Ang Organisasyon sa Simbahan ni Jesukristo

Si Jesukristo mao ang pangulo sa Ang Simbahan ni Jesukristo sa mga Santos sa Ulahing mga Adlaw. Siya nagdasig og mga propeta ug apostoles sa paggiya sa Simbahan karon, sama sa Iyang gibuhat sa mga panahon sa Bag-ong Tugon. Sila giabagan pinaagi sa uban nga mga lider sa Simbahan.

Ang Simbahan ni Jesukristo sa mga Santos sa Ulahing mga Adlaw mao ang Simbahan sa Maluluwas. Kini “gitukod diha sa sukaranan nga gipahimutang sa apostoles ug sa mga propeta, ug ang bato nga gisukaran mao si Kristo Jesus” (Mga Taga-Efeso 2:20). Kini nagpasabot nga Siya mao ang labing importante nga bahin sa pundasyon. Siya mao ang naggiya sa Simbahan pinaagi sa mga propeta ug apostoles nga Iyang pinili nga mamahimong mga lider.

Ang Unang Kapangulohan

Ang Presidente sa Simbahan mao ang propeta sa Dios dinhi sa yuta karon. Siya ang senior nga Apostol ug ang bugtong tawo sa yuta kinsa nagdawat og pagpadayag sa paggiya sa tibuok Simbahan. Ang Ginoo nagdasig kaniya aron masayod kon hain sa duha ka Apostol ang tawagon nga moserbisyo isip iyang mga magtatambag. Sila nagporma sa Unang Kapangulohan. Ang tulo mga propeta, mga manalagna, ug mga tigpadayag.

Korum sa Napulog Duha ka Apostoles

Ang mga sakop sa Korum sa Napulog Duha ka Apostoles mga propeta, mga manalagna, ug mga tigpadayag usab. Sila gitawag nga mamahimong espesyal nga mga saksi ni Jesukristo. Sila mobiyahe sa tibuok kalibotan aron sa pagtudlo ug pagpamatuod mahitungod Kaniya. (Tan-awa sa Doktrina ug mga Pakigsaad 107:23, 33.)

Mga Korum sa Seventy

Ang mga sakop sa Seventy gitawag usab aron mamahimong mga saksi ni Jesukristo (tan-awa sa Doktrina ug mga Pakigsaad 107:25). Sila motabang sa Korum sa Napulog Duha sa pagtudlo sa ebanghelyo ug sa pagtukod sa Simbahan sa tibuok kalibotan.

Litrato pinaagi ni Machiko Horii

Lokal nga mga Lider

Ang inyong kapangulohan sa stake o district, bishopric o kapangulohan sa branch, ug mga kapangulohan sa korum sa mga elder ug Relief Society tinawag usab sa Dios. Sila makatabang kaninyo nga makakat-on ug mosunod sa ebanghelyo. Kamo makakat-on mahitungod sa pipila niining mga calling diha sa Marso 2022 nga artikulo sa Mga Sukaranan sa Ebanghelyo, “Pag-alagad sa mga Calling sa Simbahan.”