ITULAU I LE LOTOIFALE
Faatonuina o le Vai i Tana
O le motu o Tana, i le Itumalo o Tafea i Vanuatu, e 45 minute e lele ai i le vaalele—po o se malaga umi i se vaa—i le Motu o Efate, o loo i ai le ofisa o le misiona mo Le Ekalesia a Iesu Keriso o le Au Paia o Aso e Gata Ai.
I le gasologa o le faama’i i le lalolagi, o faigamalaga i Vanuatu sa matua faasaina lava, sa faafaigata ai mo le Ekalesia i le eria ona auina atu pe maua mai foi faifeautalai. Mulimuli ane, sa lei toe i ai ni faifeautalai i le Motu o Tana ma o le galuega faamisionare sa faamalosia lona telegese.
I le tauamataga o le 2022, a o amata ona toe foi i tulaga masani le olaga, sa matuai fiafia ai le peresitene o le misiona a Vanuatu, o Mark Messick, i le maua mai o se talosaga mai le Peresitene o le Itu a Tana, “Auina mai faifeautalai i se taimi vave lava e mafai ai!”
Sa silafia [mulimuli ane] e Peresitene Messick e faapea, a o leai ni faifeautalai faamisiona i Tana, sa faaauau pea e tagata o le Ekalesia i le lotoifale ma faifeautalai ua mae’a misiona sa i le motu ona aoao atu le talalelei i a latou uo ma tuaoi, ma sa i ai pe tusa ma le 85 tagata ua saunia e faatalanoaina ma papatisoina. Sa faavave loa ona faatulaga e Peresitene Messick e auina atu ona Fesoasoani i le Peresitene [FP] i Tana.
Sa toe tolopo lenei fuafuaga talu ai ona ua amata ona gogolo le maugamu ola i Tana. Ona, lavea ai lea o le motu i se afa laitiiti, lea sa mafua ai se faaleagaina lautele—na toe faamautuina atili ai le tulaga o Vanuatu e numera tasi i luga o Faamaumauga Tulaga Lamatia o le Lalolagi mo le aafia gofie i faalavelave faanatura. I le faatoa amata ai ona toe faaleleia Tana mai le afa, o le pepesi faafuasei o le KOVITI-19 na lokaina ai Vanuatu atoa, ma faapena foi, sa taofia faigamalaga.
A na le oo lava i le ogatotonu o Aokuso na faatoa mafai ai loa e Peresitene Messick ona auina atu ona Fesoasoani i Tana e faatalanoa tagata e papatiso ma saunia i latou e auai i le Ekalesia. I lena taimi, sa popole le Peresitene ina nei avea le faatali umi e faalotovaivaia ai nisi o i latou, ma ono mou ese ai lo latou naunautaiga.
Ae ina ua taunuu atu Elder Silas Toa ma Elder Brian Moses Nalin—na faaauupegaina i ni faaputuga pepa mo faatalanoaga o papatisoga—sa o la mauaina o le mea moni sa faafeagai. E le gata o le 85 o tumau pea le naunau e auai i le Ekalesia, ae ua faateleina foi lo latou fuainumera i le 29. O lea, e 114 tagata sa faatalitali ma le faatuatua ina ia faatalanoaina ma papatisoina. Sa malaga loa alii faifeautalai i le la malaga taamilo i paranesi uma e valu o le Ekalesia i Tana.
Ina ua uma ona la faatalanoaina ma papatisoina tagata e toaono i le paranesi muamua, sa agai atu Elder Toa ma Elder Nalin i Sideseawi, o se nofoaga tuufua e tumaualuga i atumauga. Sa leai se auala la te faafesootaia ai le peresitene o le paranesi a Sideseawi peitai sa la iloa o loo faatali mai o ia i a la’ua e oo atu i se taimi, o lea sa aveina ai e faifeautalai le la taavale i le mamao na mafai ai, ona faaauau ai lea ona savavali mo le vaega na totoe o se savaliga 3 itula. Ina ua la taunuu mulimuli ane, sa le’i maua atu le peresitene o le paranesi. Sa maimau le taimi na sopo atu ai alii faifeautalai i lena auala mamao.
Ona to mai lea o timuga tetele. Sa iloa e tagata uma i Sideseawi e amata loa ona malolosi timuga, o le aluese mai le mauga e matua faigata lava. Sa toe faanatinati atu Elder Toa ma Elder Nalin i le la taavale, ma le iloaina o sekone uma e taua a o le’i sua tetele vaitafe ma le mafai ai ona sopoia. Sa o la taunuu i le taavale i le taimi tonu lea e aveina le taavale e uia le vaitafe muamua ma le lona lua, peitai sa o la iloa o le vaitafe lona tolu o le a avea ma luitau.
E moni lava, sa pa’ulia le la taavale i se vaega o le auala. Sa la taumafai e tulei—sa lei faamanuiaina. Sa la valaau atu i le Peresitene o le Itu, ma sa le’i umi ae taunuu le fesoasoani, ae sa le’i minoi lava le taavale. Sa faasolo maualuga le vaitafe ma tatafe o lea na o ese ai tagata fesoasoani ma agai atu i le saogalemu. Ona vaaia lea e Elder Nalin se isi mea sa faapopoleina ai o ia. Sa ia vaaia le vai i le isi vaitafe e sosoo ai—lea e fesootai ma le vaitafe lenei—ua tatafe malosi ma faamatau e pa mai.
I lona mafaufau, e foliga mai ia Elder Nalin o se malosi le vaaia na taofiofia lena vaitafe lona tolu, e pei o loo tuuavanoa mai mo i latou . . . peitai sa ia iloa o le a le umi lea. Ua saoasaoa tafega.
O Elder Toa ma Elder Nalin o ni faataitaiga o ni alii talavou sili ona lelei mai Vanuatu—faatuatuaina ma lelei i soo se auala. Mo i la’ua, o le taavale toeitiiti lava o se tupe faaalu e le gafatiaina, aemaise lava i se atunuu e tau le gafatia e aiga ona faaaooga a latou fanau, tainane foi le faatauina o se taavale. Sa filimaoti alii faifeautalai e faasao le taavale a le Ekalesia po o le a lava le tau, peitai o le taimi nei ua oo ane le vai i au o faitotoa. Sa la valaau atu i lo latou Peresitene o le Misiona. “O le a se mea ma te faia?”
O le tali atu a Peresitene Messick o le: “Faafetai atu mo le valaau. O le taimi nei o ese ma le taavale ma sefe oulua. Ou te le popole i le taavale; Ou te popole mo oulua.”
A o la faanatinati i fafo o le taavale, sa oso Elder Toa i totonu i le nofoa i tua e uu mai a la tusitusiga paia ma le 114 o pepa o faatalanoaga sa la manaomia mo papatisoga. Na te lei vaai i se mea. Ona alaga mai lea o se leo, “Ua sau le vai! Alu ese ma le taavale!” ma sa sesee ese Elder Toa mai le faitotoa i tua i le taimi tonu lava na tafea ese ai le taavale.
O le taimi lava na iloa ai e alii faifeautalai o a la tusitusiga paia ma le 114 o pepa o faatalanoaga o loo i ai pea i totonu o le taavale—lea ua le iloa mai i le la vaai—sa o la faaaogaina le mana o le perisitua ma faatonu le taavale ia puipuia a la pepa taua. “O le mea lena e mafai ona e faia i le perisitua,” na saunoa mulimuli mai ai nei alii talavou, ma le mautinoa atoatoa. “E mafai ona e faatonuina.”
Sa mafai e Elder Toa ma Elder Nalin ona o ese mai ma le saogalemu, ma o iina i autafa o le vaitafe, sa o la tootutuli ai ma tatalo. A o la tatalo ina ia saogalemu le taavale ma ia faapena ona mago pea a la tusitusiga paia ma pepa o faatalanoaga, sa lagona e faifeautalai se faamautinoaga filemu o le a lelei mea uma. O lea, sa la savavali ese loa mai le mauga i le toega o le ala.
O le aso na sosoo ai, sa maua ai e alii faifeautalai se valaau mai le Peresitene o le Itu. Ua maua e le peresitene o le paranesi a Sideseawi le la taavale, i le 250 mita i lalo ifo. Ina ua taunuu atu alii faifeautalai e toe aumai, sa o la maua ai e leai ma se omo po o se ma’osia i le tino o le taavale, e ui lava i lana malaga i le vaitafe, pasia laau, maa, ma otaota.
O totonu o le taavale sa le’i manuia tele. Sa pala uma. O le afi sa leaga ona vaega faaeletise, ma o mea uma i totonu o le taavale—o tamaitusi, o tusi lesona, o tusi—sa susu pala e le mafai ona toe faaleleia . . . sei vagana ai tusitusiga paia ma le 114 o pepa o faatalanoaga a faifeautalai. O nei mea sa taatitia i luga o isi mea uma, na mamago uma.
A o toe faaleleia le taavale, sa savavali Elder Toa ma Elder Nalin e faaauau ai le la asiasiga taamilo. I le nuu na afe ai, sa o la faatalanoaina ai ma papatiso tagata e 48 a o le i toe faaauauina i le isi itu o le Motu o Tana. “Pe a e lelavā savali,” sa fai atu ai le tasi o i la’ua i se tasi o faifeautalai, “E te savali ma lou fatu.”
O o la fatu ma se vavega o le perisitua sa fesoasoani i nei alii faifeautalai faatuatua e ausia ma aumaia uma ai i le saogalemu le 114 tagata i le Ekalesia a Iesu Keriso.