Veiqaravi ena Dauvosota

E rawa nida taracake na kaukauwa meda dauvosota vakalevu cake, ena bula kei na nodra qaravi na tani.

iVakatakilakila

era taubale vata tiko e tolu na marama

Ena 2 Korinica 12:7–8, e tukuna kina o Paula ni a masu vakatolu me kautani “edua na voto ni kau sa vakalauti kina na lewequ”. Ia a sega ni saumi na nona masu ni a sega ni kautani na bolebole a sotava tiko. Ia, a tukuna vua na Turaga, “Sa rauti iko na noqu loloma.” E vakaraitaka o Paula na vosota kei na vakabauta ena nona sauma vakaoqo: “O koya oqo sa yaloqu sara kina meu rekitaka na noqu malumalumu me tiko kina vei au na kaukauwa i Karisito” (tikina e 9).

Na Turaga a vakatavulici Moronai talega ni ena loloma soli wale i Jisu Karisito, eda rawa ni vuli ka tubu ena kaukauwa: “Kevaka era na lako mai vei au ko ira na tamata, au na vakaraitaka vei ira na nodra malumalumu. Au sa solia vei ira na tamata na malumalumu mera vakayalomalumalumutaki ira kina; ia sa rauti ira vinaka na tamata kece ga era sa vakamalumalumutaki ira vei au na noqu loloma soli wale; ni kevaka era sa vakayalomalumalumutaki ira vei au, ka vakabauti au, au na qai vakayacora me vu ni nodra kaukauwa na veika malumalumu” (Ica 12:27).

Veiqaravi ena Dauvosota

Me vakataki Paula, e levu vei keda eda sa dau kerea na veivakacegui ena vuqa na gauna ena noda bula—ka so na gauna e dau sivia sara e tolu na gauna. Ena so na gauna edau gauna donu me soli mai kina na veivakalougatataki oya, kei na so tale na gauna eda vakataki Paula, eda vakavulici ka vaqaqacotaki. Ena veigauna oqori, sa rawa ni da vulica na vosota ka vulica meda waraka na gauna ni Turaga.

Eda gadreva na ivakarau Vakarisito ni dauvosota nida veiqaravi talega. Eda na qaravi ira beka na tamata ka duidui na nodra bolebole kei na ivakatagedegede ni kila na kosipeli, ka na taura na vosota kei na loloma me veiqaravi vei ira na tamata era sega beka ni veiciqomi.

iVakatakilakila

na marama e tacake tiko

iTaba mai na Getty Images

Vakatorocaketaki ni Dauvosota

Ni yaco me da mai kila na iVakabula, eda na kila vakavinaka cake na ka ena cakava o Koya me veiqaravi ena vukuda. E rawa vakacava nida taracake na ivakarau va-Karisito ni dauvosota?

Mo kila ni bula oqo e sinai tu ena veituvaki ka vakatovolea noda vosota ka sa kena ivakarau meda dau yalo rarawa ena so na gauna. Nanuma tiko ni ena vakatovotovo kei na vakabauta na Turaga, eda na rawa ni vakavinakataka kina na ka eda na cakava ena vei ituvaki dredre eso. Mo vosota ena nomu saga mo dauvosota vakalevu cake!
Kerea vua na Kalou na veivuke ni ko vakila ni dredre nomu sasaga mo dauvosota. E dua na icegu levu kei na masu e rawa ni kauta mai na maravu kei na vakacegu.
Na vakarorogo kina sereivakatagi veilaveti vakayalo ka kauta mai na yalo vakacegu, e rawa ni vukei iko mo vakatulewataka na yalo dau vakacudrui rawarawa.
Waraka na gauna ni Turaga ena nomu bula. Na lomada kei na gagadre e dodonu me moici kina Nona ituvatuva.
Na dau vosota e dua na ivakarau ni vakasama. Nanuma tiko ni yalo ni vakariri se na kena dau tiko vei keda na yalo ni vakusakusa ena sega ni dau vakavinakataka cake na noda bula.

Vakasama eso ni Veiqaravi ena Dauvosota

Ena so na gauna na noda itavi vaka dauveiqaravi sai koya meda vukei ira na tani me ra dau vosota nira veivakatovolei. Oqo eso na sala eda rawa ni veivuke kina:

Vakaraitaka vua na tamata se matavuvale nida lomani ira ka kauwaitaki ira se cava ga na bolebole era sotava tiko, kevaka mada ga era nanuma, ena iulubale cava ga, ni ra sega ni lomani.
Wasea vata kei ira na veika o sotava ena gauna o a vulica kina mo dauvosota ka vakila ni dredre dina. Vukei ira me ra nanuma ni ra sega ni tutaudua ni ra vakila na yalototolo se cudru.
Masulaki ira me rawa nira dau vosota ena veivakatovolei dredre ka mera kila ni na rogoca na Tamada Vakalomalagi na nodra masu me rawa nira vakila na kaukauwa oya.
Mo dau vakarorogo ni ra gadreva e dua mera vosa kina. Na nona tiko edua na itokani dauveikauwaitaki edua vei ira na sala vinaka duadua me vosoti kina edua na veivakatovolei se ituvaki dredre.