Sa Dihang Gibati Nako nga Nalingla mahitungod sa Simbahan
Nganong mibiya ko. Ug nganong mibalik ko.
Mga paghulagway pinaagi ni Mark Smith
Pipila ka tuig ang milabay, ako nagsunod og usa ka panag-istoryahanay diha sa social media tali sa duha nako ka mga kanhi kompanyon sa misyon. Kining mga tawhana akong gihigugma ug gitahud.
Nanaghisgut sila sa ilang mga pangutana mahitungod sa Simbahan ug sa doktrina niini. Sa wala madugay naklaro nga silang duha mibiya sa Simbahan. Nakapahikurat kini ug nakahasol nako. Wala na gayud ko nakadungog og pipila ka mga butang nga ilang gihisgutan. Mibati ko og panginahanglan nga akong masayran kon kining mga butanga aduna bay gibug-aton. Busa nagsugod nako sa pagpangita niadtong mga argumento niadtong kinsa adunay mga kabalaka mahitungod sa Simbahan.
Pipila sa mga butang nga akong gibasa sulod sa duha ka tuig nakapahimo nako sa pagpangutana mahitungod sa Simbahan. Ang uban nga makasinati niini mobati og kaguol. Sila nagsubo tungod sa pagkawala sa ilang hugot nga pagtuo. Nasuko ko. Akong gibati nga ang Simbahan milingla kanako. Dili ko sigurado unsa ang tinuod o kinsa akong masaligan.
Naglisud na ko sa pag-adto sa simbahan. Mihangyo ko nga magpa-release sa akong calling. Ang akong relasyon uban sa akong asawa, si Cheri, ug sa akong pamilya gisakit. Nagpadayon ko sa pagsimba, apan kini pakitang tawo lang ug sa pagpaningkamot nga magkauban ang akong pamilya. Ang kinabuhi samok. Dili nako mabati ang Espiritu ug mikwestyon ko kon mibati ba gayud kaha ko sa Espiritu Santo.
Sa dihang ang akong kamagulangang anak, si Kayson, mibiya sa iyang misyon, nagpakita ko og kamagul-anon imbis kamaya unta sa okasyon. Human sa duha ka tuig, kadaghanan sa akong pamilya nasayud unsay akong giagian. Sa dihang miadto silang tanan sa templo uban ni Kayson sa unang higayon, wala ko didto.
Niining tanan, mibati ko nga nag-inusara.
Ang Suporta Nagpalibut Kanako
Usa ka adlaw ang akong mga igsoon nagkapundok aron istoryahon ko mahitungod sa unsay akong naagian. Wala gayud ko nakahinumdom sa unsay ilang gisulti, apan nasayud ko nga gihimo kini tungod sa paghigugma. Samtang kami nag-istorya, nagsugod ko sa pagkaamgo kon unsay nawala nako. Nakapadasig kini alang sa kausaban. Ako unta kadto ang nag-orden kang Kayson sa pagka-elder. Ako unta kadto ang naghatud niya ngadto sa templo. Ako unta kadto ang naghatag kaniya og panalangin sa amahan sa wala pa siya mobiya. Kadtong labing importanting mga panghitabo sa iyang kinabuhi gituyo nga maanaa ko, dili ang laing tawo. Nakahinumdom ko nga nakapangutana ko sa akong kaugalingon, “Unsay akong gibuhat?”
Wala madugay, usa ka buotan nga higala nadasig sa pagpaila-ila nako ngadto sa usa ka sakop sa iyang kapangulohan sa stake. Kining buotan nga tawo naminaw og maayo sa akong istorya ug ingon og nasayud na unsay akong isulti sa wala pa nako masulti. Nag-istorya kami sulod sa taas nga oras. Ang akong istorya, akong mga pangutana, ang katarungan nga ako nabantang susama kaayo sa unsay gipaambit sa uban ngadto kaniya. Misugod ko sa pagkaamgo nga adunay makatarunganon nga mga tubag alang sa daghan sa akong mga kabalaka ug nga kadaghanan sa akong mga pangutana, samtang sinsero, gitisok gayud sa mga tawo nga dunay tumong sa pagguba sa hugot nga pagtuo.
Ang tanan ba nakong mga pangutana ug mga kabalaka nasulbad ba dayon? Wala, siyempre wala. Apan ang akong kasingkasing igo nga nalukmay aron mahibalo og usa ka talagsaong kamatuoran: ang mga pangutana maayo, apan ang ubang pangutana mas importante kay sa uban.1 Ang pagkawala ba sa akong pamilya ug sa kahimtang atubangan sa Dios angay lang sa pipila ka wala matubag nga mga pangutana? Sa dihang gitutukan nako ang unang mga pangutana nga labing importante ug giuna sa pagpahimutang ang Dios diha sa akong kasingkasing, nagsugod ko sa pagkakita sa mga tubag nga naghatag og kasigurohan nako nga nahibalik nako sa husto nga dalan.
Ang akong presidente sa stake ug ang bishop mitabang usab kanako. Dako kaayo sila nga tabang ngari kanako ug makapadasig atol sa mga lisud nga panahon. Wala gayud sila moundang. Sila ug ang akong pamilya sa duha ka habig sa tabil mao ang nahimong instrumento sa pagtabang kanako. Nasayud ko nga ang Langitnong Amahan nakaila ug nahigugma kanato. Siya mobutang sa mga tawo diha sa atong mga dalan kon kita nagkinahanglan nila. Gikinahanglan lang nga kita andam sa pagdawat sa ilang tabang.
Unsay Buhaton Kon Ikaw man Kini
Nasayud ko nga aduna pay uban diha kinsa susama ang kaagi. Mahimong ikaw o imong kaila.
Nasayud ko nga ang Manluluwas mitukod sa Iyang Simbahan pinaagi sa awtoridad aron mahatag ang mga ordinansa ug mga pakigsaad nga atong gikinahanglan aron makabalik ngadto Kaniya. Si Satanas nagmakanunayon sa pagtrabaho aron maulawan ang Simbahan sa Ginoo gamit ang bisan unsa nga paagi nga posible. Ang pagpalakaw og mga pangutana ug pagmugna og mga pagduda sayon ra. Ang pagkahulog ngadto sa iyang mga laang mahitabo ngadto ni bisan kinsa. Ang pagsalig sa impormasyon ug mga tubag nga gihatag sa uban mahimong mas sayon kaayo kay sa pagdiskobre sa kamatuoran sa atong kaugalingon “pinaagi sa pagtuon ug usab pinaagi sa hugot nga pagtuo” (Doktrina ug mga Pakigsaad 88:118). Apan sa katapusan, kana ang gikinahanglan sa Dios.
Kon kamo nanlimbasug sa mga pangutana o pagduha-duha mahitungod sa Simbahan o sa inyong hugot nga pagtuo, dili ninyo makit-an ang kamatuoran pinaagi sa pagbasa og mga blog o sa pagpaminaw og mga podcast gikan niadtong wala mouyon sa Simbahan o mibiya niini. Apan kamo tingali usab dili matagbaw sa mabaw nga mga tubag, ug lagmit dili kamo ganahan og mga sugyot nga “dugay-dugayon ang pagtubag.”
Nakat-unan nako nga dili kita makasalig sa kahibalo sa uban, apan hinoon kita kinahanglan modangop ngadto sa Dios kinsa mao ang tinubdan sa tanang kahayag ug kamatuoran (tan-awa sa Doktrina ug mga Pakigsaad 93:26). Kita kinahanglan gayud nga magtuon niini diha sa atong mga hunahuna, apan kita kinahanglan gayud usab mangutana sa Dios kon ang atong gihunahuna matarung ba (tan-awa sa Doktrina ug mga Pakigsaad 9:8). Kinahanglang makat-on kita sa atong kaugalingon, sama sa gibuhat ni Joseph Smith (tan-awa sa Joseph Smith—Kasaysayan 1:20) ug magmapailubon sa atong pagpangita (tan-awa sa Alma 32:41). Apan ang pagkat-on pinaagi sa hugot nga pagtuo nagpasabut nga kinahanglan natong pamatud-an ang kamatuoran pinaagi sa pagsunod niini (tan-awa sa Juan 7:17; 1 Taga-Tesalonica 5:21).
Sa dihang nagtuon ko sa mga butang nga mialkontra sa Simbahan, akong gibati nga tinuod diha ako sa gabon sa kangitngit (tan-awa sa 1 Nephi 8:23–24; 12:17). Kon ako mogunit sa pulong sa Dios ug mohimo sa unang lakang ngadto Kaniya, mao ra kana ang tanang gikinahanglan Niya aron mapadala ang Iyang Espiritu sa pagtandog sa akong kasingkasing.
Igo Ba ang Paglaum?
Pipila ka semana human mibiya si Kayson sa iyang misyon, ang akong presidente sa stake mibisita kanako. Ako siyang gisultihan kabahin sa unsay nahitabo atol niadtong mga semana human ang akong mga igsoong lalaki nakig-istorya kanako. Miingon ko nga gusto ko nga makakuha og bag-o nga rekomend sa templo. Nangutana siya kon matubag ba nako sa tukma nga paagi ang mga pangutana sa templo. Mitug-an ko, “President, dili pa nako masulti nga Ako nasayud nga ang Simbahan tinuod, nanghinaut gyud ko sa tibuok kong kasingkasing nga mao kini. Ug akong isunod ang akong kinabuhi pinasikad niana nga paglaum. Igo na ba kana?”
Mihunong siya sa makadiyot dayon miingon, “Travis, sa kanunay igo na gayud kana.”
Adunay pipila ka butang nga naghulat pa gihapon ko nga makasabut, apan pipila ka mga butang nahimong tin-aw kaayo ngari kanako. Nasayud ko nga ang Langitnong Amahan nahigugma kanako. Nasayud ko nga kita lagmit maglatagaw ug nanglimbasug sulod sa usa ka panahon. Apan ako nasayud nga pinaagi ni Kristo, sa Iyang Pag-ula, ug ang paglaum nga nahatag niini, kini posible ang pagbalik ngadto sa dalan padulong ngadto Kaniya.
Ang tagsulat nagpuyo sa Utah, USA.