“Ang Sigurado nga Pagsaksi sa Modernong mga Propeta,” Liahona, Okt. 2023.
Ang Sigurado nga Pagsaksi sa Modernong mga Propeta
Ang awtoridad sa pagkapari moabot lang pinaagi sa pag-orden sa gihatagan og awtoridad ni Ginoong Jesukristo, kinsa nagdirekta sa Iyang gipahiuli nga Simbahan karon.
Si Presidente Russell M. Nelson ug ang iyang asawa, si Wendy, atol sa usa ka panagpundok sa mga misyonaryo didto sa Auckland, New Zealand, Mayo 2019. Sama sa gitudlo ni Presidente Nelson, ang Manluluwas mao ang nagdumala sa Iyang Simbahan pinaagi “[sa] hilom lamang nga kalihokan sa balaan nga plano sa pagpuli.”
Sigon sa gipahayag sa Biblia, ang tinuod nga Simbahan ni Jesukristo “gitukod diha sa sukaranan nga gipahimutang sa mga apostoles ug sa mga propeta, ug ang bato nga gisukaran mao si Kristo Jesus” (Mga Taga-Efeso 2:20). Ako nakasinati og paggamit niana nga sukaranang baroganan sa gipahiuli nga ebanghelyo daghang katuigan ang milabay.
Usa ka miyembro sa Simbahan midala sa iyang silingan ngadto sa akong opisina. Ang bana sa silingan usa ka ministro sa Protestante nga adunay dako nga kongregasyon. Sulod sa mga katuigan, kini nga magtiayon miserbisyo sa Ginoo uban sa talagsaong kakugi diha sa ilang Kristohanong pagpangalagad. Siya nakabunyag og daghang tawo ngadto niana nga simbahan.
Karon, pinaagi sa impluwensya sa mga silingan nga Santos sa Ulahing mga Adlaw, siya mibasa sa Basahon ni Mormon ug nakabig ngadto sa Ang Simbahan ni Jesukristo sa mga Santos sa Ulahing mga Adlaw. Siya andam na nga moundang sa iyang pagministro ug mopasakop sa gipahiuli nga Simbahan. Apan una, siya ug ang iyang asawa nagkinahanglan og usa ka tubag sa ilang pangutana kalabot sa awtoridad sa pagkapari. Mipahinumdom kanako nga ang iyang bana nakabunyag og daghang tawo, ug ang iyang asawa nangutana, “Ang imong pasabot nako nga ang akong bana walay bisan unsang awtoridad sa pagbunyag sa tanang tawo nga iyang gibunyagan?”
Ang Espiritu miaghat sa akong tubag, sama sa pag-aghat niini nga mga sitwasyon.
“Dili,” miingon ko. “Sigurado ko nga ang imong bana adunay awtoridad sa pagbunyag sa tanang mga tawo nga iyang nabunyagan. Siya adunay tanang awtoridad nga gihatag kaniya sa iyang simbahan. Makapahigayon siya og mga kaminyoon. Makapahimo siya sa mga tawo nga mamiyembro sa kongregasyon. Makasuhol siya og usa ka kontraktor aron makataod og bag-ong atop sa inyong simbahan. Apan kana dili mao nga matang sa awtoridad nga atong gihisgotan. Ang awtoridad diha sa imong pangutana mao ang awtoridad nga gihatag ni Jesus ngadto kang Pedro, nga ang bisan unsa nga iyang buhaton sa yuta kini pasidonggan ngadto sa langit (tan-awa sa Mateo 16:19). Ug tungod kay kanang balaan nga awtoridad kinahanglan gayod masubay balik ngadto sa Apostoles, kini anaa lamang diha sa Ang Simbahan ni Jesukristo sa mga Santos sa Ulahing mga Adlaw.”
Mga Yawe sa Pagkapari
Ang awtoridad sa pagkapari dili maangkon pinaagi sa usa ka kurso sa pagtuon o usa ka degree gikan sa seminaryo. Mahimong maka-edukar ang kasulatan, makapausbaw sa pagpamatuod sa Manluluwas nga si Jesukristo, ug gani makagana og mga tinguha sa pagserbisyo sa Dios, apan kini wala maghatag sa awtoridad. Dili usab moabot ang awtoridad sa pagkapari pinaagi sa inspirasyon o pagpangandoy. Ang awtoridad sa pagkapari moabot lang pinaagi sa pag-orden. Ang Biblia nagklaro niini.
Atol sa Iyang yutan-ong pagpangalagad, ang Manluluwas nga si Jesukristo misulti sa Napulog Duha ka Apostoles, “Dili kamo ang nagpili kanako, Ako ang nagpili ug nagtudlo kaninyo aron kamo manglakaw ug mamunga og bunga nga molungtad” (Juan 15:16). Si Apostol Pablo mitudlo, “Walay magpili sa iyang kaugalingon aron mahimong pangulong pari kondili ang Dios maoy magpili kaniya sama sa iyang gibuhat kang Aaron” (Mga Hebreo 5:4).
Piho nga mga butang mosunod gikan sa matuod nga ang awtoridad maangkon lang pinaagi sa pagkapinili ug pagka-orden sa Dios. Una mao ang kaimportante sa “mga yawe” nga gihatag ni Jesus ngadto ni Pedro niadtong sagrado nga okasyon (tan-awa sa Mateo 16:19). “Ang mga yawe sa pagkapari mao ang awtoridad sa paggiya sa paggamit sa pagkapari alang sa mga anak sa Dios.”1
Sama sa gipakita sa Manluluwas pinaagi sa paghatag sa mga yawe ngadto ni Pedro, ang mga yawe sa pagkapari gihatag ngadto sa Iyang Apostoles. Kadto nga mga yawe, nga nawala uban sa kamatayon sa orihinal nga apostoles, kinahanglan gayod nga ipahiuli aron nga ang awtoridad sa pagkapari mahimong ikahatag ug magamit diha sa gipahiuli nga Simbahan. Kini nahimo sa dihang ang langitnong mga mensahero, mibuhat ubos sa direksiyon ni Jesukristo, miabot aron sa pagpahiuli sa Simbahan ni Jesukristo. Sila mibuhat niini pinaagi sa pagsugo ug pag-orden sa Propeta nga si Joseph Smith ug naghatag kaniya sa gikinahanglan nga mga yawe sa pagkapari. Kadto nga mga yawe wala sa gawas sa Ang Simbahan ni Jesukristo sa mga Santo sa Ulahing mga Adlaw.
Niining paagiha, Ang Simbahan ni Jesukristo sa mga Santos sa Ulahing mga Adlaw—ang gipahiuli nga Simbahan—adunay awtoridad sa pagpahigayon sa tanang buhat ug mga ordinansa nga gipahigayon sa milabay nga mga dispensasyon sa ebanghelyo ug aron kini “pagabugkuson [ilhon] didto sa langit” (Mateo 16:19; Doktrina ug mga Pakigsaad 128:8). Kini nga mahinungdanon nga mga ordinansa sa kaluwasan ug kahimayaan naglakip sa bunyag, paghatag sa Espiritu Santo, ang pagtuga diha sa templo, ug kaminyoon alang sa kahangtoran. Kining tanan, alang sa buhi ug sa patay, nakapahimong posible sa atong pagbalik ngadto sa Dios nga Amahan ug sa Anak, uban sa pagpasanay sa mga relasyon sa pamilya sa kahangtoran.
Pinaagi sa Iyang pagtulon-an ug sa Iyang Pag-ula, si Ginoong Jesukristo mao ang bato nga gisukaran sa tanan niini, ug ang Iyang buhat magpadayon pinaagi sa Iyang apostoles ug mga propeta.
Ang Propeta nga si Joseph Smith mitudlo, “Ang sukaranan nga mga baroganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabotan sa atong relihiyon sumpay lamang niini.”2
Kining 1984 nga litrato (sa ubos) sa Kurom sa Napulong Duha ka Apostoles nagpakita sa upat ka umaabot nga mga Presidente sa Simbahan. Ang ikalima nga Apostol, si Presidente Gordon B. Hinckley, nagserbisyo kaniadto sa Unang Kapangulohan. Pinaagi sa pagserbisyo ug kasinatian, ang matag Apostol naandam alang sa umaabot nga mga responsibilidad, lakip sa, alang sa pipila, isip Presidente sa Simbahan.
Talagsaon nga mga Saksi
Ang Napulog Duha ka Apostoles gitawag nga mahimong “talagsaon nga mga saksi sa ngalan ni Kristo sa tibuok nga kalibotan” (Doktrina ug mga Pakigsaad 107:23). Sila adunay talagsaon nga pagpamatuod ni Jesukristo. Sila mosaksi sa Iyang katinuod, sa Iyang pagkabalaan, sa Iyang misyon ug Pag-ula, sa Iyang Pagkabanhaw, sa Iyang balaan nga pagkapari, ug sa atong potensiyal alang sa kinabuhing dayon. Ang Apostoles giabagan niini pinaagi sa uban nga gitawag aron sa paggamit “sa espiritu sa propesiya” (Pinadayag 19:10).
Sa kalibotan nga nagduhaduha sa kabalaan sa Manluluwas, ako mopamatuod uban sa akong Kaigsoonan diha sa Unang Kapangulohan ug sa Korum sa Napulog Duha ka Apostoles sa Iyang balaan nga misyon ug Pag-ula. Kami mopamatuod “nga siya mao ang Bugtong nga Anak sa Amahan” (Doktrina ug mga Pakigsaad 76:23). Kami mopamatuod nga Siya adunay nabanhaw nga “lawas nga unod ug mga bukog nga mahikap ingon sa tawo” (Doktrina ug mga Pakigsaad 130:22). Kami mopamatuod nga tungod sa Iyang Pagkabanhaw, ang tanan nga mga anak sa Dios mabanhaw usab (tan-awa sa 1 Mga Taga-Corinto 15:21–22; 2 Nephi 9:6, 22; Mormon 9:13; Doktrina ug mga Pakigsaad 29:26). Kami mopamatuod nga Siya mamulong ngadto sa Iyang mga sulugoon sa atong panahon (tan-awa sa Doktrina ug mga Pakigsaad 1:38). Kami mopamatuod nga “wala nay laing ngalan nga gihatag sa Dios ngadto sa katawhan nga maoy makaluwas kanato” (Mga Buhat 4:12; tan-awa usab sa Mosiah 3:17; Moises 6:52).
Kami mopakigbahin sa among mga pagpamatuod—ug sa mga pagtulon-an sa atong Manluluwas—inubanan sa gugma. Si Presidente Russell M. Nelson mipahayag:
“Ang mga balaod sa Dios hingpit nga nadasig sa Iyang walay kinutobang gugma kanato ug sa Iyang tinguha alang kanato nga mahimong maayo kutob sa mahimo.
“… Ang Ginoo nga si Jesukristo, nga maoy tag-iya niini nga Simbahan, nagtudlo og mga propeta ug apostoles aron ipamulong ang Iyang gugma ug itudlo ang Iyang mga balaod.”3
Si Presidente Nelson nagtudlo usab: “Kamo dili kanunay makasabot sa matag pahayag sa buhi nga propeta. Apan kon kamo nasayod nga ang propeta usa ka propeta, kamo makaduol sa Ginoo sa kamapainubsanon ug hugot nga pagtuo ug mangayo alang sa inyong kaugalingong saksi kabahin sa bisan unsa nga giproklamar sa Iyang propeta.”4
Tanan kini matuman pinaagi sa Simbahan sa Ginoo, nga gipangulohan sa propetikanhon nga pagpangalagad sa Iyang Apostoles. Sa adlaw nga ang iyang pagkapangulo sa Simbahan gipahibalo, si Presidente Nelson mihatag sa bililhon nga pagpasabot bahin sa unsay iyang gitawag nga “sa talagsaong paagi nga gidumala sa Ginoo ang Iyang Simbahan”:
“Kon ang usa ka Presidente sa Simbahan mamatay, walay misteryo kon si kinsa ang sunod nga tawagon nga moserbisyo niana nga kapasidad. Walay pagpapili, walay pangampanya, apan ang hilom lamang nga kalihokan sa balaan nga plano sa pagpuli nga gihan-ay mismo sa Ginoo.
“Ang matag adlaw sa pagserbisyo sa usa ka Apostol usa ka adlaw sa pagkat-on ug pagpangandam alang sa dugang nga mga responsibilidad sa umaabot. Nagkinahanglan kini og daghang dekada nga pagserbisyo aron ang usa ka Apostol mabalhin gikan sa junior nga lingkoranan ngadto sa senior nga lingkoranan diha sa pundok. Nianang panahona, makakuha siya mismo og kasinatian sa matag aspeto sa buhat sa Simbahan. Siya usab makaila pag-ayo sa mga katawhan sa kalibotan, lakip ang ilang mga kasaysayan, mga kultura, ug mga pinulongan samtang balik-balik siya nga motadlas sa tibuok kalibotan tungod sa mga buluhaton. Kini nga proseso sa pagpuli diha sa pagpangulo sa Simbahan talagsaon. Wala akoy laing nasayran nga sama niini. Dili nato kana angay nga ikatingala, kay kini ang Simbahan sa Ginoo. Wala Siya maglihok subay sa paagi sa mga tawo.”5
Ako mopamatuod niana nga balaan nga proseso, nga sa ingon nga paagi ang Ginoo nagdumala sa Iyang Simbahan karon.