Seves Ia blong Man I Stretem Hemwan
I Kam long Elda Jeffrey R. Holland
Blong Kworom blong Olgeta Twelef Aposol
Mi testifae se fasin blong stretem yu wetem God mo wanwan long yufala, bae i tekem kwaet pis long sol, sapos yu no stap flas mo yu gat paoa long tingting inaf blong yu kasem.
Las Epril, Presiden Russell M. Nelson i presentem aedia ia blong wok blong givhan olsem wan wei blong kipim tufala bigfala komanmen blong lavem God mo wanwan long yumi.1 Mifala olsem ol ofisa blong Jos, i glad tumas mo kongratuletem yufala long bigfala wok ia we yufala i bin stat wetem finis. Tangkyu blong folem profet we yumi lavem long bigfala wok ia, mo no wet blong kasem moa instraksen. Jes jiam long pul mo swim. Go from olgeta we oli stap long nid. No stap nomo mo askem yuwan se bae yu swim long bak i go, o bae yu swim olsem dog i go. Sapos yumi stap folem ol besik prinsipol we oli bin tijim, laenemap yumi wetem ol prishud ki, mo lukaotem Tabu Spirit blong lidim yumi, bae yumi no save mestem rod.
Long moning ia, mi wantem tokbaot wan narasaed blong yuwan long wok blong givhan, we oli no givim wok long yu from, mo i no gat kalenda blong intaviu long hem, mo ripot laen i go long heven nomo. Bae mi serem wan simpol eksampol wetem yufala long kaen givhan ia.
Grant Morel Bowen, i wan hasban we i wok had, i lukaot gud famli, we, olsem plante, i laef wetem kaekae blong graon, mo mane i bin sot taem lokol poteto i no bin gro gud. Hem mo waef blong hem, Norma, tufala i kasem nara wok, mo long en, muv i go long wan nara taon, mo muv i kambak blong stap gud long saed blong mane. Be, sore tumas, wan samting i bin hapen, Brata Bowen i harem nogud tumas taem we, long wan tempol rekomen intaviu, bisop i gat tu tingting long toktok blong Morel se hem i stap pem wan ful taeting.
Mi no save se wijwan long tufala man ia i talem stret samting long dei ia, be mi mi save se Sista Bowen i kamaot long intaviu wetem niu tempol rekomen blong hem, be Brata Bowen i wokaot i go, wetem wan kros ia we bae i tekemaot hem long Jos blong 15 yia.
I nomata se huia i raet abaot taeting ia, i klia se tugeta, Morel mo bisop, tufala i fogetem oda blong Sevya blong “go kwik, [mo] stretem samting ya … fastaem”2 mo kaonsel blong Pol blong “yufala i no stap kros, gogo kasem san i godaon.”3 Wanem i stap, i we, tufala i no bin stretem mo san i bin godaon long kros blong Brata Bowen, blong plante dei, mo wik, mo afta, plante yia, i pruvum poen ia blong wan long ol waesman blong Rom we i talem se: “Kros, sapos yu no kontrolem, i prapa spolem yu i bitim rong ia we i mekem kros ia i kam.”4 Be merikel blong man i stretem hem, oltaem i stap wetem yumi, mo from hem i lavem famli blong hem mo Jos we hem i save se i tru, Morel Bowen i bin kambak long Jos. Bae mi talem sot wanem i bin hapen.
Boe blong Brata Bowen, Brad, i wan gud fren blong mifala mo wan Eria Seventi we i givim hat blong hem long wok long Saot Aedaho. Brad i gat 11 yia long taem samting ia i hapen, mo blong 15 yia, hem i lukluk strong tingting blong papa blong hem long relijin i go daon, we i wan witnes long nogud samting we i kamaot taem oli planem kros mo rong andastaning. Oli mas mekem wan samting. So, taem Tangkyu holidei i kam kolosap long 1977, Brad, wan studen blong 26 yia long Brigham Yang Yunivesiti; waef blong hem, Valerie; mo bebi boe, Mik, oli jiam long smol trak blong olgeta mo nomata long nogud weta, oli draev i go long Bilings, Montana. Iven bigfala sno long Wes Yeloston i no save holemtaet trifala ia blong mekem givhan wok blong olgeta wetem Brata Bowen Senia.
Taem oli kasem haos, Brad mo sista blong hem, Pam, oli askem wan praevet taem wetem papa blong tufala. “Yu yu bin wan gudgudfala papa,” Brad i talem wetem smol krae, “mo mitufala i save oltaem hamas yu lavem mifala. Be wan samting i rong, mo i rong blong longtaem finis i kam. From we oli mekem nogud long yu wan taem, ful famli ia i harem nogud blong plante yia. Mifala i brokbrok mo sore, mo yuwan nomo i save stretem hemia blong yumi. Plis, plis, afta longfala taem ia, ?yu save faenem ples insaed long hat blong yu blong lego wanem i bin hapen wetem bisop, mo bakegen, lidim famli ia long gospel olsem yu bin mekem long wan taem?”
Ples i kwaet evriwan. Nao Brata Bowen i lukluk i go long tufala ia, we i bun blong bun blong hem mo mit blong mit blong hem,5 mo talem kwaet nomo: “Yes. Yes bae mi mekem.”
Oli glad tumas be oli sapraes long ansa ia, Brad Bowen mo famli blong hem i luk hasban mo papa blong olgeta i go long nara bisop we i stap, wetem spirit blong stretem hemwan, mo putum ol samting i raet bakegen long laef blong hem. Blong ansa long visit ia we oli mekem wetem paoa long tingting, be i sek long visit ia, bisop ia, we i bin invaetem Brata Bowen plante taem blong kambak, i sakem han blong hem raon long Morel mo i holemtaet hem longlongtaem.
Afta samfala wik nomo, Brata Bowen i kambak fulwan long Jos, mo i mekem hem i klin inaf blong gobak long tempol. I no longtaem afta, hem i akseptem koling blong prisaed ova long wan smol branj blong 25 mo mekem i gro kasem wan kongregesen blong ova 100 pipol. Evri samting ia i tekem ples 50 yia i pas, be risal blong wan boe mo gel we i go givhan long stret papa blong tufala, mo gud tingting blong papa ia blong save fogiv mo muv fored i nomata se ol narawan oli no stret evriwan, i tekem ol blesing i kam we i stap gohed blong kam long Bowen famli.
Ol brata mo sista. Jisas i askem blong yumi “laef tugeta wetem lav,”6 we “bae i no gat eni rao long medel blong yufala.”7 “Hem we i gat spirit blong raorao i no blong mi,” Hem i givim woning olsem long Ol Man blong Nifae.8 I tru, bae rilesensip blong yumi long Kraes, kasem wan mak, bae oli jajem i folem rilesensip blong yumi wetem ol narawan.
“Sapos bae yu kam long mi,” Hem i talem, “mo tingbaot se brata blong yu i bin gat samting agensem yu—
“Go long brata blong yu, mo, fastaem, yu mas mekem pis wetem brata blong yu, mo afta, yu kam long mi wetem ful tingting blong hat, mo bae mi akseptem yu.”9
I tru, wanwan long yumi i save tokbaot wan longfala lis blong ol olfala mak mo harem nogud, mo nogud memori, se taem ia i stap spolem yet pis long hat blong wan, o famli, o neiba. Sapos yumi nao yumi mekem soa ia, o yumi kasem soa ia, olgeta kil ia oli mas hil blong laef i save gat praes olsem we God i bin wantem. Semmak olsem kaekae long aesbokis we ol apupikinini oli stap jekem long bihaf blong yumi, olgeta olfala samting ia, dei blong save kakae i pas finis. Plis, no lego impoten spes ia insaed long sol blong ol roten samting ia i stap moa. Olsem Prospero i talem long Alonso we i stap rigret long Strong Win, “Bae yumi no stap hevi wetem wan memori we hevi blong hem i go lus finis.”10
“Fogivim man nao bambae mi mi fogivim yu,”11 Kraes i bin tijim long taem blong Niu Testeman. Mo long taem blong yumi, Hem i talem: “Mi, Lod, bambae mi fogivim huia we bambae mi fogivim; be yufala, mi talem se yufala i mas fogivim evri man.”12 Be, hem i impoten blong eniwan long yufala we i stap gotru bigfala harem nogud, blong luk gud wanem we Hem i no talem. Hem i no talem: “Yu no gat raet blong filim bigfala soa, o ril harem nogud from ol nogud eksperiens we yu bin gat wetem wan narawan.” Mo tu, Hem i no talem: “Blong save fogiv fulwan bae yu mas gobak long wan nogud rilesensip, o gobak long abius situesen we i prapa spolem yu.” Be nomata ol bigfala nogud rong we i save kam, yumi save girap i go ova long soa blong yumi nomo taem bae yumi putum leg blong yumi i stap long rod blong tru hiling. Rod ia, i hemia blong fogivnes we Jisas blong Nasaret i wokbaot long hem, we i stap singaot long wanwan long yumi: “Kam folem mi.”13
Wetem wan invitesen olsem blong stap disaepol blong Hem mo traem mekem olsem we Hem i bin mekem, Jisas i stap askem yumi blong stap ol tul blong givim gladhat blong Hem—blong stap ol “man blong karem tok blong Kraes,” long wok blong “pulum ol narafala man oli kam fren blong hem,” olsem we Pol i tokbaot long Ol Man Korin.14 Man we i hilim evri soa, Hem we i mekem ol rong samting oli kam stret, i stap askem yumi blong wok wetem Hem long bigfala wok ia blong putum pis long wan wol we bae i no faenem pis ia long wan nara rod moa.
Olsem we Phillips Brooks i raetem: “Yu, we yu stap letem ol smol samting we yu no andastanem gud i ron i go plante yia, se bae yu stretem wan dei; yu we yu stap holemtaet raorao i laef from yu no save mekemap maen blong yu se, tedei, i dei blong sakrifaesem hae tingting blong yu mo stretem raorao; yu, we yu stap pasem man nomo long rod, yu no toktok long olgeta from samting nating nomo … ; yu we yu stap letem hat blong wan i soa from yu no talem tangkyu o sore, we yu gat tingting blong talem wan dei, … go naoia mo mekem samting ia we maet bae yu neva gat wan nara janis blong mekem afta.”15
Ol brata mo sista we mi lavem. Mi testifae se blong fogivim man mo lego ol rong samting, olfala mo niuwan, i stamba blong hamas Atonmen blong Jisas Kraes i bigwan. Mi testifae se blong fiksim samting long saed blong spirit, i kam nomo long tabu Ridima blong yumi, Hem we i spid i kam helpem yumi “wetem paoa blong hiling long ol wing blong hem.”16 Yumi talem tangkyu long Hem, mo long Papa blong yumi long Heven we i bin sendem Hem, blong niufala laef ia, wan fiuja we i fri long olfala harem nogud mo mistek blong bifo, i posibol, be tu, from wan i pemaot laef ia, mi pem wetem wan bigfala praes we i harem i soa from, we saen blong hem i blad we i ron blong Smol Sipsip ia.
Wetem atoriti blong wan aposol we Sevya blong wol i givim long mi, mi testifae se fasin blong stretem yu wetem God mo wanwan long yufala, bae i tekem kwaet pis long sol, sapos yu no stap flas mo yu gat paoa long tingting inaf blong yu kasem. “Stop blong rao wan wetem narawan,” Sevya i askem17 Sapos yu save wan olfala soa i stap, yu stretem. Kea long wanwan long yufala wetem lav.
Ol fren we mi lavem yufala. Long seves ia, we yumi evriwan i stap mekem, blong stretem ol man mo yumiwan, mi mi askem yufala blong stap man blong putumbak pis—blong lavem pis, blong lukaotem pis, blong putum pis, blong holemtaetgud pis. Mi askem strong hemia long nem blong Prins blong Pis, we i save evri samting abaot “ol kil we oli givim long [hem] long haos blong ol fren blong [hem],”18 be, i stil faenem paoa blong fogiv mo fogetem—mo hilim man—mo i hapi. From hemia, mi prea, from yu mo from mi, long nem blong Masta Jisas Kraes, amen.