Feiā ʼāpī paʼari

Te mau tauira’a tā tātou e hina’aro, ’e e hina’aro ’ore, e fa’aruru

Nā Elder Ciro Schmeil

Nō te Hitu ’Ahuru

E aha tā ’outou fā tau roa ? Mai te mea ’ua ’ite ’outou e aha tā ’outou e tītau nei, e fa’aineine ïa ’outou, ’e e ’ana’anatae ato’a ho’i, nō te rave i te mau tauira’a i roto i tō ’outou orara’a.

’Ua tītau-a’enei-hia ānei ia ’outou ’ia rave i te hō’ē tauira’a ’aita ho’i tō ’outou e hina’aro mau ’ia rave ? ’Aore rā, hō’ē tauira’a ’aita ’outou i mana’o ē, tītauhia ia ’outou ’ia rave ?

15 matahiti i ma’iri a’e nei, ’ua parau mai tō’u taote iā’u ē, e ti’a iā’u ’ia taui i te huru orara’a : « ’A ha’amata i te fa’ahā’uti’uti i te tino, ’aita ana’e, e’ita ’oe e ora maoro roa », tāna ïa i parau mai iā’u. ’Ua ha’apa’o vau i tāna fa’aarara’a. ’Ua fa’aoti a’era vau e horohoro.

Nō te fa’atupu manuia i te tauira’a o teie huru orara’a, ’ua tītauhia iā’u ’ia hi’o ātea noa, nō te mea ’āhiri ē, e hi’ora’a poto noa tā’u, e’ita ïa vau e ātea roa.

Tā’u hi’ora’a ātea, ’o te hō’ē ïa horora’a maratoni i te matahiti hō’ē, e fā teie e ho’i noa mai. E tauturu teie fā iā’u ’ia ti’a i ni’a ’e ’ia horo i te mau mahana ato’a nō te mea ’ua ’ite au ē, i te hō’ē mahana nō te matahiti i muri mai, e horo e 26,2 maile (42,2 kilometera). ’Ua ha’apa’o māite au i te fa’aineinera’a iā’u ’e i te tāpaera’a i tā’u mau fā tau poto nō te hepetoma tāta’itahi, i ’ite ho’i au ē, nā te reira e fa’aineine iā’u nō te mahana tata’ura’a.

I te tahi taime, tē vai ra te mau mea e tāmata ’e e tāpe’a iā’u, mai te reva. Pēnei a’e e mea ve’ave’a roa ’aore rā e mea to’eto’e roa i rāpae, ’aore rā pēnei a’e e ua. Nō reira, e horo ïa vau i ni’a i te matini horo, noa atu ē, e mea au a’e nā’u ’ia horo i ni’a i te purūmu. Tē vai ato’a nei te mau pēpē ’o tē tāmata ’e ’o tē tāpe’a iā’u. Pēnei a’e ’aita vau i tīto’oto’o maita’i i te tino hou ’a horo ai, e mutu ïa te uaua. ’Aore rā pēnei a’e e ’ere nō’u te hape i pēpē ai au. Noa atu rā, e’ita tā’u e nehenehe e fa’aru’e nō te mea ’ua ’ite au ē, e horo vau i te hō’ē horora’a maratoni i te matahiti i muri nei. Nō reira, e rave au i te tahi mau tāuiuira’a i roto i tā’u fa’aineinera’a. ’E ’ia ora vau, e ho’i fa’ahou i rāpae nō te horohoro.

’Ua ha’api’i rahi mai te horora’a nō ni’a i te ’evanelia. E fā maoro tā tātou pā’āto’a i te pae nō te ’evanelia, ’oia ho’i e tāpe’a ē tae noa atu i te hope’a, ’ia noa’a te fa’ateiteira’a. E ha’amau rā tātou i te mau fā tau poto, mai te ravera’a i te ’ōro’a mo’a i te fare purera’a i te mau hepetoma ato’a, ’o tē tauturu ia tātou ’ia tāpae i reira. E pēpē tātou i te pae vārua ’ia rave ana’e tātou i te mau hape. ’Eiaha roa rā tātou e tāora i te tauera. E tātarahapa tātou, ’e e ho’i tātou i reira. Te rāve’a hō’ē roa e nehenehe ai ia tātou ’ia fa’aoti i tā tātou fā tau roa, ’o te ravera’a ïa i te mau tauira’a ha’iha’i i te roara’a o te ’ē’a, nō te tauturu ia tātou ’ia haere noa i mua.

Ma’iti ’ia taui

Hau atu i te ’ahuru matahiti te maoro, ’ua ’ohipa vau ’ei mono peresideni fa’atere nō Walmart i Peretīria. E mea maita’i roa tō’u ’utuāfare i te pae nō te faufa’a moni, ’ua ’oa’oa vau i tā’u ’ohipa, ’e e mea maita’i te orara’a. E mea ’ohipa rahi roa rā terā ’ohipa. ’Ua tītauhia iā’u ’ia revareva haere, ’o tei fa’ataupupū i tō mātou ’utuāfare ’e i tā’u tāvinira’a i roto i te ’Ēkālesia. I muri a’e 11 ’e ’aore rā 12 matahiti, ’ua nava’i roa.

’Ua ’āpo’o ’āmui māua tā’u vāhine fa’aipoipo ’e ’ua fa’a’oti maua ê e fa’aru’e au i teie ’ohipa. ’Ua paraparau māua i tā māua mau tamari’i, ’e ’ua nā ’ō ’āmui mātou : « ’Ua tae i te taime nō tātou ’ia taui. »

I tō’u fa’aru’era’a atu, ’ua hi’a vau mai te ti’ara’a mono peresideni fa’atere i te ta’ata ’ohipa ore. Fātata hō’ē matahiti te maoro vau i te ’itera’a ’e i te fāri’ira’a i te tahi atu ’ohipa. I te ravera’a vau i te ti’ara’a i roto i te hō’ē taiete na’ina’i ho’o fenua ’e fare nō te Fenua Marite, ’ua hau tō’u ’ā’au. I teie ’ohipa e rahi atu ā tō’u taime e fa’ata’a nō te mau mea faufa’a.

’Ua parau mai rā te tahi atu mau ta’ata iā’u ē, e ta’ata ma’ama’a vau. Nō te aha e vaiiho ai i te hō’ē ’ohipa ’aufau maita’i nō te hō’ē taiete ho’o fenua ’e fare, ’aita roa atu e ro’o ? ’E e tere ho’i i te tahi atu pae o te paraneta, i te Fenua Marite ?

’Ua tano rātou i te mea ē, ’ua riro te reira ’ei tauira’a rahi tā mātou i mā’iti i te rave. ’Ua hape rā rātou i te mana’ora’a ē, e mā’itira’a tano ’ore.

’Ua tītauhia ia mātou te fa’aro’o pūai nō te taui i te ’ohipa ’e nō te haere i te hō’ē fenua ’āpī, ’ua ha’apa’o rā te Fatu ia mātou. ’E ’ua rahi atu ā tō’u taime nō te fa’aoti i tā’u mau hōpoi’a ’ei tāne fa’aipoipo, ’ei metua tāne ’e ’ei melo nō te pāroita.

Tē ti’aturi nei au ē, e mea tītauhia te tauira’a nō te fa’atupura’a i tō tātou fāito pūai. E’ita roa atu tātou e riro mai mai tā te Metua i te ao ra e hina’aro ia tātou ’ia riro, mai te mea e fa’aea noa tātou i te hō’ē vāhi i roto i tō tātou orara’a. ’E e riro tātou mai iāna ra te huru ’a rave ai i te mau tauira’a mana’o pāpū ’e ma te fa’aro’o.

Fa’ahepohia ’ia taui

Te tahi ato’a tauira’a rahi tei tupu i roto i tō’u ’utuāfare ’o te pohera’a ïa tō’u taea’e ’āpī roa a’e i roto i te hō’ē ’ati pere’o’o. ’Aita māua i mā’iti ’aore rā i hina’aro i te reira nō māua, ’e e mea māuiui noa ā, noa atu ē ’ua 10 matahiti i teienei. E ’ere te tauira’a fa’ahepo i te mea ’ōhie.

Terā rā, e nehenehe te mau tauira’a ’aita tātou e mā’iti e riro ato’a mai ’ei rāve’a nō te patu i tō tātou fa’aro’o i te Metua i te ao ra ’e ia Iesu Mesia. E mea ’ōhie ’ia vai ha’apa’o maita’i noa ’ia tupu ana’e te mau mea mai tei au ia tātou. E nehenehe ānei rā tā tātou e tāpe’a noa i te fa’aro’o ’e ’ia tāmau noa i te haere i mua ’ia ’ore ana’e te mau tauira’a e tupu mai tei au ia tātou ?

Te ta’ara’a i te hoa fa’aipoipo, te fānau ’ore, te ’ohipa ’ore, te ma’i ’e te tahi atu mau ’ohipa mauiui mai teie te huru, e ’ere ïa te reira i te mau ’ohipa tā tātou e tīa’i nei ’e e ’ōpua nei. E nehenehe te reira e fa’atupu i te mana’o ē, ’aita tā tātou e rāve’a i mua i te orara’a. E ’ere rā i te parau mau roa—i roto i terā vaira’a tītau-’ore-hia, tē vai noa ra ā te mau mea tā ’outou e nehenehe e rave. E nehenehe e ha’amau i te mau fā na’ina’i, noa atu ā ’o te fā e fa’aitoito i terā noa a’e mahana. E nehenehe ’outou e nā reira ! E nehenehe ’outou e fa’a’oroma’i i te mau mea ato’a ! (hi’o Alama 38:4).

’Ua riro Iosepha nō Aiphiti ’ei hi’ora’a maita’i roa nō te reira. ’Ua ’ī tōna orara’a i te tauira’a fa’ahepohia—’ua ’ere ’oia i tōna ti’amāra’a ’e piti taime ! (I te taime ’a ho’o ai tōna nā taea’e iāna i roto i te tītīra’a, e fa’ahou ā, ’a tu’u ai Potiphara iāna i roto i te fare tāpe’ara’a) ’Aita rā Iosepha i ha’aparuparu iāna i mua i teie nā vaira’a hina’aro-’ore-hia ’e te ’ōpua-’ore-hia. ’Ua fa’aau ’e ’ua tupu ’oia i te rahi nā roto i te mau ’ohipa i tupu i ni’a iāna. ’E i te pae hope’a, ’ua fa’aora ’oia i tōna ’utuāfare ’e i te hō’ē nūna’a tā’āto’a. Tē tarai haere ra te Fatu iāna ’e ’ua fa’aineine iāna i te tā’āto’ara’a o te ’ē’a (hi’o Genese 37–46).

E mea fifi ’ia fa’a’oroma’i ’ia tū’ino ana’e te mau tauira’a fa’ahepohia i tā ’outou fa’anahora’a, ’a ha’amana’o rā ē, te fā tau roa, ’o te noa’ara’a ïa te fa’ateiteira’a. ’Ua ’ite te Metua i te ao ra i te mea e tītauhia nō tātou, nō te tāpae i reira : « ’Aore e ti’a ia ’outou ’ia ti’a i mua i te aro o te Atua i teienei, ’aore ato’a ho’i i mua i te utuutura’a a te mau melahi ; nō reira ’a tāmau noa i te fa’a’oroma’i ē tae noa atu i te taime ’outou e maita’i roa ai. » (Te Ha’api’ira’a Tumu ’e te mau Fafaura’a 67:13).

E tauturu te tauira’a ia tātou ’ia riro mai te Fa’aora te huru

’Ua here te Metua i te ao ra ia ’outou ’e tē hina’aro nei ’oia ia ’outou ’ia manuia. ’Ua hina’aro ’oia ’ia ’oa’oa ’outou. ’E ’ua hōro’a mai ’oia i te hō’ē fa’anahora’a ’ia ti’a ia ’outou ’ia fa’atupu i teie nā mea e piti.

’Ia hi’o ana’e au i te orara’a tāhuti nei i tōna aura’a mau—’oia ho’i te ha’api’ipi’ira’a—tē ’ite rahi nei au i te tumu nō te mau tauira’a i roto i tō’u orara’a. E tauturu te tauira’a iā’u ’ia fa’atupu i tā’u fā tau roa, ’oia ho’i te rirora’a mai tō’u Fa’aora ’o Iesu Mesia. ’Ua ’ite au ē, hō’ē ā fā tau roa tā te Metua i te ao ra nō’u ’e nō tāna mau tamari’i ato’a. Mai tā tō’u taote i ’ite ē, tītauhia iā’u ’ia taui i te hō’ē mea nō te maita’i o tō’u ea, ’ua ’ite pāpū maita’i te Atua i te mau tauira’a e tītauhia ia tātou ’ia rave nō te riro mai iāna te huru. Tē turu nei ’oia ia tātou ’e tē tu’u mai nei i te mau rāve’a tauturu mai te mau pāpa’ira’a mo’a, te hō’ē ’āmuira’a ’e te hō’ē peropheta ora nō te tauturu ia tātou i roto i tā tātou tītaura’a ’ia taui nō te maita’i.

I te mau mahana fifi roa a’e—i taua mau mahana ra e mea fifi ’ia haere i rāpae i te fare ’e ’ia ’ō’omo i tō ’outou mau tia’a horo, ’ia ’ite ana’e ’outou e tītauhia ’ia tātarahapa, ’aore rā ’ia tāfifi ana’e ’outou i te tahi atu tauira’a mana’o-’ore-hia—e fa’aha’amana’o tātou ia tātou iho i te here fāito ’ore o te Atua ’e i tōna hina’aro ’ia oa’oa a’e tātou i teienei.

E hōro’a mai te reira fa’aha’amana’ora’a i te pūai nō te rave i te mau tauira’a tā te Vārua e muhumuhu mai ia tātou ’ia rave. ’E e tauturu te reira ia tātou ’ia ti’aturi ē, te mau tauira’a mana’o-’ore-hia, tei tītauhia ia tātou ’ia rave, e tuha’a ïa nō tāna fa’anahora’a nō tō tātou ’oa’oa rahi a’e.