iVakavuvuli Taumada ni Kosipeli

Nodra Vukei na Vakaleqai Tu

E vakabulai ira tiko na tamata o Jisu

He Healed Many of Diverse Diseases [Sa Vakabula o Koya e Vuqa mai na Veimataqali Mate], mai vei J. Kirk Richards, me kakua ni lavetaki

Nida lewe ni Lotu i Jisu Karisito ni Yalododonu-Edaidai, eda muria na ivakavuvuli ni Turaga mera vukei kina o ira era vakaleqai tu. Eda kauwaitaki ira na tani ena noda qaravi ira, vukei ira mera bula rawati ira, ka wasea na veika e tu vei keda.

iVakaraitaki i Jisu Karisito

O Jisu Karisito a lomani ira, vakacegui ira, ka masulaki ira era tu wavoliti Koya. Ko Koya sa “lako voli ka daucaka vinaka” (Cakacaka 10:38). E rawa nida muria na Nona ivakaraitaki ena noda lomana, vakaceguya, veiqaravi, ka masulaki ira era tu wavoliti keda. E rawa nida dau vaqara na sala eso meda vukei ira kina na tani.

taubale tiko e rua na tamata

Veiqaravi

Na vosa na veiqaravi e vakayagataki ena ivolanikalou kei na Lotu ni Turaga me vakamacalataka na ivakarau ni noda dau veivukei vakai keda. Era na lesi na lewe ni matabete mera turaga dauveiqaravi ki na tamata yadua se matavuvale ena tabanalevu se tabana. Era lesi na marama dauveiqaravi vei ira na marama uabula yadua. O ira na turaga kei na marama dauveiqaravi era vakadeitaka ni ra sa nanumi ka vukei na lewe ni Lotu kece sara.

era tea tiko na tamata na sorenitei

Vukei Ira na Tani Mera Bula-Rawati Ira

Eda rawa ni vukei ira na lewe ni matavuvale kei na itokani mera bula-rawati ira ena nodra vakayaloqaqataki mera kunea na iwali balavu ni nodra leqa. Eda na qai rawa ni tokoni ira ni ra cakacakataka na nodra takete. Raica eso tale na itukutuku me baleta na bula-rawati koya ni Okosita 2023 Liaona itukutuku Taumada ni Kosipeli.

Qaravi Ira na Tani

E vuqa tu na sala eda rawa ni qaravi ira kina era tiko voliti keda ka vukea me sotavi na nodra gagadre vakayago, vakayalo, kei na vakasama. Na vulici ni veika baleti ira na tani ena rawa ni vukei keda meda kila na sala eda rawa ni qaravi ira vakavinaka cake kina. E rawa talega ni da masuta na veidusimaki me kila na cava eda rawa ni cakava me veivuke kina.

era kumuni vuata na tamata

Wasei na Ka E Tu Veikeda

Eda rawa ni qaravi ira na tani ena noda wasea na veika sa vakalougatataki keda kina na Kalou. Me kena ivakaraitaki, e rawa ni da solia ena lomasoli na isolisoli ni lolo se cau ki na ilavo ni Veivuke Raraba ni Lotu. E rawa talega nida veiqaravi ena noda itikotiko raraba kei na Lotu veikacivi.

Nodra iTavi na iLiuliu ni Lotu

Ena raica raraba o bisopi na nodra vukei o ira era vakaleqai tu ena nona tabanalevu. E rawa ni vakayagataka na ilavo mai na isolisoli ni lolo me vukei ira na lewenilotu era gadreva na veivuke. Eso tale na iliuliu, oka kina o rau nona daunivakasala kei na mataveiliutaki ni iSoqosoqo ni Veivukei kei na kuoramu ni italatala qase, me ra vukei ira na lewenilotu mera kunea na ivurevure eso e rawa ni ra vakayagataka me sotavi kina nodra gagadre.

Na Sasaga ni Veivuke Raraba ni Lotu

Na Lotu e vukei ira na tamata e vuravura taucoko ena veivuke ni leqa tubukoso, veivakatorocaketaki vakaitikotiko, kei na veiparokaramu tale eso me vaka na wai savasava kei na icula ni itatarovi. Mo vulica eso tale na ka, raica na Dallin H. Oaks, “Nodra Vukei na Dravudravua kei na Rarawa Tu,” Liaona, Nove. 2022, 6–8.

Mai na iVolanikalou

“Ia ko koya sa solia ena marau sa vinakata na Kalou” (2 Korinica 9:7).

Eda vakavulici ira na luveda mera qaravi ira era vakaleqai tu (raica na Mosaia 4:15–16).

Eda vakacegui ira na tani ka vukei ira ena noda colata vata na nodra icolacola (raica na Mosaia 18:8–9).

Veivosa Eso me Nanumi

Veikacivi: e dua na itavi vakatabakidua ni veiqaravi ena Lotu. Era vakasaqara na iliuliu ni Lotu na veivakauqeti me ra kila o cei ena vinakata na Turaga mera kaciva.

iSolisoli ni lolo: na ilavo eda solia ki na Lotu ni da lolo, ke lailai me tautauvata kei na levu ni ilavo eda na vakayagataka ena rua na gauna ni kana.

Bula-rawati koya: na noda rawa ni qarava na noda gagadre vakai keda kei na noda matavuvale.

Vakaraica Eso Tale

Kevaka e tiko na nomu vakatataro me baleti ira na vakaleqai tu, e rawa ni o veitalanoa kei ira nomu dauveiqaravi turaga se marama, nomu iliuliu ni tabanalevu se tabana, se o ira na daukaulotu. E rawa talega nio kunea na vosa ni koniferedi raraba ena ulutaga oqo kei na ivurevure tale eso ena Valenivola Vakosipeli (ena ChurchofJesusChrist.org se ena app ena talevoni).