Glad blong Seves we I No Selfis
Cristina B. Franco
Seken Kaonsela insaed long Praemeri Jeneral Presidensi
Yumi bin promesem Papa blong yumi we i stap long Heven se bambae yumi wok blong Hem mo ol narawan wetem lav, mo bae yumi mekem tingting blong Hem long saed blong evri samting.
Afta long las jeneral konfrens, plante pipol oli kam luk mi wetem sem kwestin: “?Olgeta jea ia oli gud blong sidaon long ol?” Ansa blong mi i semmak evri taem: “Olgeta jea oli gud tumas blong sidaon long ol sapos yu no givim toktok.” ?Hem i tru? ?Yes? Jea blong mi, mi harem se mi no sidaon gud long hem long konfrens ia, be mi mi glad tumas from blesing mo ona ia blong toktok long yufala tedei.
Samtaem, taem yumi stap givim seves, yumi mas sidaon long ol defren jea. Sam oli gud blong sidaon long ol, mo sam no, be yumi bin promesem Papa blong yumi se bae yumi wok blong Hem mo ol narawan wetem lav, mo bae yumi mekem tingting blong Hem long saed blong evri samting.
Sam yia i pas, ol yut insaed long Jos oli lanem se taem yu mekem wok blong God [Doktrin mo Ol Kavenan 4:2], yu stap joenem nambawan wokbaot. Yu stap help blong mekem wok blong God i go hariap, mo hem i wan bigfala, mo gudfala eksperiens.”1 Hem i wan wokbaot blong evriwan–i nomata long yia—mo tu, i wan wokbaot we i tekem yumi folem wanem profet we yumi laekem i tokbaot olsem “kavenan rod” ia.2
Sore tumas, yumi stap laef long wan selfis wol we ol pipol oli stap askem oltaem: “?Be bae mi winim wanem?” be oli no askem: “?Huia mi save helpem tedei?” o “?Hao nao bae mi wok gud moa blong Lod tru long koling blong mi?” o “Mi mi stap givim evri samting long Lod?”
Wan bigfala eksampol long laef blong mi blong givim seves we i no selfis, hem i Sista Viktoria Antonietti. Viktoria i wan long ol Praemeri tija long branj blong mi taem mi stap groap long Ajentina. Evri Tiusdei aftenun, taem mifala i kam tugeta blong gat Praemeri, hem i tekem wan joklet kek i kam. Evriwan i laekem kek—evriwan be i no mi. !Mi no laekem joklet kek! Mo i nomata bae hem i traem serem kek wetem mi, oltaem mi no wantem tekem.
Wan dei, afta hem i serem joklet kek wetem ol nara pikinini, mi askem hem: “?From wanem yu no mekem wan nara kaen kek—olsem aranis, o vanila?”
Hem i laf smol, nao hem i askem mi: “?From wanem yu no traem wan smol pis? Kek ia, mi putum wan spesel samting insaed mo mi promesem yu se sapos yu traem, !bae yu laekem!”
Mi lukluk raon, mo mi sapraes se evriwan i laekem blong kakae kek ia. Mi agri blong mi traem. ?Yu save traem faenem wanem i hapen? !Mi laekem!” Hemia i fas taem we mi laekem wan joklet kek.
Plante yia afta nomo mi faenemaot sikret samting insaed long joklet kek blong Sista Antonietti. Ol pikinini blong mi mo mi i visitim mama blong mi evri wik. Long wan long ol visit ia, Mama mo mi i stap kakae gud wan pis joklet kek, mo mi talemaot long hem olsem wanem mi kam blong laekem joklet kek long fas taem. Afta nao bae hem i jes talemaot haf stori.
Mama i se: “Yu luk Kris, Viktoria mo famli blong hem i no gat fulap samting, mo evri wik, hem i mas jusum bitwin blong pem bas fea blong hem mo ol pikinini oli go long Praemeri, o bae i mekem ol samting blong mekem joklet kek blong Praemeri klas. Oltaem, hem i jusum blong mekem joklet kek be i no bas fea, mo hem mo ol pikinini oli wokbaot ova long 3 kilometa wan wei, i nomata se ren o san.”
Long dei ia, mi laekem moa joklet kek blong hem. Moa impoten, mi bin lanem se sikret samting insaed long kek blong Viktoria, hem i lav we hem i gat long olgeta we hem i wok blong olgeta mo seves we i no selfis long bihaf blong mifala.
Blong tingting i gobak long kek blong Viktoria i stap helpem mi blong tingbaot wan sakrifaes we i no selfis long wan lesen we Lod i tijim ol disaepol blong Hem taem Hem i bin wokbaot i go from ples blong holem mane blong tempol. Yufala i save stori. Elda James E. Talmage i tijim se i bin gat 13 bokis, mo ol pipol oli stap sakem insaed ol kleksen blong olgeta from ol defren samting we oli raetem long ol bokis ia. Jisas i stap lukluk laen blong ol man we oli givim mane, mo i gat ol defren kaen pipol. Sam oli givim presen blong olgeta wetem tru tingting, sam oli givim ol bigfala mane blong silva mo gol, mo oli hop se bae man i luk olgeta, mo bae oli presem olgeta from donesen blong olgeta.
“Long medel blong plante ia, i gat wan pua wido, we i putum insaed long wan long mane bokis ia tu smol koen, olsem ol selen; kontribusen blong hem, bae i no kasem haf blong wan vatu. Lod i singaotem ol disaepol blong Hem oli kam raon long Hem, i mekem oli lukluk wido ia we i pua tumas mo aksen blong hem, mo talem: ‘Tru mi talem long yufala. Kleksen we wido ya i sakem i moa long ol mane we ol narafala man ya oli sakem. Ol man ya, taem oli sakem kleksen blong olgeta, oli stap sakem haf mane blong olgeta we i stap nating nomo. Be woman ya we i pua, hem i sakem olgeta mane we hem i gat, we i blong pem kakae blong hem long hem’ [Mak 12:43–44].”3
Wido ia i no holem wan hae posisen long sosaeti blong taem blong hem. Hem i holem wan samting we i moa impoten: tingting blong hem i klin gud, mo hem i givim evri samting we hem i gat blong givim. Maet i no bigwan olsem ol narawan, i moa kwaet bitim ol narawan, mo i defren long ol narawan. Long ae blong sam, wanem hem i givim i no bigwan nating, be long ae blong Sevya, Man we “i save luksave ol tingting mo evri samting we i stap insaed long hat,”4 wido ia i givim evri samting blong hem.
Ol sista. ?Yumi stap givim evri samting i go long Lod we yumi no holemtaet wan samting i stap? ?Yumi stap sakrifaesem taem mo talem blong yumi blong mekem se jeneresen we i stap kam antap i save lanem blong lavem Lod mo obei ol komanmen blong Hem? ?Yumi stap givhan long olgeta raon long yumi, mo tu, olgeta we oli putum i save long han blong yumi–mo yumi sakrifaesem taem mo paoa blong yumi we yumi save yusum long defren wei? ?Yumi stap laef folem tufala bigfala komanmen ia—blong lavem God mo blong lavem ol pikinini blong Hem?5 Plante taem, yumi soemaot lav tru long seves.
Presiden Dallin H. Oaks i tijim: “Sevya blong yumi i givim Hemwan long wan seves we i no selfis. Hem i tijim se wanwan long yumi i mas folem Hem, we bae yumi fogetem yumiwan wetem ol selfis intres blong yumi blong save wok blong ol narawan.”
Hem i gohed i talem:
“Wan eksampol we yumi save gud blong yumi draonem yumi long wok blong ol narawan … i sakrifaes we papa mo mama i mekem from ol pikinini blong olgeta. Ol mama oli safa, oli harem soa mo no tingbaot olgeta blong oli save karem mo lukaotem wanwan pikinini. Ol papa oli stretem laef blong ol mo ol samting we oli wantem blong save sapotem wan famli. …
“… Yumi glad tu long olgeta we oli kea long ol memba blong famli we oli handikap o oli olfala. I no gat wan long ol seves ia we i askem, ?Bae mi winim wanem? Evri seves ia, yumi mas putum long saed ol gud samting blong yumi blong givim seves we i no selfis. …
“Mo evri samting ia i soem prinsipol ia we i no save finis, se yumi hapi moa, mo glad moa taem yumi tekem aksen mo givim seves from ol samting we yumi gat blong givim, be i no from ol samting we bae yumi kasem.
“Sevya blong yumi i tijim se blong stap folem Hem taem yumi mekem ol sakrifaes we i nid blong mekem blong givim yumi long seves we i no selfis long ol narawan.”6
Presiden Thomas S. Monson i tijim semmak se “maet taem bae yumi kam fes tu fes wetem Hem we i Krietem yumi, bae Hem i no askem yumi: ‘Yu holem hamas posisen?’ Be bae Hem i askem: ‘Hamas pipol yu bin helpem?’ Wanem i ril, i we, yumi no save lavem Lod kasem taem yumi wok blong Hem, taem yumi givim seves long ol narawan.”7
Long nara toktok, ol sista, bae i nomata sapos yumi sidaon long ol gudfala jea, o sapos yumi traehad blong gotru long miting we yumi sidaon long wan rosta jea we oli foldem long ro long bak. Bae i nomata sapos, from i nid, yumi go aotsaed blong helpem bebi we i krae. Wanem bae i impoten, i we, yumi bin kam wetem tingting blong givim seves, blong yumi luk gud olgeta we yumi stap givhan long olgeta mo gritim olgeta wetem glad, mo bae yumi go talem nem blong yumi long olgeta ia we oli sidaon long jea we oli foldem—we yumi go mitim man wetem frensip i nomata we oli no givim wok long yumi blong givhan long olgeta. Mo bae i impoten blong yumi mekem evri samting we yumi stap mekem wetem spesel samting ia blong seves antap long lav mo sakrifaes.
Mi kam blong save se yumi no nid blong save mekem joklet kek blong kam wan gud mo strong Praemeri tija, from se i no abaot kek. Hem i lav biaen long aksen ia.
Mi testifae se lav ia, oli mekem i kam tabu tru long sakrifaes—sakrifaes blong wan tija, mo moa tru long sakrifaes we i bigwan mo i no save finis, blong Pikinini blong God. !Mi talem witnes blong mi se Hem i stap laef! Mi lavem Hem mo wantem blong tekemaot ol selfis tingting blong save lavem mo givhan olsem we Hem i stap mekem. Long nem blong Jisas Kraes, amen.