“‘Makonsiderar’ ba nga Pagpangalagad ang Pakiglakaw ug Pakig-istorya?,” Liahona, Okt. 2023.
Nagkatigulang nga Matinud-anon
“Makonsiderar” ba nga Pagpangalagad ang Pakiglakaw ug Pakig-istorya?
Ang pagpakita nga kita nagpakabana mahinungdanon ngadto sa Ginoo ug sa usag usa.
Sa dihang ang akong igsoon nga lalaki ug ako batan-on pa, ganahan mi mobisita sa among lola. Nagpuyo siya mga 15 minutos gikan sa among balay, mao nga kanunay kaming mibisita kaniya. Sa daghang higayon inig abot namo sa iyang balay, anaa siya nakig-istorya sa telepono. Usa ka silingan ang nanawag halos kada adlaw aron makig-istorya lang. Wala gayod kami makasabot kon nganong gigahin ni Lola kadtong tanang oras sa pakig-istorya diha sa telepono sa usa ka silingan. Mao nga gisultihan namo siya nga sultihan ang iyang silingan nga bisi siya. Taposon ni Lola ang tawag, mopahiyom, ug dayon mohatag sa iyang pagtagad kanamo.
Saysenta ka tuig o sobra pa ang milabay, akong naamgohan nga wala nadisturbo si Lola sa kanunay nga mga tawag sa iyang silingan. Hinuon, kining duha ka biyuda nagsuportaay sa usag usa—nag-istoryahanay samtang ang uban walay samang oras o interes sa pagbisita lamang.
Ang Pagserbisyo usa ka Pagpakita sa Pagkadisipulo
Samtang maningkamot kita nga mahimong mas sama sa atong Manluluwas, atong hangopon ang mga kahigayonan sa pagserbisyo, dili igsapayan sa “kinsa” o sa “kanus-a.” Bantayi kon sa unsang paagi ang Manluluwas migahin og panahon sa pagtudlo ni Nicodemo—usa ka Pariseo—kinsa miduol atol sa kagabhion aron mangutana Kaniya (tan-awa sa Juan 3). Sa samang paagi, si Jesus mipakita og gugma ug kapuangod samtang gitudloan Niya ang Samarianhon nga babaye didto sa atabay (tan-awa sa Juan 4).
Apan unsa man kon kita may daghang maayong gipangbuhat ug adunay laing tawo nga nanginahanglan sa atong tabang sa samang higayon? Ang Manluluwas mao usab ang atong talagsaon nga ehemplo. Sa dihang ang babaye nga walay undang ang pagdugo mikab-ot aron sa paghikap Kaniya samtang naglakaw Siya aron moserbisyo sa lain, mihunong Siya ug nangalagad ngadto Kaniya sa wala pa moadto aron mangalagad ngadto sa himatyon nga batan-ong babaye (tan-awa sa Mateo 9:20–25). Ang ehemplo ni Jesus nagpakita kanato nga bisan ang mga pagbalda mga nindot nga kahigayonan sa pagpangalagad.
Si Sister Jean B. Bingham, kanhi Kinatibuk-ang Presidente sa Relief Society, mihatag og nindot nga kasumahan bahin sa unsaon nato nga makapangalagad ngadto sa usag usa samtang nagsingabot ang Ikaduhang Pag-anhi: “Unsa pa ang mas maayong paagi sa pag-andam sa pagsugat Kaniya kay sa pagpaninguha nga mahimong sama Kaniya pinaagi sa mahigugmaong pagpangalagad sa usag usa! Ingon nga gitudlo ni Jesukristo sa Iyang mga sumusunod sa sinugdanan niini nga dispensasyon, ‘Kon kamo nahigugma kanako kamo mag-alagad kanako’ [Doktrina ug mga Pakigsaad 42:29]. Ang atong serbisyo ngadto sa uban usa ka pagpakita sa pagkatinun-an ug sa gugma alang sa Dios ug sa Iyang Anak, si Jesukristo.”1
Litrato ni Brother Rigby ug Brother Bracken sa maayong kabubut-on sa tagsulat
Asa Kita Makakaplag og mga Kahigayonan sa Pagpangalagad?
Sa kasagaran, ang Kristohanong pagpangalagad mahitabo sa ginagmay, sinserong mga buhat nga inyong buhaton matag adlaw.2
Ang akong silingan nga si Marriner Rigby 95 anyos na. Pipila ka tuig ang milabay didto siya sa usa ka parkinganan sa dihang naatrasan siya sa usa ka nalinga nga drayber, miligis sa iyang wala nga bitiis. Human sa unom ka semana nga pagpaayo, makalakaw na siya pag-usab uban sa tabang sa usa ka walker. Nagsugod siya sa paglakaw kutob sa 1.6 ka kilometro matag adlaw. Misubay og lahi nga rota usa ka buntag, naagian niya ang panimalay sa 84 anyos nga si Ron Bracken, usa ka miyembro sa ward kinsa nagsagubang og stage 4 nga kanser sa bukog. Tungod kay walay usa kanila ang gisangonan sa pagpangalagad, mihukom sila sa pagpangalagad ngadto sa usag usa samtang naglakaw sa kasilinganan.
Nag-istorya sila mahitungod sa tanan: hugot nga pagtuo, mga panalapi, mga pamilya, mga plano sa umaabot. Mao gayod, mga plano sa umaabot. Nagmatinud-anon sila mahitungod sa ilang mga sakit apan midasig sa usag usa sa pagtinguha og mga plano sa umaabot. Dayon usab, ang labing mahinungdanong bahin sa ilang pagpangalagad dili ang unsay ilang giistoryahan kondili ang ilang panagkuyog. Migahin sila og panahon alang sa usag usa.
Ang pagpangalagad mahimong maglakip sa pagpaambit ug pagpaminaw, paglakaw ug pag-istorya, pagplano ug pagpahinumdom. Usahay tingali mabalaka kita mahitungod sa unsay “makonsiderar” isip pagpangalagad. Apan ang sinsero nga pag-atiman mahinungdanon ngadto sa Ginoo ug sa usag usa. Ang tanan makahimo niana—ug kini makahimo og Kristohanon nga kalainan!
Ang tagsulat nagpuyo sa Utah, USA.