“Duavata vaka Veitacini ena vei Karisito,” Liaona, Sepi. 2023.
Ni sa Kidavaki Mai kina iLavelave Oqo
Duavata vaka Veitacini vei Karisito
Na domodrau ruarua na marama kei na turaga e gadrevi me rawati kina na cakacaka ni Turaga. E dina nida duidui, ia eda veirogorogoci vakaikeda, ka duavata ena duabau na naki sai koya meda tisaipeli i Karisito.
Na noda duidui e sega ni dodonu me veivagolei tani mai na inaki oqo. Ia, na noda duidui ka oka kina na noda taledi kei na cau erau vaqaqacotaka na noda vakayaco-ka ena cakacaka ni veivakabulai kei na bula vakacerecerei e vuravura raraba. E vola ena ilavelave oqo o Elder Gerrit W. Gong ena Kuoramu ni iApositolo Le Tinikarua, “Eda na vakatauca na vakatulewa vinaka cake ka rawaka cake ena veiqaravi vua na Turaga ni da vakamareqeta na noda dui cau ka cakacakavata, taciqu kei na ganequ ena Nona cakacaka” (tabana e 4). Eda na rawata vakacava na duavata vakaoqori? Sa dodonu me da vakabauta ni rawa ni cakacaka na Turaga ena noda duidui me kune kina na vinaka ena Nona matanitu.
Ena noqu itukutuku ena tabana e 8, au wasea kina na veika au sa vulica mai na itukutuku ni Veiyalayalati Vou me baleta na yalewa ni Kenani, ka a vakasaqara na iVakabula me vakabulai luvena yalewa. Na yalewa e sega ni kawa vaka Isireli. Ia e vakabauta o koya ni kaukauwa ni Turaga e rawa ni vakabula na luvena, kei na vakabauta vakasakiti oqo a semati koya kina vei ira na tamata ni veiyalayalati ka yaco kina na cakamana.
Meda qai rai yani vua na iVakabula ena ka kecega eda cakava, ka “semati na lomada ena duavata kei na veilomani” (Mosaia 18:21). Eda kalougata nida vuli mai na kaukauwa ni noda duidui yadudua ka vakamareqeti ira me vaka e dau cakava na Karisito. Au vakavinavinakataka ni tiko e dua na iVakatawa ka rogoca na domo duidui ni Nona vei sipi yadua.
Wekamuni dina,
Peresitedi Camille N. Johnson
Peresitedi Raraba ni iSoqosoqo ni Veivukei