« Tō tātou pi’ira’a ’ia fa’a’ite i te ’evanelia a te Fa’aora », Liahona, Tiurai 2023.
Tō tātou pi’ira’a ’ia fa’a’ite i te ’evanelia a te Fa’aora
’Ei mau tāvini nā te Atua, ’ua pi’ihia tātou ’ia fa’a’ite i te tīa’ira’a tā te Fa’aora e pūpū nei nā roto i tōna ora, tāna mau ha’api’ira’a, tōna tāra’ehara ’e tāna ’evanelia i fa’aho’ihia mai.
’Ei mau misiōnare taure’are’a nō Peretāne, ’ua ha’api’i māua tō’u hoa i te hō’ē ta’ata tei ora i te mau ’ohipa ri’ari’a ’e fātata roa atu i te pohe, i te taime nō te tama’i rahi°II o te ao nei. ’Ua ō ’oia i roto i te nu’u tama’i i ni’a i te fenua, ’e ’ua ora mai ’oia i roto i te hō’ē ’arora’a rahi i mua i te pahī tei ni’a ’oia, hou ’a ho’i mai ai i te fenua Peretāne. I tōna tāera’a mai i Peretāne, ’ua putapū roa tōna ’ā’au ’e te māuruuru i te ho’ira’a mai ma te hau i te fare, ’e ’ua tūturi ’oia, ’ua apa i te repo, ’e ’ua pūpū i tōna māuruuru rahi.
I tō māua ha’api’ira’a iāna i te fa’aho’i-fa’ahou-ra’a mai ’e te fa’ata’ara’a i te ’ōrama mātāmua o Iosepha Semita, ’ua ta’i ’oia. Ma te roimata i tōna hōho’a mata, ’ua fa’a’ite mai ’oia i te ’itera’a māuiui tāna i fāri’i. ’Ua fa’ata’a mai ’oia ē, ’ua fa’atupu te poro’i nō te fa’aho’i-fa’ahou-ra’a mai i te mau mana’o mai tāna i fāri’i, ’a ho’i mai ai ’oia ma te hau i ni’a i te repo Peretāne. ’Ua ’ite ’oia ē, e hope’ara’a mure ’ore tōna.
« Tē pūpū nei te ’evanelia tei fa’aho’i-fa’ahou-hia mai i te māramarama ’o tā te mau tamari’i a te Atua e hina’aro nei i roto i te mau taime ’āehuehu », ’ua parau Elder Quentin°L. Cook (te ’ana’ira’a i ni’a, te pae nā te pae ’atau mai), tei tāvini i roto i te misiōni nō Peretāne ’e ’o Elder Jeffrey R. Holland (’ana’ira’a i ni’a, te hitu nā te pae ’aui mai).
I te pae ’aui°: Hōho’a i piahia ma te parau fa’ati’a a te fatu hōho’a
Tō tātou pi’ira’a ’ei mau tāvini nō te Atua
’Ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, e mau tāvini tātou nō te Atua. ’Ei mau tāvini nōna, tā tātou misiōni o te fa’a’itera’a ïa ia vetahi ’ē—mai te mau ta’ata tā’u i ha’api’i i Peretāne—te tīa’ira’a tā te Fa’aora e pūpū nei nā roto i tōna ora, tāna mau ha’api’ira’a, tōna tāra’ehara, ’e te ’evanelia tei fa’aho’i-fa’ahou-hia mai (hi’o 3°Nephi 27:13–14). E ’ere te reira i te ’ohipa ’ōhie i roto i te hō’ē ao tei ’ī i te fē’a’a, te hepohepo, ’e te pō’iri, tē pūpū nei rā te ’evanelia tei fa’aho’i-fa’ahou-hia mai i te māramarama ’o tā te mau tamari’i a te Atua e hina’aro i roto i te mau taime ’āehuehue.
’Ua parau te peresideni Russell°M. Nelson ē e hina’aro rahi tō te ao nei i te ’evanelia a Iesu Mesia i teienei°: « Tāna ’evanelia te pāhonora’a hō’ē roa ’ia mata’u ana’e te ta’ata ’e ’ia ’ore ’ia ta’a fa’ahou e nāhea rā. Tē ha’apāpū nei te reira i te faufa’a rahi nō tātou ’ia pe’e i te arata’ira’a a te Fatu i tāna mau pipi ’ia ’haere […] i roto i te ao ato’a ’e ’ia poro i te ’evanelia i te mau mea ora ato’a [Mareko 16:15, ha’apāpūra’a i ’āpitihia atu°; hi’o ato’a Mataio 28:19]. Tei ia tātou te hōpoi’a mo’a ’ia fa’a’ite i te mana ’e i te hau o Iesu Mesia i te mau ta’ata ato’a e fa’aro’o mai, ’e e vaiiho i te Atua ’ia upo’oti’a i roto i tō rātou orara’a. ’Ua parau fa’ahou te peresideni Nelson, « e ’ohipa tā tātou tāta’itahi i roto i te ha’aputuputura’a o ’Īsera’ela ».1
Hō’ē rāve’a tā tātou nō te rave i te reira ’ohipa, ’o te fāri’ira’a ïa i te pi’ira’a ’ia tāvini ’ei misiōnare rave tāmau. ’Ua ’ite tātou, mai tā te peresideni Nelson i ha’apāpū a’enei ē, te hōpoi’a nō te ’ohipa misiōnare rave tāmau, nā mua roa nō te feiā ’āpī tamāroa ïa tei fa’ahereherehia nō te ha’aputuputura’a i te mau mahana hope’a nei. Nō rātou, « e hōpoi’a autahu’ara’a » te ’ohipa misiōnare. Noa atu ē, ’aita te ’ohipa misiōnare e fa’ahepohia nō te feiā ’āpī tamāhine, ’ua ani te peresideni Nelson ia rātou ’ia ani i te Fatu ē, e hina’aro ānei ’oia ’ia tāvini ato’a rātou. « E mea fa’ahiahia mau te mea tā ’outou e hōro’a mai nō teie ’ohipa°! » tāna ïa i parau ia rātou. ’E, ’oia mau, tē hina’aro nei te Fatu i te mau ta’ata fa’aipoipo pa’ari ’ia tāvini mai te au i te huru o tō rātou orara’a. « Tā rātou mau tauto’ora’a », i roto i te mau parau a te peresideni Nelson, « ’e’ita ïa e nehenehe e mono ».2
Te tahi atu rāve’a nō tātou ’ia rave fa’aoti i tā tātou ’ohipa i roto i te ha’aputuputura’a ia ’Īserā’ela ’o te ha’amana’ora’a ïa i tā tātou fafaura’a, ’ia « ti’a ’ei ’ite nō te Atua i te mau taime ato’a, i roto i te mau mea ato’a, ’e i roto i te mau vāhi ato’a » (Mosia 18:9). ’Aita tātou e tītauhia te hō’ē pi’ira’a misiōnare rave tāmau nō te ti’a ’ei ’ite. ’A ora ai tātou i te ’evanelia, e here ’e e tāvini ia vetahi ’ē, e ti’a pūai noa i mua i te fa’ahemara’a ’e te hāmani-’ino-ra’a, ’e e fa’a’ite i te ’itera’a pāpū nā roto i te parau ’e te ’ohipa, e ’ume mai tātou ia vetahi ’ē ia Iesu Mesia ra.
E nehenehe te fa’a’itera’a i te ’evanelia e riro ’ei ’ohipa ri’ari’a, tae noa atu nō te feiā tei tāvini a’ena i te hō’ē misiōni. Mai te mea rā e ’itera’a pāpū pūai tō tātou nō ni’a i te Fa’aora ’e nō te fa’aho’i-fa’ahou-ra’a mai, tā tātou noa e rave ’o te fa’a’ite-pāpū-ra’a ïa i te mea tā tātou i ’ite.
Te faufa’a rahi o te ’itera’a pāpū
Nāhea tātou i te ha’apūai i tō tātou ’itera’a pāpū nō te riro mai ’ei mau misiōnare maita’i°? Tītau-noa-hia ia tātou ’ia pe’e i te parau a’o a tō tātou peropheta ora. E tupu tō tātou ’itera’a pāpū i te rahi mai te mea°:
-
E ha’ape’epe’e tātou i tō tātou itoito pae vārua.3
-
E fa’ata’a i te taime nō te Fatu.4
-
E ha’apūai i tō tātou niu pae vārua.5
-
E vaiiho tātou i te Atua ’ia upo’oti’a i roto i tō tātou orara’a.6
-
’A fa’aro’o iāna.7
’A tuatāpapa ai tātou i te mau parau a te peresideni Nelson ’e ’ia ha’apa’o i tāna a’o, e ha’apūai tātou i tō tātou ’itera’a pāpū nō te Fa’aora ’e tāna ’evanelia, te ’ohipa a te peropheta Iosepha Semita i roto i te fa’aho’i-fa’ahou-ra’a mai, te parau mau o te Buka a Moromona, ’e te pi’ira’a o te mau peropheta ’e te mau ’āpōsetolo nō teie ’anotau. E fa’aineine te hō’ē ’itera’a pāpū pūai ia tātou—’e e ha’amaita’i i tō tātou mau hina’aro—’ia ha’apa’o i te pi’ira’a tohu a te peresideni Nelson ’ia ha’aputuputu ia ’Īserā’ela i nā pae e piti o te pāruru.
Nō te fa’a’ite maita’i i te ’evanelia, ’aita e tītauhia ia tātou ’ia riro ’ei hō’ē ta’ata paraparau ’aravihi. ’Aita e tītauhia ia tātou ’ia ’ite i te mau hu’ahu’a ato’a o te ha’api’ira’a tumu o te ’evanelia. ’Aita e tītauhia ia tātou ’ia tāmau ’ā’au e rave rahi tātini pāpa’ira’a mo’a. ’Aita ato’a e tītauhia ia tātou ’ia riro ’ei ta’ata ’ite rahi. E tauturu te reira mau mea ia tātou ’ia fa’a’ite i tā tātou parau poro’i, terā rā, te mana fa’afāriu mau e tae mai nā roto mai i te ’ā’au ha’eha’a, te hō’ē ’itera’a pāpū pūai, ’e te hō’ē fa’a’itera’a pāpū nō ’ō mai i te Vārua Maita’i.
« ’Aore roa e ta’ata » ’ua parau te peropheta Iosepha Semita, « e nehenehe e poro i te ’Evanelia ’āhiri ’aita te Vārua Maita’i ».8
« Auahi i roto i tō’u ivi »
I te matahiti 1830, i muri a’e i te fa’aro’ora’a i te mau misiōnare ’ia ha’api’i i te parau poro’i o te ’evanelia i fa’aho’i-fa’ahou-hia mai, ’ua hina’aro Brigham Young ’ia ’ite nōna iho i te parau mau nō te mea tā rātou e ha’api’i ra. ’Ua tuatāpapa ’oia i te Buka a Moromona ma te ha’apa’o maita’i ’e tae noa atu i te huru o te feiā tei fa’a’ite pāpū i te reira ’e i tō te peropheta Iosepha Semita.
’Ua putapū te ’ā’au ’e te vairua o Brigham i te hō’ē mea nō ni’a i terā mau misiōnare mātāmua. « E au tō rātou ’itera’a pāpū mai te auahi i roto i tō’u mau ivi », tāna ïa i parau.9
Hō’ē o te reira mau misiōnare, ’o Eleazer Miller, e melo nō te ’Ēkālesia e maha noa ’āva’e te maoro.10 I roto i te reo misiōnare o teie tau, e « tamari’iri’i noa ā » ’oia, ’e e ’ere ’oia i te ta’ata ’aravihi i te paraparau i mua i te ta’ata. ’Aita rā e faufa’a tō te reira mau mea.
Eleazer Miller
Tau matahiti i muri mai, ’ua parau te peresideni Brigham Young°: « I tō’u ’itera’a i te hō’ē ta’ata ’aravihi ’ore, ’aore rā, tāreni ’ore, ’ia paraparau i mua i te ta’ata, ’o tē nehenehe noa e parau ē, ’ua ’ite au nā roto i te mana o te Vārua Maita’i ē, e parau mau te Buka a Moromona, [’e] e peropheta Iosepha Semita nā te Fatu[,]’ [t]e Vārua Maita’i e ’itehia atu i roto i te reira ta’ata, ’ua ha’amāramarama ïa i tō’u hāro’aro’ara’a, ’e tei mua iā’u te māramarama, te hanahana ’e te tāhuti ’ore ».
’Ua parau te peresideni Young ē, ’ua hā’atihia ’e ’ua ’ī ’oia i taua māramarama ra ’e taua hanahana ra, ’e ’ua ’ite ’oia nōna iho ē, e parau mau te ’itera’a pāpū o Eleazer.
« Te ao nei ’e tōna pa’ari ’e te mana, ’e te hanahana ato’a, ’e te fa’a’ite’itera’a ’ana’ana ’o tōna mau ari’i ’e tōna mau ta’ata pūai », te parau ïa a te peresideni Young, « e mea faufa’a ’ore roa ïa ’ia fa’aauhia i te ’itera’a pāpū ’ōhie ’e te māramarama maita’i ’o te hō’ē tāvini a te Atua ».11
’Āuē te rahi ’o tō tātou ’oa’oa
’Ua parau te peropheta Iosepha Semita ē, «°i muri a’e i te mau parau ato’a i parauhia ra, te ’ohipa tei hau i te rahi ’e te faufa’a ’o te porora’a ïa i te ’Evanelia ».12
Te fa’aturara’a i tā tātou mau fafaura’a ’ei melo nō te bāsileia o te Atua ’o te fa’a’itera’a ïa i te ’evanelia a Iesu Mesia. Te fa’a’itera’a i te ’evanelia o te hō’ē ïa o te mau fa’a’itera’a teitei roa a’e o te herera’a i tō tātou ta’ata tupu mai ia tātou iho (hi’o Mataio 22:37–39). Te fa’a’itera’a i te ’evanelia ’o te fa’auera’a rahi ïa a te Fa’aora.
Te feiā i rotopū ia tātou tei tauturu i te ’āfa’i mai i te mau vārua i te Mesia ra, ’ua tāmata ïa i te ’oa’oa mure ’ore tei fafauhia i te feiā e ha’a nō te fa’aora i te mau tamari’i a te Atua (hi’o Te Ha’api’ira’a Tumu ’e te mau Fafaura’a 18:15–16). Tē feruri noa nei ā vau i tā’u tāvinira’a rave tāmau ’ei misiōnare ’āpī i Peretāne—te mau hoa i pīha’i iho vau i te tāvinira’a, te mau ta’ata tā mātou i fārerei, te mau tamaiti ’e te mau tamāhine faufa’a rahi a te Atua tā mātou i tauturu i te ’āfa’ira’a mai i roto i tāna nana. ’Ua ta’a ’ē roa tō’u orara’a i mua a’e.
Nā roto i tō’u iho ’itera’a, tē parau fa’ahou atu nei au i te fafaura’a a te Peresidenira’a Mātāmua i te feiā « ’o tē hopoi i tāna parau mau i te ao nei »,13 i’ō rātou ānei ’aore rā nā te ara°: « E ha’amāuruuru ’e e ha’amaita’i rahi mai te Fatu ia ’outou ’a tāvini ai ’outou iāna ma te haeha’a ’e te pure. E rahi atu ā te ’oa’oa e tīa’i mai ra ia ’outou, hau atu i tā ’outou e ’ore a’enei e fāri’i, ’a ’ohipa ai ’outou i rotopū i tāna mau tamari’i »14