« ’Eiaha na e mata’u », Liahona, Tiurai 2023.
Te reo o te feiā mo’a i te mau mahana hope’a nei
’Eiaha na e mata’u
’Ua ’ite au ē, e ’oa’oa tātou i te fa’a’itera’a i te ’evanelia i te mau ta’ata e rave rahi.
Hōho’a i hōro’a-noa-hia mai e te fatu hōho’a
E rave rahi o tō’u mau hoa ’e tō’u mau hoa pīahi e ’ere i te melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, e ani pinepine mai iā’u nō ni’a i te ’Ēkālesia. I muri a’e i te hō’ē taime, ’ua rohirohi roa vau i te pāhono-fa’ahou-ra’a i taua mau uira’a ra, nō reira ’ua feruri au i te hō’ē rāve’a.
E mea au nā’u ’ia hāmani i te mau video natirara nō te fa’a’ana’anatae i te ta’ata. Tē hāmani nei au i te mau video pehe, te mau video ha’amaramarama, ’e te mau video hō’ata. I te hō’ē mahana, ’a feruri ai au i te mea tā’u e rave nō tā’u video nō muri iho, ’ua fa’aoti au e hāmani i te hō’ē video ’o tei pāhono i te mau uira’a nō ni’a i te ’Ēkālesia.
’Ua haru mai au i tā’u camera. I muri iho, ma te pāpa’i ’ore i te mea tā’u e parau, ma te ha’amana’o rā i te mau pāpa’ira’a mo’a faufa’a tā’u i hina’aro e fa’ahiti, ’ua hāmani au i te video. ’Aita roa atu vau i ’ite e aha tē tupu mai. ’Ua fa’auru-noa-hia vau e hāmani i te video. Mai ia Nephi, « ’ua arata’ihia vau e te Vārua, ’e ’aore au i ’ite nā mua roa i te mau mea tā’u e ti’a ’ia rave » (1 Nephi 4:6).
Ma te ha’ape’ape’a ’ore e aha tā tō’u mau hoa, tā tō’u mau hoa ha’api’ira’a ’e te mau fēti’i—te mau melo o te ’Ēkālesia ’e ’aore rā, te mau melo ’ore—e parau mai, ’ua fa’auta uira au i te reira.
Tau hepetoma i muri mai i te fa’auta-uira-ra’a-hia te video, ’ua ha’amata vau i te fāri’i i te tahi mau mana’o i ni’a i tā’u mau rāve’a tūreiara’a tōtiare. ’Ua ha’amata te ta’ata ’aita vau i mātau i te paraparau ’e i te ha’amāuruuru iā’u nō tā’u video. Nō tā’u video, ’ua ha’amata ato’a te hō’ē ta’ata i te fāri’i i te mau ha’api’ira’a misiōnare. I muri iho, ’ua fa’aoti taua ta’ata ra e bāpetizo iāna.
Mai te taime ’a hāmani ai au i te video, e au ra ē te mau ta’ata tā’u i mātau e ’ere i te melo nō te ’Ēkālesia, ’ua ri’i mai iā’u—hau atu paha. E rave rahi o rātou tei fa’aea i te fa’ahapa i te ’Ēkālesia. ’Ua fa’aea vetahi i te ui mai i te hō’ē ā mau uira’a nō ni’a i te ’Ēkālesia, nō te mea e pāhonora’a tā rātou i teienei.
’Eiaha na tātou e mata’u ’ia rave i te mea tā te Fatu i fa’aue mai ia tātou. ’Ua fa’aue ’oia i te mau ’āpōsetolo : « E haere ’outou ē ’ati noa a’e te mau fenua ato’a e fa’aite haere i te ’evanelia i te ta’ata ato’a » (Mareko 16:15).
Tē parau fafau atu nei au ē, e’ita tātou e tātarahapa i te ha’apa’ora’a i tāna parau.