jos, i stap kam daon. Yunaeted Stet mo sam nara nesen, bae oli fesem wan fiuja we bae i no gat pikinini oli kam adalt blong sapotem namba blong ol olfala we oli finis wok.1 Ova 40 pesen blong ol bebi we oli bon long Yunaeted Stet oli bon long ol mama we oli no mared. Ol pikinini ia oli stap long denja. Evri samting ia oli wok agensem tabu plan blong Papa long saed blong sevem man.
II.
Ol lata-dei Sent woman oli andastanem se blong stap olsem wan mama, hem i fas wok mo bigfala glad blong olgeta. Presiden Gordon B. Hinckley i talem: “Ol woman, plante long olgeta oli luk se oli kasem evri samting long laef, bigfala hapines blong olgeta, insaed long hom mo famli. God i putum insaed long ol woman, wan tabu samting we i kamaot olsem strong paoa, fasin blong kam gud moa, pis, gud fasin, klin fasin, trutok mo lav. Evri samting ia oli ol gudfala kwaliti, mo oli kamaot klia taem wan i kam wan mama. …”
Hem i gohed: “Bigfala wok we eni woman bae i mekem, bae i blong fidim mo tijim, mo laef mo leftemap tingting mo lukaot long ol pikinini blong hem long stret mo gud fasin mo trutok. I no gat wan narafala samting we bae oli save komperem long hemia, i nomata wanem samting bae hem i mekem.”2
Ol mama, ol sista we mi lavem, mifala i lavem yufala from huia yufala, mo wanem yufala i stap mekem blong mifala.
Long impoten toktok blong hem long 2015, “Mi Plis long Ol Sista blong Mi,” Presiden Russel M. Nelson i talem:
“Kingdom blong God i no, mo i no save fulwan sapos i no gat ol woman we oli mekem ol tabu kavenan, mo afta, stap kipim olgeta; !ol woman we oli save toktok wetem paoa mo atoriti blong God!
“Tedei, yumi nidim ol woman we oli save olsem wanem blong mekem ol impoten samting oli hapen tru long fet blong olgeta mo oli strong blong difendem ol fasin blong klin tingting mo ol famli long wan wol we i sik long sin. Yumi nidim ol woman we oli givim tingting blong olgeta blong lukaot gud long ol pikinini blong God folem rod ia blong kavenan we i go blong kam olsem god; ol woman we oli save olsem wanem blong kasem revelesen blong olgetawan, we oli andastanem paoa mo pis blong tempol endaomen; ol woman we oli save olsem wanem blong singaotem ol paoa blong heven blong protektem mo mekem strong moa ol pikinini mo famli; ol woman we oli tij we oli no fraet.”3
Ol tijing blong insperesen ia oli stanap long “Famli: Wan Ofisol Toktok I Go long Wol,” we Jos ia we i kambak i talem strong bakegen doktrin mo praktis we i stamba blong plan blong Krieta bifo Hem i bin krietem wol ia.
III.
Naoia, mi toktok long ol yangfala long grup ia we i stap lisin naoia. Ol dia yang sista blong mi. From save blong yufala abaot gospel blong Jisas Kraes we i kambak, yufala i spesel. Save blong yufala bae i mekem se yufala i save stap strong mo winim ol hadtaem blong stap groap. Stat long taem yufala i yangfala finis, yufala i tekpat long ol projek mo ol program we oli developem ol talen blong yufala, olsem raeting, givim toktok mo mekem plan. Yufala i bin lanem fasin blong tekem responsabiliti, mo olsem wanem blong stanap agensem temtesen, olsem blong giaman, stil, o fasin blong yusum alkol o drag.
Wanem i spesel long yufala, oli bin luksave long Yunivesiti blong Not Karolina long wan stadi blong ol yangfala mo relijin. Wan atikol blong Charlotte Observer i tekem taetol ia “Ol Momon yut oli fesem laef i moa gud: Stadi i faenem se oli kam nambawan blong fesem ol jalenj blong yangfala laef.” Atikol ia i talem se “ol Momon oli beswan blong no stap foldaon long ol nogud fasin, oli mekem gud long skul mo oli gat gud fasin abaot fiuja.” Wan long olgeta we oli stadi, we i mekem ol intaviu blong ol yut, i talem: “Long evri kategori we mifala i lukluk long hem, i gat wan klia paten: Ol Momon oli kam faswan.”4
?Hao nao yufala i save stap strong mo winim ol hadtaem blong stap groap.? Ol yang woman, hem i from yufala i andastanem bigfala plan blong glad we i kam long Papa long Heven. Hemia i talem huia yufala, mo stamba tingting blong laef blong yu. Ol yut we oli andastanem hemia oli faswan blong stretem problem, mo faswan blong jusum raet samting. Yufala i save se yufala i save kasem help blong Lod blong winim evri hadtaem blong stap groap.
Wan nara risen from wanem yufala i gud moa, i we, yufala i andastanem se yufala i ol pikinini blong wan Papa long Heven we i lavem yufala. Mi sua se yufala i save gud hym ia “Ol Pikinini, God I Stap Kolosap long Yufala.” Hemia fas ves we yumi evriwan i bin singsing mo biliv long hem:
Pikinini, God i stap klosap long yu,
I lukaot yu long dei mo naet.
Mo i glad blong gat yu mo blesem yu.
Sapos yu traehad blong mekem wanem i raet.5
I gat tufala tijing long ves ia: Faswan. Papa long Heven i kolosap long yumi mo i lukaot gud yumi dei mo naet. !Tingbaot hemia! God i lavem yumi, i stap kolosap long yumi mo Hem i lukaot gud long yumi. Nambatu. Hem i glad blong blesem yumi taem yumi traehad blong mekem wanem i raet. !Hemia bigfala kamfot long medel blong ol wari mo ol had samting!
Yes ol yang woman; yufala i gat blesing mo yufala i gud tumas, be yufala i stap olsem evri pikinini blong Papa long Heven, we yufala i gat nid blong traehad blong mekem wanem we i raet.
Tedei, mi save givim advaes long plante defren samting, be mi jusum blong tokbaot tu samting nomo.
Fas kaonsel blong mi, i abaot ol mobaelfon. Wan las stadi we oli mekem i faenem se ova haf blong ol yangfala long Yunaeted Stet oli spendem tumas taem long mobaelfon blong olgeta. Moa long 40 pesen oli talem se oli wari taem oli no holem mobaelfon blong olgeta.6 Hemia i hapen moa wetem ol gel bitim ol boe. Ol yang sista blong mi—mo ol bigfala woman tu—bae i blesem laef blong yufala sapos yufala i no yusum tumas mo no stap dipen long mobaelfon blong yufala.
Seken advaes blong mi i moa impoten. Gat kaen fasin wetem ol narafala man. Kaen fasin i wan samting we plante yut oli stap mekem finis. Sam grup blong ol yut long sam komuniti oli bin soem rod long yumi evriwan. Insperesen i bin kam tru long ol kaen fasin aksen blong ol yang pipol blong yumi i go long olgeta we oli nidim lav mo help. Long plante wei, yu givim help ia mo soem lav ia long wanwan long yumi. Bae i gud tumas sapos evriwan i save folem eksampol blong yufala.
Long semtaem, yumi save se enemi i stap temtem yumi evriwan blong no gat kaen fasin, mo i gat ol eksampol blong hemia, iven long medel blong ol pikinini mo yut. Fasin we i no kaen, oli save hem long plante nem, olsem buli, gang grup agensem wan, joen tugeta blong sakemaot ol narawan. Ol eksampol ia, oli givim soa long ol fren long klas o ol fren nomo. Ol yang sista blong mi. Lod i no laekem sapos yumi mekem nogud, o tritim nogud ol narawan.
Hemia wan eksampol: Mi save wan yang man, wan rifuji long ples ia, long Yuta, we oli bin jikim hem from hem i defren, mo i toktok long homples lanwis blong hem. Wan gang blong rij yut oli mekem nogud hem gogo, hem i kikbak long wan wei we i mekem se hem i go kalabus blong ova 70 dei, mo oli lukluk blong sendem hem i gobak long kantri blong hem. Mi no save wanem i mekem yut grup ia, mo plante oli ol Lata-dei Sent olsem yufala, be mi save luk risal blong nogud fasin blong olgeta, we i wan trabol eksperiens we wan long ol pikinini blong God i pem. Ol smol aksen blong nogud fasin i save mekem ol bigfala nogud samting.
Taem mi harem stori ia, mi komperem wetem wanem profet blong yumi, Presiden Nelson, i talem long las wol yut divosen. Taem hem i askem yufala mo ol nara yut blong givhan blong mekem Isrel i kambak tugeta, hem i talem: “Stanap we yufala i defren long wol ia. Yufala mo mi i save se yufala i mas stap wan laet long wol ia. From hemia, Lod i nidim blong yu luk olsem, yu saon olsem, yu mekem samting olsem, mo yu dresap olsem wan tru disaepol blong Jisas Kraes.”7
Yut ami we Presiden Nelson i askem yufala blong joenem, bae i no minim blong mekem nogud samting long ol narawan. Bae oli folem tijing blong Sevya blong go luk ol narawan, mo gat lav mo tingting long ol narawan, iven blong tanem nara jik blong fes blong yufala taem yufala i filim se oli mekem nogud long yufala.
Long wan toktok blong jeneral konfrens, samples long taem ia we plante long yufala i jes bon i kam long wol, Presiden Gordon B. Hinckley i presem “ol naes yang woman we oli stap traehad blong laef folem gospel.” Hem i tokbaot olgeta, semmak olsem we mi filim blong tokbaot yufala:
Oli gat open hat long wanwan long olgeta. Oli lukaot blong mekem wan long olgeta i kam strong moa. Oli givim gud nem long papa, mama, mo hom we oli kamaot long hem. Oli kam blong oli kam woman, mo tekem, truaot long laef blong olgeta, ol bigfala tingting we i stap pusum olgeta tedei.”8
Olsem wan wokman blong Lod, mi talem long yufala, ol yang woman, wol blong yumi i nidim gud fasin mo lav blong yufala. Gat kaen fasin wetem ol narafala man. Jisas i tijim yumi blong lavlavem wanwan long yumi mo tritim ol narawan olsem we yumi wantem se oli mekem long yumi. Taem yumi stap traehad blong stap kaen, yumi go kolosap long Hem mo paoa blong lav blong Hem blong lidim ol man.
Ol dia sista blong mi. Sapos yufala i tekpat long eni nogud fasin, o fasin nating—wanwan o wetem wan grup—disaed naoia blong jenis mo leftemap tingting blong ol narawan blong jenis. Hemia i kaonsel blong mi, mo mi givim long yufala olsem wan wokman blong Lod Jisas Kraes from se Spirit blong Hem i talem long mi blong toktok long yufala long saed blong impoten topik ia. Mi testifae abaot Jisas Kraes, Sevya blong yumi, we i bin tijim yumi blong lavlavem yumi olsem Hem i lavem yumi. Mi prea se bae yumi mekem olsem, long nem blong Jisas Kraes, amen.