E hina’aro te mau ta’ata ato’a i te ’evanelia

Nā Joy Teresa°M. Moises

’Ua ’ōpua vau e tāvini i te hō’ē misiōni, i muri a’e rā i te ha’api’ira’a tuatoru ’ua mana’o vau ē, ’aita e tītauhia iā’u ’ia tāvini—e tae roa atu ’ua roa’a iā’u te hō’ē ’ohipa i pīha’i iho i te mau tamahine hāmani-’ino-hia. I muri iho, ’ua ’ite vau ē, e hina’aro te mau ta’ata ato’a i te ’evanelia.

The Lost Coin, nā Harold Copping © Providence Collection / parau fa’ati’a nō roto mai i te GoodSalt.com

I tō’u haerera’a i te Paraimere, ’aita vau e ha’amana’o nei i te rahira’a taime ’a ani mai ai tō’u mau ’orometua ha’api’i, ’o vai i rotopū ia mātou e haere e tāvini i te hō’ē misiōni rave tāmau. I roto i tō’u ferurira’a tamari’i ’āpī, ’ua parau noa vau e haere au.

’Ua fa’a’ite mai tō’u metua vahine iā’u i te faufa’a rahi o te ha’aputuputura’a ia ’Īserā’era, ma te tauturura’a i te mau misiōnare rave tāmau ’ia ha’api’i ’e ’ia fa’a’ite i te ’evanelia. I te hō’ē taime, ’ua ’āmui atu vau iāna nō te ’imi i te fare o te hō’ē tuahine nō te pāroita, ’aita e haere fa’ahou mai nei i te purera’a i te hō’ē tau taime te maoro. ’Ua fātata roa māua i te mo’e nō te mea ’aita māua i ’ite pāpū i te vāhi tei reira ’oia i te orara’a. ’Ua ’imi itoito noa tō’u metua vahine i te fare o te reira tuahine, ma te riri ’ore. Mai te vahine i roto i te parabole nō te titerāma mo’e (hi’o Luka 15:8–10), ’ua ’iteahia mai iāna te tuahine ’e ’ua ’oa’oa roa.

Te huru o tō’u metua vahine hōro’a-maita’i-ra’a iāna nō te ’ohipa a te Fatu, ’eiaha noa i te fa’a’itera’a i te ’evanelia i roto ato’a rā i te tahi atu mau pi’ira’a o te ’Ēkālesia, ’ua tauturu te reira iā’u ’ia ’ite ē, e ti’a i te mau ta’ata ato’a ’ia tāvini i te Fatu, noa atu nā roto i te mau rāve’a ha’iha’i roa.

’A tere noa ai te mau matahiti, ’ua fāri’i au i te parau tu’ite nō te séminaire, ’ua fāri’i au i tā’u feti’a nō te feiā ’āpī tamāhine, ’ua fāri’i i te parau tu’ite nō te fare ha’api’ira’a tuarua ’e ’ua ha’amata i te rave i te ’ohipa. Haere iti iti noa ra, te mana’o nō te riro ’ei misiōnare rave tāmau ’ei ’ohipa e ’ere i te mātāmeha’i. Noa atu e mea itoito noa ā vau ’e ’ua rave maita’i i tō’u mau pi’ira’a i roto i te ’Ēkālesia, ’ua parau vau iā’u iho ē, « ’aita e fifi ’ia ’ore e tāvini i te hō’ē misiōni rave tāmau, nō te mea e ’ere te reira i tā’u fa’ahepora’a. E tuahine au, ’e e nehenehe au e tāvini i te Fatu nā roto i te tahi atu ā mau rāve’a ».

E aha te mea i fa’ataui i tō’u ferurira’a

I te 22ra’a o tō’u matahiti, ’ua ti’a iā’u ’ia rave i te ’ohipa i roto i te hō’ē pū i reira vau e tauturu ai i te mau tamāhine tei hāmani-’ino-hia ’e tei tāu’a-’ore-hia. ’Ua ’oto vau nō rātou. ’Ua ’ite au e mea nāhea te hāmani-’ino-ra’a i te ha’amauiuira’a i tō rātou māfatu ’e te ha’amoura’a i tō rātou here nō rātou iho. ’Ua tāmata te tahi pae o rātou i te ’ōnohi ia rātou. ’Aita vetahi o rātou i hina’aro e ti’aturi i te hō’ē ta’ata. E rave rahi o rātou ’aita e vai fa’ahou ra te tīa’ira’a i roto i te orara’a ’e ’aita e fāri’i nei i te here o te Fa’aora.

Pinepine au i te ui iā’u iho : « E nehenehe teie mau hāmani-’ino-ra’a e ’apehia°? ’Āhiri nā ’ua fāri’i tō rātou feiā hāmani ’ino i te ’evanelia°? ’Āhiri nā ’ua riro mai tō rātou mau metua ’ei melo nō te ’Ēkālesia, hou teie mau tamāhine ’a fānauhia mai ai°? » ’Ua ’ite a’era vau ē, e’ita paha teie mau tamāhine e ora i teie mau tāmatara’a, ’āhiri tō rātou mau metua ’e tō rātou feiā hāmani ’ino i fāri’i ’e i ora i te ’evanelia.

Te ferurira’a i teie mau uira’a ’e te ’ohipara’a i te pū, ’ua tauturu iā’u ’ia hāro’aro’a ē, e hina’aro te mau ta’ata ato’a i te ’evanelia. Mai te nu’u a Helamana i roto i te Buka a Moromona tei aro nō te pāruru i tō rātou fa’aro’o ’e tō rātou ’utuāfare, tē hina’aro nei te Fatu i te mau misiōnare rave tāmau nō te fa’a’ite i tāna ’evanelia ’e nō te pāruru i tōna pātireia.

Na te mau ’itera’a tā’u i fāri’i i pīha’i iho i te mau tamāhine i te pū, i fa’auru iā’u ’ia haere noa nā ni’a i te ’ē’a, i reira Fatu e hina’aro ai ’iā’u ’ia haere. ’Ua fa’aoti au ē, e ti’a iā’u ’ia ’āmui atu i te nu’u misiōnare a te Fatu. ’Ua ’ite mai ’oia i teie hina’aro, ’e ’ua pi’ihia vau ’ia tāvini i roto i te misiōni nō Cauayan, Firipino.

Tāvini i te hō’ē misiōni

I roto i tā’u misiōni, ’ua ’ite au i te mau ta’ata i te tauira’a ma te ha’api’ira’a mai i te ’evanelia. ’Ua ha’api’i au i te mau ta’ata ’aita i ’ite nāhea e fa’a’ore i te hapa, tei puhipuhi i te ’ava’ava ’e tei inu i te ’ava, tei vai te te’ote’o, tei ’ore i ’ite nāhea ’ia pure. Maoti te ’evanelia, ’ua fa’aru’e rātou i tā rātou mau peu tahito ’ia ti’amā rātou i te mea tā te Atua i fafau mai°: te ora mure ’ore.

Maoti te tāra’ehara a te Fa’aora, ’ua ha’api’i mai au e nehenehe te ta’ata ato’a e ha’amata ’aore rā e ho’i fa’ahou mai i ni’a i te ē’a ’āfaro ’e te piriha’o, mai te mea e tātarahapa rātou. E tauturu te ’evanelia a Iesu Mesia ia tātou ’ia taui ’e ’ia haere i mua e tae atu i te maita’i-roa-ra’a, ’e ’ia vai ti’amā nō te mau ha’amaita’ira’a rahi tā te Metua i te ao ra i fa’aineine nō tātou. E nehenehe teie mau tauira’a e tae mai ma te ’oto i te ’oa’oa, ma te huehue i te hau, ma te riri i te fa’a’orera’a hara, ma te paruparu i te pūai, ma te au ’ore i te here.

E ha’amaita’ira’a rahi tō’u i te rirora’a ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei. Tē tauturu nei te ’evanelia a Iesu Mesia iā’u ’ia māramarama i tō’u faufa’a ’ei tamāhine nā te mau metua i te ao ra, tae noa atu i roto i te mau huru tupura’a ’ino. E tāmāhanahana noa tō tātou Metua i te ao ra iā’u nā roto te Vārua Maita’i. ’Ua riro te mau pāpa’ira’a mo’a ’ei ’avei’a nō’ū, ’ia ta’a ’ore ana’e au ’e ’ia tītauhia iā’u ’ia rave i te mau fa’aotira’a.

Tē tūtava nei au ’e tō’u ’utuāfare ’ia fa’a’oroma’i pāpū ē tae noa atu i te hope’a. Tē māuruuru nei au i te fa’aipoipora’a i te hō’ē tāne tei mau i te autahu’ara’a ’e e ’itera’a pāpū pūai tōna nō te ’evanelia a Iesu Mesia tei fa’aho’i-fa’ahou-hia mai. E ’ere tā’u fafaura’a ’e te Fatu e nō’u ana’e nō tō’u ato’a rā ’utuāfare ’e nō tōna pātireia.

Tē ora nei te ta’ata pāpa’i i Firipino.