“Sa Qai Kila na iBalebale ni Lomani Mai Vua na Kalou.” Liaona, Sepi. 2023.
iTabagone Qase Cake
Sa Qai Kila na iBalebale ni Lomani Mai Vua na Kalou
Au sa guilecava na kaukauwa ni noqu kila tiko na kequ ivakatakilakila vakalou.
Droini mai vei Alecia Schubert
Niu a se gone, a toki na noqu matavuvale mai Hungary ki Jamani. Au a marau me toki i kea, ia a qai yaco me ciwa na yabaki dredre ni noqu bula.
A dredre na noqu saga meu vulica na vosa vaka Jamani, kau dau mavoa vakatotolo na yaloqu, ka dau vakavuna kina na noqu dau vaqaseni vakarawarawa. Na noqu raica na kequ yaga a lutu sara ga. Ni toso na gauna au a vakila ni vaka au sega ni lomani ka lailai noqu vakanuinui kina veisiga ni mataka. Au a vakataroga se na vinaka cake beka na vuravura keu yali o au ka so na gauna sa dau yaco mai na vakasama ni kukuna.
Ia, ena sala tawakilai, ena loma ni veika rarawa, au kila ni a soli vei au na bula ena vuku ni dua na inaki, kevaka mada ga au a sega ni kila taucoko na kena ibalebale. Au a kila ni rawa meu kunea na rarama ni iVakabula ena gauna mada ga ni butobuto levu (raica na Ica 12:4). Ni vaka me veicalati na veika kecega, au a kila na vanua meu kunei Koya kina kei na ka e rawa ni cakava vei au keu vakasaqarai Koya ena ivolanikalou, ena masu, ka vakayacora na noqu vinaka kece meu nona tisaipeli. Na bulataki vakaidina ni Nona kosipeli a solia vei au edua na tiki ni vakacegu ka a vukei au meu toso tikoga ena gauna vakadomobula oqo.
E Dua na Dina Ka sa Yali Vei Au
A qai yaco, me keitou toki tale vakamatavuvale ki Hungary. Au sa taurivola oti ena vuli torocake, ka dina ga ni sa oti noqu dau vaqaseni, a se yali tikoga na noqu nuitaki au vakai au. Na revurevu ni noqu dau vakalolomataki a tarai au sara vakalevu, ka so na gauna au dau vakatitiqataka na kequ yaga vakai au.
Me vaka niu dua na itabagone, au a vinakata dina meu yalodei niu cakava na veidigidigi lelevu ni bula kei na digitaki ni cava au via rawata ena bula.
Ena gauna au a sotava tiko kina na veika oqo, au a vakauqeti meu tiko ena dua na koniferedi me baleti ira na itabagone sega ni vakawati ena tokalau kei Iurope. Au a gadreva eso na veidusimaki vakayalo ena noqu bula me vukei au me’u vakatitobutaka na kequ-yaga ka masulaka meu kunea e kea na isaunitaro.
Ena dua na bogi ni koniferedi, e a se na voto ni ligaqu ena gauna a tekivu vosa kina o koya ka vosa ena yasanibuka me baleta na nona a dau vaqaseni ni se gone. A vosa me baleta na nona a vakila na nona tawayaga ka sega ni laurai. Au sa tekivu tagi sara ga.
A vakamacalataka o koya na veika sara ga au sa sotava oti.
A tomana nona vosa ka wasea na dina a tautauri tu kina ena gauna ni nona bolebole—e dua na dina kau sa guilecava:
“Au luve ni Kalou.”
Mareqeta na Kequ iVakatakilakila Vakalou
E a se tonawanawa tikoga na wai ni mataqu, ni sa oti na vosa e yasanibuka. A raica sara o koya ka vosa ka gole mai me mokoti au. A tukuna vei au ni sega ni dau mai tiko vakatamata me vosa ena yasanibuka ia a vakauqeti ni tiko e dua na tamata e gadreva me rogoca vakadodonu na nona itukutuku.
O au na tamata oya.
Na veika au sotava oqo a vakaraitaka vei au ni Tamada Vakalomalagi e kilai ira vinaka tu na luvena, ka kila vinaka o Koya na sala me yacovi keda kina meda rawa ni vakila mada ga vakalailai na Nona loloma uasivi vaka itubutubu. E kila o koya niu gadreva me’u rogoca na itukutuku nei koya ka vosa oqo ka dusimaki au meu tiko ena vanua donu ena kena gauna donu.
Au sa kila tu mai na malanivosa, “Au luve ni Kalou.” ena noqu bula taucoko, ia na taucoko ni kena dina sa qai lauta na yaloqu ena gauna sara ga oya. Au sa qai kila vakaidina na ibalebale nida luvena edua na Kalou e taucoko ka rui lomani keda vakalevu o Koya me lomasoli me sorovaka na Luvena me rawa ni da bula tale ka sereki mai na noda ivalavala ca. E lomani au vakalevu sara ka dina ni na sega ni dau taqomaki au mai na mosi, ia ena tiko o Koya kei au niu lako curuma tiko ka rawa ni vukei au me’u ulabaleta, tubu kina, ka lesu tale vei Koya.
E lomani au ena gauna oqo, ka tawayalani na Nona lomani au ena veiyabaki au a vaqaseni kina niu nauma ni sega ni dua a lomani au. Au sa qai kila oqo ni baleta noqu kila na dina oqo mai boto ni yaloqu au a digitaka kina meu toso tikoga.
O Peresitedi Russell M. Nelson a qai vakavulica wale tikoga oqo na mana ni noda kila na keda ivakatakilakila vakalou. A kaya o koya: “Kemuni na noqu itokani lomani, o ni sa luvena vakayalo dina sara na Kalou. … Ia e sa toqai tiko beka e yalomu na dina tawamudu oya? …
“Oqo na ka dina: Na nomu igu e ka vakalou. Ena nomu vakasaqaqara vagumatua, na Kalou ena solia vei iko mo raica se o cei o na rawa ni yaco mo vakataka.”1
Ena gauna oqo niu dau vakataroga na kequ yaga, au dau vakananuma vei au ni’u luve ni Kalou ka sa isolisoli mai Vua na noqu bula.
Nanuma tiko ni ko sa luve ni Kalou. Ka kua ni guilecava na kaukauwa vakayalo dau veimaroroi, dau veisautaki-bula, ka veivakurabuitaki ka yaco mai ni da karona na dina.
E vakaitikotiko na dauvolaivola e Szeged, Hungary.