Digital Lamang
Mapanagnaon nga mga Pagtulun-an alang sa Atong Panahon—Bag-ong mga Mensahe gikan sa mga Propeta, Apostoles, ug Ubang mga Lider sa Simbahan
Tan-awa kon unsa ang bag-ohay lang nga gitudlo sa mga lider sa Simbahan diha sa social media mahitungod kon sa unsang paagi si Jesukristo nagdumala ug nagpanalangin sa Iyang Simbahan pinaagi sa Iyang gitawag nga mga sulogoon.
Busa Panglakaw Kamo, ug Tudloi ang Tanang Kanasuran, ni Harry Anderson
“Kon ang Gipahiuli nakahimo og bisan unsa,” miingon si Presidente Russell M. Nelson, “giguba niini ang karaang tinuohan nga mihunong na ang Dios sa pagpakigsulti sa Iyang mga anak. Wala nay mas layo pa sa kamatuoran. Usa ka propeta nagbarog sa ulohan sa Simbahan sa Dios sa tibuok dispensasyon, gikan kang Adan hangtod karon [tan-awa sa Bible Dictionary, “Dispensations”]. Ang mga propeta nagpamatuod kang Jesukristo—sa Iyang kabalaan ug sa Iyang misyon ug pangalagad dinhi sa yuta. Gipasidunggan nato si Propeta Joseph Smith isip propeta niining kataposang dispensasyon. Ug gipasidunggan nato ang matag tawo nga mipuli niya isip Presidente sa Simbahan.”
Namulong isip usa ka sakop sa Korum sa Napulog Duha ka Apostoles, si Presidente Nelson midugang, “Kasagaran kita moawit, ‘Salamat, O Dios sa Propeta’ [Mga Himno, nu. 13]. Ato bang nasabtan og maayo unsay gipasabot niana? Hunahunaa ang pribilehiyo nga gihatag sa Ginoo kanato sa pagpaluyo sa Iyang propeta, kansang tambag lunsay, limpyo, walay tinguha alang sa kaugalingon, ug tinuod gayod!”1
Sa unsang paagi kita napanalanginan sa mga propeta ug apostoles kinsa nagrepresentar sa Ginoo sa ilang mga calling diha sa Unang Kapangulohan ug sa Korum sa Napulog Duha ka Apostoles? Ang bag-ohay nga mga pagtulon-an gikan sa mga lider sa Simbahan sa social media naghisgot mahitungod sa papel sa mga propeta ug sa mga mensahe gikan sa mga lider sa Simbahan sa kinatibuk-ang komperensiya. Mahimo ka usab nga magtuon og dugang mahitungod niini nga hilisgotan gikan sa nanglabay nga mga pakigpulong sa kinatibuk-ang komperensiya mahitungod sa mga propeta.
Usa ka Sugyot sa Pagpaminaw sa Kinatibuk-ang Komperensiya
“Ania ta karon sa pagsugod og laing kinatibuk-ang komperensiya. Gusto unta kong mohimo og usa lang ka sugyot alang kaninyo nga ikonsiderar nga makapalambo og dako sa epekto niini nga komperensiya sa inyong kinabuhi. Pagbaton og mga pangutana diha sa inyong hunahuna ug sa inyong kasingkasing. Samtang inyong gamiton ang hugot nga pagtuo diha sa Ginoo aron sa pagmugna ug pagkonsiderar niana nga mga pangutana, ug samtang maminaw kamo og maayo pinaagi sa gahom sa Espiritu Santo, makadawat kamo sa mga tubag nga inyong gikinahanglan.”
Elder David A. Bednar, Facebook (bidyo), Mar. 31, 2022, facebook.com/davida.bednar.
Pagkalingkawas ug Luwas nga Dalangpan
“Diha sa mga doktrina sa Simbahan, ang hugot nga pagtuo ug ang pagpangita og kahibalo nahiangay; nahiuyon ug nagsuporta sa usag usa. Karon … sa Brigham Young University, naghisgot ko og pipila ka mga doktrina ug mga inisyatibo nga gihatag sa mga Presidente sa Ang Simbahan ni Jesukristo sa mga Santos sa Ulahing mga Adlaw sa miaging 100 ka tuig.
“Ang mga doktrina nga akong gipili nga hisgotan mahinungdanon kay naghatag kini og kalingkawasan sa pagpanalipod batok sa piho nga mga hagit ug mga daotan dili lamang sa mga panahon nga nadawat ang mga gipadayag apan usab sa pagpanalipod sa umaabot nga mga henerasyon.
“Sama pananglit, niadtong 1922 …, si Heber J. Grant mao ang propeta ug Presidente sa Simbahan. Usa ka baroganan nga iyang kanunay nga gihatagan og gibug-aton mao ang Pulong sa Kaalam.
“Si Presidente Grant nadasig atol sa iyang serbisyo isip ang propeta aron himoon ang pagsunod sa Pulong sa Kaalam nga usa ka gikinahanglan aron sa pagdawat og rekomend sa templo. Siya usab nahimong inila tungod sa pagpadayon sa pagtudlo sa mga baroganan sa Pulong sa Kaalam sulod sa katuigan nga siya miserbisyo.
“Kita karon nagpuyo sa panahon nga daghang mga tawo moingon nga nagsunod sila sa siyensya mahitungod sa panglawas. Ang makalilisang nga mga resulta sa panglawas nga gikan sa pagpanigarilyo ug inom klaro na karon nga gipahibalo sa syensya. Mapasalamaton ko nga ang mga pagpadayag nga mapanagnaon ug mga pagpahayag nagsangkap og pagkalingkawas ug usa ka luwas nga dalangpan alang sa matinud-anon nga mga miyembro sa Simbahan. Ang pagsunod sa mapanagnaon nga pagpadayag gikan sa gitawag nga propeta sa Ginoo nakadala og kahilwasan ug kalinaw.”
Elder Quentin L. Cook, Facebook, Ago. 16, 2022, facebook.com/quentin.lcook.
Ang Tahas ni Joseph Smith sa Pagpangulo Kanato ngadto kang Jesukristo
“Akong dungog ang pagrepresentar sa Ang Simbahan ni Jesukristo sa mga Santos sa Ulahing mga Adlaw kagahapon didto sa The World Peace Dome sa Pune, India, samtang ang usa ka estatuwa ni Propeta Joseph Smith gidugang ngadto niining harianon nga balay-tigumanan nga gitukod aron sa pagpalambo og kalibotanong kalinaw.
“Atong gipasidunggan ang nagpadayon nga impluwensya ni Joseph Smith alang sa kamaayo sa kalibotan, ang mga pagpadayag nga iyang gidala, ang iyang ehemplo sa sakripisyo ug serbisyo, ug sa iyang debosyon ug pagsaksi sa buhi nga Dios.
“Bisan og atong gitahod si Joseph Smith isip usa ka propeta, sa walay pagpangutana ang labing dungganan nga estatuwa alang kanako ug alang sa tanang miyembro sa gipahiuli nga Simbahan ni Jesukristo mao ang estatuwa sa Manluluwas nga si Jesukristo nga nagbarog dinhi niini nga simboryo [dome].
“Niadtong 1820, ang batan-ong si Joseph miadto sa kakahoyan nag-inusara duol sa iyang panimalay aron mag-ampo alang sa mga tubag. Samtang nagsangpit sa Dios, nakakita siya og duha ka mahimayaong mga tawo, ang Dios nga Amahan ug ang Iyang Anak nga si Jesukristo, nagbarog ibabaw kaniya diha sa hangin diha sa ‘gilis sa kahayag.’ Nakigsulti Sila ngadto kang Joseph ug miingon kaniya nga ang kahingpitan sa ebanghelyo mapahiuli sa yuta pinaagi kaniya sa umaabot.
“Kita sukad mipasabot niini nga walay katumbas sa pagpakita sa Dios [theophany] isip ang ‘Unang Panan-awon,’ ug kini ang tilindogan sa tanan nga nagsunod sa gipadayag nga plano sa Dios alang sa pagtubos natong tanan, Iyang mga anak.
“Isip usa ka espesyal nga saksi sa ngalan ni Jesukristo, ako mopamatuod nga Siya mao ang sentro nga sumbanan nga naghimo nga posible sa plano sa katubsanan sa Dios alang sa matag usa kanato.”
Elder D. Todd Christofferson, Facebook, Nob. 23, 2022, facebook.com/dtodd.christofferson.
Mga Tingog sa Kamatuoran
“Kinsa ang imong gipaminaw?
“Ang tubag niini nga pangutana moimpluwensya sa inyong umaabot ug sa inyong mahangturon nga padulngan. Maimpluwensya ba kamo sa mga tingog nga mahiyason, makapadani, matarong, puno sa panabot, ug sensitibo sa espiritwal, o mas maimpluwensya ba kamo sa mga tingog nga negatibo, bagulbulan, maulog-ulogon, matahapon, ug kalibotanon?
“Paminaw niadtong kinsa tinud-anay nga nahigugma kaninyo ug matinud-anong gusto kaninyo nga makaangkon og mahangturon nga kinabuhi diha sa presensya sa Dios.
“Paminaw sa mga pulong sa propeta ug apostoles sa Ginoo.
“Paminaw sa tingog sa Espiritu Santo.
“Paminaw sa mga pulong ni Jesukristo pinaagi sa pagtuon sa Iyang mga pulong ug pagbutang sa Iyang mga sugo diha sa inyong kasingkasing.
“Mohatag ko kaninyo sa akong saad nga samtang padayon kamong maminaw sa mga tingog sa kamatuoran, magpabilin kamo nga espirituhanon nga luwas ug mamahimong labaw pa kay sa unsa mo karon.”
Elder Neil L. Andersen, Facebook, Abr. 14, 2022, facebook.com/neill.andersen.
Ang Desisyon sa Kanunay nga Pagsunod sa Buhing Propeta
“Si Melanie ug ako giganahan nga nakigpulong uban sa mga misyonaryo bag-ohay lang diha sa usa ka sibya sa missionary training centers sa tibuok kalibutan. Ang mensahe ug saad nga akong gihatag niadtong mga misyonaryo susama sa matag usa kanato: Kon mosunod kita sa gitawag nga propeta sa Ginoo, mas mapaduol kita ngadto sa Manluluwas ug masayod nga Siya ang buhi nga Kristo.
“Ang desisyon nga kanunay nga mosunod sa buhi nga propeta nakaimpluwensya sa akong kinabuhi ug sa mga kinabuhi sa akong pamilya labaw pa sa bisan unsa nga desisyon. Nasayod ako nga ang paghimo niini nga pagpili adunay susama nga impluwensya diha kaninyo ug sa inyong mga minahal usab.”
Elder Ronald A. Rasband, Facebook, Okt. 27, 2022, facebook.com/RonaldARasband.
Tambag alang sa Bisan Unsa nga Lisod nga Kahimtang
“Kon papilion ko og usa ka tambag nga ihatag nga makatabang hapit sa bisan unsang lisod nga kahimtang nga atong gisagubang karon, mao kini ang akong tambag: pilia ang pagsunod sa buhi nga propeta sa Dios.
“Mapasalamaton ko nga mopakigbahin niini nga mensahe atol sa usa ka buhi nga debosyonal uban sa batan-ong Ulahing mga Santos didto sa Africa South ug Central Areas. Samtang mitubag kami sa mga pangutana gikan niini nga mga indibidwal, akong gihunahuna ang mga nawong niadtong nangutana. Nasayod ko nga ang Ginoo nakahibalo sa matag panlimbasog nato ug mga pangutana ug gusto nga motabang kanato nga makakaplag og kalinaw.”
Elder Ronald A. Rasband, Facebook, Nob. 19, 2021, facebook.com/RonaldARasband.
Magkat-on Unsaon sa Paglakaw uban sa Ginoo
“Sa tinuod walay mas dako, mas kulba-hinam, ug mas makapabayaw sa kalag nga hagit kay sa pagkat-on kon unsaon sa paglakaw uban sa Ginoo ug sa samang higayon magdawat sa talagsaong panalangin sa Iyang paglakaw uban kanato. …
“Palihog ikonsiderar ang mosunod samtang magpadayon kamo sa pagkat-on sa paglakaw uban sa Ginoo:
“Una, pangayo sa Dios og inspirasyon kon unsaon pagbalanse ang inyong nagkapuliki nga eskedyul aron makagahin kamo og panahon sa pagtuon kanunay sa Basahon ni Mormon: Laing Tugon ni Jesukristo. Ang mga kamatuoran sa ebanghelyo ni Jesukristo gitudlo sa labing klaro ug labing gamhanan nga paagi diha sa Basahon ni Mormon.
“Ikaduha, paggahin og mas daghang panahon uban sa Ginoo diha sa Iyang mga templo. Ang mga templo sa literal nga paagi mga balay sa Ginoo. Ug kon anaa kita didto, kita makabati og lahi nga impresyon nga gibiyaan nato ang mingaw ug awaaw nga kalibotan.
“Ikatulo, sunda ang mga pulong sa atong buhi nga mga propeta. Samtang kamo maglakaw ug maminaw sa mga propeta ug apostoles sa ulahing adlaw, inyong makita ang inyong kaugalingon nga mas maglakaw uban ni Jesus.
“Si Jesukristo buhi ug … ang Iyang hingpit nga gugma gihatag ngadto sa tanan nga moduol ngadto Kaniya. Kanunay siyang naa sa duol, mapailubon nga naghulat kanato kon kita gikapoy sa dalan ug sa walay kataposan naglakaw uban kanato bisan asa kita.”
Elder Ulisses Soares, Facebook, Dis. 8, 2022, facebook.com/soares.u.
Mga Sudlanan aron sa Pagpakigbahin sa Buhi nga Tubig
“Ganahan kaayo ko sa kinatibuk-ang komperensiya! Alang kanako, ang kinatibuk-ang komperensiya usa sa dakong mga pagpakita sa buhi nga tubig nga gidalit sa Manluluwas kanato. Sa pagbukas sa Sabado sa buntag nga sesyon, gibati nako nga daw susama sa Samarianhon nga babaye diha sa atabay, kinsa, sa dihang ang Manluluwas midalit kaniya sa buhing tubig, mitubag, “Sir, hatagi ako niining tubiga, aron dili na ako uhawon ug dili na usab ako moanhi sa pagkalos” (Juan 4:15).
“Samtang nanganta ang Tabernacle Choir ug mga pagpamatuod sa buhi nga Kristo gipadayag, gibati nako nga sama sa usa ka espongha nga gipaunlod sa naghatag og kinabuhi nga tubig, gusto nga mosuyop sa mga mensahe nga ang Langitnong Amahan aduna alang kanako. Unsa ang gusto Niyang ipasabot kanako? Unsa ang gusto Niya kanako nga buhaton?
“Dako ang akong pasalamat alang sa dili maihap nga mga oras sa hilabihan nga pag-ampo nga gigahin sa mga propeta ug apostoles ug ubang mga lider sa Simbahan aron mahimo silang mga sudlanan aron sa pagpakigbahin sa buhi nga tubig nga gipangita sa atong napagba nga mga kalag.
“‘Ang moinom sa tubig nga akong ihatag kaniya dili na gayod uhawon; kay ang tubig nga akong ihatag mahimo diha kaniya nga usa ka tuboran nga mohatag og buhing tubig ug kinabuhing walay kataposan’ (Juan 4:14).”
Presidente Susan H. Porter, Facebook, Mar. 31, 2023, facebook.com/PrimaryPresident.
Usa ka Paglugway sa Gugma sa Langitnong Amahan alang Kanato
“Sila si Sister Amy A. Wright, Sister Tracy Y. Browning, ug ako adunay sagrado nga pribilehiyo nga na-set apart sa Unang Kapangulohan pipila na ka semana na ang milabay. Sa dihang misulod kami sa lawak, si Presidente Nelson milamano sa kamot sa matag usa ug migahin og panahon kadiyot sa pagtan-aw sa among mga mata. Ang akong anak nga lalaki, nga uban kanako, miingon kanako pagkahuman niadto unsa ka lawom ang iyang pagbati sa gugma ug kainit samtang milamano siya sa kamot ni Presidente Nelson.
“Nasayod ko nga gibati ni Presidente Nelson kana nga gugma alang sa matag miyembro sa Simbahan! Mao kana ang paglugway sa gugma nga gibati sa atong Langitnong Amahan alang kanato. Kining kataposan sa semana sa kinatibuk-ang komperensiya, maminaw kita sa mga mensahe sa gugma ug paglaom gikan sa atong minahal nga propeta, ingon man usab sa daghang ubang dinasig ug mahalaron nga mga lider kinsa nahigugma kaninyo ug nahigugma sa Ginoo. Mahimo bang dunganan ninyo ako sa pagpaminaw?”
Presidente Susan H. Porter, Facebook, Sept. 30, 2022, facebook.com/PrimaryPresident.
Nagpundok aron sa Pagpaminaw Unsa ang Itudlo sa Ginoo Kanato
“Ganahan kaayo ko sa kinatibuk-ang komperensiya! Alang kanako, kini mao ang panahon sa pagpundok uban sa atong pamilya aron maminaw sa unsay itudlo sa Ginoo ngari kanato pinaagi sa Iyang mga propeta ug ubang mga lider. Nagdala kini og talagsaong pagbati sa pagkasayod nga ang katawhan sa tibuok kalibotan nagpundok sa samang panahon aron sa pagpaminaw sa tingog sa usa ka propeta.
“Gusto usab ako sa istorya ni Hari Benjamin, usa ka propeta ug hari sa Basahon ni Mormon, sa dihang gitawag niya ang iyang katawhan aron magpundok ngadto sa templo aron sa pagpaminaw sa iyang mga patulun-an sa wala pa siya mamatay. Ang mga kasulatan nag-ingon nga silang tanan miabot ug ‘mitukod sa ilang mga tolda sa palibot, matag tawo sumala sa iyang banay’ (Mosiah 2:5) ang mga pultahan sa ilang mga tolda nag-atubang sa templo aron magpabilin sila sa ilang mga tolda ug mamati unsa ang itudlo kanila sa Ginoo pinaagi sa mga pulong sa ilang propeta. Dako nga pundok sa katawhan nanagpundok nga usa ka tore ang gitukod aron makapaminaw sila og maayo sa mga pulong ni Hari Benjamin. Apan bisan pa man, ang uban dili gihapon makadungog kaniya, mao nga iyang gi-instruksiyon nga isulat ang iyang mga pulong ug ipadala ngadto sa dili makadungog sa iyang tingog.
“Ato gibuhat ang susama nga butang karon. Matag unom ka bulan, ang atong propeta motawag kanato aron magpundok aron maminaw unsa ang itudlo sa Ginoo kanato pinaagi sa Iyang mga sulogoon. Bahin niana pipila ra ang makahimo sa pagpundok sa pisikal nga paagi diin ang propeta ug ang ubang mga lider nakigpulong. Apan tungod sa panalangin sa karon nga teknolohiya, kasagaran kanato makahimo sa pagpundok sa atong kaugalingon nga mga panimalay aron motan-aw o maminaw sa tingog sa propeta. Ug dayon, sama sa panahon ni Hari Benjamin, kadtong tanan nga mga pagtulon-an gisulat sa atong kaugalingon nga pinulongan ug gipadala ngari kanato aron atong matun-an ug mahinumdoman. Unsa nga panalangin nga makahimo sa pagpaminaw sa tingog sa propeta ug maminaw sa pulong sa Dios!”
Sister J. Anette Dennis, Facebook, Abr. 2, 2023, facebook.com/RS1stCounselor.
Pagdirekta sa Atong Panan-awon ngadto sa Langitnong Amahan ug ni Jesukristo
“Usa ka hulagway nga sa hangtod magpabilin sa akong panumdoman nahitabo atol sa Oktubre 2022 nga kinatibuk-ang komperensiya. Dinha koy pribilehiyo sa paglingkod nga hapit direkta likod sa pulpit. Nakahatag kini kanako og talagsaon nga bintaha sa pagtan-aw ug pagbantay samtang ang mga pulong gikan sa mga mamumulong midan-ag diha sa mga nawong niadtong naminaw.
“Sa kataposan sa sesyon sa Domingo sa hapon, ang atong pinalanggang propeta, si Presidente Russell M. Nelson, namulong, ug klaro nga ang matag tawo diha sa Sentro sa Komperensiya nakatutok kaniya. Dayon sa kalit lang, hapit murag gi-orchestra sa usa ka konduktor, ang katunga sa kongregasyon milingi pataas ug ngadto sa tuo, samtang ang katunga mitan-aw pataas ug ngadto sa wala.
“Usa kadto ka makalibog nga pagbati nga tan-awon sa sinugdanan nga wala na hinuoy nagtan-aw sa propeta. Ngano man? Tungod kay iyang gidirekta ang ilang atensyon paingon sa duha ka dagko nga mga screen nga nagsaysay sa pagbisita ni Jesukristo ngadto sa karaang Amerika. Iyang gidirekta ang ilang panan-awon ngadto kang Jesukristo!
“Ang lawom nga kahulogan niini nga hulagway mahinungdanon kanako. Ang tahas sa propeta, manalagna, ug tigpadayag sa kanunay mao ang pagdirekta sa atong panan-aw pataas, ngadto sa Langitnong Amahan ug ni Jesukristo.
“Mopamatuod ako nga Ang Simbahan ni Jesukristo sa mga Santos sa Ulahing mga Adlaw mao ang Simbahan ni Jesukristo, ug si Presidente Russell M. Nelson mao ang propeta ni Jesukristo. Sunda ang propeta; sayod Siya!”
Sister Amy A. Wright, Facebook, Mar. 29, 2023, facebook.com/Primary1stCounselor.
Pagsuporta sa mga Doktrina ug mga Kamatuoran nga Gitudlo sa mga Propeta
“Pila kaninyo ang nahinumdom niadtong mga worksheet sa eskwelahan nga padrowingon mo og mga linya nga motakdo sa relasyon tali sa mga litrato, mga tawo, o mga butang nga nakalista sa pikas nga duha ka kolum? Tingali sa usa ka kolum makakaplag kamo og usa ka litrato sa usa ka plorera, ug sa sunod nga kolum makaplagan ang usa ka hulagway sa usa ka bulak. Ang pagdrowing og linya, pagkonektar sa duha, naghulagway sa relasyon tali kanila.
“Kini nga mga kalihokan gituyo aron sa pagtabang sa mga magkat-on sa pag-ila og usa ka pagkauyon, pagkasusama, o kaangayan tali sa mga butang. Sa usa ka bag-ohay nga assignment sa Lithuania, kini nga pagbansay gikan sa akong sayo nga mga adlaw sa pag-eskwela miabot sa akong hunahuna sa dihang ang usa ka mahunahunaon nga misyonaryo nga nagserbisyo didto nangutana kon giunsa nako pag-andam sa akong kaugalingon alang sa kinatibuk-ang komperensiya.
“Akong gihulagway nga samtang nagkaduol ang kinatibuk-ang komperensiya, akong gipunting og maayo ang akong pagtuon diha sa mga mensahe nga gihatag sa Unang Kapangulohan ug sa Korum sa Napulog Duha ka Apostoles. Ug mibati ko og mapasaligon sa pagbuhat niini tungod kay akong naamgohan nga ang tanan nga nagpalibot nga mga mensahe nga gihatag sa Kinatibuk-ang mga Awtoridad ug Kinatibuk-ang mga Opisyales misuporta sa mga doktrina ug mga kamatuoran nga gitudlo sa mga propeta, mga manalagna ug mga tigpadayag.
“Samtang gitun-an nako kadto nga mga pakigpulong sa tibuok tuig, daw gibati nako sa mahulagwayong paagi nga makadrowing ko og mga linya gikan sa mga mensahe gikan niining mga lider sa Simbahan ngadto sa mga pakigpulong nga gihatag sa Unang Kapangulohan ug sa Korum sa Napulog Duha. Ug samtang nagkaduol na ang kinatibuk-ang komperensiya, ang gipalapdan nakong pagtuon sa mga pulong naghatag nako og maayo nga yuta diin makatanom og dugang nga mga pagtulun-an nga akong madawat sa sunod.”
Sister Tracy Y. Browning, Facebook, Mar. 30, 2023, facebook.com/Primary2ndCounselor.