E Vukei Keda Vakacava na Rarawa ni Kalou Meda Veivutuni?

E vakavulica o Paula na iApositolo ni “rarawa sa vaka na loma ni Kalou sa vakayacora na veivutuni ki na bula … ia na rarawa vakavuravura sa vakayacora na mate.” (2 Korinica 7:10). Eda na rawa beka ni vakila na rarawa vakavuravura, madua, kei na yalolailai ni da ivalavala ca. Ia nida gole vua na iVakabula me da veivutuni, eda sureti Koya me veisautaka na lomada ka vukica na noda rarawa me reki (raica na Alama 36:18–20).

Na Rarawa sa Vaka na Loma ni Kalou kei na Veivutuni Dina

Ni da vakila na rarawa sa vaka na loma ni kalou, eda na kila na noda malumalumu ka vinakata meda caka vinaka cake. Eda vakila na inuinui me baleta na veisiga ni mataka—ka vakila na loloma ni iVakabula vei keda.

Vakasamataka na veitaro oqo ni o vulica na 2 Korinica 7:

Na cava na kena ibalebale ni da sa “rarawa kina veivutuni”? (tikina e 9).
Na cava eda na cakava ni da vakila na rarawa sa vaka na loma ni kalou? (raica na tikina e 10–11).

Rarawa Vakavuravura kei na Rarawa Sa Vaka Na Loma Ni Kalou

“Na rarawa vakavuravura ena dreti keda sobu, bokoca na inuinui, ka vakauqeti keda meda soli keda yani meda temaki tikoga.

“Na rarawa sa vaka na loma ni Kalou e veimuataki ki na saumaki mai kei na veisau ni yalo. E vakavuna meda cata na ivalavala ca ka taleitaka na ivalavala dodonu. E uqeti keda meda tucake ka lako voli ena rarama ni loloma i Karisito. Na veivutuni dina e baleta na veisau, e sega ni veivakararawataki se vakararawataki tiko. Io, na veivutuni mai vuniyaloda kei na rarawataki vakaidina ni talaidredre edau vakavuqa me mosimosi ka vei ikalawa bibi ena cakacaka tabu ni veivutuni. Ia ni veimuataki na veibeitaki ni yaloda ki na noda cati-keda-vakaikeda se tarovi keda meda tucake tale, oqo e vakalatilati ka sega ni vukea na noda veivutuni.”

Elder Dieter F. Uchtdorf ena Kuoramu ni iApositolo Le Tinikarua, “O Sa na Rawata Ena Gauna Oqo!,” Liaona, Nove. 2013, 56.