Kamo Mohigugma, Siya Moluwas
Ang tagsulat nagpuyo sa Utah, USA.
Kami nag-ampo nga ang kasingkasing sa among mga anak mausab. Dayon miabut ang dili komportable (ug makapalingkawas) nga pagkaamgo.
Ang akong bana ug ako mipadako sa among mga anak diha sa ebanghelyo. Aduna kami pagtuon sa kasulatan sa pamilya matag buntag, pag-ampo sa pamilya, ug sinemana nga family home evening. Mitambong kami sa simbahan, magdungan sa pagpangaon, ug moadto og mga bakasyon uban sa pamilya. Regular nga mitambong ang mga bata sa templo aron sa pagpahigayon og mga pagbunyag alang sa mga patay, migradwar sila gikan sa seminary, ug ang duha nila miserbisyo og mga misyon.
Ug dayon isip mga hamtong, nagsugod sila sa pagsusi og mga dalan ug mga ideya nga lahi gikan sa mga butang nga among gitudlo kanila. Tagsa-tagsa, ang among mga anak mihunong sa pag-apil sa simbahan hangtud nga usa na lang sa among lima ka anak ang mipili pa gihapon sa pagtambong. Among gihilakan ang among mga anak ug naghunahuna kon napakyas ba kami isip mga ginikanan o kon aduna bay butang nga unta among nahimo sa lahi nga paagi.
Sulod sa taas nga panahon, nangamuyo kami sa Ginoo sa pag-usab sa ilang mga kasingkasing, ug sa katapusan ang Ginoo mitubag sa among mga pag-ampo. Apan dili sa paagi nga among gilauman.
Imbis nga yanong pag-usab sa kasingkasing sa among mga anak, mipakita Siya kanamo nga kami kinahanglan magsugod pinaagi sa pag-usab sa among kaugalingong mga kasingkasing. Samtang ang mga ginikanan adunay importanting tahas sa pagtudlo sa ilang mga anak, Siya mipahinumdom kanamo nga si Jesukristo mao ang ilang Manluluwas ug Maghuhukom.
Sa akong determinasyon sa pagluwas sa akong mga anak, migahin ko og daghang oras sa pag-ampo, pagbasa sa mga kasulatan, ug moadto sa templo, naghunahuna nga kon akong buhaton ang tanang matarung nga mga butang, mahimo kong angayan sa pagpanginlabot sa Dios—nga daw ang akong mga lihok makapahimo sa Dios nga mopatigbabaw sa ilang kabubut-on ug mopugos kanila sa pagtuo sama sa akong gituohan.
Ang akong bana ug ako gusto gayud kaayo nga luwason sila, apan ang among bersyon sa pagluwas mas naingon og paglektyur, pagpangasaba, o pagpakita og pagsupak sa ilang mga pagpili, nga sa katapusan misangput sa panagbingkil. Kami nakaamgo nga sa among paglaum sa pagdala og balik sa among mga anak, sa pagkatinuod amo silang giabug palayo. Magkadako ang ilang pagbati sa among mga paghukom ug pagkadismaya, mas maglikay sila kanamo.
Ang akong mga pag-ampo nausab sa usa ka pangamuyo alang sa kausaban sa akong kaugalingong kasingkasing. Nakaamgo ko nga ang akong mga rason sa akong kagustuhan nga mausab ang akong mga anak naggikan sa sayop nga dapit. Nag-ampo ko alang sa dugang nga gugma. Nag-ampo usab ko sa pagbuntog sa akong gibati nga kaulaw nga ang akong pamilya dili perpekto tan-awon sama sa gipakita sa akong mga higala diha sa social media sa mga litrato sa kaminyoon diha sa templo sa ilang mga anak o mga bunyag sa ilang mga apo.
Samtang ako miduol sa Manluluwas alang sa pagkaayo, ang akong kasingkasing misugod sa pagkalukmay ngadto sa akong mga anak. Nakaamgo ko nga ang paghigugma kanila sama sa Iyang paghigugma kanila nagpasabut sa paghimo og mga kausaban. Ngadto Kaniya, ang gugma dili usa ka pamaagi—kini mao ang kadasig nga nakapahimo sa Iyang gibuhat. Siya miingon nga Siya wala mihimo “og bisan unsa gawas kon kini alang sa kaayohan sa kalibutan; kay siya nahigugma sa kalibutan” (2 Nephi 26:24).
Ang pagsalig diha sa abilidad sa Manluluwas sa paghimo sa Iyang buhat (tan-awa sa 2 Nephi 27:20) nagtugot kanako nga matutukan ang paghigugma sa akong mga anak ug itugyan ang pagluwas ngadto sa Ginoo. Wala kini magpasabut nga undangon ang pagpaningkamot sa pagtabang kanila, apan kon ang paghigugma nila maoy hinungdan sa akong pakig-inter-aksyon kanila, nakapausab kini sa paagi sa akong inter-aksyon.
Nagsugod ko nga makita sila sa lahi nga paagi. Gisugdan nako nga tutukan ang ilang mga kalig-on ug ang ilang mga talento ug nagsugod ko sa pagkakita unsa ka mahigugmaon, kamadagayaon, kalantip ug kamaayong tawo nila.
Ang akong bana ug ako mas naminaw og dugang ug minus ang pagtabi. Nangutana mi mahitungod sa ilang kinabuhi ug sa ilang mga interes. Imbis mohukom, among gipakita ang kakuryuso. Among gipulihan ang pagpanaway ug kasagmuyo sa pagpahayag sa gugma, ug ang among mga anak mibati nga kadto tinuod.
Ang among panimalay nahimong usa ka dapit diin sila mahimo nga mobati sa gugma ug pagdawat. Mihunong sila sa pagtago sa mga butang gikan namo ug misugod sa pagkamatinuoron ug mitug-an mahitungod sa unsay mga panghitabo sa ilang kinabuhi. Nagkasuod kami.
Ang among pamilya anaa pa gihapon sa pagpalambo, apan ang among mga anak malingaw nga moadto sa among panimalay ug mogahin og panahon uban kanamo. Luwas ra ilang pamati diha sa among presensya, ug pinaagi sa among gugma nanghinaut ko nga sila makabati sa gugma sa Dios alang kanila. Wala ko kahibalo kon niining tibuok kinabuhi nga sila mobalik ngadto sa mga butang sila natudloan sa bata pa, apan ako nasayud nga sila anaa sa mga kamot sa Manluluwas.