“O Via Kila Vakalevu?,” Liaona, Sepiteba 2023.
Domodra na Yalododonu Edaidai
O Via Kila Vakalevu?
E dua vei ira na noqu lewe ni valelaca e a duatani mai vei ira na sotia tale eso, kau mani taroga kina vua na vuna.
E papitaisotaki tiko o koya ka vola na ivola mai vei Thomas Salisbury ena Drano e Sông Bé, Vietnam.
iTaba lolomataki mai vei koya ka volavola
Au a curu kina Mataivalu ni Amerika meu yabaki tolu kina ka yaco yani ki na Ceva kei Vietnam ena noqu ika 20 ni yabaki ni noqu siganisucu. Ni oti e walu na vula, au a lesi ki na dua na itikotiko ni mataivalu ena vua-i-ra kei Saigon. Niu tiko voli e kea, au raica sara vakatotolo ni dua vei ira na lewe ni noqu valelaca, o Thomas Salisbury, a duatani mai vei ira kece.
Na duidui e a laurai levu kau mani tarogi koya kina, “Tom, na cava o duatani kina mai vei ira kecega oqo?”
“Baleta niu Yalododonu Edaidai,” a sauma o koya.
“Na cava e dua na Yalododonu Edaidai?” Au a taroga.
A lokuca o koya me keirau sota talega kei Harold Lewis, e dua ka sa kaulotu oti ka veiqaravi tiko vaka-ivukevuke ni italatala ni itikotiko ni mataivalu. Ena imatai ni neitou soqoni ena dua na valelaca ka vakayagataki tiko me dua na valenilotu lailai, au a vakadonuya kevaka au vakabauta dina na veika erau tukuna tiko vei au, au na papitaiso. Au a ciqoma talega e dua na ilavelave ni iVola i Momani, kau dau tawana tiko ena taga e ra ni noqu itarausese balavu ka dau wilika ena gauna kece au cegu kina.
A tarava mai e vica na veivosaki, kau kunea ni lesoni yadua a saumi kina na taro ka dau tiko vei au ena noqu vakasaqara voli na dina. Ia ni rau tarogi au o Tom kei Harold se au via papitaiso, au a kaya sega. Au sega ni kila se au na muria vakacava na ivakaro kece erau a vakavulica vei au.
Ni oti noqu tiko ena dua na koniferedi ni tikina e Saigon, au a gole ki Ositerelia me dua na macawa ni vakacagicagi kei na vakacegu. Niu tiko e kea, sa tekivu yaco meu vakila na bibi ni ivakavuvuli ni kosipeli vei au. Niu lesu tale ki Vietnam, au a tukuna sara vakatotolo vei Tom niu gadreva meu papitaiso.
Ni oti ga vakalailai, a papitaisotaki au o Tom ena drano e Sông Bé, ka vakadeitaki au o Harold meu sa dua na lewe ni Lotu, kei Timoci Hill, na neitou iliuliu ni ilawalawa ni Lotu, a tabaki au meu dikoni.
Niu lesu i vale ki Amerika ni oti e ono na macawa ki muri, au a vakatakila na kosipeli vei noqu itau, ka qai yaco me watiqu. A ciqoma talega o koya na itukutuku ni inuinui ka tiko ena kosipeli.
Au na dau vakavinavinaka tawamudu tu ga nia tarogi au o Tom se au vinakata meu kila eso tale na ka. Na Nona ivakaraitaki kei na veisureti a sauma na noqu gagadre meu kunea na dina ka marautaka na veivakalougatataki ni kosipeli.