Lokal nga mga panid
Kabatan-Onan Nakadawat og Kalig-On ug Kadasig Gikan sa Kinatibuk-Ang Presidente sa Young Men
Kamo nasayod kon kinsa kamo, ug kon ngano nga ania kamo dinhi. Kamo anak sa Dios , ug kamo adunay mahangtorong padulngan.
Mao kini ang makapadasig nga mensahe nga nadawat sa kabatan-onan sa Area sa Pilipinas gikan ni Presidente Steven J. Lund, Kinatibuk-ang Presidente sa Young Men, atol sa iyang pito ka adlaw nga pagbisita sa nasod niadtong Hulyo 16–22.
Gikuyogan sa iyang asawa, si Sister Kalleen Lund, si Presidente Lund nakighinabi sa Young Men ug Young Women nga miapil sa For Strength of Youth (FSY) nga mga komperensiya gikan sa mosunod nga mga stake ug mga district: Kalibo, Roxas (Capiz), ug Antique (Hulyo 19); Bacoor ug Imus (Hulyo 20); ug Camiling ug Paniqui (Hulyo 21). Siya ug si Sister Lund nagpahigayon usab og debosyonal uban sa mga misyonaryo sa Philippines Iloilo Mission pagka-Hulyo 18.
Nagtutok sa 2023 nga Tema sa Kabatan-onan “May kalig-on ako sa pagsagubang sa tanan tungod sa gahom nga gihatag kanako ni Kristo” (Mga Taga-Filipos 4:13), si Presidente ug si Sister Lund midungan sa kabatan-onan sa pag-recite sa—ug labing importante, sa paghisgot—sa mga tema sa Young Men ug Young Women, naminaw nila nga mipakigbahin sa ilang mga hagit ug mga kabalaka, mihatag og suporta ug pagdasig sa mga lider sa kabatan-onan, ug oo, nakiglingaw-lingaw sa kabatan-onan atol sa lainlaing mga kalihokan sa FSY.
Ang mga Lund gikuyogan didto sa lainlaing mga dapit sa mga sakop sa Kapangulohan sa Area sa Pilipinas ug sa ilang mga asawa: Si Elder Steven R. Bangerter, presidente sa area, ug si Sister Susann A. Bangerter; si Elder Yoon Hwan Choi, unang magtatambag, ug si Sister Bon Kyong Koo Choi; si Elder Carlos G. Revillo, ikaduhang magtatambag, ug si Sister Marie Revillo. Nakigkita usab sila sa lokal ug sa rehiyonal nga mga lider sa Simbahan.
HULYO 19 – KALIBO, ROXAS (CAPIZ), UG ANTIQUE
“Kini mao ang lig-on kaayo nga kasundalohan nga midasdas sa unahan, nagtigom og kusog sa matag adlaw ug matag oras, batok sa tanang unos ug tanang hagit sa kalibotan,” si Presidente Lund miingon sa kabatan-onan sa Kalibo Stake, Roxas Capiz Stake, ug sa Antique District atol sa FSY nga komperensiya nga gipahigayon didto sa Punta Villa Resort sa Iloilo City. “Kabahin kamo nianang lig-on kaayo nga kasundalohan nga gimugna sa Langitnong Amahan,” siya mimatuod sa mga partisipante.
“Gibati nako nga bulahan sa dihang nadungog nako kadto nga mga pulong nga gisulti ni Elder Lund,” mipakigbahin si Kurt Brigham Villanueva, nga nagserbisyo isip kaabag sa kapangulohan sa korum sa mga priest sa Kalibo 2nd Ward. “Iyang gipukaw ang akong hunahuna aron mahibalo nga isip naghupot sa pagkapari, kinahanglan ko nga mobarog ug motabang sa pagpundok sa Israel, ug mas nakadasig kini nako sa paghimo sa akong kaugalingon nga takos aron moserbisyo sa Ginoo.”
Sa dihang gi-recite ang mga tema sa Young Men/Aaronic nga Pagkapari ug Young Women uban ni Presidente ug ni Sister Lund, si Sister Jewel Koztelijk Soriano, presidente sa klase sa Young Women gikan sa Hamtic Branch namalandong sa kahulogan niini. “Tungod sa tabang ni Presidente Lund nasabtan nako nganong gihimo ang tema,” si Sister Jewel mihinumdom, misubli sa unsay gipasabot sa lider sa kabatan-onan sa tibuok kalibotan: “Kita nagsag-ulo sa tema tungod kay ang kalibotan nag-usab sa atong kailhanan.”
Dili pa lang dugay, ang mga Lund nagpahigayon og debosyonal uban sa mga misyonaryo sa Philippines Iloilo Mission. “Kitang tanan kabahin sa daghang panalangin ug mga milagro,” si Sister Lund misulti sa mga misyonaryo, nagpasabot nga ang mga miyembro sa Simbahan adunay gasa sa pagpang-ayo, dili lang sa pisikal nga pagpang-ayo apan usab nianang “paghatag og paglaom sa uban.”
Alang sa iyang bahin, si Presidente Lund mipasabot nga tungod kay “kita minahal nga mga anak nga lalaki ug mga anak nga babaye sa Dios,” naghatag kini og kaseguroan nga “kita nasayod kon kinsa kita nganong ania kita dinhi.” Nga sa ingon, siya midugang, ang mga misyonaryo adunay dakong responsibilidad: “Pagtabang sa uban nga moduol ngadto ni Kristo, aron sila makabaton og kamaya ug kalipay.”
Si Elder Albarico, full-time nga misyonaryo, naminaw og maayo samtang si Presidente Lund mihinumdom sa usa ka FSY nga komperensiya didto sa usa ka nasod diin adunay pipila lang ka miyembro. “Nakahatag kini nako og kadasig sa pagsabot nga ang matag usa anak nga lalaki ug anak nga babaye sa Langitnong Amahan,” ang misyonaryo namalandong, “ug sila kabahin usab niining mahinungdanong buhat bisan kon sila anaa sa nasod nga Muslim ang kadaghanan.”
HULYO 20 – BACOOR UG IMUS
Human sa pagpasabot og maayo sa mga pamahayag nga “ako minahal nga anak nga lalaki sa Dios” ug “ako anak nga babaye sa Langitnong mga Ginikanan” nga makita diha sa mga tema sa kabatan-onan, si Presidente Lund mihatag og makapaukyab sa hunahuna nga pangutana ngadto sa kabatan-onan sa Bacoor Stake ug sa Imus Stake atol sa debosyonal didto sa bag-ong gitukod nga Pasilidad sa FSY sa Tanay sa Rizal.
“Sa inyong hunahuna ngano man nga ang propeta gusto nga kita molitok niadto nga mga pulong?” siya nangutana, ug unya gisundan og laing pangutana nga mas nagmatuod kaysa nangutana: “Dili ba kini klaro nga kita Iyang mga anak?”
Milingi ngadto sa mga naghupot sa Aaronic nga Pagkapari, si Presidente Lund mipasabot: “Ang propeta mihatag og tema sa Young Men aron isag-ulo tungod kay nagpuyo kita sa lahi nga kalibotan kaysa among gipuy-an, diin ang mga pilosopiya sa mga tawo nga gihisgotan ni Joseph Smith naningkamot sa pagkombinsir ninyo nga kamo mahimong si bisan kinsa apan dili mao kon si kinsa gayod kamo.”
Si Presidente Lund mipasabot dayon ngadto sa tanan: “Kon adunay usa ka tawo nga moabot ug mosulti nato nga mao ni kita, nga mao na kita, kita nasayod nga dili kana tinuod. Kita mga anak sa Dios, ug ikaduha Siya adunay buhat nga ipahimo nato. Ako adunay mahangtorong padulngan, ug adunay katuyoan niini nga kinabuhi.”
Ang mga pulong ni Elder Lund nakapadasig ni Matthieu Grant Valdez sa Imus 3rd Ward: “Nag-motivate po sa akin na mag-serve ng mission” (Nakapadasig kini nako nga moserbisyo og misyon). Gipangutana kon unsaon niya paggamit sa iyang nakat-onan, siya mitubag, “Mas pamalandongan ang ebanghelyo,” ug ipakigbahin kini ngadto sa tanan, “para po mas ma-strengthen yung faith natin” (aron mas molig-on ang atong pagtuo).
Si Sister Lund, nga misaysay nga siya usab mitambong sa mga komperensiya sa kabatan-onan sa ten-edyer pa, mipakigbahin sa iyang mga pagbati: “Ako nagtuo nga ang usa sa mga rason ngano nga ang FSY importante kaayo tungod kay mao kini ang labing duol nga butang nga inyong mabatonan sa pagpuyo og celestial kaayo nga kinabuhi. Mianhi kamo dinhi, mipalayo sa inyong kaugalingon gikan sa kalibotan, gikan sa tanang kabalaka sa kalibotan … ug naghimo og nindot kaayo nga mga panaghigalaay kinsa nagtuo sama sa inyong gituohan.”
Si Elize Ungavetti sa Imus 2nd Ward nahimong emosyonal human makadungog ni Sister Lund nga misaysay sa kasinatian diin nangayo siya og tabang sa Langitnong Amahan sa dihang nasaag siya sa lahi nga siyudad. “Ako nagtuo nga kon kita mag-ampo sa Ginoo kon kita naglibog o nasaag,” iyang nakat-onan gikan sa istorya, “Siya motabang nato, ug Siya mogiya nato kon asa kita moadto.”
HULYO 21 – CAMILING UG PANIQUI
Si Sister Lund mihimo sa mga partisipante sa Camiling Stake ug Paniqui Stake nga mobati og kakampante samtang nagpundok sila alang sa FSY didto sa Crystal Waves Hotel and Resort sa Talavera, Nueva Ecija. “Mianhi kita sa FSY,” siya mipahinumdom, “ug kita gilibotan sa mga tawo nga nagtuo sama sa atong gituohan.” Ug ang labing importante, “kita mibati nga luwas, ug kita mibati nga komportable, ug ang Espiritu adunay oportunidad nga mag-uban nato ug mopabati nato nga “kini ang atong tinuod nga panimalay!””
Si Presidente Rodel Dolorfino sa kapangulohan sa Camiling Stake ug ang iyang asawa nga si Sister Juliet Dolorfino mao ang session directing couple (SDC) alang niining partikular nga FSY, ug ang duha natandog sa istorya ni Sister Lund bahin sa iyang pioneer nga katigulangan, usa ka batan-ong babaye nga nagtulod sa kariton. Siya nagtulod hangtod nga nakuyapan, ug ang iyang mga higala nagpundok ug nag-ampo alang niya ug nabalik ang iyang kusog igo nga makapadayon siya sa pagtulod paingon sa Salt Lake Valley.
“Nasayod ko nga ang kabatan-onan nadasig niini nga istorya,” gibati ni Sister Dolorfino. “Nagkinahanglan sila og mga higala nga motabang ug mag-ampo alang nila samtang naningkamot sila sa pagsunod sa ebanghelyo matag adlaw.” Si Presidente Dolorfino mitabang usab nga ang kabatan-onan makakaplag og susama nga kalig-on atol sa “wala damha nga mga higayon” nga giingon ni Presidente Lund nga ilang masugatan sa kinabuhi. “Ang Manluluwas mao ang atong sundanan aron atol unya sa wala damha nga mga higayon, atong mapakita ang atong tinuod nga kinaiya,” siya mipahinumdom. “Kita mag-atubang og lisod nga mga panahon sa atong kinabuhi ug oportunidad nato kini nga mapakita ang Kristohanon nga kinaiya.”
Ang mga mensahe sa mga Lund nakaimpluwensya sa mga lider sa kabatan-onan nga mitambong. “Mapasalamaton kaayo ko nga si Presidente ug si sister Lund mitambong sa among FSY,” miingon si Brother Jhan-Jhan Agustin, nga nagserbisyo isip lalaki nga koordinitor alang sa kalihokan. “Gibati namo ang dakong gugma ni Presidente Lund alang sa among kabatan-onan ug alang sa Manluluwas. Siya usa gayod ka disipulo ni Kristo.”
PAGBATON OG KALIG-ON PINAAGI NI KRISTO
Sa iyang pakighinabi sa kabatan-onan, si Presidente Lund mipahimo kanila sa pagpasalig nga isag-ulo ang mga tema sa Aaronic nga Pagkapari ug sa Young Women: “Kadto nga mga pulong importante kaayo, dili ba?”
Sa matag kalihokan, iyang gibalikbalik sa kabatan-onan ang kaimportante sa pagkahibalo kon kinsa sila, ug sa paglikay sa makalibog nga mga tingog sa klaibotan: “Ang kalibotan, ang kaaway, gusto nga mokombinsir ninyo nga kamo mahimong si bisan kinsa apan dili mao kon si kinsa kamo. Si Satanas gusto nga kamo motuo nga kamo mas ubos pa kaysa kon kinsa kamo. Dili siya gusto nga kamo mahibalo nga kamo anak sa Dios.”
Ug sa pagtapos niya sa usa sa iyang pakigpulong, si Presidente Lund sa makausa pa mipasabot sa 2023 nga Tema sa Kabatan-onan pinaagi sa paghatag og gibug-aton sa makapalig-on nga presensya sa Manluluwas. “Siya dili mobiya ninyo,” siya miingon, “bisan kon modesisyon kamo nga lisod, bisan kon mopili kamo nga mopalayo Kaniya, apan Siya dili gayod mopalayo ninyo. Bisan pa man kon mopalayo kamo, Siya magpaduol kaninyo.”