Digital Lamang
7 ka Pangutana aron Mahimong Mas Makabarog pinaagi sa Kinaugalingong Paningkamot sa Pinansiyal nga Paagi
Andama ang imong kaugalingon sa pinansiyal ug sa espirituwal nga paagi aron sa pag-atiman sa imong kaugalingon ug sa imong pamilya.
Ang Unang Kapangulohan nagtudlo: “Ang Ginoo namahayag, ‘Mao kini ang akong katuyoan sa paghatag sa akong mga santos’ (D&P 104:15). Kini nga pinadayag usa ka saad gikan sa Ginoo nga Siya mosangkap sa temporal nga mga panalangin ug moabli sa mga oportunidad sa pagka-self-reliant, nga mao ang abilidad nga kita makasangkap sa mga kinahanglanon sa atong kinabuhi ug sa mga sakop sa atong pamilya. …
“Palihog salig nga kamo anak sa atong Amahan sa Langit. Nahigugma Siya kaninyo ug dili gayod mobiya kaninyo. Nakaila Siya ninyo ug andam nga mopadangat diha ninyo sa espirituwal ug temporal nga mga panalangin sa pagka-self-reliant.”1
Ang Simbahan adunay daghang kapanguhaan sa pagtabang nato nga mahimo ug magpabilin nga makabarog pinaagi sa kinaugalingong paningkamot. Kining pito ka pangutana, uban sa gi-link nga mga tinubdan sa ubos, makatabang nimo sa imong pagsunod niini.
1. Nagbayad ba Ko og Matinooron nga Ikapulo?
Ang pagbayad sa ikapulo ug madagayaong mga halad naghatag og espirituwal nga pundasyon sa pagpahinumdom nato nga ang tanan nga anaa nato naggikan sa Langitnong Amahan. Kita gisaaran usab nga ang Ginoo “moabli sa mga bintana sa langit ug mobubo sa daghang panalangin ngadto niadtong matinud-anong nagbayad sa ikapulo ug mga halad (tan-awa sa Isaias 58:6–12; Malaquias 3:10–11).
“Kon unahon nato sa pagbayad ang atong ikapulo ug mga halad, ang atong pasalig niining importante nga baroganan sa ebanghelyo molig-on ug ang kalagmitan sa sayop nga pagdumala sa pinansiyal [ug ang kalisod sa pinansiyal] mamenosan.”2
2. Naningkamot ba Ko nga Mogasto Kutob Lamang sa Akong Kinitaan?
Kon naggasto kita og sobra pa sa atong kinitaan matag bulan, kinahanglang mangita kita og mga paagi sa pagtangtang sa dili mahinungdanon nga mga pagpamalit, nga maoy makalinga nato sa unsay importante gayod. Sama sa gipahayag sa Ginoo diha sa Mateo 6:19–21:
“Ayaw kamo pagtigom ug mga bahandi alang sa inyong kaugalingon dinhi sa yuta kay tay-an lamang kini ug kutkuton sa anay o kawaton usab sa mga kawatan:
“Pagtigom hinuon ug mga bahandi alang sa inyong kaugalingon didto sa langit diin walay taya ug anay nga makakutkot niini ug walay mga kawatan nga makakawat niini:
“Kay hain gani ang inyong bahandi, tua usab ang inyong kasingkasing.”
Ang Doktrina ug mga Pakigsaad 48:4 nagpakigbahin usab sa kaimportante sa pagtigom og kwarta matag bulan:
“Kinahanglan gayod nga kamo magtigom sa tanan nga mga salapi kutob sa inyong mahimo, ug nga kamo magbaton sa tanan kutob sa inyong mahimo sa pagkamatarong, aron moabot ang panahon nga kamo makahimo sa pagpalit og yuta alang sa usa ka kabilin, gani bisan og dakbayan.”
Bisan kon dili kinahanglan nga kita sa tinagsa-tagsa mopalit og mga yuta sama sa mga Santos kaniadto, ang pagkaadunay tinigom nga kwarta makatabang nato nga mahimong andam sa bisan unsa nga buhat nga gustong ipabuhat sa Ginoo kanato.
3. Nagplano ug Nagsunod ba Ko og Badyet?
Ang Doktrina ug mga Pakigsaad 88:119 nagtudlo nato nga “han-aya ninyo ang inyong mga kaugalingon; andama ang matag butang nga kinahanglanon.” Ang pagplano ug pagtipig og rekord sa atong mga panalapi makatabang nato sa pagkwenta kon pila ang atong kinitaan, kon pila ang atong nagasto (sama sa pagkaon, kapuy-an, kagamitan, transportasyon, sinina, ug maayo nga makalingaw nga mga kalihokan), ug kon pila ang atong natigom. Ang pagplano daan ug “paghan-ay” sa atong kaugalingon makatabang nato sa pagseguro nga kita adunay igo alang sa “matag butang nga kinahanglanon” karon ug sa umaabot.
4. Ako ba Adunay Igong Kwarta nga Natigom alang sa mga Emerhensiya?
Ang wala damha nga mga emerhensiya motumaw bisan kanus-a sama sa pagpaayo sa balay, medikal nga mga emerhensiya, mga katalagman, mawad-an og trabaho, ug uban pang mga kalisdanan sa ekonomiya. Ang pagpangandam karon makatabang nato nga malikayan ang kahadlok ug kalisod sa pinansiyal sa umaabot (tan-awa sa Doktrina ug mga Pakigsaad 38:30).
Maalamon kini nga adunay nakareserba nga labing menos pang-usa ka bulan nga pundo alang sa emerhensiya. Ikonsiderar ang mga paagi nga imong mamenosan ang mga galastohan sa matag bulan aron makapundo niini nga reserba. O susiha kon aduna bay dakong kantidad nga palitonon nga imong gihunahuna apan mahimo ra nga unya na lang o likayan aron ireserba kini nga pundo. Ang ginagmay nga mga sakripisyo karon makahatag og kalinaw ug proteksiyon sa umaabot (tan-awa sa Alma 37:6).
5. Unsaon man aron Mas Paspas Nakong Mabayran ang Akong Utang?
Ang uban nga mga utang sa kinabuhi tingali kinahanglanon o gamiton alang sa giplano nga katuyoan, sama sa pagpalit og desente nga balay o unang sakyanan, pag-eskwela, pag-ugmad og maayong rekord sa pagbayad og utang [credit history], ug pagsangkap alang sa mahinungdanon nga mga panginahanglan.3 Ang dili kinahanglanon nga mga utang, hinuon, kinahanglan nga likayan tungod kay maulipon kita niini (tan-awa sa Doktrina ug mga Pakigsaad 19:35) ug mabutang sa kapeligro ang atong pagbarog pinaagi sa kinaugalingong paningkamot sa mga panahon sa kalisdanan.
Sama sa gitudlo ni Presidente J. Reuben Clark Jr. (1871–1961): “Ang tubo dili matulog ni magluya ni mamatay; dili gayod kini maospital; magpadayon kini ma-Dominggo ug sa mga holiday; dili gayod kini mobakasyon. … “Kon nakautang na, ang tubo maoy inyong kompanyon matag minuto sa adlaw ug gabii; dili kamo makabaliwala niini o makalikay niini; dili ninyo kini mapalayo; dili kini madala sa mga hangyo, mga mando, ni mga sugo; ug kon kamo mosupak niini o mapakyas sa pagtuman sa mga mando niini, molaglag kini kaninyo.”4
6. Ubos ra ba ang Akong Sweldo?
Ikonsiderar kon ang imong trabaho hingpit ba nga naggamit sa imong mga kahanas ug mga talento o kon kwalipikado ka sa laing trabaho nga adunay mas dakong sweldo ug mga benepisyo alang nimo ug sa imong pamilya. Padayon sa pagbaton og dugang nga mga kahanas alang sa tibuok kinabuhi nga pagkat-on ug mga sertipikasyon (tan-awa sa Doktrina ug mga Pakigsaad 88:119). Ang pagbuhat niini makatabang nimo nga mouswag ang imong sweldo samtang naglambo ka sa imong trabaho o propesyon. Pakig-istorya sa imong lokal nga mga lider mahitungod sa mga kapanguhaan nga gitanyag sa Simbahan aron matabangan ka sa imong pagpangita og trabaho, sama sa employment.ChurchofJesusChrist.org.
Hinumdomi usab kon unsay gitudlo ni Presidente Russell M. Nelson: “Walay shortcut sa kamaayo ug abilidad. Ang edukasyon mao ang kalainan tali sa paghandom nga makatabang kamo sa ubang tawo ug sa paghimo sa pagtabang kanila.”5
Sa unsang mga paagi nga ang pagpangandam ug pagpanarbaho sa tukmang paagi alang sa imong mga kahanas makapanalangin nimo ug sa uban?
7. Naggamit ba Ko sa mga Kapanguhaan nga Anaa Nako?
Kitang tanan makasinati og mga higayon sa atong kinabuhi nga kinahanglan kita nga mangayo og tabang sa uban, sa pagpangayo og impormasyon gikan sa mga eksperto o sa pagdawat og temporaryo nga tabang sa pinansiyal. Ang pagkahibalo kon kanus-a ug unsaon pagpangayo og tabang parte na sa pagkahimong makabarog pinaagi sa kinaugalingong paningkamot. Pinaagi sa mga programa ug mga materyal sa Simbahan ug pinaagi sa mga eksperto sa komunidad, ang Ginoo mihatag nato og daghang kapanguhaan (lakip na nianang anaa sa ubos) aron matabangan kita nga mahimong makabarog pinaagi sa kinaugalingong paningkamot sa pinansiyal nga paagi. Uban sa kakugi, sakripisyo, pagtuon, pagsalig sa Ginoo, ug pakigtinambagay, makahimo kita og dagkong mga lakang aron mahimong makabarog pinaagi sa kinaugalingong paningkamot. Ug kon gikinahanglan, kon nahimo na nato ang tanan sa paggamit sa anaa nato nga mga kapanguhaan, hinumdomi nga ang mga lider sa ward makahatag usab og tabang pinansiyal; human sa “tanang paningkamot nga nahimo, dili angay nga maulaw”6 sa pagpangayo niana nga tabang.