“Papitaiso ena Bogi ni Vakaraubuka,” Liaona, Sepi. 2023.
Domodra na Yalododonu Edaidai
Papitaiso ena Bogi ni Vakaraubuka
Na noqu gagadre meu veivutuni a vukei au meu kunea na iVakabula kei na Nona Lotu.
Droini mai vei Katy Dockrill
Ni oti noqu sotava na marau taumada ni noqu lako mai Amerika mai Jaina meu rawata na noqu koroi cecere vakavuli, au a vakaogai sara ena vica vata na pepa ni vuli meu wilika ka vola. Au a veilecayaki talega ena sala meu veimaliwai kina kei noqu daunivakasala vakavuli, ka vakuria na noqu lomaocaoca. Au vakila niu yali ka galili, kau a sega ni kila na ka meu cakava.
Au a vakadeitaka ni noqu caka cala e liu sa vakavuna na noqu rarawa ka na gadrevi meu veivutuni. Sa yakavi bogi mai, kau mani vakaqara ena initaneti na “lotu”. Au a raica ni lotu duadua ga ka se dola tiko me yacova na 9:00 ena bogi sai koya Na Lotu i Jisu Karisito ni Yalododonu Edaidai. Niu vakadeitaka ena noqu vakasama meu laki veivutuni e valenilotu, au tekivu yani ena dua na ilakolako ka dua na auwa na kena dede.
Niu yaco yani i valenilotu rauta na 6:00 ena yakavi, au a raica na cina ka rogoca na veidredrevaki kei na ivakatagi ni lako tiko mai loma. Au vakasaqaqara wavokita na vale ia au sega ni kunea rawa na katuba. Ena dua na katubaleka, au raica e dua na tama ni qito tiko kei luvena tagane ena dua vei ira na rumu. Au a tukituki ena katubaleka me rawa ni raici au. A dusimaki au ki na katuba, kidavaki au ki loma, ka tukuna vei au ni dua e papitaisotaki tiko.
Au a muri koya ka curu ena dua na rumu ka solia tiko kina edua na veivakalougatataki edua na tagane vua edua na gonetagane ka se qai papitaiso oti ga. Niu tu voleka e katuba, ka vakarorogo ki na veivakalougatataki, au a vakila ni Kalou e vakasolokakanataka tale tikoga mai vei au na veivakalougatataki. A vakatakatari na lomaqu, kau a vakila na veika au a qai mai kila e muri ni oya na Yalo Tabu. Au a rogoca talega e dua na domo ni kaya niu sa vosoti.
Ni oti na papitaiso, au a soqoni vata kei ira eso ka sotava kina e vuqa na tamata vinaka. Au a sega tale vakadua ni galili. E dua na turaga a vakatakilai koya ni a “peresitedi ni tabana” e liu a lomasoli me kauti au ki vale. Ni oti e vica na vula, ni oti noqu tauri lesoni vei rau na kaulotu, au a papitaiso.
Ena siga ni noqu papitaiso ena 2018 mai Cambridge, Massachusetts, a vosa kina e dua na baraca baleta na sala a vakarautaka kina na Tamada Vakalomalagi lomani na papitaiso ena Vakaraubuka oya. A vakamacalataka ni papitaiso a dodonu me qai vakayacori ena Sigatabu ka tarava, ia ena vuku ni veisaqasaqa ni gauna, e a tuvai kina ki na bogi ni Vakaraubuka. Ke a sega na veisau oya, keu a sega beka ni mai kila na Lotu, noda iVakabula kei na Tamada Vakalomalagi, kei ira na taciqu kei na ganequ ena kosipeli.