Nodra na iTubutubu

Rai vua na Kalou me baleta na iNaki kei na Veidusimaki

Kemuni na iTubutubu lomani,

Na Tamada mai Lomalagi e sega ni talai keda mai ki vuravura ka sega na veidusimaki. Mai na isolisoli vakalou ni ivolanikalou, na masu, ira na parofita bula, keda vakai keda, ka vuqa tale, eda rawa ni rai vua na Kalou me baleta na inaki kei na veidusimaki. Nio wilika na ilavelave oqo ni Liaona, vakasamataka vakatitobu na ivurevure eso sa solia vei keda o Koya me vukei keda me vakaibalebale na bula oqo ka lesu tale vei Koya ena kena e tarava.

Veivosakitaki ni Kosipeli

Eda Vakaitavi Vata ena iTuvatuva ni Kalou

Vakamatavuvale, sa rawa mo dou wilika na 1 Korinica 11:11 ka veivosakitaka na kena ibalebale. Wasea na vei malanivosa mai na itukutuku nei Elder Gerrit W. Gong (tabana e 4), ka vakamacalataki kina na nodra vakaitavi vata na tagane kei na yalewa ena ituvatuva ni veivakabulai. Ena rawa vakacava me vakaduavatataki keda ka sega ni tawasei keda na noda duidui?

Na Kaukauwa Veivakabulai ni Vakabauta

Wilika vata na Maciu 15:21–28 ka tukuni tiko kina na yalewa ni Kenani. A cava na vuna o nanuma kina ni nona vakabauta a vakavuna me vakabulai na luvena yalewa? Wilika na veimalanivosa mai na itukutuku nei Peresitedi Camille N. Johnson ena tabana e 8 me kilai vinaka kina na itavi ni yalomalua kei na vakabauta ena kena rawati na kaukauwa ni Turaga.

iVakananumi kei Jisu Karisito e Veisiga

Taroga na nomu matavuvale, O dau vakananuma vakacava na iVakabula ena nomu bula? Wilika na veitikina bibi mai na itukutuku ena tabana e 38 me baleta na bibi ni noda dau nanuma tiko. Navuca mo vakaraitaka tu ena nomu itikotiko e dua na iyaloyalo se vosacavuti ka vakananumi iko me baleti Karisito.

Lako Mai, Mo Muri Au Lasa Vakamatavuvale

Nanuma na Veivakalougatataki i Karisito e Veisiga

1 Korinica 15

A vakavulici ira na yalododonu e Korinica o Paula ena dina bibi ni kosipeli: “ni sa mate na Karisito ena vuku ni noda ivalavala ca … ni sa bulu talega, ka ni sa tucake talega e nai katolu ni siga” (1 Korinica 15:3–4). A vakayaloqaqataki ira mera “taura tiko” (1 Korinica 15:2) na kosipeli ka vunautaka vei ira. Sureta na nomu matavuvale me ratou qitotaka na qito ni veivakananumi oqo:

1. Solia kina tamata yadua na gauna me ra vola kina e dua na isaunitaro lekaleka ki na taro oqo: Na cava edua na veivakalougatataki ni kosipeli o marautaka ena vuku ni Veisorovaki ni iVakabula? (Me baleta eso na vakasama, raica na 1 Korinica 15:19–29.)

2. Veivukevuke ena wasei ni veika o a vola ka cavuqaqataka na ka a vola o koya ka liu vei iko.

Veivosaki: E rawa vakacava nida nanuma vakavinaka cake na veivakalougatataki sa solia vei keda na Karisito? Navuca me caka edua na ituvatuva ni matavuvale me nanumi kina edua na sala sa vakalougatataka kina na nomudou bula na Karisito.

Vakauta mai o Mitzi Schoneman

Mai na Me iSakisaki ni iTabagone Mekasini

Vakavakarau ki na Koniferedi Raraba

Raica eso na itaviqaravi kei na itukutuku digitaki ena rawa ni vukei ira na itabagone mera vakavakarau kina koniferedi raraba ni vula ko Okotova.

Vulica mo Vakalaiva ka Vakarorogo

E vosa o Sisita Kristin M. Yee me baleta na sala sega ni namaki ka veivakurabuitaki a yaco ena nona bula ni se goneyalewa ena nona digitaka me vakatara na Turaga me vakayarayarataka na nona veivakatulewa bibi.

Sotavi ni Dredre ni Bula ni Vakasama

Vulica eso tale na ka me baleta na kena sotavi na dredre ni bula ni vakasama ka o na sotava se dua o daulomana.

Lesoni mai na Yabaki ni iTabagone nei Josefa Simici

Raica na veika era rawa ni vulica na itabagone nikua mai na veika a sotava o Josefa Simici ena 200 na yabaki sa oti.

Mai na iTokani Mekasini

Veivuke mai na Lako Mai, Mo Muri Au

Raica na itaviqaravi vakamacawa me vukea me marautaki na vulici ni ivolanikalou vakamatavuvale.

Marama Vakabauta

Wilika e dua na itukutuku mai vei Peresitedi Dallin H. Oaks me baleta na nodra ivakaraitaki yalodina na marama ena nona bula.

Bula Vinaka ni Yalo kei na Vakasama

Na ilavelave ni vula oqo ni iTokani e tiko kina na ivurevure me vukea nodra vakavulici na luvemu me baleta na ituvaki ni vakasama, oka kina na italanoa me baleta na bula sa taucoko tu kei na nona vakasukai totolo mai na tacina edua na daukaulotu. O rawa talega ni kunea edua na vakatutu e veirauti kei ira na gone me baleta na tiko-vinaka ena iwasewase “Me Baleti Ira na Gone Qase Cake”.