Mensahe sa Area
Pagtukod og Mahangtorong mga Pamilya
Ang Pamilya: Usa ka Pamahayag ngadto sa Kalibotan, nag-ingon: “Ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay kataposan nga destinasyon sa Iyang mga anak.”
Isip mga miyembro sa Ang Simbahan ni Jesukristo sa mga Santos sa Ulahing mga Adlaw, nagtuo kita nga ang pamilya gi-orden ug mahinungdanon sa plano sa Dios alang sa kalipay. Ang atong kinadak-an nga kalipay niini nga kinabuhi ug sa sunod moabot kon nagtubo kita sa mahigugmaong kahimtang uban sa atong mga pamilya.
Apan ang pagtukod og mahangtorong mga pamilya dili sayon; nagkinahanglan kini og daghang paningkamot. Ang kaaway nagtrabaho kanunay aron mabungkag ang atong mga pamilya. Nasayod siya sa mahangtorong kinaiyahan sa mga relasyon sa pamilya ug sa tahas niini sa katilingban. Nagtrabaho siya og maayo kay nasayod siya nga kon mabungkag niya ang pamilya, mabungkag niya ang atong katilingban.
Mao nga kinahanglan usab kita nga motutok sa atong mga paningkamot sa pagtukod sa atong mga pamilya sa lig-ong pundasyon ug sa kanunay mapugngan ang mga pag-atake sa kaaway.
Usa sa mga paagi nga kita makatukod og lig-ong pamilya mao ang pagtuon sa ebanghelyo ni Jesukristo diha sa panimalay. Sa iyang pag-abli sa ika-188 nga Matag Tunga sa Tuig nga Kinatibuk-ang Komperensiya, si Presidente Russell M. Nelson mipahibalo sa bag-ong programa isip kabahin sa paningkamot “sa paglig-on sa mga pamilya ug mga indibidwal pinaagi sa usa ka nakasentro sa panimalay ug gisuportahan sa Simbahan nga plano sa pagkat-on sa doktrina, paglig-on sa pagtuo, ug pag-ugmad og mas maayo nga personal nga pagsimba.” Si Presidente Nelson mipakigbahin nga kita naanad na nga maghunahuna nga ang Simbahan mao ang dapit diin kita nagkat-on sa espirituwal nga paagi, gisuportahan sa unsay nahitabo sa panimalay, ug siya mihagit nato sa pag-usab sa naandan ngadto sa mas nakasentro sa panimalay nga pagkat-on nga gisuportahan sa Simbahan.
Pinaagi sa mga programa ug mga kapanguhaan sama sa Dali Sunod Kanako diha sa Panimalay, Family Home Evening, sa Programa sa Kabataan ug Kabatan-onan, ug sa bag-ong Alang sa Kalig-on sa mga Kabatan-onan nga giya, kita mahimong magkat-on ug mogamit sa ebanghelyo ni Jesukristo nga manag-uban.
Akong nakat-onan gikan ni Presidente Nelson nga ang mga baroganan, mga hiyas, ug mga pagtulon-an sa ebanghelyo kinahanglan nga dili ra kutob diha sa mga miting sa simbahan kondili kinahanglang aktibong nalambigit sa atong adlaw-adlaw nga mga kinabuhi, labi na sulod sa pribado ug suod nga kahimtang sa atong mga panimalay. Nagpasabot kini sa pagsunod sa Dali, Sunod Kanako nga mga kapanguhaan, pagbasa sa mga kasulatan, pag-ampo, ug pagbaton og mga kalihokan sa pamilya nga manag-uban. Kita makatabang usab sa atong mga anak pinaagi sa pag-apil sa Programa sa Kabataan ug Kabatan-onan ug sa pagtabang nila sa pagtuon sa bag-ong Alang sa Kalig-on sa mga Kabatan-onan nga giya. Sa paghimo niini, ang mga indibidwal ug mga pamilya masangkapan og dugang pa aron makasabot ug mogamit sa mga baroganan sa ebanghelyo diha sa mga sitwasyon sa tinuod nga kinabuhi. Pinaagi niini nga paningkamot, ang mga pamilya mas masuod sa usag usa samtang nagpalig-on sa ilang pagtuo diha ni Ginoong Jesukristo.
Si Bonnie H. Cordon, kanhi kinatibuk-ang presidente sa YW miingon, nga kita kinahanglan nga “[mo]duol ngadto kang Kristo, apan ayaw pag-inusara.” Ang mga pamilya naghatag og maamumahon nga kahimtang diin ang mga indibidwal makaawhag ug makabayaw sa usag usa. Kon ang mga sakop sa pamilya manag-uban nga maningkamot sa pagduol ngadto ni Kristo, magkahiusa sila sa pagpalig-on sa ilang pagtuo ug pagsabot pinaagi sa pagpakigbahin og mga ideya ug mga kasinatian nga mopalambo sa relasyon sa matag usa uban Kaniya.
Alang niadtong mibati nga dili sila kabahin sa tradisyonal nga pamilya, palihog ayaw batia nga kini nga tambag dili magamit kaninyo. Hinaot nga makakaplag kamo og espesyal nga mga pakigrelasyon sa “pamilya” ngadto sa inyong mga suod, sa inyong matinabangon nga mga higala ug mga lider, ug sa mga tawo nga adunay sama niana nga hunahuna. Ako nagtuo gayod nga ang tambag sa Propeta makatabang sa mga tawo sa tanang kahimtang.
Akong nakita nga kon kita magtuon kauban sa usa ka tawo, ug bisan sa imong mga kauban sa lawak, kita mas daghan ug mas paspas makat-on. Ang pagtuon nga manag-uban adunay dako kaayong epekto sa atong pagkat-on. Morag magic kini alang sa pagkat-on! Ang yawe sa atong hilabihan nga paglambo mao ang pagtuon uban sa laing tawo ug, sa samang higayon, sa pagtuon nga kita ra. Kon kita mohimo niini, kita panalanginan og mas dakong kauswagan ug mas dakong panabot, ug kita mas mapaduol ngadto ni Jesukristo. “Kay kon may duha o tulo nga magkatigom sa akong ngalan, anaa ako uban kanila.” misaad ang Ginoo. (Mateo 18:20).
Ako nasayod nga ang paggahin og panahon uban sa pamilya importante. Kitang tanan gusto nga makabaton og malamposong kaminyoon ug kinabuhi sa pamilya, apan sa kasagaran malinga kita sa daghang laing mga kalihokan nga moresulta sa pagbaliwala sa unsay labing mahinungdanon. Usahay nakatutok kaayo kita sa pagpaningkamot aron makasangkap sa atong pamilya nga nakalimot na kita sa paggahin og panahon alang nila. Motambag ko nga ayaw kab-ota ang kalamposan o bisan unsa nga inyong gipangandoy pinaagi sa paglangan sa paggahin og panahon uban sa pamilya. Ayaw tugoti nga ang inyong ulo nakaduko sulod sa 3, 5, o 15 ka tuig aron lang sa paghangad sa kataposan ug moingon, “Karon makasugod na ko sa pagpuyo ug paggahin og kalidad nga panahon uban sa akong asawa, sa akong mga anak, o sa akong pamilya,” dayon masayod nga ulahi na diay kaayo ang tanan. Si Stephen R. Covey miingon, “Sayon ra kaayo nga malinga diha sa laang sa kalihokan, sa kabisi sa kinabuhi, sa pagsige og trabaho sa pagkatkat sa hagdanan sa kalamposan nga madiskobrehan na lang nga nagsandig diay kini sa sayop nga bungbong.”
Ako nasayod nga ang kaaway tinuod ug siya nagtrabaho aron sa pagbungkag sa atong mga pamilya. Apan ako nasayod usab nga ang Ginoo tinuod ug Siya nagtrabaho aron sa paglig-on sa atong mga pamilya. Kitang tanan makahimo sa atong bahin sa pagtabang sa atong mga pamilya nga molambo.
Mapasalamaton ko sa mga panalangin sa pamilya. Mapasalamaton ko sa akong mga oportunidad sa pagpalig-on sa akong mga relasyon sa pamilya pinaagi sa pagtuon sa kasulatan, pag-ampo, pagserbisyo, ug pagpakigbahin sa mga kasinatian. Ako nasayod nga kon magtinabangay kita sa pagsuporta ug pagbayaw sa usag usa, ang atong pamilya mahimong usa ka gamhanang pwersa alang sa kaayohan sa kalibotan.
Pinaagi sa mga kalipay ug mga kasakit sa kinabuhi, akong nakita nga walay mas importante pa kaysa pamilya. Sila ang atong kanunay nga mga kauban ug mga tigsuporta, ug naghatag sila nato og hilabihan nga kalipay, kahulogan, ug katuyoan sa atong kinabuhi. Mapasalamaton ko sa mga panalangin nga naggikan sa pagkahimong kabahin sa usa ka pamilya, ug nag-ampo ko nga unta atong hatagan og bili ug pasidungog kining talagsaon nga gasa gikan sa Dios. Ako nasayod nga ang mga pamilya mahimong manag-uban sa kahangtoran. Sa ngalan ni Jesukristo, amen.