Vakabulai e loma ni Valetabu

Mai vei Phumele Mkhize, KwaZulu-Natal, Sauca Aferika

Ena valetabu, au vakila kina e dua na veivakadeitaki titobu ni Turaga e lomani au ka kauwaitaka tiko na noqu sasaga bula tiko.

Na imatai ni luvei keirau tagane a sucu-mate ena 2017. Ni vo e ciwa na vula me vakatabui na Valetabu e Durban Sauca Aferika ena 2020, e a sucumate tale na ikarua ni luvei keirau tagane.

Ena gauna oya, au vakila niu vakataki Ana ena Veiyalayalati Makawa. “A sa rarawa na yalona, a sa masu vei Jiova ko koya, ka tagi vakalevu” (1 Samuela 1:10).

Au vakila niu sega ni vukei au rawa vakataki au ka cudru, ka tauvi au tiko na mosi vakaitamera. Au vakila ni leqa na lomaqu, na yagoqu kei na yaloqu. Na tautauri tiko ki na ititoko e a vaka niu tautauri tiko ki na dua na waniculacula ka sa cawadru vakamalua tiko mai ligaqu. Au kama vakaidina tiko ena “kuro qele ni veivakararawataki” (Aisea 48:10).

Au vakavinavinaka niu a ciqoma na veivuke kei na veivakabulai mai na noqu matavuvale, na ivolanikalou, kei na masu. Au ciqoma talega na veivuke mai vei ira na dauniveivakasalataki. Ia, na tuvuka ni noqu vakabulai, a yaco ena loma ni valetabu.

Niu tekivu veiqaravi ena valetabu, sa tekivu meu vakasinaiti ena rarama levu. Au vakila na veivakacegui e kea. Au vakila talega e dua na veivakadeitaki titobu ni Turaga e lomani au ka kauwaitaka tiko na noqu sasaga bula.

Niu tomana tiko na noqu veiqaravi ena vale ni Turaga, au sa tekivu meu raica na yacadra na noqu qase e liu ena dua na rai duidui. Era sega ni yaca walega. Au qai kila, me kena ivakaraitaki, ni dua na qase e liu a luvena yalewa edua, dua na tina, dua na bubu, dua na nei, a ganena edua, ka vugona edua. Na nona mate a rairai dredre sara vei ira na wekana era bula tiko. Ia na veivakalougatataki e vakarautaki tu vua na qase e liu oqo e valetabu ena veicakacaka vakalotu tabu vakaveisosomitaki, e tiko kina e dua na reki vakaitamera ka kamica ka uasivita na mosi cava ga era a vakila na wekana bula ena nona sa mai takali.

Na kila oqo e sa vakalougatataki au ena noqu vakasamataki rau na neirau gonetagane vakamareqeti, na ituvaki tawamudu ni yaloda, kei na ituvatuva ni veivakabulai nei Tamada Vakalomalagi. Na nodrau mate na luvei keirau tagane e vakauqeti au meu cakava na noqu vinaka taucoko meu bulataka na kosipeli.

Eso na siga era a dredre cake mai na veisiga tale eso. Ia na tautauri matua ki na noqu yalayala ni veiyalayalati a vakarawarawataka na veisiga oqori.

Me kerei na vosa nei Peresitedi Russell M. Nelson, “Keirau sa nanuma vakalevu na luvei keirau [tagane]. Ia, me baleta ga na kosipeli vakalesuimai i Jisu Karisito, keitou sega ni lomaleqataki [rau]. Ni keitou doka tikoga na neitou veiyalayalati kei na Kalou, keitou sa namaka me keitou na tiko vata tale kei [rau].”¹