Paionia a le Ekalesia i Kuiniselani: John Douglas Jeffrey

Saunia e John Millar

I le amataga o le 1957 sa tu’itu’i ai faifeautalai i le faitotoa a lona tina ma sa ia valaaulia i la’ua i totonu. O le amataga lea o le aoao o John Douglas Jeffrey e uiga i le Ekalesia a Iesu Keriso o le Au Paia o Aso e Gata Ai. A o faaaluina e ia ma lona tina se taimi ma faifeautalai, sa molimau ai le Agaga Paia ia te ia e moni le Ekalesia aua sa mafaia e faifeautalai ona taliina uma ana fesili.

Mulimuli ane, sa siitia atu John i Townsville, Kuiniselani, lea sa ia feiloai ai i le toatele atu o nisi faifeautalai sa faaauau ona aoaoina o ia, ma i lea foi taimi o lona toalua, o Lois. Ia Setema 1957 sa avea ai i latou ma tagata muamua sa auai i le Ekalesia i Townsville. Sa papatisoina o ia i le Alia o Bluewater sa i le itu i matu o Townsville. (O papatisoga i le alia po o le vai taele sa o se mea na masani ai i uluai aso o le Ekalesia).

“O le aoaoina e uiga i le Ekalesia moni na suia ai lo’u olaga,” o le tomanatu lea a John. “Sa ou mafaufau o le a se mea o ou faia pe ana fai atu lo’u tina ‘leai’ ina ua tu’itu’i atu faifeautalai i lona faitotoa!” Faatasi ma se vaaiga fou faaletalalelei sa sefe ai e John ma lana Lois [se tupe] e asiasi ai i le malumalu i Hamilitone Niu Sila, lea sa faamauina ai lona aiga mo le taimi nei ma le faavavau atoa. “Na umi se taimi mo ma’ua aua e toafa le ma fanau ma ioe e tatau ona ma aveina i latou e faamau ia i ma’ua!”

Sa faiaoga John i le Aoga a Townsville Grammar ma molimauina se tauiviga o se paranesi laitiiti o tuputupu a’e. I na aso sa itiiti faletatalo i Ausetalia ma sa faapotopoto tagata lotu i o latou fale po o i faletele mautotogi. I le mavae ai o le 15 tausaga i Townsville, sa ia maua ai se valaaulia e faiaoga i se Aoga fou a Leoleo i Oxley, Perisipeni. Faatoa lua ona tausaga i le Aoga Leoleo ina ua valaaulia o ia e auai i le Ofisa o Aoga a le Ekalesia o se taitai faamaopoopo i Perisipeni.

O le Siteki Muamua sa faatulagaina i Kuiniselani i le 1960 faatasi ai ma William E Waters na valaauina o se Peresitene o le Siteki. Sa mulimuli mai ia te ia se alii mai Sikotilani e igoa ia William E Proctor. Ma o le gasologa o lena taimi sa valaauina ai John o se Epikopo o le Uarota a Inala. O lona taimi o se Epikopo sa puupuu aua i le mavae o le lua tausaga sa valaauina ai e auauna atu i le Aufautua Maualuga.

I na aso o nofoaga faafanua o le siteki sa tele sa kavaina ai le tele o le sautesasa’e o Kuiniselani faataamilo i Perisipeni—matu i Nambour, saute i le Gold Coast, ma sisifo i Toowoomba. I le 1975 sa valaauina ai John e avea ma Peresitene o le Siteki o le Siteki a Perisipeni Ausetalia.

Sa matauina e Peresitene Jeffrey le mamao e malaga ai nisi tagata lotu e auai i le lotu i vaiaso taitasi, o lea sa ia aveina ai se faafanua ma tusi se lio 8 km faataamilo i faalapotopotoga taitasi. Ona o latou galulue faatasi ai lea ma le pulega o fale ma fanua a le Ekalesia i Sini e faavaeina paranesi i nofoaga faataatitia i totonu o ona li’o faataamilo. O na paranesi sa faapotopoto i faletele o aoga se’ia oo ina matua malolosi e agavaa ai mo se faletatalo. O le uiga o lea mea o tagata lotu sa le toe malaga mamao e auai i sauniga lotu. O lenei faasinomaga sa taina le ala mo le tuputupu a’e i le lumanai o sui auai i Kuiniselani.

I le 1978, faato’a tolu tausaga talu ona mavae lona valaauga o se Peresitene o le Siteki o Perisipeni, sa fautuaina ai e John ia vaeluaina le siteki. Ona avea ai lea o ia ma Peresitene o le Siteki fou a le Ausetalia Perisipeni i Saute. I le na o le tolu tausaga talu ona mavae lena mea, i le 1981, na faavaeina ai se isi siteki ma faaigoaina o le Siteki a Ausetalia Perisipeni i Sisifo.

Ua 12 nei siteki i eria tetele o Perisipeni.

I luga atu o ana auaunaga faata’ita’i i le Ekalesia, e anoano foi ni poto masani o John i galuega a le Ekalesia, sa avea o ia ma Taitai Faamaopoopo mo le Seminare ma le Inisitituti, ma sa avea ma Faatonu o le Eria o Ausetalia ma le Pasefika mo le Ofisa o Aoga a le Ekalesia.

Sa sau o ia mai se tagatafou liliu mai i se Peresitene o le Paranesi (Paranesi a Townsville), i se Peresitene o le Itu (Itu o Townsville), o se Epikopo (Uarota a Inala), Peresitene o le Siteki (siteki eseese), ma o se Peresitene o le Misiona (Winnipeg Kanata). Sa auauna foi John o se Sui Risone (o le taimi nei ua ta’ua o se Fitugafulu Eria), i le avea ai ma se Peresitene muamua o le Malumalu o Perisipeni, ma o se Failautusi Faapitoa i le Au Peresitene o le Eria o le Pasefika.

“Sa matua agalelei le Alii ia te a’u, tuuina a’u i tulaga lea sa tuuina mai ia te a’u ni aafiaga maoae o le talalelei ma ni aoaoga mai le Au Pulega Aoao,” na saunoa ai John. “O lea foi, sa faafaigaluegaina a’u e le Seminare ma le Inisitituti ona sa ou fiafia e faitau ma aoao i tusitusiga paia. I le taimi nei i le olaga litaea ua sili atu ona ou taulai atu i taumafaiga e . . . ola ai e pei ona aoao mai e le Faaola.”

O le faletua o John, o Lois Gay Tucker, sa maliu i le aso 19 o Iuni 2014. E toaono o la afafine ma le atalii e toatasi: Jennifer, Elizabeth, Karen, Anita, Lynis, Larissa ma David. “E mafai ona ou molimau atu i le taua o le i ai o se fesoasoani maoae, o le i ai faatasi i le 57 tausaga sa ma fesoasoani o le tasi ma le isi i le tele o aafiaga luitauina, e aofia ai taimi i le utiuti o le tupe e fafaga ai lo ma aiga, peitai e totogi e le aunoa a ma sefuluai, ma sa ma ola i na taimi faatasi ma le fesoasoani a le Alii . . . ma sa ma iloa o le a Ia [fesoasoani] ona o lo ma faatuatua ia te Ia.”

O John, lea ua 87, o loo alala i Redland Bay i le Siteki a Ausetalia Perisipeni Cleveland. O loo faaauau pea ona avea o se auauna faatuatua o le Alii ma molimau atu i le talalelei lea e faaauauina pea ona lagolagoina o ia: “O le Ekalesia a Iesu Keriso o le Au Paia o Aso e Gata Ai e moni, ma ua i ai so tatou Perofeta soifua o Lona fofoga taumolimoli iinei i le Lalolagi, o Peresitene Russell M. Nelson!”