“Taciqu kei na Ganequ vua na Turaga,” Liaona, Sepi. 2023.
“Taciqu kei na Ganequ vua na Turaga
“Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura—ka soli kemuni mai vei keimami o Koya.
Vakabula o Karisito na luvena tagane e dua na yada ena koro ko Neini.
Ni biubiu mai Kapenaumi, a lako na noda iVakabula ki na dua na koro ka vakatokai o Neini. Voleka ki na matamata ni koro, a raica o Koya e dua na ilakolako ni veibulu. Na nona mate sega ni namaki na luvena e duabau ga e dua na yada dravudravua a vakavuna me mai tu duadua kina.
“Ia ni sa raici koya na Turaga, sa lomana sara, ka kaya vua, Kakua ni tagi.
“A sa lako ko koya ka tara na tavata: a ra sa tu vakadua ko ira sa colata. Ka sa kaya, O iko na cauravou, au sa kaya vei iko, Tu cake.”
Ni duri cake na cauravou ka tekivu vosa, a sa “soli koya vei tinana” o Jisu (raica na Luke 7:11–15; vakaikuritaki).
Ena Nona gauna taucoko ni veiqaravi, ki na 1 se ki na 99,1 na noda iVakabula e vakaraitaka vakavinaka sara na yalololoma, vakabauta, inuinui, loloma uasivi, loloma, veivosoti, loloma veivueti, kei na veiqaravi.2 E sureti keda yadua o Koya meda “lako mai, ka muri au” (Luke 18:22) ka yaco me “vakataki au” (3 Nifai 27:27).3
“Mo dou vakataki Au”
Meda muria na ivakaraitaki uasivi ni noda iVakabula ka yaco me vakataki Koya, eda ciqoma na Nona veisureti me da lako vata kei Koya ena Nona salatu ni veiyalayalati (raica na Mosese 6:34). Ena so na gauna eda dau kila rawa na salatu ni veiyalayalati ena cakacaka vakalotu ni veivakabulai kei na bula vakacerecerei e vakatakilakilataki kina—papitaiso kei na veivakadeitaki me ciqomi na isolisoli ni Yalo Tabu ka yaco me lewena Na Lotu i Jisu Karisito ni Yalododonu Edaidai; Veitabaki kina Matabete i Melikiseteki (vei ira na veitacini); edaumeni ena vale ni Turaga (me baleti keda yadua); kei na veivauci ni valetabu.
Na cakacaka vakalotu e gadrevi me baleta na vakabulai kei na vakacerecerei e dua na cakacaka tabu ka vakayacori ena lewa ni matabete vakadonui ka vakavulica vei keda na veiyalayalati ka salavata kei na cakacaka vakalotu oqo. Ena so na sala, eda rawa ni vakasamataka e dua na cakacaka vakalotu ni veivakabulai kei na vakacerecerei me dua na cakacaka e sau ka kauta mai e dua na ivau ni veiwekani vata kei na Kalou kei na Luvena tabu kina noda bula ena vuku ni veiyalayalati.
Oi keda yadua, nida luvena tagane se yalewa lomani na Kalou, eda sa dui cakava na noda veiyalayalati tabu vua na Kalou. Eda vakayacora vaka tamata yadua, ena yacada yadua, vakayadudua. Na sema ena veiyalayalati oqo kei na Kalou sa soli kina vei keda yadua na kaukauwa, inuinui, kei na yalayala. Na veiyalayalati oqo era rawa ni veisautaka sara ga na keda ituvaki, vakasavasavataka na noda gagadre kei na ivalavala, ka vukei keda me da biuta tani na tagane se marama vakavuravura ni da soli keda ki na veivakayarayarataki ni Yalo Tabu. Ena veiyalayalati, ena vuku ni Veisorovaki i Karisito na Turaga, o keda yadua e rawa meda yaco me dua na luve ni Kalou—“meda talairawarawa, yalomalua, yalomalumalumu, dauvosota, ka sinai ena loloma” (Mosaia 3:19).
Veiqaravi Vata ena Veiyalayalati
“Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura” (Joni 3:16)—ka soli kemuni mai vei keimami o Koya. Na okati ena veiyalayalati—meda semati vata kei na Kalou ka vakai keda ena veiyalayalati—e sureti keda meda rawata na noda ivakatakilakila kei na inaki vakalou ena noda veitaratara kei lomalagi ka semati ka tauyavutaki e dua na itikotiko ni Yalododonu nida veilomani ka veiqaravi vakai keda vakakina o ira era tu wavoliti keda. Ena kena vakarautaki na madigi me baleta na yalayala kei na okati ena veiyalayalati, e sega ni digitaki ira vakailoa na tamata na Kalou. E sureti keda yadua o Koya, yalewa kei na tagane, vakawati se sega, se cava ga na vanua eda lako mai kina kei na ituvaki, meda lako Vua ka vakakina vakai keda ena veiyalayalati.
Nida okati ena veiyalayalati vua na Turaga, eda sa okati talega ena veiyalayalati vakai keda. Na veika vakasakiti ena yaco ni da lomana na Turaga ka cakacaka vata, veivakasalataki vata, ka veiqaravi vakai keda. Na veiqaravi ena veiyalayalati e vaqaqacotaka na keda ivau vua na Turaga ka vakakina vakai keda. Oqo e oka kina na noda veimaliwai yadua kei na Tamada Vakalomalagi, matavuvale, ivavakoso ni Lotu, itikotiko, kei na veitabatamata ni matavuvale. Nida bulataka na noda veiyalayalati, eda na vakayalia noda dau nanumi keda ka kunea na bula ka kena usutu na Karisito.
iTuvatuva ni Bula Marau Vakalou ni Kalou
Ena ituvatuva ni bula marau vakalou ni Kalou, a kaya o Peresitedi Russell M. Nelson, “sa tadola tu ko lomalagi vua na yalewa sa vakaedaumeni ena nona mana ni matabete na Kalou ka drodro mai na nodra veiyalayalati ni matabete me vaka vua na tagane e taura tu na matabete.”4
E tukuna o Peresitedi Camille N. Johnson, na Peresitedi Raraba ni iSoqosoqo ni Veivukei, “Sa tu vei keda na dodonu me da rawata na kaukauwa ni matabete ena ivalavala dodonu ena vuku ni bula kilikili yadua.”5 Ni cavuvosataki Peresitedi Nelson, e kaya o koya, “Eda gadrevi ira na marama era kila na sala me ra rawata kina na kaukauwa sa vakarautaka tu na Kalou vei ira na daumaroroya na veiyalayalati.”6 O ira na daumaroroya na veiyalayalati era vakasaqara ka bula ena vakabauta, yalomalumalumu, kei na gugumatua, e vakavulica o Peresitedi Johnson, e rawa ni ra ciqoma na veituberi, veivakauqeti, isolisoli ni Yalotabu, ivakatakila, kei na “veivuke kei na kaukauwa me yaco me vakataki Jisu Karisito vakalevu cake kei na Tamada Vakalomalagi.”7 Nida dui solia yadua na noda isolisoli talei ka cakacaka vata kei na Turaga ka vakaikeda, eda sa bulia kina “na yago e duabau ga” (1 Korinica 12:13).
Ena ituvatuva ni Kalou, o ira na tina kei na tama era sa veitokani ka dauveivukei vata. Eda veivukei vakaikeda nida sa itokani vata ena loloma kei na buladodonu me da veisusu ka veiqaravi vakaikeda ka vakakina ki na noda matavuvale. Na savasava ni vakasama kei na itovo era sa gadrevi taumada ki na ivakatakila kei na veivakauqeti ka ra gadreva na marama kei na turaga. Ena nodra veivale, o ira na tama kei na tagane vakawati era na vakatulewa ena yalomalua, yalomamalumalumu, kei na loloma e sega ni veivakaisini—na itovo ni bula dodonu ka ra gadreva na tagane kei na yalewa ena noda veimaliwai kece sara.8
E rarawa na Lomalagi ni, ena dua na veimaliwai, e tiko kina na veivakavakacacani, ivakarau kaukauwa, se veivakasaurarataki cava ga mai vua na tagane se yalewa. Na veivakauqeti, na vosota vakadede, na yalovinaka, kei na kila savasava sa ivakarau Va-Karisito eda vakasaqara yadua—se da vakawati, sega ni vakawati, mate na watida, se veisere (raica na Vunau kei na Veiyalayalati 121:41–42). Oqo e baleta ni noda itutu ena mata ni Turaga kei na Nona Lotu ena vakatau ena noda itovo ni bula yadua kei na buladodonu ena maroroi ni veiyalayalati.
Veivakasalataki ena Matabose
Ena yalo vata oqo, ena Lotu ni Turaga eda veivakasalataki ena matabose ni da veiqaravi vata. Ena noda matabose, era dau vakasaqara na iliuliu na veivakararamataki kei na veivakasama eso mai na tamata kecega. Au vakavinavinakataki ira vakayadua na marama kei na turaga vakasakiti kau kalougata me keimami veiqaravi, vata, ena veimatabose e cake ni Lotu. O ira na marama kei na turaga vakaturaga oqo era veivuke ena vakasoqoni vata nei Isireli ena veiqaravi vakadaukaulotu, vakarautaki keda meda sota kei na Kalou ena veiqaravi ni matabete kei na matavuvale, vakaduavatataka na matavuvale me tawamudu ena veiqaravi ni valetabu kei na tuva kawa, ka qaravi ira era vakaleqai tu ena veiqaravi ni welefea kei na bula rawati koya.
Ena veikisi yadua, eda vakayaco digidigi vinaka ka rawa-ka vakalevu sara ena veiqaravi vua na Turaga ni da vakamareqeta na noda dui cau vakaikeda ka cakacaka vata, vaka veitacini kei na veiganeni ena Nona cakacaka.
Sa vakakina, au vakavinavinaka ni, ena noda iteki kei na tabanalevu, era sa duavata kina na veitacini kei na veiganeni iliuliu kei ira na lewenilotu ena cakacaka ni veivakabulai ka rawati kina na bula vakacerecerei. Ena Lotu, ena ruku ni nodra veidusimaki ni iliuliu yalodina ni kaulotu, na matabose ni veiliutaki ni tabana ni kaulotu ka oka kina o ira na cauravou kei na goneyalewa iliuliu ni veituberi ka ra liutaki ira noda daukaulotu, ka sa yaga ka bibi na nodra cakacaka kei na itavi yadua. Ena mataivalu ni Amerika, o ira na italatala ni Yalododonu Edaidai, era turaga kei na marama sotia ka ra tokoni mai na Lotu, ka ra vakalougatataki ira era veiqaravi ena veitabana ni mataivalu duidui eso.9 Ena veiqaravi, sa tu vei ira na noda cauravou kei na goneyalewa na madigi kei na gagadre me ra veiqaravi. Ena noda veiqaravi, eda na duavata kece.
E dua na sala eda tu ka ivakadinadina kina ni Kalou sai koya meda ivakadinadina ni cakacaka vakalotu vakalesui mai ni kosipeli. Kemuni na taciqu kei na ganequ meda tu ka ivakadinadina me baleta na papitaiso, vei ira na bula kei ira na mate. Kemuni na taciqu kei na ganequ meda tu ka ivakadinadina me baleta na ikuri ni cakacaka vakalotu ena vale ni Turaga. E kea, ena ruku ni idola ni peresitedi ni valetabu, era dau qarava na marama na veicakacaka vakalotu tabu me baleti ira na veiganeni ka ra na vakayacora na turaga na veicakacaka vakalotu tabu me baleti ira na veitacini.
Ena ituvatuva vakalou ni marau ni Kalou, e kaya kina o Peresitedi Dallin H. Oaks, na iMatai ni Daunivakasala ena Mataveiliutaki Taumada, “na kaukauwa ni matabete e vakalougatataki keda kece sara. Na idola ni matabete e dusimaki ira na marama vakakina na turaga, kei na cakacaka vakalotu kei na lewa ni matabete sa baleti ira na marama vakakina na turaga. … O koya ga e cakacaka ena dua na itutu se veikacivi ka ciqoma mai vua e dua ka taura tiko na idola ni matabete e sa vakayagataka tiko na lewa ni matabete ni vakayacora tiko na nona itavilesi.”10
Tubu Sivita na Vuravura``
Ni da saga meda “duabau,” me vaka ga ni sa duabau kei Tamada o Jisu Karisito (Joni 17:21), sa dodonu meda “vakaisulu … ena Turaga o Jisu Karisito” (Roma 13:14).
E rawa ni da vakasavasavataki, nida tubu ena loloma soliwale, ka vulica ka taura me noda na itovonibula i Jisu Karisito—me da loloma vakalevu cake, veivosovosoti vakarawarawa, kua ni dau lelewa vakatotolo, veiqaravi ka solibula vakalevu cake, vakaraitaka vakatitobu ka vakawasoma na yalololoma.
Me da nuitaka na ivunau kei na ivakaraitaki i Karisito, ka marautaka na dina ka yaco meda Nona tisaipeli yalomalumalumu (raica na 2 Nifai 28:14)—o keda vaka tamata yadua ka vakakina vakaveitacini ka vakaveiganeni ena Turaga.11