Savali Faaleautaitai i le Eria
Faapotopoto Uma i le Malumalu
Talu ona lagolagoina ia Peresitene Russell M. Nelson ia Aperila 2018, ua faaauau pea ona ia valaaulia i tatou e ola i se ala maualuga ma paia atu, ma ia faalautele atu la tatou vaaiga mamao i tala atu o luitau o lenei olaga i avanoa e faavavau.
Ia Aperila 2018 sa ia saunoa ai: “E faigofie lava ma faamaoni la tatou savali i le lalolagi: tatou te valaauliaina fanau uma a le Atua i itu uma e lua o le veli ia o mai i lo latou Faaola, maua faamanuiaga o le malumalu paia, maua le olioli tumau, ma agavaa mo le ola e faavavau.”1
O le tausaga na sosoo ai i le konafesi aoao sa ia a’oa’o mai ai: “O le faamoemoega o le Atua e tatau ona avea ma a tatou faamoemoega. E finagalo o Ia i Lana fanau ia filifili e toefoi atu ia te Ia, ua saunia, ua agavaa, ua maua faaeega paia, ua faamauina, ma faamaoni i feagaiga na osia i totonu o malumalu paia.”2
I le ola a’e ai i Ausetalia, o le malumalu na aupito lata ane o Hamilitone, Niu Sila ma i le avea ai ma se faifeautalai fou ia Ianuari 1976 sa maua ai o’u faaeega paia iina. O loo o’u manatua pea le toafimalie ma le filemu sa ou lagonaina i le tapuai ai i le maota o le Alii. A o o’u matauina le olioli o ulugalii faaipoipo matutua, sa ou lagona lo’u manaomia o se soa filifilia e faavavau ina ia maua ai faamanuiaga atoatoa lea e ofoina mai e le malumalu.
Sa ou mauaina lena faamanuiaga ia Ianuari 1979, ina ua ou toe foi atu faatasi ma Maxine Thatcher, o se tamaitai aupito i aulelei ma amiotonu mai la’u uarota. Sa faamauina i ma’ua mo le taimi nei ma le faavavau. Sa o ma’ua ofo ma olioli i feagaiga sa ma osia o le tasi ma le isi ma le Alii. Sa ma lagonaina ia matafaioi ma mana o faamanuiaga e faavavau ia sa faamauina i luga o o ma’ua ulu. Ae mo i ma’ua, e pei o le toatele sa nonofo i le atu Australasia i lena taimi, o na aafiaga matagofie o le malumalu na pau lea o mea na matou faamoemoe e mauaina.
Sa matua o matou fiafia ina ua faapaiaina le Malumalu i Sini Ausetalia i le lata i le ono tausaga mulimuli ane ia Setema 1984. Sa o matou malaga i taavale i le 1100 km e auai i le faapaiaga o le malumalu. Mai lena taimi, o Au Paia faatuatua mai Melepone ma Perisipeni sa faia soo ni malaga i pasi i faaiuga o vaiaso (12 itula i le itu e tasi) i le malumalu i Sini—e malaga ese i le mae’a o galuega i le Aso Faraile, faaalu le Aso Toonai i le malumalu ma i lena po toe faimalaga i aiga ma taunuu tonu i le taimi mo lotu i le Aso Sa.
I le 1988 sa siitia atu ai lo’u aiga i Perth Ausetalia—sa i ai so’u avanoa faigaluega fou. O le malumalu o Sini sa 4000 km mai lo matou fale. Sa o matou faia se tautinoga faaleaiga e faimalaga atu i taavale i le malumalu i Sini i le mavae o le tai lua tausaga. Pe a i ai iina, matou te faaaluina le vaiaso atoa e auai ai i sauniga o le malumalu, o loo i ai pea i le ma fanau manatuaga fiafia o le taimi aupito paia sa o matou i ai faatasi i se faigamalaga e tolu ma le afa aso i le ala e tasi agai i le isi itu o Ausetalia.
Sa faaauauina faamanuiaga ia Setema 2001 ina ua faapaiaina le malumalu i Perth Ausetalia. I le gasologa o se piriota e lua-tausaga i Ausetalia, sa faapaiaina ai foi malumalu i Melepone, Perisipeni ma Adelaide.
I lana lauga, “O Oa Faaleagaga,” i le Sauniga a Tamaitai o le Konafesi Aoao ia Oketopa 2019, sa saunoa ai Peresitene Nelson:
“A o faatupulaia ai le Ekalesia, o le a fausia pea malumalu ina ia mafai ai e le tele o aiga ona maua le avanoa i lena faamanuiaga aupito silisili o faamanuiaga uma, o le ola e faavavau lea. Tatou te faaaloalo i se malumalu o le maota sili ona paia lea i le Ekalesia. Soo se taimi lava e folafola atu ai ni fuafuaga e fausia se malumalu fou, e avea lava ma se vaega taua o le tatou talafaasolopito.”3
I le Eria o le Pasefika ua o tatou ola ai i se vaitaimi faasolopito o le fausiaina o malumalu. O sauniga o le suatiaina o le eleele i lenei tausaga ua faailo ai le amatalia o le fausia o malumalu i Vanuatu ma Papua Niu Kini. O loo faagasolo lelei le malumalu i Aukilani, faatasi ai ma le mae’a o puipui o fafo ma le faamae’aina o totonu o loo faagasolo pea. O le mamanuina ma le fuafuaina o loo faaauauina pea mo malumalu ua uma ona fofogaina mai i Kiripati, Neiafu Toga, Amerika Samoa ma Ueligitone, Niu Sila. O tupe faaalu faafaigaluega i malumalu o se molimau faifaipea o le taua o sauniga paia o le malumalu ma tapuaiga i le malumalu.
Sa aoao mai Peresitene Nelson ia Oketopa 2018:
“O le fauina ma le tausiga o nei malumalu atonu e le suia ai lou olaga, ae o le faaaluina o lou taimi i totonu o le malumalu o le a mautinoa lava [le suia ai o lou olaga]. Mo i latou ua matua leva lava e lei toe alu i se malumalu, ou te uunaia oe ia saunia nei ma toe foi atu i le vave e mafai ai. Ona ou valaaulia lea o oe e te tapuai atu i totonu o le malumalu ma tatalo ia matua lagona le alofa lemafuatia o le Faaola mo oe, ina ia tofu maua e outou taitoatasi sau oe lava ia molimau o loo faaauau pea ona Ia taitaia lenei galuega paia e faavavau.”4
Ina ua ma faaipoipo ma Maxine i le 40 tausaga ua mavae i le malumalu i Niu Sila, o le faamoemoe mo le tapuai atu faifaipea i se malumalu i Ausetalia sa na o se miti na mamao lava. O ai na manatu o le itiiti ifo ma le 25 tausaga mulimuli ane, o le a faagaoioi ai ni malumalu se 5 i Ausetalia?
I le Pasefika tatou te faateleina lo tatou auai i malumalu o i ai nei ma sauniuni mo faamanuiaga o malumalu i le lumanai. A o tatou faatalia le faamae’aina o malumalu na fofogaina mai i nai tausaga o sosoo ai, e mafai ona o tatou faatinoina vaega patino nei e lua:
1. Faatumauina ni pepa faataga aoga o le malumalu.
Sa tuuina mai e Peresitene Nelson i le Ekalesia atoa se meaalofa ina ua ia faasoa mai fesili mo pepa faataga aoga o le malumalu o se vaega o lana saunoaga faaiu i le konafesi o Oketopa 2019. O nei fesili e fesoasoani ia i tatou e salamo ma saunia ai e faia ni faatalanoaga mo ni pepa malumalu faatasi ai ma o tatou taitai o paranesi/uarota po o siteki/misiona. Matou te uunaia tagata auai matutua uma, e aofia ai i latou ua mae’a ulufia le malumalu, e faafou o latou pepa faataga o le malumalu i tausaga taitasi. E tusa lava pe e te le o lagonaina o e agavaa, feiloai ma lou Peresitene o le Paranesi po o le Epikopo, o le a matua fiafia e fesoasoani ia te oe e saunia. O se tasi lenei o ana matafaioi aupito taua ma paia o se faamasino alofa o Isaraelu.
Sa faaopoopo mai Peresitene Nelson:
“Ou te fia talanoa atu i le tatou autalavou. Matou te uunaia outou ia agavaa mo pepa faataga o le malumalu e tapulaa le faaaogaina. O le a fesiligia oe mo na o fesili na e faatatau ia te outou i au sauniuniga mo sauniga o suipapatisoga ma faamauga. Matou te faafetai tele mo lo outou agavaa ma le naunautaiga e auai i lena galuega paia o le malumalu.”5
I le avea ai o talavou ma o latou ulua’i faamuamua, o au epikopo ma peresitene o paranesi o le a fono faatasi ma talavou uma ma tagata fou e fesoasoani ia i latou i le mauaina ma le tausia o pepa faataga o le malumalu.
2. Faia se taimi i a tatou fuafuaga faasolo mo le auai soo atu i le malumalu.
O le fuafuaina o ni malaga i le malumalu ma le faaopoopoina o ni avanoa mo le malumalu i a tatou kalena e fesoasoani tatou te fiafia ai i le auai soo atu i le malumalu. O taimi taitasi uma tatou te asiasi atu ai i le malumalu tatou te aoao atili ai ia Iesu Keriso ma Lana matafaioi tutotonu i le fesoasoani lea i lo tatou toe foi atu i lo tatou Tama Faalelagi.
3. Talafaasolopito o Aiga
O loo faaauau pea ona faatuina e Peresitene ma Tuafafine Nelson se faataitaiga maoae e ala lea i o la galuega o talafaasolopito o aiga. E faamanatu soo mai e Peresitene Nelson ia i tatou le taua o le auauna atu i o tatou aiga i itu uma o le veli. Ou te iloa mai aafiaga patino le olioli i le mauaina lea o o’u tua’a, faamaumau o latou faamatalaga auiliili, auina atu igoa i le FamilySearch, ona auai lea i le faatinoga o sauniga paia mo i latou i le malumalu.
O se upusii mai le saunoaga faaiu a Peresitene Nelson i le Konafesi Aoao ia Oketopa 2022 e faamanatu mai ai ia i tatou o le malumalu, “o Lona maota lea. E faatumulia i Lona mana. Ia aua lava nei see ese le tatou vaai mai mea o loo faia e le Alii mo tatou i le taimi nei. O loo Ia faia Ona malumalu ia maua gofie atili. O loo Ia faatelevaveina le saoasaoa o loo tatou fausiaina ai malumalu. O loo Ia faateleina lo tatou tomai e fesosoani ai e faapotopoto Isaraelu. O loo Ia faafaigofieina foi mo i tatou taitoatasi ona faamamāina faaleagaga. Ou te folafola atu o le faateleina o taimi e i ai i totonu o le malumalu o le a manuia ai lou olaga i auala e le mafai e se isi lava mea ona e manuia ai.”6
Ou te tatalo e faapea i totonu o o tatou aiga ma i totonu o tatou aiga faaleuarota ma faaleparanesi, o le a tatou faamuamua ai pepa faataga o le malumalu, auai atu i le malumalu ma le saunia o igoa o aiga mo sauniga o le malumalu, ina ia mafai ona tatou agavaa ai mo faamanuiaga uma lea e mafai ona oo mai e tauala mai i malumalu o i ai nei ma malumalu fou a o faapaiaina i atumotu matagofie o le Pasefika.