Naghulat sa Saad
Ang akong anak nga babaye midistansya sa Simbahan, apan nakahibalo ko nga mapanalanginan siya sa mga butang nga natudlo kaniya mahitungod sa ebanghelyo.
Paghulagway pinaagi ni Megan Schaugaard
Tulo ka bulan sa wala pa ako mag-21 anyos, nabunyagan ko uban sa akong igsoong babaye, sa akong inahan, ug sa akong otso anyos nga pag-umangkon nga lalaki. Sa mga katuigan, hugot kami nga mihupot sa ebanghelyo bisan sa daghan namo nga mga hagit.
Sa dihang ang akong bana ug ako naminyo, determinado kami nga magpabilin nga aktibo sa Simbahan. Sa dihang nakaanak na, ang akong bana ug ako nanglimbasug nga mamahimong maayo nga mga ginikanan ug sa pagtudlo sa ebanghelyo diha sa among panimalay.
Usa ka adlaw mitambong ko og komperensya uban sa among usa ka tuig nga anak nga babaye. Sa komperensya, ang usa ka Area Seventy namulong mahitungod sa responsibilidad sa mga ginikanan sa pagtudlo sa ebanghelyo ngadto sa ilang mga anak. Dayon mihimo siya og usa ka saad nga nagbilin og dakong impluwensya ngari kanako. Siya miingon: “Kon, human sa tanan nga inyong mahimo sa pagtudlo sa ebanghelyo, usa sa inyong mga anak mobiya sa Simbahan, sila gihapon mapanalanginan tungod sa panumduman sa mga butang nga ilang nasinati sa panimalay.”
Ang mga pulong sa niana nga Area Seventy mipuno kanako sa paglaum tungod kay aduna koy mga pag-umangkon nga mibiya sa Simbahan. Mga tuig ang milabay ang akong anak nga babaye, siya gihapon kadtong nag-edad og usa ka tuig nga akong gikugos atol niana nga komperensya, mibiya sa Simbahan sa dihang 17 anyos na siya. Nakahimamat siya og usa ka tawo nga wala makagamut diha sa ebanghelyo, ug naminyo sila. Wala na siya misimba pagkahuman niana.
Sakit kadto alang kanako. Balik-balik kong nangutana sa akong kaugalingon kon unsa ang nabuhat namo nga sayop. Ang iyang amahan ug ako kanunayng naningkamot sa pagsunod sa mga sugo ug moserbisyo sa Simbahan. Gihigugma namo ang among mga anak ug gusto ang labing maayo alang nila. Human sa pag-agas sa mga luha ug mga pangutana, nakaingon mi nga ang mga bata motubo, mogamit sa ilang kabubut-on ug dili kanunayng motuo sa mga butang nga natudlo kanila sa panimalay.
Subo lang, ang kaminyoon sa akong anak nabungkag, ug dili lang gihapon siya gustong mobalik sa Simbahan. Ang ako lang mahimo mao lang ang paghinumdom sa saad nga siya mahinumdom ug mapanalanginan tungod sa mga butang nga natudlo kaniya sa panimalay.
Nagpadayon ko sa pag-ampo alang sa akong anak nga babaye. Gimahal nako siya sa tibuok nakong kasingkasing, ug masakitan ko nga makita siya nga midistansya sa Simbanan. Apan nasayud ko nga, bisan pa sa akong pagkadili hingpit, ang butang nga akong gitudlo niya husto ug tinuod. Nasayud ko nga ang Langitnong Amahan makiangayon ug mahigugmaon ug nga Siya maminaw sa atong mga pag-ampo. Walay pagduha-duha sa akong kasingkasing, nasayud ko nga kon buhaton nako ang akong bahin, Siya motubag kanila sa higayon nga Iyang makita nga husto.