“Usa ka Pagbaha sa Tubig ug mga Panalangin,” Liahona, Okt. 2023.
Mga Hulagway sa Hugot nga Pagtuo
Usa ka Pagbaha sa Tubig ug mga Panalangin
Usa ka pagbaha sa mga pagsulay mahimong moabot sa atong mga kinabuhi, apan kita mopamatuod nga ang atong hugot nga pagtuo diha sa gahom sa Dios mopanalangin kanato.
Litrato sa maayong kabubut-on sa mga tagsulat; gisukip nga litrato pinaagi ni Christine Hair
Isip managkompanyon nga misyonaryo, mibiyahe kami og 45 ka minuto sakay sa eroplano gikan sa Isla sa Efate kasadpan sa Isla sa Tanna. Nagdala kami og daghang tinumpi nga mga porma alang sa bunyag ug migamit og usa ka pick-up nga trak aron sugdan ang among mga pagbisita ngadto sa walo ka branch sa isla. Sa pag-abot namo niadtong Agosto, ang gidaghanon sa mga tawo nga andam na alang sa bunyag misaka ngadto sa 114.
Pagka-Agosto 18, 2022, miadto kami sa branch sa Sideseawi. Wala kami paagi nga makontak ang presidente sa branch aron masultian siya nga kami padulong na. Mipadayon lang kami og adto ug nanghinaot nga makit-an siya.
Kon maghunahuna ka sa Tanna, hunahunaa ang mga kalsada sa lasang. Kami midrayb sa among pick-up nga trak ngadto sa layo nga bukid kutob sa among mahimo. Dayon gibilin kini namo ug misugod sa paglakaw. Mikabat og tulo ka oras una namo naabot ang balangay. Ang amoa ra gyod nga makaon mao lang ang mga lubi nga among makit-an diha sa kadalanan.
Sa dihang miabot kami sa balangay, ang presidente sa branch wala didto, apan anaa ang iyang magtatambag. Kami nakig-istorya kaniya mahitungod sa misyonaryo nga buhat, ug dayon misugod na sa pag-ulan. Sa dihang misugod na sa pag-ulan didto sa Sideseawi, ang mga tawo naningkamot og maayo sa pagpangita og usa ka luwas nga dapit. Nagdali kami paglusad sa bukid padulong sa among trak.
Kon walay ulan didto sa Tanna, luwas ra ang pagdrayb. Apan kon adunay ulan, kana ang hadlok na. Sa dihang miabot na kami sa among trak, misugod na kami og drayb apan wala madugay miungot sa pagtabok sa sapa.
Gipaningkamotan namo sa pagtulod ang trak, apan wala kadto nagsilbi. Busa, gitawagan namo ang presidente sa district aron magpatabang. Miabot ang tabang ug kami naningkamot pag-usab aron moabante ang trak, apan ang uwan nagpadayon sa pagkusog ug nagkakusog pa. Daghang mga sapa nag-anam og saka ug miawas ngadto sa nagkalainlaing dapit libot kanamo.
Litrato sa maayong kabubut-on sa mga tagsulat
“Biyae ang Trak!”
Kadtong mga nanabang kanamo mihaw-as sa sapa, apan kami nanggunit og maayo sa lingkoranan sa sakyanan samtang nagkadako ang tubig sa sapa. Dili namo gustong biyaan ang trak. Ang tubig karon anaa na sa mga gunitanan sa pultahan sa trak diha sa habig sa sulog.
Mitawag kami sa among presidente sa misyon, si Mark Messick, ug misulti kaniya unsay panghitabo. “Karon nagkadako na ang tubig,” miingon kami. Nangutana mi kon OK ra ba nga luwason namo ang among kinabuhi ug biyaan ang trak.
“Salamat sa pagtawag nako,” miingon si Presidente Messick kanamo. “OK ra! Biyae ang trak kon asa kana ug pangita og luwas nga dapit karon dayon!”
Duol ra kami sa dapit kon diin ang duha ka sapa mag-abot. Ang laing sapa nga duol namo dako ug kusog na, apan ang sapa nga diin anaa kami gamay pa, mura og nagpaabot kini namo nga manggawas. Apan dayon, boom!
Adunay tawo nga misinggit gikan sa tampi sa sapa. Si Elder Nalin, gikan sa Tanna, nakasabot sa pasidaan: “Tubig!”
Miungot ang among trak nga nagbabag, nga nagsaka ang sulog sa habig sa pultahan ni Elder Toa. Si Elder Nalin nakagawas og una. Si Elder Toa kinahanglan mosaka sa luyo nga lingkoranan ug mogawas sa pultahan sa pikas habig sa sakyanan aron makagawas. Dali niyang gitan-aw ang luyo nga lingkoranan alang sa among mga porma sa bunyag ug mga kasulatan apan wala na kini makita. Nagtuo siya nga gikuha na kini ni Elder Nalin. Sa dihang nakagawas na sa Elder Toa, ang sapa mianod sa trak.
Kon ang tubig midaot sa mga porma, kinahanglan gyod kami mobalik sa mga area nga among gibisita ug usbon ang mga interbiyo. Kinahanglan sab kami nga mobalik ngadto sa opisina sa misyon sa Efate aron magkuha og dugang nga mga porma ug unya mobalik sa Tanna.
Elder Silas Toa
Litrato pinaagi ni Christine Hair
Elder Brian Moses Nalin
Litrato pinaagi ni Christine Hair
Hugot nga Pagtuo diha sa Gahom sa Dios
Samtang nagtan-aw kami sa trak nga gianod, si Elder Toa sa kataposan nakakita sa mga kasulatan ug mga porma sa bunyag diha sa luyo nga lingkoranan. “Giunsa kaha niini pagkahitabo?” Naghunahuna siya giunsa nga wala niya kini nakita.
Samtang kami didto pa sa sapa, mitawag kami sa gahom sa Dios sa pagpanalipod sa mga kasulatan ug mga porma sa bunyag. Kami nagbaton og hugot nga pagtuo nga Siya moluwas niini sumala sa Iyang pagbuot.
Dayon mikawas kami sa sapa ug miluhod ug nag-ampo mahitungod sa trak ug sa among mga porma sa bunyag ug mga kasulatan. Kami wala na makakita sa trak, apan nasayod kami nga ang tanang butang mamaayo ra.
Nakaplagan sa mga tawo sa Sideseawi ang trak sa kadugayan nianang adlawa ug mitawag sa presidente sa district. Ang trak gianod og mga 820 ka pye (250 m) paubos sa sapa. Ang tanang butang sa trak nabasa, gawas lang sa among mga porma sa bunyag ug mga kasulatan! Uga kini, nahimutang sa ibabaw sa uban nga mga pampleta, mga notebook, ug mga manwal.
Gipundok namo ang usa ka grupo aron motabang kanamo sa paghaw-as sa trak sa sapa. Ang trak kinahanglan mauga apan dali ra nga giayo. Wala kini lumping o garas.
Human sa unos, kami sa kasagaran milakaw ngadto sa lain-laing mga branch sa Tanna. Kon kapuyon na inyong mga bitiis sa paglakaw, molakaw kamo uban sa inyong kasingkasing.
Sa milabay nga pipila ka adlaw, among nahuman ang among mga interbyio sa bunyag ug mibunyag og 114 ka tawo, kadaghanan nila mga pamilya. Usa ka branch adunay 48 ka tawo nga andam na alang sa bunyag. Kami misugod sa pagpang-interbiyo kanila sa alas 7:00 sa buntag. Sa dihang nahuman kami, among nakita ang adlaw nga misawop.
Usa ka pagbaha sa mga pagsulay mahimong moabot sa atong mga kinabuhi, apan kita mopamatuod nga ang atong hugot nga pagtuo diha sa gahom sa Dios mopanalangin kanato. Bisan ang tubig baha sa Tanna dili makabuntog sa mga pagbaha sa mga panalangin sa Langitnong Amahan.