Gipadaplin Nila ang Ilang mga Pagsulay
Nianang adlawa, si Kendra, Brent, ug si Tyson tinuod nga mga ehemplo sa Kristohanong pagpangalagad.
Paghulagway pinaagi ni Trent Gudmundsen
Kitang tanan makasinati og kalampusan ug kapakyasan sa kinabuhi, apan ang 2013 mao ang usa ka lisud gayud nga tuig sa among pamilya. Nakasinati kami og daghang wala damha ug mahalon nga mga pag-ayo sa balay ug sakyanan. Ang akong bana, si Ryan, nawad-an sa iyang trabaho, ug ang among kinamanghuran nga anak nga lalaki natawo nga may mga komplikasyon ug gikinahanglang mogahin og pipila ka semana sa neonatal intensive care unit. Nanlimbasug pud ko sa depresyon human sa pagpanganak. Kini nga mga sirkumstansya, inubanan sa pagkaginikanan sa upat ka gagmayng mga bata, nakaingon sa among pinansyal ug emosyonal nga kalisud.
Si Ryan nakakita og bag-ong trabaho, apan siya mitrabaho og taas nga mga oras ug layo sa panimalay sulod sa pipila ka semana sa usa ka higayon. Ang among singko anyos nga anak nga lalaki, si Wesley, misugod sa pagbaton og kabalaka mahitungod sa iyang amahan nga wala kanunay. Kanunay siyang makamata sa gabii gikan sa mangil-ad nga mga damgo.
Ang among kaparyentihan misuporta kanako kon kanus-a sila makahimo, apan kasagaran gibati gihapon nako nga gikapoy ug nag-inusara. Nasayud ko nga ang Langitnong Amahan nahigugma ug nakaila sa akong pamilya, apan mibati ko nga daw kami nangalumos.
Usa ka hapon, samtang si Ryan tua sa laing lugar alang sa trabaho, akong gidala ang akong mga anak sa panimalay gikan sa eskwelahan ug nag-ampo gayud alang sa panabang. Dayon nianang gabhiona, ang akong silingan nga si Kendra nanuktok sa among pultahan. Nasayud siya mahitungod sa among sitwasyon ug nangutana kon kumusta na ko. Wala koy intensyon sa pagreklamo ngadto kaniya, ug siya ang katapusang tawo nga akong pangayoan unta og tabang. Ang iyang bana, si Brent, nakigbatok sa kanser sulod sa milabayng upat ka tuig.
Giingnan nako si Kendra nga maayo ra ko, apan sinsero siyang nangutana pag-usab. Naghilak, gisultian nako siya mahitungod sa akong mga panglimbasog. Sa dihang gisultian nako siya mahitungod sa kabalaka ug sa mga mangil-ad nga mga damgo ni Wesley, nangutana siya kon ganahan ba ko nga hatagan ni Brent og panalangin si Wesley.
Wala madugay, si Kendra, Brent, ug ang ilang kinamagulangang anak nga lalaki, si Tyson, miabut sa among pultahan nga nagsul-ob og mga sinina nga pangsimba. Luya si Brent. Sigurado ko nga migamit kini sa iyang tibuok kusog aron makaanhi sa among balay. Iyang gihatagan og panalangin si Wesley, ug si Tyson mihatag kanako og panalangin.
Nianang adlawa, si Kendra, Brent, ug si Tyson tinuod nga mga ehemplo sa Kristohanong pagpangalagad. Gipadaplin nila ang ilang kaugalingong mga pagsulay aron sa sinserong pagtanyag kanamo sa gugma ug kalooy. Mibati ako nga napanalanginan nga ang Langitnong Amahan mitubag sa akong pag-ampo niini nga malumong paagi. Namatay si Brent paglabay sa duha ka semana.
Nianang adlawa sa among panimalay, si Brent nagbarug isip usa ka saksi sa Dios pinaagi sa matarung nga paggamit sa pagkapari (tan-awa sa Mosiah 18:9). Alang kanako, sagrado kini nga ang iyang pagpangalagad sa among pamilya mao ang usa sa iyang katapusan nga mga buhat dinhi sa yuta.