“Vakavinavinaka niu ‘Rogoci Koya,’” Liaona, Sepi. 2023.
Vakavinavinaka niu “Rogoci Koya”
E dredre na noqu dau vakarorogo e valenilotu, ia na italanoa oqo mai na Veiyalayalati Vou a vukei au meu raica na noqu ituvaki ena duatani tale na rai.
Sa dau tauvi au tu e dua na didivara levu ena vuqa noqu gauna ni bula ka rawa niu kila walega e rauta ni 20 na pasede ni veika e tukuni mai na itutu ni vunau ena vuqa na gauna ni soqoni ni Lotu. Ena so na gauna, na noqu didivara e dau vakavuna meu galili ka tawasei, me vaka na gauna era dredrevaka kina na ivavakoso ena dua na vosa lasa nei koya e vosa ia ka sega o au baleta niu sega ni rogoca. Ia a sega nio au duadua ga. O ira na lewenilotu qase ena tabanalevu era a tukuna vei au nio ira talega e dau dredre nodra rogoca na ka.
So na gauna, ni oti noqu saga meu kila nona vosa edua ka dau vosa-i-ra ena soqoni ni sakaramede se ena gauna e dau tukuna kina edua na qasenivuli ni Wilivola ni Sigatabu ni sega ni gadrevi me vakayagataki na gusu ni vosa baleta ni tamata kece e vinaka tu na daligadra, au vakataroga se cava meu gole kina i lotu niu sega ni rogoca vinaka na ka. Ena sega beka ni vakayagataki vinaka cake na noqu gauna e vale meu wilika na lesoni ni Lako Mai, Mo Muri Au se vulica na ivolanikalou?
Ia, au a vinakata meu talairawarawa ka tomana tiko noqu tiko ena lotu vata kei na noqu matavuvale meu vakavouya na noqu veiyalayalati ni papitaiso ka nanuma na iVakabula ena noqu vakaivotavota ena sakaramede. Sa dau ka dina ni veivakalougatataki meu vakila na Yalotabu, kau dau vakila niu vakatataki cake mai na veika au rawa ni rogoca.
Ena dua na Sigatabu e a vosa ena soqoni ni sakaramede edua na lewe ni matabose e cake ena domo makare, ka vakarawarawataka na nona rogoci. E a tukuna na italanoa mai na Veiyalayalati Vou me baleta na marama turi dra balavu me 12 na yabaki ka vakabauta ni rawa ni vakabulai kevaka e rawa ni tara walega na tutu ni isulu i Jisu ni tavali (raica na Luke 8:43–48).
E qai solia o koya ka vosa edua na veivakararamataki bibi ka lauti au sara vakalevu, ka vakamacalataka ni baleta na nona ituvaki, na yalewa oqo e okati me tawasavasava ka na rawa kina me kua ni vakatarai me tiko ena lotu. Me 12 na yabaki!
Na revurevu ni ka oqo a kurabuitaki sara vakalevu vei au. E dina ga ni tauvimate, ia a rairai sega sara ni bibi na kena mate me sega ni rawa ni dau tiko kina ena lotu, vakavudua mada ga. Ia ena vuku ni lawa ni veimaliwai vakaitikotiko ka tu ena gauna oya, a sega kina ni vakatarai me tiko kina. Sa dua na veivakatovolei mosimosi vua e dua na tamata vakabauta!
Niu vakasamataka na mosi ni yalo a rairai vakila ena nona vakatabui mai na sokalou vua na Kalou vata kei ira na itokani era vakabauta vata ena vuku ni nona ituvaki vakayago—e dua na ka e sega ni lewa rawa—na Yalotabu a dolava na mataqu meu raica na tautauvata ni veika keirau sotava. A rawa vei au meu kila, dina ga niu sega ni rawa ni vakaitavi vakataucoko, sa bau rawa mada ga vei au meu tiko ena lotu ka rogoca na veika au rawa ni rogoca. Na marama oqo a sega vua na digidigi vakaoqo. Au madualaka na veigauna lekaleka au a dau vakasamataka kina meu tiko ga e vale.
Vakasauri ga, a vosa i yaloqu na Kalou, ka meu kila ni sega ni vinakata o Koya meu vakila niu beitaki. E vinakata meu vakavinavinaka—vakavinavinakataka meu rawa ni tiko ena lotu ka vaqaqacotaki ena noqu veitokani kei ira na tisaipeli yalodina i Karisito. E dina niu sega ni rogoca rawa na veika kece, ia au rawa ni kila eso na ka—ka dau vakalougatataka na noqu bula na veika vakayadua oqori. A tu talega na veigauna talei eso a vukei au kina na Yalotabu meu kila vakavinaka na veika au a sega ni rawa ni rogoca.
Au vakavinavinakataka na galala meu sokalou kina vua na Kalou ka marautaka na veivakalougatataki ni gole ki na Nona vale. A vakadinadinataka vei au na Yalotabu ni vinaka vakalevu cake vei au meu tiko ena soqoni ni Lotu, vakaivotavota ena sakaramede, ka vulica kina eso na ka mai na noqu sega sara ga ni tiko kina.
E veisau na noqu itovo ni rai ena siga oya. Ena vuku ni noqu sega ni via yalolailai ena vuku ni noqu malumalumu, a vakasinaiti kina na yaloqu ena vakacegu, kau a vakadeitaka meu vakanamata ga ki na veivakalougatataki ni dau tiko ena lotu. Au vakadeitaka meu saga ena yalodina meu vakavinavinakataka na ka au rawa ni rogoca mai na noqu vakayalolailaitaki ena veika au sega ni rawa ni rogoca.
E kaya o Elder Dieter F. Uchtdorf ena Kuoramu ni iApositolo Le Tinikarua: “Na vakavinavinaka ena gauna ni leqa e sega ni kena ibalebale ni da marautaka na veika eda sotava. E kena ibalebale ga ena rai ni vakabauta eda sa raibaleta kina na dredre eda sotava tiko nikua.”1 Na marama ka dodoliga me tara na tutu ni sulu i Jisu sa dua na ivakananumi totoka vei au me tu vei au edua na tiki ni vakabauta na Turaga meu raibaleta na noqu malumalumu kei na vakararavi e veirauti vua na Kalou meu kila nio Koya ena vakalougatataki au meu ulabaleta na kequ ituvaki vakayago.
Na bula e kauta mai na veimataqali bolebole kece sara e dau vakabibitaka na yaloda, na lomada, se yagoda, ia ena gauna mada ga ni leqa, eda sa vakayaloqaqataki meda vakavinavinakataka na veivakalougatataki eda marautaka tiko. E kaya na Turaga:
“Au sa kaya vakaidina vei kemudou na wekaqu, dou kakua ni rere, dou yalo vakacegu ga; io, dou reki tiko ga, ka vakavinavinakataka na ka kecega. …
“… Kei na veika kece dou sa vakararawataki kina era na vakaduavatataki mo dou vinaka kina, ka me vakalagilagi kina na yacaqu” (Vunau kei na Veiyalayalati 98:1, 3).
E vakaitikotiko na dauvolaivola e Utah, Amerika.