Yufala I No Mekem Tingting blong Yufala I Trabol
I Kam long Elda Ronald A. Rasband
Blong Kworom blong Olgeta Twelef Aposol
Gat hop, ol brata mo sista. Yes, yumi stap long denja taem, be taem yumi stap long kavenan rod, yumi no nid blong fraet.
Mi ademap witnes blong mi long ol mesej we Presiden Russell M. Nelson mo Elda Quentin L. Cook oli jes givim abaot agrimen mo fasin blong stap wan blong Kaonsel blong Fas Presidensi mo Kworom blong Olgeta Twelef Aposol. Mi save se ol revelesen anaonsmen ia oli maen mo oli tingting blong Lod mo bae oli blesem mo mekem wanwan man, woman mo famli i kam strong moa, mo tu, Jos blong Jisas Kraes blong Ol Lata-dei Sent blong plante jeneresen we i stap kam.
Sam yia i pas, wan long ol yang mared gel mo hasban blong hem oli askem Sista Rasban mo mi, wan impoten kwestin we i tanem laef: “Hem i sef mo waes yet blong karem ol pikinini oli kam long wan wol ia we i kam nogud mo i mekem man i fraet?
Nao; hemia i wan impoten kwestin blong wan mama mo papa i tingting long hem wetem ol pikinini blong ol we oli mared. Mitufala i save harem save fraet long voes blong tufala mo filim fraet long hat blong olgeta. Ansa blong mifala long tufala i wan strong, “Yes, i moa bitim oraet,” mo mifala i serem ol stamba tijing blong gospel, mo filing blong mitufala mo eksperiens blong laef.
Fraet i no wan niu samting. Ol disaepol blong Jisas Kraes, we oli aot long Solwota blong Galili, oli bin fraet long win, mo wef long tudak long naet.1 Semmak olsem ol disaepol tedei, yumi gat ol fraet i stap. Ol singgel adalt blong yumi oli fraet blong mekem ol komitmen olsem blong mared. Ol yang mared wan, olsem ol pikinini blong yumi, oli fraet blong karem ol pikinini long wan wol we i kam nogud evriwan. Ol misinari oli fraet long plante samting, speseli blong toktok long ol strenja. Ol wido oli fraet blong gohed olgetawan. Ol yangfala oli fraet se bae oli no akseptem olgeta; ol skul pikinini oli fraet long fas dei long skul; ol yunivesiti studen oli fraet blong karem mak blong tes. Yumi fraet blong mestem samting, harem nogud long hat, mo samting we yumi no save. Yumi fraet long ol hariken, ol etkwek, mo ol faea we oli stap prapa spolem ol ples mo laef. Yumi fraet se bae oli no yusum yumi, o, blong oli jusum yumi. Yumi fraet se bae yumi no gud inaf; yumi fraet se Lod bae i no givim blesing. Yumi fraet long jenis, mo fraet i save go antap i kasem bigfala fraet. ?Yumi tokbaot evriwan ia?
Stat long taem bifo, fraet i stap katem sot lukluk blong ol pikinini blong God. Oltaem, mi laekem stori blong Elisa long Seken King. King blong Siria i sendem wan ami we “oli kasem taon ya long naet, mo oli go hivap raon long hem.”2 Tingting i blong holemtaet mo kilim ded profet Elisa. Afta yumi ridim:
“Nao long eli moning, wokman blong man blong God i wekap, i go afsaed, nao i luk ol soldia blong Siria oli stap hivap raon long taon ya. “Man blong wok blong hem i talem long hem: ‘!Profet! !Naoia yumi lus finis! ?Bambae yumi mekem olsem wanem?’”3
Fraet ia i toktok.
“Be profet i talem se, ‘Yu no fraet. Olgeta long saed blong yumi oli plante moa, i winim olgeta ya.’”4
Be hem i no stop ia.
“Mo Elisa i prea se, “Hae God. Plis yu openem ae blong man ya, blong hem i luk paoa blong yu.” Nao Hae God i openem ae blong man ya, mo hem i luk we hil ya we taon i stap long hem i fulap gud long faea we i olsem ol hos wetem ol kat blong faet we oli stap hivap raon long profet ya.”5
Maet yumi no gat ol hos mo ol faea kat blong ronemaot ol fraet blong yumi mo winim ol devel blong yumi, be lesen i klia. Lod i stap wetem yumi, i gat tingting long yumi mo i stap blesem yumi long ol wei we Hem nomo i save mekem. Prea i save singaotem paoa mo revelesen we yumi nidim blong putum tingting blong yumi long Jisas Kraes, mo sakrifaes blong Hem we i pem praes from yumi. Lod i bin save se, samtaem, bambae yumi fraet. Mi bin stap ia, mo yufala tu, from hemia nao ol skripja oli ripitim advaes blong Lod:
“Taswe, yufala i stap glad, mo yufala i no fraet.”6
“Lukluk long mi long evri tingting blong [yufala]; no gat tu tingting, no fraet.”7
“No fraet, smol grup”8 Mi laekem toktok ia, “smol grup.” Long Jos ia, maet namba blong yumi i smol long wei we wol i stap kaontem paoa, be taem yumi openem ae blong spirit blong yumi, “Olgeta long saed blong yumi oli plante moa, i winim olgeta ya.”9 Man blong yumi blong Lukaot long Sipsip, Jisas Kraes, i gohed: “Letem wol mo hel i kam wan agensem yufala, from we sapos yufala i stanap antap long strong ston blong mi, bambae oli no save win.”10
?Olsem wanem oli ronemaot fraet? Yangfala boe ia, i stap stanap long saed blong Elisa, wan profet blong God. Yumi gat semfala promes. Taem yumi lisin long Presiden Russel M. Nelson, taem yumi mekem folem advaes blong hem, yumi stap stanap wetem wan profet blong God. Tingbaot ol toktok blong Josef Smit: “Mo nao, afta long plante testemoni we oli bin givim abaot hem, hemia i testemoni, laswan long evriwan, we hem i givim abaot Hem: se !Hem i stap laef!11 Jisas Kraes i stap laef. Lav blong yumi long Hem mo gospel blong Hem i ronemaot fraet.
Tingting blong yumi, blong “oltaem gat Spirit blong hem”12 i stap wetem yumi, bae i pusum fraet blong yumi long saed, blong yumi save lukluk we i no save finis long laef blong yumi long laef ia. Presiden Nelson i givim woning ia: “Be, long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.”13
Lod i talem, long saed blong ol jik we bae i kavremap ples mo bae i mekem hat blong plante oli kam strong: “Be ol disaepol blong mi bambae oli stanap long ol tabu ples, mo bambae oli no muv.”14
Mo tabu kaonsel ia i kam: “Yufala i no mekem tingting blong yufala i trabol tumas, from we, taem evri samting ia i kam blong hapen, bae yufala i save se ol promes we mi bin mekem long yufala bambae oli hapen.”15
Stanap long ol tabu ples—no mekem tingting i trabol—mo ol promes oli kamtru. Bae yumi lukluk long wanwan ia long saed blong fraet blong yumi.
Faswan, stanap long ol tabu ples. Taem yumi stanap long ol tabu ples—ol hom we oli stret mo gud, ol japel we oli dediketem, ol tempol we oli konsekretem—yumi filim Spirit blong Lod i stap wetem yumi. Yumi faenem ol ansa long ol kwestin we oli stap trabolem yumi, o pis ia blong pusum kwestin long saed. Hemia Spirit we i stap long aksen. Ol tabu ples ia insaed long kingdom blong God long wol ia, i askem respek blong yumi, respek long ol narawan, bes fasin blong yumi blong stap laef folem gospel, mo hop blong yumi blong pusum long saed ol fraet mo lukaotem hiling paoa blong Jisas Kraes tru long Atonmen blong Hem.
I no gat rum blong fraet long ol tabu ples ia blong God, o long hat blong ol pikinini blong Hem. ?From wanem? From lav. God i lavem yumi—oltaem—mo yumi lavem Hem. Lav blong yumi long God i sakemaot evri fraet, mo lav blong Hem i fulap long ol tabu ples. Tingting long hemia. Taem yumi no strong long ol komitmen blong yumi long Lod, taem yumi kamaot long rod blong Hem we i go long laef we i no save finis, taem yumi kwestinim o gat tu tingting long mining blong tabu plan blong Hem, taem we yumi letem fraet i openem doa long evri kompanion blong hem—nao Spirit i aot long yumi, mo yumi no stap wetem Lod. Sapos yu save se i olsem wanem, yu save se i no wan gud ples blong stap long hem. Be, taem yumi stanap long ol tabu ples, yumi save filim lav blong God, mo “lav we i stret evriwan i ronemaot evri fraet.”16
Nekis promes i: “Yufala i no mekem tingting i trabol.”17 I nomata hamas fasin nogud mo bigfala trabol i fulumap wol, yumi gat promes se tru long evri dei fasin blong stap fetful long Jisas Kraes, “pis [blong God] i bigfala moa, i bitim save blong yumi.”18 Mo taem Kraes i kam, wetem evri paoa mo glori, bae ivel, faet mo nogud jastis bae i stop.
Longtaem i pas, Aposol Pol i profesae abaot taem blong yumi, i talem long yang Timoti:
“Long taem ya we bambae i klosap long Lasdei, laef long wol ya bambae i kam strong tumas.
“Bambae ol man oli save tingbaot olgeta nomo, … oli wantem mane tumas, … oli tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkyu, mo oli no save tingbaot God.
“Oli wantem tumas ol samting we oli stap harem gud long hem, i winim we oli stap lavem God.”19
Tingbaot, olgeta we oli stap wetem yumi, long tugeta saed blong vel, olgeta ia we oli lavem Lod wetem evri gat, paoa long tingting, maen, mo paoa long bodi, oli moa plante bitim olgeta ia.20 Sapos yumi tru se yumi trastem Lod mo wei blong Hem, sapos yumi stap fulwan long wok blong Hem, bambae yumi no fraet long ol paoa blong wol mo mekem tingting blong yumi i trabol wetem olgeta. Mi askem strong long yufala blong pusum long saed ol paoa blong wol, wetem ol fos blong hem mo lukaotem spirit long evri dei laef blong yufala. Lavem wanem Lod i lavem—we i tekem olgeta komanmen blong Hem, ol tabu haos blong Hem, ol tabu kavenan blong yumi wetem Hem, sakramen evri Sabat dei, toktok blong yumi tru long prea—mo bae tingting blong yufala i no trabol.
Las poen: trastem Lod mo ol promes blong Hem. Mi save se evri promes blong Hem bae oli kamtru. Mi save hemia i strong semmak olsem we mi stanap long ples ia long fored blong yufala, long tabu miting ia.
Lod i talemaot long revelesen: “From olgeta we oli waes mo oli bin akseptem trutok, mo oli bin tekem Tabu Spirit olsem gaed blong olgeta, mo oli no bin folem ol giaman toktok—i tru, mi talem long yufala, bambae mi no katemdaon olgeta mo no sakem olgeta i go long faea, be bae oli stap laef long dei ia.”21
Hemia nao from wanem yumi no mas mekem tingting blong yumi i trabol from ol trabol blong tedei, from olgeta long bigfala haos ia, from olgeta we oli jik long ones traehad mo strong seves blong yu long Lod Jisas Kraes. Fasin blong gat hop, paoa long tingting, iven jareti, i kam long hat we trabol i no spolem hem. Presiden Nelson, we i gat hop abaot fiuja i talem bakegen long yumi: “Sapos yumi mas gat eni hop se yumi save sevsevem ol plante kaen voes ia mo ol tingting blong ol man we oli atakem trutok, nao yumi mas lan blong kasem revelesen.”22
Blong save kasem revelesen blong yuwan, yumi mas putum i kam faswan, fasin blong laef folem gospel mo leftemap tingting blong stap fetful mo gat Spirit long ol narawan, mo tu, long yumiwan.
Spencer W. Kimball i wan profet taem mi yangfala. Long ol yia we i jes pas, afta we oli singaotem mi wan Aposol, mi bin faenem pis long fas mesej blong hem long jeneral konfrens long Oktoba 1943. Hem i harem se koling blong hem i bigwan; mi save filing blong hem. Elda Kimball i talem: “Mi bin tingting plante mo prea plante, mo livim kakae mo prea plante. I gat ol tingting we oli no agri we i kam long maen blong mi—sam voes we oli talem: ‘Yu no save mekem wok ia. Yu no klin inaf. ‘Yu no naf blong mekem’—mo oltaem, long en, wan tingting i win: ‘Yu mas mekem wok we oli givim—yu mas save mekem, mas klin inaf mo kwalifae from wok ia.’ Mo faet ia i gohed.”23
Tingting blong mi i kam antap long klin testemoni blong Aposol ia we bae i kam namba 12 Presiden blong bigfala Jos ia. Hem i bin luksave se hem i mas lego ol fraet blong hem i stap blong “mekem wok we oli givim,” mo bae hem i mas dipen long Lod blong gat paoa blong mekem se hem i “save, i klin inaf mo i kwalifae from wok ia.” Yumi tu, yumi save mekem. Ol faet ia bae oli gogohed, be bae yumi fesem olgeta wetem Spirit blong Lod. Bae tingting blong yumi i no trabol from se taem yumi stanap wetem Lod mo stanap from ol prinsipol blong Hem mo plan blong Hem we i no save finis, yumi stap stanap long tabu graon.
Nao, ?weswe long gel o dewen ia we i askem bigfala kwestin ia, we i mekem tufala i fraet sam yia i pas? Tufala i bin tingting long storian blong mifala long naet ia; tufala i bin prea mo livim kakae mo mekem desisen. Mifala i hapi mo glad long tufala, mo long mitufala, ol bubu, se naoia oli gat blesing ia blong gat seven naes pikinini taem oli stap wokbaot i go wetem fet mo lav.
Gat hop, ol brata mo sista. Yes, yumi stap long denja taem, be taem yumi stap long kavenan rod, yumi no nid blong fraet. Mi blesem yufala se taem yufala i mekem olsem, bae tingting i no trabol from taem we yumi stap laef long hem, o ol trabol we bae oli stap kam. Mi blesem yufala blong jusum blong stanap long ol tabu ples mo no muvmuv. Mi blesem yufala blong biliv long ol promes blong Jisas Kraes, se Hem i stap laef, Hem i stap lukaot long yumi, i kea long yumi, mo i stanap long saed blong yumi. Long hemia, blong Masta, mo Sevya blong yumi, Jisas Kraes, amen.