Sa Digital Lamang: Mga Young Adult
Ang Unsaon, Ngano, Kanus-a, ug Asa sa Pagtigum og Kwarta
Ang artikulo giandam sa pagkonsulta ni E. Jeffrey Hill, PhD, manaliksik sa mga panalapi sa pamilya
Bisan kon gitan-aw ninyo ang kwarta nga hinatag sa langit o dili maayo apan gikinahanglan, kini gayud gikinahanglan. Apan isip mga young adult, kasagaran mobati kita nga daw nakulangan pa kita bisan sa atong inadlaw-adlaw nga panginahanglan, unsa pa kaha sa emerhensya nga wala damha! Mao nga importante kaayo nga adunay mga tinigum.
Aron sa pagtabang kaninyo, ania ang lima ka mga sugyot sa sayo nga pagsugod sa pagpadaghan sa inyong mga tinigum aron makatagamtam kamo sa mga panalangin sa pinansyal nga kalig-on sa umaabut.
-
Unsaon? Sugdi pinaagi sa paghimo og badyet. Planoha og maayo kon pila sa inyong kinitaan ang moadto sa pagbayad sa ikapulo ug sa inyong mga panginahanglan (mga balayranan, pagkaon, mga utang, ug uban pa). Bisan pila ang nahabilin makahatag kaninyo og ideya kon pila ang inyong matigum sa matag bulan ug pila ang nahabilin aron magasto sa inyong mga gusto.
Susiha ang inyong pinansyal nga institusyon kabahin sa mga opsyon nga makapahimong sayon sa pagtigum, sama sa diha-diha dayon nga pagbutang og usa ka piho nga porsyento sa inyong kinitaan ngadto sa inyong kwarta sa bangko matag bulan. Nianang paagiha, dili na gani mo kinahanglan maghunahuna pa bahin niini! Ug siguradoa sa pagpahimulos sa bisan unsang matang sa mga plano sa pagtigum alang sa pagretiro nga tingali itanyag sa inyong gitrabahoan.
-
Kanus-a? Karon! … O bisan sa pagsugod sa inyong sunod nga sweldo. Kamo tingali mobati nga wala na kamoy luna diha sa inyong badyet aron sa pagtigum karon, apan pinaagi sa pagsugod sa pagtigum bisan og ginagmay lang matag bulan, kamo makapalambo og kinaiya nga makapanalangin kaninyo sa umaabut!
-
Pila man? Pagtigum kutob sa inyong mahimo sulod sa imong badyet. Kon ang kwarta magnihit o kamo nakautang, tingali mahimo mong magtigum bisan 5 porsyento lang matag bulan. Apan samtang ang inyong kita magkadako, mapadak-an ninyo kana ngadto sa 10 o 15 porsyento o mas labaw pa sa pagdagan sa panahon. Ang usa ka maayo nga tumong tingali adunay labing minos usa ka bulan nga pang-emerhensiya nga suplay sa kwarta. Dayon sugdi ang pagtigum og igo aron moabut sa 3 hangtud 6 ka bulan ug padayon sa pagtigum.
-
Asa? Usa ka maayo nga ideya ang pagbutang sa inyong mga tinigum sa iyang kaugalingon nga account—makapugong kana ninyo nga matintal sa paggasto niini sa inadlaw-adlaw nga mga butang. Kon ikaw nagtigum alang sa piho nga butang, sulayi sa paghimo og piho nga account nga inyong manganlan (sama sa “sopa” o “laptop”) aron sa pagpahinumdom ninyo sa inyong tumong.
Kon aduna gihapon kamoy mga pangutana, pakigkita sa usa ka tigtambag sa pinansyal. Makatabang sila kaninyo sa paghimo og mga tumong sa mga pagtigum base sa inyong pinansyal nga sitwasyon.
Labaw sa tanan, hinumdumi nga ang unang lakang sa pinansyal nga seguridad mao ang pagbayad og una sa inyong ikapulo! Salig sa panaad sa Ginoo nga Iyang “buksan [ko kaninyo] ang mga tamboanan sa langit, ug buboan sa panalangin, sa pagkaagi nga wala na unyay dapit nga igong kabutangan sa pagdawat niini” (Malaquias 3:10; 3 Nephi 24:10). Usahay kita magdahum niadtong mga panalangin nga moabut sa pamaagi nga ang kwarta nga ibu-bu ngari kanato, apan hinumdumi nga kini nga mga panalangin mahimong maglakip sa espiritwal nga mga butang (tan-awa sa David A. Bednar, “Ang Mga Tamboanan sa Langit,” Liahona, Nob. 2013, 17–20).
Ang Ginoo miingon nga “kini mao ang [Iyang] katuyoan sa paghatag sa [Iyang] mga santos”.(Doktrina ug mga Pakigsaad 104:15). Ang pagtigum og kwarta mahimong daw lisud—ilabi na isip usa ka young adult, nga daghan kaayong aspeto sa inyong kinabuhi tingali dili pa han-ay—apan sa hinay-hinay, makahimo mo niini. Ang Langitnong Amahan motabang kaninyo nga mausab ang inyong mga kinaiya ug mga prayoridad aron mahimong makabarug sa kinaugalingong paningkamot ug lig-on sa pinansyal nga aspeto.