Elda Brook P. Hales

Jeneral Atoriti Seventi

Taem we Elda Brook P. Hales i bin gat eit o naen yia, hem i stap long wan fast mo testemoni miting, mo papa blong hem i bin prisaeding bisop long taem ia. Papa blong hem i invaetem kongregesen blong kam serem testemoni, mo kolosap evriwan i kam talem testemoni. “Maet i fas taem we mi bin filim Spirit i testifae long mi se gospel i tru,” Elda Hales i talem.

Hem i bin filim witnes ia plante taem stat long tetaem ia, speseli taem hem i bin stap olsem sekretari blong Fas Presidensi stat long 2008. Taem oli bin sastenem Presiden Thomas S. Monson olsem profet mo Presiden blong Jos, mo bakegen taem oli bin sastenem Presiden Russel M. Nelson, hem i witnesem “klos blong profet i foldaon long wanwan long ol man ia, mo mi bin save, we mi no gat tu tingting, se God i bin jusum olgeta mo i singaotem olgeta blong stap olsem Presiden blong Jos long stret taem ia.”

Elda Hales, oli singaotem hem i kam wan Jeneral Atoriti Seventi long 17 Mei 2018, mo oli sastenem hem long 6 Oktoba 2018. Bambae hem i gohed blong stap olsem sekretari blong Fas Presidensi.

Hem i bon long Ogden, Yuta, YSA, long 7 Epril 1956, mo papa mo mama blong hem i Klea mo Glenn Phillip Hales; hem i kasem wan bank mo faenens digri long Weber Stet Kolej (naoia Weber Stet yunivesiti) long 1980. Afta we hem i graduet, hem i bin wok long ol komesiol bank mo long Faenens mo Rekod Dipatmen blong Jos. Hem i maredem Denise Imlay Hales Jenuware 1981, mo tufala i papa mo mama blong fo pikinini. Elda Hales i bin go long wan fultaem misin long Franis, Paris Misin, i bin kaonsela long wan bisoprik, hae pris grup lida, bisop, stek presiden, prishud man blong plei piano, Sandei Skul tija, mo wan man blong mekem siling long tempol.

Long dei ia, taem hem i bin wan yang boe, elda Hales i no bin serem testemoni blong hem. Be testemoni blong hem i bin gro strong moa stat long taem ia. Gospel blong Jisas Kraes i bin kambak tru long Profet Josef Smit; Buk blong Momon i tru, God i lavem yumi i stret evriwan mo i wantem tumas blong blesem yumi; Jisas i Sevya blong yumi, mo yumi gat blesing blong gat kampani blong Tabu Spirit oltaem wetem yumi taem yumi stap klin inaf,” hem i talem.