Te reo o te feiā mo’a i te mau mahana hope’a nei

Te ti’aturi ra ānei ’oe i te Atua ?

Nā Shirl Brown Jr., Nevada, Fenua Marite

’A fa’a’ite mai ai tō’u hoa i tōna mau māna’ona’ora’a, ’ua tae mai ra te hō’ē māramarama tā’ue i ni’a iā’u.

Fa’ahōho’ara’a nā Katy Dockrill

I tō’u na’ina’ira’a, ’aita roa atu vau i fē’a’a i te parau mau o te ’evanelia. I tō’u rā taera’a i tō’u taure’are’ara’a, ’ua uiui noa vau ē, e ’itera’a papū ānei tō’u, ’e ’aore rā tē fāri’i noa ra vau i te mea tā tō’u nā metua e tō’u mau hoa i ti’aturi. I pure au nō te ’ite ē, e parau mau te ’evanelia.

Noa atu tō’u mau ’arora’a, ’ua parau mai te hō’ē taure’are’a tamāhine tā’u i fārerei i te fare ha’api’ira’a tuatoru ē, tē ’ite ra ’oia ē, ’ua ta’a iā’u tā’u ’ōpuara’a ’e te ’avei’a e rave i roto i te orara’a.

I ui mai ’oia iā’u : « Tē ti’aturi ra ānei ’oe i te Atua ? »

I parau vau iāna ē, ’o te reira iho ā, ’e tē ha’api’i nei tā’u ’ēkālesia i tō tātou tā’amura’a i te Atua ’e te tumu o te orara’a. I parau ato’a vau iāna nō ni’a i te peropheta Iosepha Semita ’e te Fa’aho’i-fa’ahou-ra’a mai. ’Ua fa’aro’o maita’i ’oia.

I te sābati nō muri iho i te fare purera’a, ’ua rave mai au i te mau buka iti nō ni’a ia Iosepha Semita ’e te ’ōpuara’a nō te fa’aorara’a, nō tō’u hoa. I muri a’e i tōna tai’ora’a i te reira ’e te ha’amatara’a i te tai’o i te Buka a Moromona, i ’āfa’i au iāna i te purera’a.

I muri a’e, ’ua parau mai ’oia iā’u ē, e mea piri roa ’oia ’e tōna tua’ana. E pairati rereata reihiti ’oia tei ha’uti i roto i te mau fa’a’ite’itera’a manureva i reira. Te mea ’oto rā, i te pu’e tau māhanahana hou māua ’a fārerei ai, ’ua pohe ’oia ’a rere ai nō te hō’ē fa’a’ite’itera’a. ’Ua oti roa ’oia i tōna pohe ’e ’ua pe’ape’a ’oia nōna, nō tōna ti’aturi-ore-ra’a i te Atua. I pure noa ana ’oia nō te ’ite e aha tōna vaira’a ’e tōna ti’ara’a i mua i te Atua.

’A fa’aite ai ’oia i tōna mau māna’ona’ora’a, ’ua puta tā’ue mai ra te māramarama i ni’a iā’u. E ’itera’a nō te parau mau ’e te māramarama mau. I ta’a iā’u ē, ’aita tō maua fārereira’a i tupu noa mai terā. ’Ua fa’aro’o rā te Atua ’e ’ua pāhono mai i te pure ’ā’au tae o teie tamāhine ’ā’au ’oto.

’Ua tupu te haeha’a i roto iā’u ’ia ’ite ē, ’ua ’ite te Metua i te ao ra iā’u, ’e tē fa’ariro nei ’oia iā’u ’ei mauha’a i roto i tōna nā rima nō te pahono i tāna pure. ’Ua māramarama vau i tōna pa’ari rahi i te fa’a’ohipara’a i teie ’ohipa nō te pāhono ato’a i tā’u pure nō te ’ite ē, e parau mau ānei te ’evanelia.

I muri a’e i te fa’aineinera’a, ’ua fa’anaho vau i tā’u mau pūtē nō nā matahiti maita’i roa a’e e piti o tō’u orara’a. I terā ato’a taime, ’ua rave tō’u hoa i te mau ha’api’ira’a misiōnare ’e tōna tuahine. ’Ua tomo rāua to’opiti i roto i te ’Ēkālesia ’e i muri iho ’ua tavini i te hō’ē misiōni. I muri a’e i tā’u misiōni, ’ua ani mai tō’u hoa iā’u ’ia rave i te mau ’ōro’a o te hiero nō tōna tua’ana.

’Ua ’ite au ē, tē fa’aro’o ’e tē pāhono nei te Atua i te mau pure ’ā’au tae, noa atu ē e ’ere i te rave’a ’e te taime mātauhia e tātou.