Nagiyahan ngadto sa usa ka Trabaho

Ni Ildinete de Santo Souza, São Paulo, Brazil

Ako wala makakita og trabaho, apan ako masaligon sa Ginoo nga siya mopanalangin kanako alang sa akong mga paningkamot nga mahimong makabarog pinaagi sa kinaugalingon nga paningkamot.

Atol sa akong kataposan nga semester sa kolehiyo, mibati ko nga kinahanglan ko nga magsugod sa pagpangita og trabaho sa akong natad sa pagtuon, nga mao ang edukasyon. Giplano nako nga motrabaho og part-time isip usa ka magtutudlo sa elementarya nga eskwelahan. Nianang tungora, ang akong mga anak nanagko na.

Aron maandam sa pagsulod sa pagpanarbaho, mi-enrol ko sa usa sa mga kurso sa Simbahan nga pagbarog pinaagi sa kinaugalingong paningkamot aron sa pagtabang kanako nga makakita og trabaho.¹ Sa dihang miabot ko sa akong unang klase, ako lang ang estudyante didto. Ang magtutudlo usa ka matinahuron nga lalaki [gentleman] nga adunay Amerikanong tuno sa sinultihan nga matinguhaon sa pagserbisyo sa uban. Atol sa among mga leksiyon, iyang gipasabot ang mga baroganan sa ebanghelyo nga makatabang kanako sa pagpalambo og hugot nga pagtuo diha sa Ginoo ug sa pagbuhat diha sa hugot nga pagtuo.

Mokabat og duha ka oras ang akong pagbiyahe ngadto sa sentro sa pagbarog pinaagi sa kinaugalingong paningkamot sa Simbahan didto sa São Paulo, apan moadto ko sa klase sa tukma nga oras sa matag semana. Giseryuso nako ang klase tungod kay kini importante ngari kanako.

Sa paghuman sa kurso, hinoon, ako wala makakita og trabaho nga magtudlo. Bisan pa man, akong gisultihan ang akong magtutudlo nga masaligon ko sa Ginoo nga mopanalangin kanako ug sa dili madugay makakita ko og trabaho. Nagtuon ko alang sa pasulit nga akong gikinahanglang kuhaon aron makigtigi alang sa posisyon sa usa ka magtutudlo sa eskwelahan, ug misugod ko sa pagtambong og usa ka kurso sa pagbarog pinaagi sa kinaugalingong paningkamot kon unsaon sa pagsugod og negosyo .²

Dihadiha dayon human ako mikuha sa mga pasulit, nagdali ko ngadto sa akong klase sa pagbarog pinaagi sa kinaugalingong paningkamot sa stake. Akong gisultihan ang tanan didto kon unsa kaandam ang akong gibati alang sa mga pasulit—salamat sa akong mga pagtuon ug sa akong mga kurso sa pagbarog pinaagi sa kinaugalingong paningkamot.

Sa kataposan, nakuha nako ang trabaho nga akong gusto. Mibati ko og tumang kalipay, ug ako mapasalamaton nga makahimo sa pagbayad sa ikapulo ug mga halad ngadto sa Ginoo. Atol sa akong ikaduha nga kurso sa pagbarog pinaagi sa kinaugalingong paningkamot, ang Espiritu miaghat kanako sa pagkuha og EnglishConnect 2 ug sugdan ang buhat sa postgraduate.³

Mibati ko nga napanalanginan og hilabihan ka dako pinaagi niining giya gikan sa Ginoo sa paghimo sa maong importante nga mga desisyon sa akong kinabuhi. Ako nasayod nga Siya motuman sa Iyang mga saad ug kana kon kita motuman sa Iyang mga sugo, Siya mopanalangin kanato sa temploral ug espirituwal nga paagi uban sa mga butang nga atong gikinahanglan aron mouswag (tan-awa sa Mosiah 2:41).