“Kami Nagmahal Gihapon sa Ginoo,” Liahona, Okt. 2023.
Mga Tingog sa mga Santos sa Ulahing mga Adlaw
Kami Nagmahal Gihapon sa Ginoo
Ang gisangpotan dili mao sa unsa ang among gilaoman, apan ako nasayod nga ang akong mga pag-ampo alang sa akong anak nga lalaki wala makawang.
Mga tulo ka tuig ang milabay ang akong anak nga lalaki, si Mark, na-diagnos nga may kanser. Ang mga surgeon miopera kaniya, apan ang kanser mipadayon sa pagkatap. Nag-ampo ang tibuok pamilya ug nagpuasa alang kaniya atol niadtong taas nga mga bulan.
Akong nabasahan diha sa mga kasulatan ug sa nagkalainlain nga mga pakigpulong sa komperensiya kon unsa ka importante ug katinuod ang gahom sa hugot nga pagtuo. Mihukom ko sa pagpuasa ug pag-ampo, mibati nga ang akong hugot nga pagtuo igo na nga mahitabo ang milagro. Ang akong anak mamaayo, o ang iyang kanser dili mograbe. Kanunay nakong tapuson ang akong bug-os nga mga pag-ampo sa “tumanon ang Imong pagbuot.”
Gibasa nako ang matag pakigpulong kabahin sa hugot nga pagtuo nga akong makit-an nga nahatag atol sa milabay nga kinatibuk-ang mga komperensiya o makita diha sa uban nga mga materyal nga gimantala sa Simbahan. Nakakaplag ko og mga pakigpulong ni Presidente Russell M. Nelson nga makahupay kaayo.
Ang among anak nga lalaki namatay niadtong Hunyo 28, 2021. Nahugno kaming tanan ug nagmagul-anon. Ako mibati nga ang akong hugot nga pagtuo dili gayod igo ang kalig-on.
Usa ka adlaw mitan-aw ko sa luyo nga hapin sa isyu sa usa ka kinatibuk-ang komperensiya sa Liahona ug nakita ang usa ka litrato ni Presidente Nelson nga nagbarog sa pulpito. Ubos sa litrato adunay usa ka parapo nga gikuha gikan sa usa sa iyang mga pakigpulong. Miingon siya nga nagkinahanglan og hugot nga pagtuo ang pagpasakop sa Simbahan, ang pagsunod sa mga propeta, ang pagserbisyo og misyon, ang pagpakabuhi og putli, ug pagtudlo sa ebanghelyo. “Nagkinahanglan og hugot nga pagtuo ang pagpangaliyupo alang sa kinabuhi sa usa ka minahal ug gani dugang pa nga pagtuo,” siya midugang, “ang pagdawat sa makasagmuyo nga tubag.”1
Akong gibasa kana nga kapahayag sa labing minos tulo ka higayon una ako nakaamgo nga kadto alang kanako. Usa ka kalma nga pagbati ang milukop kanako. Ako nasayod nga ang among mga pag-ampo alang sa akong anak nga lalaki wala makawang. Ang akong hugot nga pagtuo lig-on sa paagi nga ang Ginoo nasayod ug midawat.
Ang among pamilya nakasinati sa among bahin sa kasub-anan, lakip ang pagpanaw sa akong bana ug tulo ka mga apo nga lalaki. Ang akong hugot nga pagtuo sa Langitnong Amahan ug ni Jesukristo nagsulti kanako nga ang akong namatay nga anak nga lalaki nag-uban sa akong bana ug mga apo nga lalaki. Kana nga kahibalo nakahatag kanako og kalinaw. Bisan pa man sa kalisdanan sa pamilya, kami nagmahal gihapon sa Ginoo ug sa Iyang ebanghelyo, ug ang among mga pagpamatuod milambo. Ako mopamatuod nga si Presidente Nelson usa ka propeta ug ang iyang tambag nga gihatag naggikan sa Ginoo.