« Te ’itera’a i te mau temeio a te Fa’aora i roto i tō tātou orara’a », Liahona, Tiurai 2023.
Te mau temeio a Iesu
Te ’itera’a i te mau temeio a te Fa’aora i roto i tō tātou orara’a
E maha ha’api’ira’a nō roto mai i te fa’aorara’a te Fa’aora i te matapō.
Fa’ata’ara’a nō roto mai Tōna fa’atāhinura’a i te mata, nā Walter Rane
Tē vai ra te mau taime i roto i tō tātou orara’a, tē ti’aturi nei ’e tē pure nei tātou nō te mau temeio. Penei a’e nō te hō’ē ta’ata tei herehia ’aore rā nō tō tātou iho maita’i. Tā tātou tīa’ira’a, ’ia pāhonohia mai tā tātou tāparura’a, ’ia tāta’ihia te fifi i tupu, ’ia tāmarūhia te vārua pe’ape’a ’e ’ia hōro’a mai te Fatu o te mau temeio i te fa’aotira’a tā tātou e hina’aro. Mai te mea e ’ere te hope’ara’a i te mea tā tātou e tīa’i ra ’aore rā tei roto i te tārena tā tātou i pure, i te rahira’a taime e uiui tātou nō te aha ra.
Tē ha’api’i nei Moroni, « e a’o atu ho’i au ia ’outou e ta’u mau taea’e here e ha’amana’o ’outou ē, e hō’ē noa huru tōna i nanahi, i teie nei mahana ’e a muri noa atu°; ’e taua mau mea hōro’a tā’u e parau nei e ’ore roa ïa e fa’a’orehia ’a mau ai te fenua, maori rā nō te fa’aro’o ’ore o te tamari’i a te ta’ata nei » (Moroni 10:19).
Tē vai noa ra ānei te reira mau hōro’a ’e te mau temeio, tei pāpa’ihia i roto i te mau pāpa’ira’a mo’a i tō tātou nei ’anotau°? Nāhea tātou ’ia fāri’i i te reira mau ha’amaita’ira’a ? Tē ’ite ra ānei te Fa’aora i te mea e tupu nei i roto i tō tātou orara’a ’e, ’ua hina’aro ānei ’oia e fa’aora ia tātou i tō tātou mau tāmatara’a°?
Tē hina’aro nei au e fa’a’ohipa i te temeio a te Fa’aora i te hōro’ara’a ’ia ’ite te matapō, ’ei niu nō te pāhono i teie mau uira’a. (’Ei hi’ora’a, hi’o te Mataio 9:27–31°; 12:22–23°; Mareko 8:22–26°; 10:46–52°; Ioane 9:1–11.)
E aha tā tātou e nehenehe e ha’api’i mai nō ni’a i te misiōni a te Fa’aora nā roto mai i tāna mau temeio°?
Nō te māramarama i te fa’aurura’a a te hō’ē temeio i ni’a ia tātou ’e i roto i tō tātou orara’a, e ha’amata na tātou nā roto i te fa’ata’ara’a e aha te hō’ē temeio. ’Ua riro te mau temeio « ’ei tāpa’o fa’a’ite i te mau ’āti Iuta ē, ’o Iesu te Mesia… E rave rahi o te reira ’ei tāpa’o ato’a, ’ei ha’api’ira’a… i te mau parau mau hanahana… Te mau temeio ’ua riro ’e tē riro nei ’ei pāhonora’a i te fa’aro’o ’e ’o tāna fa’aitoitora’a maita’i roa a’e. ’Aita roa atu te reira i ravehia ma te pure ’ore, te hina’aro ’ore, ’e te fa’aro’o ’ore ».1
’Ua parau Elder Ronald A. Rasband nō te pupu nō te Tino ’Ahuru ma Piti ’āpōsetolo ma te ’ōhie noa ’e te nehenehe°:
« Te mau temeio e mau ’ohipa hanahana ïa, e mau fa’a’itera’a ’e e mau ’itera’a nō te mana fāito ’ore o te Atua ’e e ha’apāpūra’a ē, ’hō’ē noa huru tōna inanahi, i teie nei mahana, ē a muri noa atu’ [Moroni 10:19]
« … E tāroara’a (prolongement) te mau temeio nō te fa’anahora’a mure ’ore a te Atua ; e taura pāruru ora mai te ra’i mai i te fenua nei ».2
Nō reira, hō’ē rāve’a maita’i roa nō te tuatāpapa i te mau temeio a te Fa’aora ’e i te ha’api’i mai nō te reira ’o te ha’amana’ora’a ïa ē, e fa’atoro te temeio tāta’itahi i te hō’ē ’ohipa rahi a’e i te tupura’a ’ohipa iho ’e te ’imira’a i te mau parau mau pāpū maita’i nō ni’a i te Atua ’e tāna ’ohipa.
E ’āparau ana’e i te tahi o te mau parau mau tā tātou e nehenehe e ’apo mai nā roto mai i te mau temeio a te Fa’aora, i te fa’aho’ira’a ’ia ’ite te matapō. E nehenehe e vāhi i te reira i roto e maha ha’api’ira’a, mai teie i muri nei.
1. Te fa’aho’ira’a mai te ’ite mata ’o te hō’ē ïa tāpa’o nō te Mesia
Te mau peropheta tahito tei fa’a’ite pāpū i te taera’a mai o te Mesia, ’ua parau rātou nō te mau temeio tāna e rave, e tae noa atu i te hōro’ara’a ’ia ’ite te matapō.
I te ari’i Beniamina, ’ua parau te hō’ē melahi mo’a ē, te Fa’aora « e haere ’oia i rotopū i te ta’ata nei, ma te rave i te mau temeio fa’ahiahia, ’oia ho’i, te fa’aorara’a i te feiā ma’i, te fa’ati’a-fa’ahou-ra’a i te feiā pohe, te fa’aorara’a i te feiā piri’o’i ’ia haere, ’e te feiā matapō ’ia ’ite » (Mosia 3:5°; ’a hi’o ato’a Isaïa 35:4–5).3
Nō reira, tē ha’apāpū nei te mau temeio nō te hōro’ara’a ’ia ’ite te matapō i teie mau tohura’a, nō ni’a i te taera’a mai o te Fa’aora ’e tāna aupurura’a i te mau tamari’i a te Atua.
2.’O Iesu te māramarama o te ao nei
’Ua fa’ahiti-pāpū-hia teie parau mau i te fārereira’a Iesu i te hō’ē ta’ata matapō mai tōna fānaura’ahia mai (hi’o Ioane 9:1–11). I te anira’a te mau pipi ē, ’ua fānau-matapō-hia ānei taua ta’ata ra nō te hara, ’ua parau Iesu ē, ’aita, « nō te mea rā ’ia iteā te ’ohipa a te Atua iāna nei » (’īrava 3). I muri iho, hou te fa’aho’ira’a ’ia ’ite taua ta’ata ra, ’ua parau a’era te Fa’aora, « te parahi nei au i te ao nei, o vau te māramarama o teie nei ao » (’īrava 5).
’Ua fa’ata’a mai Elder Bruce°R. McConkie (1915–1985) nō te pupu nō te Tino ’Ahuru ma Piti ’āpōsetolo°: « Hou ’a fa’a’ara’ara ai i te mata pae tino o te matapō, ’ua fa’aha’amana’o mai Iesu i te feiā e fa’aro’o ra iāna i tāna i parau nā mua atu°: ‘’O vau te māramarama o teie nei ao’, nō te ha’api’i ē°: ‘I te mau taime ato’a e ha’amana’o ’outou ē, ’ua fa’a’ara’ara vau i te mata o te matapō i te pae tino nei, ’ia ha’amana’o ato’a ē, ’ua haere mai au nō te hopoi mai i te māramarama i te mata nō te pae vārua’ ».4
E ti’a ia tātou ’ia ha’amana’o ē, e mea nāhea te hara i te fa’arirohia i roto i te mau pāpa’ira’a mo’a ’ei ha’amatapōra’a pae vārua, ’e te fa’aorara’a i te hara ’ei ’īritira’a i te reira ha’amatapōra’a. ’O ’oia te « māramarama o teie nei ao » ’ua fa’a’ohipa ’oia i teie ’ohipa i tupu ’ei tāpa’o nō te ’ohipa teitei a’e tāna i haere mai e fa’atupu i roto i te ao nei.
3. Nā mua te fa’aro’o i te mau temeio
’A tere ai Iesu na ni’a i te mau purūmu nō Kaperenaumi, ’ua ’āpe’e e piti ta’ata matapō iāna, ma te tuō, « e te tamaiti a Davida ra, e aroha mai ’oe ia māua ». I muri iho ’ua paraparau atura ’oia ia rāua ma te ui, « tē mana’o na ’ōrua ē, e ti’a tenā iā’u°? ’E ’ua pāhono atura rāua, « e te Fatu, ’ē »
Te fa’a’itera’a nō tō rāua ti’aturi ē, e nehenehe te Fatu e tauturu ia rāua, tei roto ïa i tō rāua onoono i te pe’era’a iāna ’e i roto i tā rāua fa’ira’a vitiviti i taua ti’aturira’a ra i te taime ’a anihia ai rāua. ’Ua fa’atīa’ia te Fa’aora i tō rāua mata, nā ’ō atura, « tā ’ōrua i mana’o na, ’ia nā reirahia ’ōrua ». ’Ua tupu te tauira’a i te reira iho ā taime°: « ’Ara’ara a’era tō rāua mata i reira ra » (Mataio 9:27–31).
’Ua parau Elder McConkie°: « ’Ia fa’a’ara’ara Iesu i te mata o te matapō, pinepine Iesu, mai teie, i te ’āpiti atu i tāna fa’auera’a i te tahi mau ’ohipa pae tino. I teie taime ’e i te tahi atu mau taime, ’ua fa’atīa’ia ’oia i te mata pō ».
Nō te aha te Fa’aora i rave ai i te reira°? « ’Aore hō’ē o teie mau ’ohipa mātau-’ore-hia e riro ’ei mea faufa’a nō te fa’a’ohipa i te mana fa’aora », tē fa’ata’a nei Elder McConkie. ’Ua ’ite rā tātou ē, nā mua te fa’aro’o i te mau temeio, ’e nō reira « te ’ōpuara’a pāpū a te Fatu, o te ha’apūaira’a ïa i te fa’aro’o o te ta’ata mataru’i ’aore rā o te ta’ata tari’a turi ».5
4. I te tahi taime e tae mai te mau temeio te fa’aue nā ni’a iho i te fa’aue
I Betesaida, ’ua arata’i mai te ta’ata i te hō’ē ta’ata mataru’i ia Iesu ra. I muri a’e i tōna arata’ira’a i taua ta’ata ra i rāpae i te ’oire, « ’ua parai atura Iesu i te huare i ni’a i tōna mata, ’e ’ua tu’u atura i tōna rima i ni’a iho iāna ». I taua taime ra, ’ua fa’aho’i-fa’ahou-hia mai te tahi tuha’a iti nō te ’ite i te mata o taua ta’ata ra, ’e nō reira, « ’ua tu’u fa’ahou atura te Fa’aora i tōna nā rima i ni’a i tōna nā mata », ma te fa’atupu i te hō’ē fa’aho’ira’a hope roa. (Hi’o Mareko 8:22–26.)
’Ua ha’apāpū mai Elder McConkie i te mau parau mau tā tātou e nehenehe e ’apo mai nā roto mai i teie ’ohipa°:
« Mai te huru ra ē, nā roto i te mau fārereira’a tino ’e ’o Iesu, ’ua fa’atupu te reira i te ti’aturira’a, te ha’apāpūra’a ’e te fa’aro’o i roto i te ta’ata mataru’i.
« … ’Ia ’imi te ta’ata i te aroha fa’aora o te Fatu ma tō rātou pūai ato’a ’e tō rātou fa’aro’o ato’a, noa atu ē, nō te hō’ē noa fa’aorara’a iti te reira… ’Ei reira e roa’a ai ia rātou te ha’apāpūra’a ’e te fa’aro’o hau atu ’ia ora hope roa. E mea pinepine ato’a te ta’ata i te fa’aora-marū-hia i tō rātou mau ma’i pae vārua, te tahi tuha’a i muri mai i te tahi, ’a fa’atū’ati ai rātou i tō rātou orara’a i ni’a i te mau fa’anahora’a ’e te mau ’ōpuara’a a te Atua ».6
Nā roto i te ravera’a i teie temeio i roto e piti ta’ahira’a ta’a ’ē, ’ua tauturu te Fatu i te ta’ata matapō ’ia fa’aineine nō te fāri’i i te tā’āto’ara’a o te ha’amaita’ira’a. E nehenehe ānei tātou e ’ite ato’a i teie hōho’a i roto i tā tātou iho ma’imira’a i te mau temeio, te hō’ē mea e ti’a ia tātou ïa rave, ’aore rā, ’aita e rave, hou ’a ineine ai tātou nō te hō’ē ’ohipara’a teitei a’e ?
Te fa’aro’o ’eiaha ’ia fa’aorahia
Noa atu ’ua ’ite tātou i te faufa’a rahi o te fa’aro’o nō te fa’atupu i te mau temeio, e mea faufa’a ’ia ’ite ē i te tahi taime e’ita ato’a te feiā mo’a ha’apa’o pāpū maita’i e ’ite i tō rātou mau hina’aro ’e tā rātou mau tāparura’a e pāhonohia.
’Ua ha’api’i Elder David A. Bednar, nō te pupu nō te Tino ’Ahuru ma Piti ’āpōsetolo, ia tātou :
« E mea pāpū ē, e mauha’a te parauti’a ’e te fa’aro’o i roto i te fa’anu’ura’a i te mau mou’a—mai te mea e fa’atupu te fa’anu’ura’a i te mau mou’a i te mau ’ōpuara’a a te Atua ’e ’ua ti’a ho’i i tōna hina’aro. E mea pāpū ē, e mauha’a te parauti’a ’e te fa’aro’o i roto i te fa’aorara’a i te feiā ma’i, te turi ’e te piri’o’i—mai te mea e fa’atupu te reira fa’aorara’a i te mau ’ōpuara’a a te Atua ’e ’ua ti’a ho’i i tōna hina’aro. Nō reira, noa atu e fa’aro’o pūai tō tātou, e rave rahi mou’a e’ita e fa’anu’u. ’E e’ita ho’i te tā’ato’ara’a o te feiā ma’i ’e te hāpepa e fa’aorahia. ’Āhani ’ua fa’aitihia mai te mau pāto’ira’a ato’a, ’āhani e fa’a’orehia te tā’āto’ara’a o te mau ma’i, e mou ïa te mau ’ōpuara’a mātāmua o te fa’anahora’a a te Metua.
« E rave rahi ha’api’ira’a e ti’a ia tātou ’ia ha’api’i mai i te tāhuti nei e roa’a te reira nā roto noa i te mau mea tā tātou e ora nei ’e i te tahi taime, tā tātou e māuiui nei. ’E tē tīa’i nei te Atua ia tātou ’e tē ti’aturi nei ’oia ia tātou ’ia fa’aruru i te mau ’ati o te tāhuti nei nō te hō’ē tau, nā roto i tāna tauturu, ’ia ti’a ho’i ia tātou ’ia ha’api’i mai i te mea e tītauhia ia tātou ’ia ha’api’i mai ’e ’ia riro mai i te pae hope’a i te mea tā tātou e ti’a ’ia riro mai i te tau a muri atu ».7
Tē hina’aro nei au e ’āmui atu i tō’u ’itera’a pāpū i te mau ’itera’a pāpū o te mau peropheta tahito ’e nō teie ’anotau. Tē tupu noa nei ā te mau temeio i rotopū ia tātou. ’O te Fa’aora Iesu Mesia te puna nō te mau mana ato’a, te māramarama ’e te tāmarūra’a. Tē fa’a’ite pāpū nei au ē, nā roto i tō tātou fa’aro’o iāna, e nehenehe tātou e fa’aorahia, ’e mai te mea ’aita tātou e fa’aorahia, e ’itehia ihoā ia tātou te hau maoti te Ari’i nō te hau, te Māramarama o te ao, ’e te Ta’ata fa’aora o te feiā fa’aora.