“Wasei ni 72 na iLavelave ni iVola i Momani,” Liaona, Sepi. 2023.
Domodra na Yalododonu Edaidai
Wasei ni 72 na iLavelave ni iVola i Momani
Ena veigauna kece au dolava kina na gusuqu meu vosa baleta na iVola i Momani, e dau tiko vata kei au na Yalo Tabu.
Droini mai vei Allen Garns
Ena gauna ni matedewa na COVID-19, keitou a kalougata ni a qaravi vakavuniwai tiko na watiqu, o Claude, ena neitou itikotiko. E kea, o ira na luvei keirau kei au a veivuke ena yalololoma ena nona qaravi me yacova nona takali yani ki na noda itikotiko vakalomalagi.
Taumada, keirau a masulaka kei Claude me keirau vukica na rumu e yasa ni vale me rumu ni veiqaravi vakavuniwai, me rawa ni biu kece kina na veika kece e gadreva me logaloga vinaka kina. Keirau a ciqoma na veivakadeitaki me vakayacora.
Me vakavoutaki na rumu oqo, a gadrevi kina e vica na tamata cakacaka e vale. E kalougata, ni tiko e dua na katuba e muri ni rumu oqo, me rawa ni ra veicuruyaki kina na tamata ka sega ni curu mai kina neitou rumu levu. Oya a dua na veivakalougatataki levu ena gauna ni vakatatabu ni COVID-19.
Ni vakacavari na rumu nei Claude, era a dau lako mai e veisiga na nasi. Era dau yalovinaka, dauloloma, ka kila vakavinaka na veika e gadrevi me keitou cakava me logaloga vinaka tikoga kina o Claude.
Niu a lewena na Lotu, au a vakavulici ni o ira kece na lewe ni Lotu era daukaulotu.1 Baleta niu taleitaka na wasea na kosipeli, au a otataka kina e tolu na kisi ni iVola i Momani, 24 na ivola ena veikisi yadua. Au a yalataka meu solia edua na ivola ki na tamata yadua e curuma na neitou vale.
Au a makataka na veiwase bibi ni ivola yadua ena dua na kadi ni bisinisi au a cakava ka tabaki tiko kina na Valetabu e Salt Lake. Au a vakabira talega na noqu ivakadinadina ena draunipepa lala eliu ni ivola yadua. Ni bera ni soli e dua na ivola vua e dua na tamata cakacaka se nasi, au a vakamacalataka vei ira se cava na iVola i Momani.
Au a kurabui ena veika era a tusanaka mai. E dua ga na tamata a sega ni via ciqoma e dua na ivola. O ira kece na kena vo era a taleitaka me ra rogoca baleta na ivola. Eso era a vakavinavinakataki au vakalevu sara, ka kaya ni ra kila na veika baleta na iVola i Momani ka vinakata e dua. E vica vei ira era a marau vakalevu ka ra mani mokoti au.
Au a vakadeitaka ni yaco oqo baleta ena veigauna kece au dolava kina na gusuqu meu vosa baleta na iVola i Momani, a tiko vata kei au na Yalo Tabu. Au sa vakadeitaka nio ira na tamata cakacaka kei na nasi era a rawa ni vakila na Yalotabu. Au a veisoliyaka yani na 72 kece na ivola, kau se qai otataka wale toka ga oqo e 24 tale.