Digital Lamang: Mga Young Adult
Ang Kapeligro sa Gagmay nga mga Pagtipas
Ang espirituhanon nga kawalay hunahuna sa hinayhinay makapalayo kanato gikan sa dalan sa pakigsaad.
Usa ka gabii na kaayo nipauli ko sakay sa bus. Gikapoy na ko, apan ang tigmaneho sa bus alisto kaayo ug dili katulogon. Dayon nakabantay ako unsa ka dili masaligan ang pipila sa mga dalan. Walay hunonganan, sa pikas dalan lang gayod sa usa ka bahin ug usa ka dako kaayo nga pangpang sa pikas. Ang bisan unsa nga pagliko gikan sa dalan makahimo og usa ka seryoso nga aksidente sa magsingabot nga trapik o sa makalilisang nga pagkahulog sa pangpang.
Nakabantay ko nga ang drayber wala gayod mogawas sa mga linya sa dalan—bisan kausa wala motipas ngadto sa posibli nga kadaot sa pareho nga bahin. Nagsugod ko og hunahuna mahitungod kon unsa ka sama ang atong kinabuhi niini nga sitwasyon.
Ang mga tentasyon, usahay, magpalibot kanato gikan sa tanang bahin samtang nagbyahe kita sa kinabuhi diha sa dalan sa pakigsaad ug mouswag paingon sa atong mahangturon nga destinasyon. Ug sama nga ang drayber sa bus nagkinahanglan nga magpabilin sa iyang bahin aron luwas kita paingon sa destinasyon, kinahanglan kitang magpabilin diha sa mga linya sa ebanghelyo nga manalipod kanato gikan sa espirituhanon nga trahedya paingon sa atong padulngan.
Si Sister Rebecca L. Craven, kanhi Ikaduhang Magtatambag sa Kinatibuk-ang Kapangulohan sa Young Women mitudlo: “Kita … anaa sa usa ka relis, usa ka dalan sa pakigsaad nga kita mipasalig sa dihang kita gibunyagan isip mga miyembro sa Ang Simbahan ni Jesukristo sa mga Santos sa Ulahing mga Adlaw. Bisan tuod og kita makasugat og panagsa nga mga babag diha sa agianan, kini nga dalan makahimo nato nga makapadayon ngadto sa atong bililhon nga mahangturong destinasyon kon kita lig-on nga magpabilin niini.”1
Ang Risgo sa Pagpabilin nga Kaswal o Walay Paghunahuna
Ang uban sayop nga nagtuo nga ang gagmay nga mga pagtipas gikan sa dalan sa pakigsaad dili kaayo importante ug dili modangat sa mahinungdanon nga mga sangpotanan. Bisan pa man, dili kini tinuod. Kini nga hunahuna mao gayod ang unsay gusto ni Satanas nga atong tuohan—nga ang pagtikang sa pikas nga mga linya ug ngadto sa dalan sa nagsingabot nga peligro (bisan og kausa lang) dili makadaot kanato.
Bisan pa man, sama sa gipahimangno ni Presidente Dieter F. Uchtdorf niadtong siya Ikaduhang Magtatambag diha sa Unang Kapangulohan, “Sulod sa daghang mga tuig nga pag-alagad sa Ginoo ug sa dili maihap nga mga interbyu, akong nakat-unan nga ang kalainan tali sa kalipay ug kaalaut diha sa matag usa, diha sa mga kaminyoon, ug mga pamilya kadaghanan mahitabo gumikan lamang sa pipila ka mga sayop”2
Dayag lang, tungod sa atong Manluluwas nga si Jesukristo, kanunay kitang makadangop ngadto Kaniya ug maghinulsol ug mohimo og pag-usab kon makahimo kita og mga sayop—tungod kay kitang tanan dili hingpit. Apan ang pagpaningkamot sa pagbarog sa balaan nga mga dapit nagpasabot nga atong gitagaan og bili kadto nga gasa sa paghinulsol ug nagkat-on gikan sa atong mga sayop. Tungod sa mga balda ug mga tingog sa kalibotan, kon dili kita kanunay nagdapit sa Espiritu sa atong mga kinabuhi, anaa kita sa risgo nga mahimong dili kaayo magtagad o dili mabinantayon sa atong pagkadisipulo ug maghimo og gagmay nga mga pagtipas gikan sa dalan sa pakigsaad.
Si Sister Craven mipakigbahin og usa ka panglantaw niini sa dihang siya miingon:
“Ang kalibutan napuno sa mga kasamok nga makapahisalaag bisan sa mga pinili … Kon kita dili mabinantayon sa pagtuman sa atong mga pakigsaad sa walay pagkasayop, ang atong wala kaayoy pagtagad nga mga paningkamot sa kaulahian magdala kanato ngadto sa ginadili nga mga dalan o sa pagkuyog niadtong nakasulod na sa dako ug lapad nga gambalay. …
“… Mahimo kitang makapangatarongan kutob sa atong mahimo, apan ang kamatuoran mao nga, walay husto nga paagi sa pagbuhat sa sayop nga butang!”3
Lakaw kauban ni Kristo
Ang akong drayber sa bus nasayod nga ang pagtipas gikan sa iyang dalan adunay makadaot nga mga sangpotanan, ug tungod niana, dili siya motipas gikan sa iyang dalan. Kon adunay susama niana nga hunahuna mahitungod sa kalibotanon nga mga tentasyon ug kasamok makatabang kini kanato sa paglikay sa mga sitwasyon nga makadala kanato o sa uban og espiritwal nga peligro.
Diha sa Daang Tugon, ang katawhan sa Israel mapasaligon sa pagbuhat sa bisan unsa nga gisugo sa Ginoo human maluwas gikan sa mga sundalo ni Paraon (tan-awa sa Exodo 24:3, 7). Sa walay swerte, human miadto si Moises sa kabukiran aron sa pagdawat sa Napulo ka Sugo, ang mga Israelita daling nalimot sa Ginoo ug misugod sa pagsimba sa bulawan nga nating baka nga ilang gihimo (tan-awa sa Exodo 32:7–8).
Sama sa katawhan sa Israel, ang pagtipas sa dalan sa pakigsaad daling mahitabo kon dili kita mabinantayon. Mahinungdanon ang pagpangutana sa atong kaugalingon kon unsa kita kamapasaligon sa pagbuhat sa unsay gihangyo ni Jesukristo. Tingali naglakip kini sa pagkonsiderar kon naggahin ba kita og panahon alang Kaniya ug sa Langitnong Amahan matag adlaw. O sa pagrebyo unsa nga mga batasan o makabalda ang atong wagtangon. Ang pagtan-aw sa atong mga kaugalingon ug unsa kita kamapasaligon ug kamatugtanon nga magpabilin sa dalan sa pakigsaad makatabang kanato sa pagbarog nga lig-on.
Usahay, sama ni Nephi, dili kita kanunay makasabot sa ngano luyo sa tanang gisugo sa Langitnong Amahan kanato nga buhaton (tan-awa sa 1 Nephi 11:17). Bisan pa man, makasalig kita nga Siya nahigugma kanato ug gusto kanato nga magpabilin sa dalan sa pakigsaad aron makabalik kita ngadto Kaniya. Nasayod Siya sa kataposan gikan sa sinugdanan, nagpasabot nga makapakita ug makagunit kita sa hugot nga pagtuo nga Siya nasayod unsay maayo alang kanato, bisan og nag-atubang kita og mga tentasyon.
Kon atong ipakita ngadto sa Langitnong Amahan ug ni Jesukristo ang atong pasalig pinaagi sa pagsunod sa Ilang mga sugo ug mga propeta, pagsalig Kanila, ug pagdapit sa Espiritu ngari sa atong mga kinabuhi matag adlaw, makapadayon kita nga masaligon ug luwas diha sa dalan sa pakigsaad ngadto sa mahangturong destinasyon.