Digital Lamang: Mga Young Adult
Pagkonektar ngadto Niadtong anaa sa Pikas Bahin sa Tabil
Sa dihang miadto ko sa templo sa ikaduhang higayon, nakadawat ko og pamatuod nga ang mga pulong sa propeta tinuod.
Duha na ka tuig sukad sa akong unang pagbisita sa templo, ug naghinamhinam ko nga motambong pag-usab uban sa usa ka grupo sa mga young adult. Ang akong tumong mao ang paglig-on sa akong kaugalingon, pagpakighigala, ug pagsinati sa prebilehiyo sa pagpahigayon sa sagradong mga ordinansa.
Samtang anaa sa bunyaganan didto sa templo, morag daghan kaayo ko og nahunahunaan tungod sa kakuyaw. Kadto mao pa lang ang akong ikaduhang higayon nga moadto sa templo, ug nahadlok ko nga masayop samtang nagpahigayon ko sa mga ordinansa. Apan ang usa ka sakop sa kapangulohan sa templo, nga mitabang sa mga pagbunyag, misulti ngari namong naghulat nga naglinya nga kon maablihan pa lang namo ang tabil sulod sa usa ka segundo, makakita unta kami kon unsa ka daghan ang mga tawo nga anaa sa kalibotan sa mga espiritu nga naghulat aron matabangan.
Kana nga hunahuna midulot sa akong kasingkasing, ug dihadiha dayon akong naamgohan kon unsa ka importante kini nga mga ordinansa.
Pagbati og Kalipay sa Buhat sa Templo
Samtang namalandong ko sa unsay iyang gisulti, akong nahinumdoman ang usa ka teknik nga akong nakat-onan sa klase sa teyatro diin ang mga artista mobutang sa ilang kaugalingon diha sa sitwasyon sa mga karakter nga ilang idrama aron mahulagway sila sa mas epektibong paagi. Naghunahuna ko kon ang Langitnong Amahan motabang ba kaha nako samtang naningkamot ko sa pagbutang sa akong kaugalingon diha sa kahimtang sa mga tawo nga akong gi-proxihan sa mga ordinansa sa templo.
Unsa kaha ang akong bation kon, human sa mga dekada o gani mga siglo sa paghulat, sa kataposan madawat na gyod nako ang makaluwas nga mga ordinansa nga gipangandoy kaayo nako?
Samtang misulay ko sa paghunahuna og dugang pa mahitungod niadtong akong gi-proxihan, ang Espiritu Santo mitabang nako nga mobati og hilabihan nga kalipay. Dili nako mapugngan ang akong mga luha. Akong nabati ang kalipay niadtong akong gi-proxihan sa bunyag. Gibati nako ang kusog nga impresyon kon unsa sila kadugay naghulat alang sa ilang makaluwas nga mga ordinansa.
Matinguhaon ko nga moadto sa templo, apan akong naamgohan nga kon akong kalimtan ang akong kaugalingong mga kabalaka ug mga pagbati ug motutok lang gayod sa pagrepresentar sa matag tawo nga akong gi-proxihan sa bunyag, akong mabati ang ilang kalipay agi sa tabil.
Mapasalamaton kaayo ko nga nakaserbisyo sa tibuok adlaw didto sa templo ug nakatabang niadtong nanginahanglan nako aron suportahan sila aron mahimo silang andam nga mobalik ngadto sa presensya sa Amahan. Mas nasabtan nako ang pagpadayag nga gihatag sa Dios ngadto ni Propeta Joseph Smith didto sa Kirtland Temple: “Tanan kinsa namatay, nga walay kahibalo niini nga ebanghelyo, kinsa unta makadawat niini kon sila gitugotan pa sa pagpabilin, mahimo nga manununod sa celestial nga gingharian sa Dios” (Doktrina ug mga Pakigsaad 137:7).
Ang Buhat sa Templo Makapausab Ninyo
Sa wala pa mopauli gikan sa templo, ang tanang young adult nag-alirong aron mopakigbahin sa ilang mga pagpamatuod ug mga kasinatian. Ang Espiritu Santo mihikap sa kasingkasing sa matag usa, ug kami nasayod nga mas lahi na kami kaysa una namong pag-abot sa templo tungod sa among bag-ong tumong sa paghimo sa buhat sa templo ug sa family history.
Kinahanglang hinumdoman nato ang gisulti sa atong minahal nga propeta, si Russell M. Nelson: “Bisan kon ang buhat sa templo ug sa family history adunay gahom sa pagpanalangin niadtong anaa sa kalibotan sa espiritu, kini adunay sama nga gahom sa pagpanalangin sa mga buhi. Kini adunay makapalunsay nga impluwensya niadtong nagbuhat niini.”1
Sa kasamtangan nagserbisyo ko isip magtatambag sa korum sa mga elder nga gisangon sa buhat sa templo ug sa family history. Nagtrabaho kami nga makab-ot ang tumong nga adunay balay sa Ginoo sa among dapit. Samtang naningkamot kami, personal nakong nabati kanang makapalunsay nga impluwensya nga gihisgotan ni Presidente Nelson.
Ako nasayod nga kon kita mohimo niini nga buhat, kita mapanalanginan gayod sa Ginoo. Ang tanang saad nga Iyang gihimo ngari nato pinaagi sa Iyang mga propeta ug apostoles matuman, dinhi man niini nga kinabuhi o sa sunod nga kinabuhi. Sama sa gitudlo ni Elder Dale G. Renlund sa Korum sa Napulog Duha ka Apostoles: “Ang Dios molig-on, motabang, ug mobulig kanato [tan-awa sa Isaias 41:10]; ug Iyang ibalaan ngari kanato ang dako kaayo natong kasakit [tan-awa sa Mga Himno, nu. 44]. Kon tigumon nato ang atong mga family history ug moadto sa templo para sa atong katigulangan, tumanon sa Dios ang daghan niining gisaad nga panalangin sa mga buhi ug patay na.”2
Ako mopamatuod bahin sa gahom sa buhat sa templo ug sa family history nga maanaa sa atong kinabuhi. Ang paghimo niana nga buhat makatabang nato nga malig-on ang atong pagtuo ug ang atong pundasyon diha sa ebanghelyo ni Jesukristo. Kita mao ang makatabang sa mga tawo sa pikas bahin sa tabil—ug sa pagbuhat sa ingon, atong bation ang kalipay nga naggikan nianang sagrado nga mga kasinatian.