Tā’u misiōni tāmau

Nā Christopher Deaver, California (Marite)

’Ua toro mai te rata hope’a a tō’u metua tāne i tō’u ananahi, ma te hōro’a mai iā’u i te mau parau faufa’a rahi roa ’ino iā’u nei.

Tē ’oa’oa ra vau i tā’u misiōni rave tāmau i ni’a i te mau mou’a nehenehe nō Cajamarca (Pērū), i te fa’arurura’a tō’u metua tāne i te ma’i uaua roro. ’Aita i maoro roa i muri iho, ’ua fa’aru’e mai ’oia.

I tō’u fārereira’a i tō’u peresideni misiōni, ’ua ta’i au i tō’u ha’amana’ora’a ē, ’ua ha’api’i tō’u pāpā iā’u i te aura’a ’ia riro ’ei misiōnare ’e ’ei ta’ata parauti’a. ’Ua pāpa’i mai ’oia iā’u i te mau hepetoma ato’a, ma te fa’a’ite i tōna ’itera’a pāpū, ma te ha’api’i mai iā’u i te mau mana’o pūai o te ’evanelia, ’e ma te fa’aitoito iā’u ’ia rave ma tō’u maita’i roa a’e.

I muri a’e i tā māua fārereira’a, ’ua hōro’a mai te peresideni misiōni i te hō’ē rata iā’u—te rata hope’a a tō’u metua. ’Ua fa’atoro mai tāna rata i ni’a i tō’u ananahi, ma te hōro’a mai i te mau parau faufa’a rahi roa ’ino iā’u nei :

« Tē vai fa’ahou ra tā ’oe [misiōni] i roto i te tahi tau ’āva’e—te hō’ē misiōni fifi roa, i reira ’oe e ti’aturihia ai nō te pūpū i tō ’oe orara’a i te mau parau tumu ’o tā ’oe i ha’api’i i te ta’ata, i te ravera’a i te mau mea tā ’oe i poro noa ana ē tae mai i teie taime. E nehenehe te reira e riro ’ei misiōni manuia roa a’e. E au ’oe mai te fa’ahopue i roto i te faraoa…

« ’Ua here mātou ia ’oe ’e tē pure nei mātou nō ’oe. ’A rave itoito i te ’ohipa ’e ’a rave i te mau ’ohipa ti’a. »

’A tai’o ai au i tāna mau parau, ’ua ta’i au—ma te ’oto, nō te mea ’o tāna mau parau hope’a iā’u i roto i teie orara’a, ’e ma te ’oa’oa, nō tō te reira mana ’e te hope’a rahi nō’u. I ’ite au ē, tā’u misiōni i muri iho—te toe’a o tō’u orara’a—terā mau ïa te fā. E taime ïa nō te tāmatara’a mau, ’e e tītauhia te mau mea ato’a tā’u i ha’api’i mai ’e tā’u i ’ite ’ei misiōnare.

’Ua ’ite au ē, e ’ōpuara’a hōhonu tā te Metua i te ao ra nō tātou tāta’itahi. E nehenehe tāna e fa’anu’u i ni’a i tō tātou mau taime i ni’a i te fenua nei, ma te hōro’a ia tātou i te mata nō te hi’o ’e nō te ’ite i tāna parau mau. I ’ite au i te reira ’a hōro’a ai au i tō’u orara’a iāna ra ’e ’a ’ite ai au i tāna mau ha’amaita’ira’a. ’E i ’ite au i te reira ’a ’ohipa ’āmui ai māua tā’u vāhine fa’aipoipo nō te patu i te hō’ē ’utuāfare tei ’ī i te tīa’ira’a, i te mau tamari’i ’e i te ’evanelia.

’Ua hōpoi mai te Fa’aora i te pūai ia mātou ’a tuturi ai mātou i raro, ’a haere ai i roto i te mau pāpa’ira’a mo’a, i te hiero ’e ia vetahi ’ē nō te tāvini atu. ’Ua ’ite au i te rima o te Fatu i te hōhorara’a i roto i te mau taime fa’ahiahia o tō’u orara’a ’a fa’a’ite ai au i te ’evanelia i te ’utuāfare ’e i te mau hoa.

Teie ho’i tāna misiōni, « ’ia fa’atupu i te tāhuti ’ore ’e te ora mure ’ore o te ta’ata nei » (Mose 1:39). ’Oia mau, tē tāmau noa nei ā taua misiōni ra.