Digital Lamang
Mga Propeta ug Apostoles—Atong Tataw ug Masaligan nga mga Giya
Samtang mangita kita og direksiyon alang sa atong kinabuhi, mobati kita og kamasaligon sa pagsunod sa tambag gikan sa mga propeta ug apostoles.
Sa dihang ako otso anyos pa, gidala ko ug ang akong igsoon nga lalaki sa akong papa aron mag-hike og layo.
Sa dihang nagkaduol na mi sa ibabaw, ang akong igsoong lalaki ug ako nagsugod og pangutana sa mga pangutana nga gikahadlokan sa matag ginikanan:
“Unsa pa kalay-a?”
“Hapit na ba ta maabot?”
Ang akong papa mapasensyahong motubag:
“Duol na ka kaayo!”
“15 ka minutos na lang!”
Apan 15 minutos ang milabay, ug unya 15 pa. Ang akong papa nagsugod gikan sa pagdasig ngadto sa pag-agni ngadto sa paghangyo. “Gamay na lang gyod,” moingon siya, nagtuo nga tinuod gyod. Bisan siya natingala nga layo pa gyod mi.
Sa dihang nakalabay kami og mga hiker nga nanganaog gikan sa ibabaw, mahinamon kaayo ming nangutana unsa pa kalay-a ang among baktason.
“Duol na lang mo!” mao ang ilang madasigong tubag. “Duol na mo didto!”
Nahitabo kini sa makadaghang higayon. Sa kataposan, ang akong igsoong lalaki mihagba sa iyang kaugalingon sa tunga-tunga sa dalan, mikyugpos sa iyang mga bukton, ug mipahayag, “Dili na ko mopadayon pa.”
Mga Magbalantay sa Tore
Sa among nakat-onan niadto nga hiking trail, lainlaing mga tawo adunay lainlaing mga opinyon. Matag usa nga among masugatan miingon kanamo nga “duol” na mi sa tumoy, apan silang tanan adunay lainlaing mga ideya kon unsay gipasabot niana. Bisan ang akong talagsaong amahan—kinsa miputos sa among mga snack, mipuno sa among sudlanan sa tubig, ug midala kanamo ngadto sa trailhead—wala na kahinumdom unsa gayod ka taas ang baktasonon. Kay walay sinati nga giya, ang akong igsoong lalaki ug ako nangaluya ug nadismaya sa punto nga buot nang mosurender.
Samtang maglakaw kita sa dalan sa pagkigsaad matag adlaw, makasugat kita og lainlaing mga impluwensya ug mga opinyon. Daghang mga tawo ang buot nga mahimong atong mga giya—mga tig-impluwensya, mga politiko, pamilya, ug mga higala. Ang pipila niini nga mga giya wala gayoy pagtagad kon unsay maayo alang kanato. Ang ubang mga giya nagtinghuha sa labing maayo alang kanato, ug makatabang kini sila ug mosuporta samtang maglambo kita—sama sa akong papa—apan wala kaha tingali silay mga tubag sa tanan.
Swerte lang, ang Langitnong Amahan ug si Jesukristo nasayod sa tanan kinsa nakaila kanato sa hingpit ug kinsa nakahibalo sa karon ug sa umaabot nga mga kahimtang sa kalibotan nga atong gipuy-an. Ug Sila naghatag kanato og mga propeta ug apostoles aron sa paglihok isip atong mga giya ug mga magbalantay sa tore (tan-awa sa Ezequiel 33:1–7).
Aniay pipila lang ka paagi nga sila naggiya kanato subay sa dalan sa pakigsaad:
Paghatag og Hingpit nga Kamatuoran
Si Presidente Russell M. Nelson mihatag sa katibuk-an kon unsa ang mahatag kanato sa pagpangita ug pagbuhat sa mga pulong sa mga propeta ug apostoles: “putli nga kamatuoran, putli nga doktrina ni Kristo, ug putli nga pagpadayag.” Sa kalibotan diin “pipila lang ka mga tawo ang nahibalo asa modangop alang sa kamatuoran,” mobati kita og kamasaligon nga nagkat-on kita ug nagsunod sa “hingpit nga kamatuoran—mahangturon nga kamatuoran,” basta nga naminaw kita sa mga pulong sa atong modernong mga lider.1
Total, samtang nagkat-on kita diha sa Amos 3:7, “Sa pagkamatuod ang tanang himoon sa Ginoong Dios ipahibalo gayod niya sa iyang mga alagad nga mga propeta.” Ingon sa gitudlo ni Elder Dieter F. Uchtdorf sa Korum sa Napulog Duha ka Apostoles: “Adunay usa ka tinubdan sa kamatuoran nga hingpit, husto, ug dili madaot. Kana nga tinubdan mao ang atong walay kinutoban sa kaalam ug nahibalo sa tanan nga Langitnong Amahan.”2
Ang Langitnong Amahan mao ang tinubdan sa kamatuoran, ug Siya nagsulti niana nga kamatuoran ngadto sa Iyang mga propeta. Mobati kita og kamasaligon mahitungod sa atong abilidad sa pagpangita ug pag-ila sa kamatuoran kon nagsunod kita sa mapanagnaon nga tambag.
Pagtabang Kanato nga Magpabilin nga Nahimutang ug Nahiusa
Ang Simbahan ni Jesukristo sa mga Santos sa Ulahing mga Adlaw usa ka tibuok kalibotan nga Simbahan; ang atong mga miyembro nagpuyo sa tibuok kalibotan ug adunay nagkalainlaing mga kasinatian sa kinabuhi. Unsaon natong tanan pagpabilin nga magkauyon? Unsaon nato pagbati og kamasaligon nga kitang tanan nagbuhat sa unsay angay buhaton?
Si Presidente Dallin H. Oaks, Unang Magtatambag sa Unang Kapangulohan, mitudlo mahitungod sa panginahanglan og organisasyon sa tibuok kalibotan ug sa unsang paagi kana gipatuman pinaagi sa mga propeta ug apostoles:
“Ang buhat sa Ginoo nagkinahanglan og usa ka organisasyon nga gipangulohan sa Ginoo pinaagi sa mga lider nga Iyang pinili ug gihatagan og awtoridad ug kinsa Iyang idumala sa pagpatuman sa Iyang mga katuyoan. Ang kasaysayan sa kasulatan nagpakita nga ang maong mga lider sukad pa sa una usa ka propeta o mga propeta ug apostoles. …
“Ngano nga ang usa ka organisasyon gikinahanglan man aron matuman ang mga katuyoan sa Ginoo? Bisan og ang atong Manluluwas nahigugma ug motabang kanato sa tinagsa-tagsa, sa pagtuman sa Iyang mga katuyoan alang sa tibuok pundok sa mga anak sa Dios—ilabi na sa Iyang katawhan sa pakigsaad—molihok Siya pinaagi sa usa ka organisasyon nga pangulohan sa mga propeta ug apostoles.
“Pinaagi lamang sa usa ka organisasyon nga ang tinagsa-tagsa ka miyembro nga gitawag ni Apostol Pablo og ‘ang lawas ni Kristo’ (1 Mga Taga-Corinto 12:27) makadawat og mga oportunidad nga ilang gikinahanglan aron makab-ot ang espirituhanong paglambo nga maoy tuyo sa ilang pagkalalang.”3
Ang panalangin sa buhi nga mga propeta ug apostoles naghiusa ug naglig-on kanato isip usa ka Simbahan. Mobati kita og kamasaligon nga ang pagsunod sa ilang mga pulong makahimo kanato nga hilwas diha sa dalan sa pakigsaad ug naglihok diha sa eksakto nga direksiyon.
Pagpakigbahin sa Gugma sa Dios alang Kanato
Nasayod kita nga ang mga propeta ug apostoles talagsaon nga panalangin, apan unsa man kon mohangyo sila kanato sa pagbuhat og usa ka butang nga daw lisod? O usa ka butang nga sukwahi sa unsay gisulti sa mga tawo nga nagpalibot kanato? Sa gipahayag ni Presidente Henry B. Eyring, Ikaduhang Magtatambag sa Unang Kapangulohan: “Ang Ginoo kasagaran mosugo sa Iyang mga propeta sa pagtambag nga lisod dawaton sa mga tawo. Ang kaaway sa atong mga kalag mosulay aron kita masilo ug magduha-duha sa tawag sa propeta gikan sa Dios.”4
Apan, ingon sa gipasabot ni Elder Neil L. Andersen sa Korum sa Napulog Duha ka Apostoles, kana nga kamatuoran kinahanglan dili mohimo kanato nga mabalaka: “Ayaw kaalarma kon ang tingog sa propeta bahin sa pagpasidaan mosupak sa popular nga mga opinyon sa atong panahon. Ang pagbiay-biay sa nasuko nga mga dili tumutuo kanunayng isalibay sa higayon nga magsugod na sa pagsulti ang propeta.”5
Si Elder Ulisses Soares sa Korum sa Napulog Duha ka Apostoles mipakigbahin nganong mobati kita og kahupay kon makadungog kita sa mga lider nga mamulong, bisan kon ang ilang tambag daw mahagiton:
“Makahupay ang pagkahibalo nga wala kita mag-inusara sa kalibotan, bisan sa mga hagit nga atong giatubang sa kinabuhi. Ang pagkaadunay mga propeta usa ka timaan sa gugma sa Dios alang sa Iyang mga anak. Ipahibalo nila ang mga saad ug ang tinuod nga kinaiyahan sa Dios ug kang Jesukristo ngadto sa Ilang katawhan. …
Nagrepresentar [ang mga propeta ug apostoles] sa hunahuna ug kasingkasing sa Ginoo ug gitawag nga morepresentar Kaniya ug motudlo kanato unsa ang angay natong buhaton aron makabalik pagpuyo sa presensya sa Dios ug sa Iyang Anak, si Jesukristo. … Pinaagi sa pagsunod kanila, mas sadya ang atong kinabuhi ug minos ang kakomplikado, ang atong mga kalisdanan ug mga suliran mas sayon nga mapas-an, ug mamugna nato ang espiritwal nga taming libot kanato nga mosalipod kanato sa mga pag-atake sa kaaway sa atong panahon.”6
Ang katinuod nga pipila sa mga pagtulon-an sukwahi sa mga pagtulon-an sa kalibotan mao nga nganong nagkinahanglan kita og mga propeta—ang Langitnong Amahan gusto nga mogiya sa Iyang mga anak ug manalipod kanila batok sa mga kadaotan sa kaaway.
Pagtuboy sa mga Prayoridad sa Panagna
Sa kataposan, ang akong igsoong lalaki mibangon ug naabot sa nindot nga linaw nga among gilakaw sa tibuok adlaw. Usa kadto ka talagsaon ug mapuslanon nga kasinatian.
Apan unsa pa unta kadto ka maayo kon nasayod pa kami kon unsay gipaabot? Ang pag-hike mas mubo ra unta o dili kaayo tungason, apan mas andam unta kami. Ingon sa gipasabot ni Presidente Nelson, “Ang pagbuntog sa kalibutan … nakahimo sa tanan sa kinabuhi nga mas sayon,” bisan og wala kini nakapahimong sayon sa tanan.7
Samtang nagpaluyo kita sa mga propeta ug apostoles ug naghimo “og personal nga pasalig nga atong buhaton ang atong labing maayo sa pagsuporta sa ilang propetikanhong mga prayoridad,”8 ingon sa gitudlo ni Presidente Nelson, makadawat kita og giya ug direksiyon alang sa atong kinabuhi.